ꦭꦸꦭꦸꦔꦶꦢ꧀ꦢꦤ꧀‌ꦲꦤꦕꦫꦏ

16 December 2023 | 123 kali
Macapat By : Supriyadi Sapta Atmaja

ꦣꦤ꧀ꦝꦁꦒꦸꦭ

{ꦲ}

꧄ꦧ꧀ꦕ꧄ꦲꦤꦤꦶꦫꦠꦤ꧀ꦲꦤꦔꦮꦶꦠ꧀ꦠꦶ
ꦲꦸꦫꦶꦥ꧀ꦲꦶꦫꦠꦤ꧀ꦏꦼꦤꦲꦤ꧀ꦠꦏ
ꦲꦼꦤꦼꦁꦲꦼꦤꦶꦁꦱꦼꦭꦮꦱ꧀ꦱꦺ
ꦲꦚꦶꦥ꧀ꦠꦗꦒꦢ꧀ꦲꦒꦸꦁ
ꦲꦺꦂꦩꦫꦸꦠꦱꦶꦠꦶꦭꦤ꧀ꦒꦼꦤꦶ
ꦲꦤꦱꦶꦂꦕꦠꦸꦂꦮꦂꦤ
ꦲꦼꦥ꧀ꦏꦱꦼꦧꦸꦭ꧀ꦲꦸꦫꦸꦥ꧀
ꦲꦸꦫꦸꦥ꧀ꦏꦫꦤꦲꦾꦁꦱꦸꦏ꧀ꦩ
ꦲꦩꦼꦩꦸꦗꦶꦱꦏꦺꦃꦏꦁꦱꦩꦾꦢꦸꦩꦢꦶ
ꦲꦸꦫꦶꦥ꧀ꦲꦸꦫꦸꦥ꧀ꦏꦂꦱꦚ꧉

{ꦤ}

꧋ꦤꦭꦶꦏꦤꦺꦒꦸꦱ꧀ꦠꦶꦠꦤ꧀ꦥꦏꦤ꧀ꦛꦶ
ꦤꦼꦢꦾꦮꦼꦫꦸꦃꦢ꦳ꦠ꧀ꦠꦺꦥꦿꦶꦪꦺꦴꦁꦒ
ꦤꦸꦭꦶꦲꦚꦶꦥ꧀ꦠꦲꦪꦁꦔꦺ
ꦤꦼꦁꦒꦶꦃꦲꦮꦸꦗꦸꦢ꧀ꦲꦼꦤꦸꦂ
ꦤꦸꦂꦩꦸꦲ꦳ꦩ꧀ꦩꦢ꧀ꦕꦃꦪꦱꦼꦗꦠꦶ
ꦤꦸꦫꦸꦤ꧀ꦱꦗꦿꦺꦴꦤꦶꦁꦲꦭꦩ꧀
ꦤꦼꦫꦁꦔꦶꦏꦁꦮꦸꦗꦸꦢ꧀
ꦤꦼꦠꦼꦥ꧀ꦥꦶꦱꦧ꧀ꦢꦲꦾꦁꦱꦸꦏ꧀ꦱ꧀ꦩ
ꦤꦸꦠ꧀ꦥꦼꦥꦼꦱ꧀ꦛꦺꦤ꧀ꦒꦫꦶꦱ꧀ꦱꦺꦏꦁꦩꦲꦱꦸꦕꦶ
ꦤꦸꦂꦕꦃꦪꦤꦺꦲꦾꦁꦩꦸꦭꦾ꧉

{ꦕ}

꧋ꦕ꧀ꦭꦥ꧀ꦕꦶꦤꦶꦥ꧀ꦠꦕꦃꦪꦲꦶꦁꦏꦁꦲꦼꦤꦶꦁ
ꦕꦤ꧀ꦢꦿꦤꦺꦲꦪꦁꦔꦺꦲꦾꦁꦏꦮꦼꦏꦱ꧀
ꦕꦸꦩ꧀ꦭꦺꦴꦫꦺꦴꦠ꧀ꦥꦣꦁꦕꦃꦪꦤꦺ
ꦕꦶꦤꦶꦥ꧀ꦠꦩꦿꦶꦁꦱꦧ꧀ꦢꦏꦸꦤ꧀
ꦕꦶꦠꦼꦫꦤꦺꦏꦁꦩꦲꦱꦸꦕꦶ
ꦕꦃꦪꦔꦸꦁꦏꦸꦭ꧀ꦭꦶꦕꦃꦪ
ꦕꦃꦪꦲꦶꦁꦏꦁꦲꦸꦁꦒꦸꦭ꧀
ꦕꦉꦩ꧀ꦩꦺꦱꦗꦿꦺꦴꦤꦶꦁꦫꦒ
ꦕꦶꦤꦤ꧀ꦝꦶꦪꦱꦺꦴꦫꦺꦴꦠ꧀ꦠꦺꦱꦗꦿꦺꦴꦤꦶꦁꦧꦠꦶꦤ꧀
ꦕꦸꦤ꧀ꦝꦏꦤꦺꦲꦾꦁꦱꦸꦏ꧀ꦩ꧉

{ꦫ}

꧋ꦫꦱꦲꦶꦏꦸꦫꦺꦴꦱꦸꦭ꧀ꦏꦁꦱꦼꦗꦠꦶ
ꦫꦸꦩꦠ꧀ꦠꦼꦤꦱꦗꦿꦺꦴꦤꦶꦁꦲꦁꦒ
ꦫꦫꦱ꧀ꦱꦼꦤ꧀ꦏꦭꦮꦤ꧀ꦱꦫꦺꦃ
ꦫꦶꦤꦺꦫꦺꦃꦭꦤ꧀ꦫꦶꦤꦸꦫꦸꦃ
ꦫꦸꦮꦠ꧀ꦠꦼꦤ꧀ꦫꦶꦮꦸꦠ꧀ꦏꦁꦔꦿꦸꦮꦼꦠ꧀ꦠꦶ
ꦫꦱꦱꦗꦿꦺꦴꦤꦶꦁꦤꦭ
ꦫꦶꦤꦱꦏꦁꦠꦸꦲꦸꦉꦥ꧀ꦱꦶꦉꦥ꧀ꦥꦼꦤ꧀ꦢꦸꦂꦲꦁꦏꦫ
ꦉꦉꦁꦒꦤꦼꦤ꧀ꦧꦸꦢꦶꦩꦸꦏꦭꦮꦤ꧀ꦧꦼꦕꦶꦏ꧀
ꦉꦏ꧀ꦱꦤꦼꦤ꧀ꦱꦫꦸꦩꦺꦴꦁꦱ꧉

{ꦏ}

꧋ꦏꦂꦱꦤꦶꦫꦪꦼꦏ꧀ꦠꦶꦤꦺꦲꦾꦁꦮꦶꦢꦶ
ꦏꦁꦠꦸꦩꦼꦣꦏ꧀ꦩꦫꦶꦁꦔꦭꦩ꧀ꦢꦺꦴꦚ
ꦏꦸꦫꦸꦁꦔꦤ꧀ꦩꦫꦶꦁꦗꦱꦢ꧀ꦢꦺ
ꦏꦭꦩꦸꦤ꧀ꦤꦼꦢꦾꦮꦼꦫꦸꦃ
ꦏꦸꦢꦸꦒꦼꦊꦩ꧀ꦠꦶꦠꦶꦔ꧀ꦒ꧀ꦭꦺꦣꦃꦲꦶ
ꦏꦉꦩ꧀ꦩꦩꦼꦱꦸꦧꦿꦠ
ꦏꦗꦠ꧀ꦠꦺꦧꦺꦤ꧀ꦏꦧꦸꦭ꧀
ꦏꦭꦶꦭꦤ꧀ꦩꦿꦶꦁꦲꦾꦁꦮꦶꦱꦺꦱ
ꦏꦭꦶꦱ꧀ꦱꦏꦶꦁꦩꦼꦩꦭꦏꦁꦔꦽꦫꦶꦧꦼꦠ꧀ꦠꦶ
ꦏꦸꦤ꧀ꦏꦼꦂꦱꦤꦺꦏꦁꦏꦮꦱ꧉

{ꦢ}

꧋ꦢꦺꦤꦺꦱꦶꦫꦲꦂꦱꦮꦼꦫꦸꦃꦪꦼꦏ꧀ꦠꦶ
ꦢꦸꦩꦢꦶꦤꦺꦩꦏ꦳꧀ꦭꦸꦏ꧀ꦱꦧꦸꦮꦤ
ꦢꦠꦤ꧀ꦚꦶꦥ꧀ꦠꦥꦿꦶꦧꦣꦶꦤꦺ
ꦢ꦳ꦠ꧀ꦄꦥ꧀ꦔꦭ꧀ꦲꦚꦧ꧀ꦢꦏꦸꦤ꧀
ꦢꦸꦩꦢꦏ꧀ꦏꦤ꧀ꦥ꦳ꦪꦏꦸꦤ꧀ꦢꦢꦶ
ꦢꦢꦶꦤꦺꦱꦏꦏꦂꦱ
ꦢꦭꦃꦕꦶꦥ꧀ꦠꦤꦶꦥꦸꦤ꧀
ꦢꦺꦤ꧀ꦒꦼꦭꦂꦩꦼꦏꦂꦠꦸꦩꦁꦏꦂ
ꦢꦢꦾꦩꦏ꦳꧀ꦭꦸꦏ꧀ꦱꦭꦸꦩꦃꦲꦺꦭꦔꦶꦠ꧀ꦧꦸꦩꦶ
ꦢꦸꦥꦶꦱꦩ꧀ꦥꦸꦤ꧀ꦏꦭꦶꦭꦤ꧀꧈

{ꦠ}

ꦠꦏꦺꦴꦏ꧀ꦲꦼꦤꦩꦫꦁꦥꦿꦮꦶꦤꦱꦶꦱ꧀
ꦠꦸꦩꦸꦫꦸꦤ꧀ꦤꦺꦫꦸꦃꦩꦿꦶꦁꦮꦸꦗꦸꦢ꧀ꦠꦶꦠꦃ
ꦠꦺꦠꦺꦱ꧀ꦤꦶꦠꦶꦱ꧀ꦩꦿꦶꦁꦒꦂꦧꦤꦺ
ꦠꦸꦩꦶꦩ꧀ꦧꦭ꧀ꦒꦾꦠꦸꦩꦸꦫꦸꦤ꧀
ꦠꦶꦠꦶꦥꦱ꧀ꦛꦶꦠꦸꦩꦼꦏꦗꦤ꧀ꦗꦶ
ꦠꦸꦠꦸꦒ꧀ꦱꦔꦁꦥꦸꦂꦤꦩ
ꦠꦩ꧀ꦧꦃꦢꦱꦢꦭꦸ
ꦠꦸꦩꦸꦭꦶꦩꦶꦗꦶꦭ꧀ꦲꦶꦁꦢꦺꦴꦚ
ꦠꦶꦤꦶꦠꦶꦥ꧀ꦥꦤ꧀ꦤꦩꦭꦤ꧀ꦄꦩꦤꦃꦱꦸꦕꦶ
ꦠꦠꦥꦿꦤꦠꦤ꧀ꦤꦶꦁꦒꦼꦱꦁ꧉

{ꦱ}

꧋ꦱꦸꦩꦸꦫꦸꦥ꧀ꦥꦲꦗꦏꦺꦴꦁꦱꦶꦭꦭꦶ
ꦯꦲꦢꦠ꧀ꦏꦭꦶꦃꦥꦣꦱꦼꦏ꧀ꦱꦺꦤ꧀ꦤꦤ
ꦱꦸꦥꦪꦲꦪꦸꦲꦶꦁꦠꦼꦩ꧀ꦧꦺ
ꦱꦁꦲꦤꦲꦶꦏꦸꦮꦸꦗꦸꦢ꧀
ꦱꦠꦸꦲꦸꦤꦺꦪꦲꦶꦏꦸꦒꦸꦱ꧀ꦠꦶ
ꦱꦚꦠꦤꦺꦱꦁ꧈ꦲꦤ
ꦱꦼꦥꦼꦤ꧀ꦱꦏꦶꦁꦱꦸꦮꦸꦁ
ꦱꦺꦴꦭꦤ꧀ꦱꦭꦶꦤ꧀ꦩꦺꦩ꧀ꦧꦮꦂꦤ
ꦱꦪꦺꦏ꧀ꦠꦶꦲꦶꦏꦸꦲꦶꦁꦏꦁꦩꦲꦪꦼꦏ꧀ꦠꦶ
ꦱꦶꦤꦁꦔ꧀ꦭꦶꦁꦱꦧꦼꦤ꧀ꦩꦁꦱ꧉

{ꦮ}

ꦮꦱ꧀ꦥꦢꦏ꧀ꦤꦲꦗꦔꦱꦶꦱꦶꦱꦶꦥ꧀
ꦮꦶꦮꦫꦤꦺꦒꦸꦱ꧀ꦠꦶꦩꦲꦏ꧀ꦮꦱ
ꦮꦮꦱ꧀ꦱꦼꦤ꧀ꦏꦸꦭꦸꦥ꧀ꦢꦺꦤ꧀ꦲꦒꦺ
ꦮꦕꦤꦼꦤ꧀ꦲꦗꦮꦺꦴꦂꦱꦸꦃ
ꦮꦸꦗꦸꦢ꧀ꦗꦠꦶꦭꦤ꧀ꦲꦪꦁꦤꦺꦏꦶ
ꦮꦿꦸꦲꦤꦏꦤ꧀ꦛꦶꦕꦼꦛ
ꦮꦪꦁꦧꦶꦱꦊꦧꦸꦂ
ꦮꦶꦠ꧀ꦪꦼꦏ꧀ꦠꦶꦤꦺꦱꦁ꧈ꦕꦫꦏ
ꦮꦺꦴꦱ꧀ꦱꦺꦲꦸꦠꦸꦱ꧀ꦱꦤꦺꦲꦶꦁꦏꦁꦩꦲꦲꦸꦫꦶꦥ꧀
ꦮꦱꦤꦲꦪꦁꦩꦸꦱ꧀ꦤ꧉

{ꦭ}

ꦭꦏ꧀ꦱꦶꦠꦤꦺꦗꦭꦺꦤꦏꦭꦶꦭꦶꦁ
ꦭꦶꦁꦲꦼꦭꦶꦁꦔꦼꦤ꧀ꦭꦫꦥ꧀ꦥꦺꦧꦼꦤ꧀ꦩꦺꦴꦁꦱ
ꦭꦶꦭꦏ꧀ꦤꦤꦸꦠ꧀ꦼꦫꦺꦤ꧀ꦠꦃꦲꦺ
ꦭꦩꦸꦤ꧀ꦱꦶꦫꦩꦶꦠꦸꦲꦸ
ꦭꦸꦭꦸꦱ꧀ꦭꦭꦶꦱ꧀ꦢꦠꦤ꧀ꦥꦭꦭꦶ
ꦭꦶꦪꦼꦥ꧀ꦥꦺꦠꦤ꧀ꦱꦃꦩꦸꦭꦠ꧀
ꦊꦉꦩ꧀ꦩꦸꦭꦠ꧀ꦭꦸꦭꦸꦠ꧀
ꦭꦼꦭꦏꦸꦭꦶꦮꦠ꧀ꦢꦼꦢꦭꦤ꧀
ꦭꦺꦴꦤ꧀ꦲꦭꦺꦴꦤ꧀ꦤꦤ꧀ꦩꦸꦫꦶꦃꦫꦲꦪꦸꦤꦶꦁꦲꦸꦫꦶꦥ꧀
ꦭꦸꦭꦸꦃꦊꦧꦸꦂꦥꦤ꧀ꦤꦿꦶꦩ꧉

{ꦥ}

꧋ꦥꦔꦗꦧ꧀ꦧꦺꦮꦺꦴꦁꦲꦸꦫꦶꦥ꧀ꦥꦸꦤꦶꦏꦶ
ꦥꦤ꧀ꦤꦫꦶꦩꦱꦿꦃꦲꦶꦁꦧꦛꦫ
ꦥꦔꦽꦏ꧀ꦱꦏꦧꦺꦃꦠꦶꦠꦃꦲꦺ
ꦥꦶꦁꦥꦶꦤ꧀ꦝꦺꦴꦲꦩꦶꦠꦸꦲꦸ
ꦥꦔꦤ꧀ꦢꦶꦏꦤꦺꦏꦚ꧀ꦗꦼꦁꦤꦧꦶ
ꦥꦤ꧀ꦠꦼꦱ꧀ꦪꦺꦤ꧀ꦠꦶꦤꦸꦭꦣ
ꦥꦶꦤꦺꦴꦁꦏꦠꦸꦠ꧀ꦭꦏꦸ
ꦥꦺꦴꦭꦃꦠꦶꦁꦏꦃꦤꦸꦫꦸꦠ꧀ꦱꦸꦤꦃ
ꦥꦏꦼꦂꦠꦶꦤꦺꦗꦸꦩ꧀ꦧꦸꦃꦏꦺꦭꦏꦸꦭꦤ꧀ꦭꦛꦶ
ꦥꦔꦶꦏꦼꦠ꧀ꦭꦏꦸꦗꦮ꧉

{ꦣ}

꧋ꦣꦠꦼꦁꦔꦶꦥꦸꦤ꧀ꦥꦶꦮꦸꦭꦁꦲꦸꦠꦩꦶ
ꦣꦱꦂꦫꦶꦥꦸꦤ꧀ꦝꦮꦸꦃꦏꦁꦱꦚꦠ
ꦣꦶꦔꦺꦤ꧀ꦮꦸꦱ꧀ꦕꦼꦛꦱꦸꦩ꧀ꦧꦼꦂꦫꦺ
ꦣꦲꦠ꧀ꦏꦁꦩꦲꦭꦸꦲꦸꦂ
ꦣꦼꦣꦩ꧀ꦥꦂꦲꦶꦂꦭꦩ꧀ꦱꦸꦚꦫꦸꦫꦶ
ꦣꦸꦩꦮꦃꦏꦚ꧀ꦗꦼꦁꦄꦲ꦳꧀ꦩꦢ꧀
ꦣꦥꦸꦏ꧀ꦏꦚ꧀ꦗꦼꦁꦫꦺꦴꦱꦸꦭ꧀
ꦣꦱꦂꦤꦺꦴꦫꦤꦠꦺꦕꦶꦢꦿ
ꦣꦣꦒ꧀ꦱꦧꦂꦔꦣꦼꦥ꧀ꦥꦶꦱꦏꦺꦃꦥꦤꦺꦴꦣꦶ
ꦣꦼꦱ꧀ꦠꦸꦤ꧀ꦢꦢꦺꦴꦱ꧀ꦠꦸꦭꦣ꧉

{ꦗ}

꧋ꦗꦭ꧀ꦩꦮꦤꦶꦔꦿꦱꦸꦏ꧀ꦭꦏꦸꦱꦸꦕꦶ
ꦗꦼꦗꦼꦒ꧀ꦗꦸꦗꦸꦂꦭꦩꦸꦤ꧀ꦥꦺꦔꦶꦤ꧀ꦗꦗꦒ꧀
ꦗꦶꦤꦒꦥꦺꦴꦭꦃꦠꦶꦁꦏꦃꦲꦺ
ꦗꦸꦚ꧀ꦗꦸꦁꦥꦶꦮꦸꦭꦁꦭꦸꦲꦸꦂ
ꦗꦼꦤꦏ꧀ꦗꦼꦚ꧀ꦗꦼꦩ꧀ꦤꦼꦩ꧀ꦧꦃꦲꦾꦁꦮꦶꦢꦶ
ꦗꦸꦂꦲꦗꦺꦂꦱꦼꦱꦿꦮꦸꦁꦔꦤ꧀
ꦗꦸꦩꦼꦤꦼꦁꦔꦭꦸꦲꦸꦂ
ꦗꦠ꧀ꦩꦶꦏꦲꦮꦠꦏ꧀ꦢꦺꦮ
ꦗꦠꦶꦤꦶꦁꦏꦁꦮꦸꦱ꧀ꦩꦼꦏꦏ꧀ꦲꦂꦢꦤꦶꦁꦏꦥ꧀ꦠꦶ
ꦗꦶꦮꦚꦮꦶꦗꦶꦧꦏ꧉

{ꦪ}
꧋ꦪꦺꦤ꧀ꦠꦱꦶꦫꦥꦶꦠꦪꦲꦶꦁꦧꦠꦶꦤ꧀
ꦪ꧀ꦮꦏꦮꦠꦶꦂꦮꦱ꧀ꦮꦱ꧀ꦗꦿꦺꦴꦤꦶꦁꦤꦭ
ꦪꦏꦶꦤ꧀ꦤꦏꦁꦠꦤ꧀ꦥꦥꦶꦪꦺ
ꦪꦺꦤ꧀ꦠꦼꦩꦼꦤ꧀ꦧꦶꦱꦏꦧꦸꦭ꧀
ꦪꦺꦏ꧀ꦠꦶꦗꦚ꧀ꦗꦶꦠꦤ꧀ꦧꦭꦺꦚ꧀ꦗꦤꦶ
ꦪꦸꦮꦤꦤꦶꦂꦱꦶꦏꦫ
ꦪꦺꦴꦒꦾꦩꦁꦒꦶꦃꦲꦪꦸ
ꦪꦸꦢꦲꦸꦁꦒꦸꦭ꧀ꦠꦤ꧀ꦥꦧꦭ
ꦪꦪꦃꦉꦤꦔꦸꦢꦶꦱꦩ꧀ꦥꦸꦂꦤꦤꦶꦁꦣꦶꦫꦶ
ꦪꦼꦏ꧀ꦠꦺꦏ꧀ꦤꦱꦧꦼꦤ꧀ꦢꦶꦤ꧉

{ꦚ}

ꦚꦠꦤꦶꦁꦤꦼꦁꦚꦠꦏ꧀ꦤꦲꦶꦁꦱꦼꦥꦶ
ꦚꦼꦚꦼꦠ꧀ꦠꦺꦫꦠ꧀ꦭꦮꦤ꧀ꦏꦲꦤꦤ꧀ꦚ
ꦚꦸꦚꦸꦢꦩꦫꦁꦲꦂꦢꦤꦺ
ꦚꦶꦂꦤꦏ꧀ꦏꦺꦲꦮꦤꦼꦥ꧀ꦱꦸ
ꦚꦚꦤ꧀ꦝꦶꦁꦔꦩꦫꦁꦮꦺꦴꦁꦱꦸꦕꦶ
ꦚꦫꦶꦁꦥꦁꦒꦮꦺꦲꦭ
ꦚꦸꦢꦒꦮꦺꦢꦸꦢꦸ
ꦚꦸꦮꦂꦒꦏ꧀ꦤꦩꦿꦶꦁꦮꦺꦴꦁꦠꦸꦮ
ꦚꦼꦏꦂꦏꦤ꧀ꦛꦶꦭꦏꦸꦩꦤ꧀ꦛꦶꦭ꧀ꦱꦗꦿꦺꦴꦤꦶꦁꦲꦠꦶ
ꦚꦩ꧀ꦧꦸꦁꦥꦱꦼꦢꦸꦭꦸꦂꦫꦤ꧀꧈

{ꦩ}

꧋ꦩꦸꦭꦤꦺꦠꦥꦿꦠꦫꦸꦤꦱꦩꦶ
ꦩꦂꦱꦸꦢꦶꦪꦔꦺꦭ꧀ꦩꦸꦏꦁꦱꦚꦠ
ꦩꦿꦶꦃꦫꦲꦪꦸꦲꦶꦁꦒꦼꦱꦁꦔꦺ
ꦩꦿꦶꦁꦩꦢꦾꦱꦼꦥꦶꦱꦩꦸꦤ꧀
ꦩꦼꦤꦼꦁꦩꦸꦫꦶꦃꦮꦿꦸꦃꦏꦁꦔꦪꦺꦴꦩ꧀ꦩꦶ
ꦩꦤꦃꦲꦶꦫꦠꦤ꧀ꦱꦩꦂ
ꦩꦺꦴꦂꦫꦺꦲꦶꦁꦲꦁꦒꦩꦸ
ꦩꦸꦭꦶꦃꦲꦲꦶꦁꦩꦸꦭꦤꦶꦫ
ꦩꦸꦭꦤꦶꦫꦠꦸꦩꦼꦫꦃꦱꦒꦸꦁꦢꦸꦩꦢꦶ
ꦩꦸꦭꦶꦃꦩꦿꦶꦁꦔꦭꦩ꧀ꦧꦏ꧉

{ꦒ}

꧋ꦒꦼꦒꦫꦤ꧀ꦤꦺꦮꦺꦴꦁꦔꦸꦥꦢꦶꦔꦺꦭ꧀ꦩꦶ
ꦒꦸꦁꦔꦺꦤꦶꦪꦠ꧀ꦩꦸꦫꦶꦃꦱꦤ꧀ꦠꦺꦴꦱ
ꦒꦶꦒꦶꦠ꧀ꦠꦼꦤ꧀ꦲꦩꦿꦶꦃꦠꦸꦠꦸꦒ꧀ꦒꦺ
ꦒꦸꦭꦁꦔꦼꦤ꧀ꦫꦶꦤ꧀ꦠꦼꦤ꧀ꦢꦭꦸ
ꦒꦼꦒꦼꦒ꧀ꦲꦤꦱꦗꦿꦺꦴꦤꦶꦁꦲꦠꦶ
ꦒꦒꦱꦼꦤ꧀ꦠꦶꦩ꧀ꦧꦁꦔꦤ
ꦒꦛꦸꦏ꧀ꦤꦥꦤꦼꦩꦸ
ꦒꦺꦴꦭꦺꦴꦁꦒꦶꦭꦶꦒ꧀ꦩꦿꦶꦃꦩꦸꦥ꦳ꦏꦠ꧀
ꦒꦸꦩꦼꦊꦁꦔꦺꦭꦩꦸꦤ꧀ꦧꦚ꧀ꦗꦸꦂꦢꦶꦥꦼꦫꦼꦠꦿꦶ
ꦒꦸꦩꦼꦤ꧀ꦝꦸꦁꦱꦶꦁꦏꦶꦂꦫꦤ꧉

{ꦧ}

꧋ꦧꦧꦂꦫꦤꦺꦲꦤꦄꦭꦩ꧀ꦏꦧꦶꦂ
ꦧꦶꦤꦸꦏꦤꦺꦏꦼꦧꦏ꧀ꦲꦶꦁꦄꦭꦩꦠ꧀
ꦧꦪꦸꦒꦼꦤꦶꦲꦤꦱꦶꦂꦫꦺ
ꦧꦸꦩꦶꦏꦭꦮꦤ꧀ꦧꦚꦸ
ꦧꦢꦤ꧀ꦤꦶꦁꦲꦾꦁꦠꦼꦠꦼꦥ꧀ꦔꦲꦸꦧ꧀ꦧꦶ
ꦧꦧꦂꦫꦤ꧀ꦗꦼꦫꦺꦴꦗꦧ
ꦧꦺꦴꦭꦧꦭꦶꦗꦸꦩ꧀ꦧꦸꦃ
ꦧꦢꦤ꧀ꦗꦼꦫꦺꦴꦭꦶꦫꦸꦗꦧ
ꦧꦶꦤꦸꦏꦤꦺꦮꦫꦤꦲꦶꦁꦄꦭꦩ꧀ꦱꦺꦴꦒ꦳ꦶꦂ
ꦧꦾꦂꦢꦸꦩꦶꦭꦃꦏꦁꦚꦠ꧉

{ꦛ}

꧋ꦛꦶꦊꦒ꧀ꦛꦶꦊꦒ꧀ꦭꦭꦶꦏꦁꦏꦲꦺꦱ꧀ꦛꦶ
ꦛꦶꦔꦏ꧀ꦛꦶꦔꦸꦏ꧀ꦛꦼꦁꦔꦺꦢꦠꦤ꧀ꦲꦤ
ꦛꦸꦏꦸꦭ꧀ꦭꦺꦢꦶꦲꦒꦺꦲꦒꦺ
ꦛꦺꦴꦏꦺꦴꦭ꧀ꦭꦤ꧀ꦲꦺꦴꦫꦛꦸꦏꦸꦭ꧀
ꦛꦶꦛꦶꦏ꧀ꦮꦲꦺꦠꦤ꧀ꦲꦤꦢꦢꦶ
ꦛꦂꦛꦶꦂꦩꦤꦸꦏ꧀ꦩꦼꦩꦁꦱ
ꦛꦼꦛꦸꦏꦸꦭ꧀ꦭꦤ꧀ꦥꦸꦠꦸꦁ
ꦛꦼꦔꦼꦂꦛꦼꦔꦼꦂꦠꦤ꧀ꦥꦫꦱ
ꦛꦶꦭꦁꦕꦶꦭꦸꦁꦔꦸꦥꦢꦶꦥꦸꦚ꧀ꦢꦼꦂꦫꦺꦲꦸꦫꦶꦥ꧀
ꦛꦺꦛꦺꦏ꧀ꦏꦤ꧀ꦒꦶꦫꦶꦒꦺꦴꦣ꧉

{ꦔ}

꧋ꦔꦶꦁꦏꦁꦥꦏ꧀ꦱꦔꦺꦩ꧀ꦧꦥꦿꦮꦶꦫꦁꦔꦶ
ꦔꦺꦩ꧀ꦧꦔꦺꦭ꧀ꦩꦸꦔꦮꦏ꧀ꦠꦤ꧀ꦲꦸꦤꦶꦁꦔ
ꦔꦮꦸꦂꦲꦩꦸꦁꦲꦤ꧀ꦢꦼꦢꦺꦴꦔꦺꦁ
ꦔꦶꦩ꧀ꦥꦸꦤ꧀ꦥꦶꦠꦸꦠꦸꦂꦭꦸꦲꦸꦂ
ꦔ꧀ꦒꦪꦸꦃꦏꦮꦿꦸꦃꦔꦺꦭ꧀ꦩꦸꦏꦁꦭꦸꦔꦶꦢ꧀
ꦔꦸꦢꦶꦮꦢꦶꦤꦶꦁꦔꦿꦠ꧀
ꦔꦶꦁꦪ꧀ꦮꦫꦔꦸꦫꦔꦸ
ꦔꦁꦱꦸꦮꦔꦤ꧀ꦠꦶꦠꦸꦩꦼꦏ
ꦔꦺꦴꦩ꧀ꦧꦺꦧꦚꦸꦏꦁꦲꦫꦤ꧀ꦥꦽꦮꦶꦠꦱꦫꦶ
ꦔ꧀ꦒꦪꦸꦃꦮꦺꦴꦂꦏꦁꦏꦸꦮꦱ꧉

ꦢꦺꦤꦶꦁ: ꦱꦸꦥꦿꦶꦕꦤ꧀ꦠꦿꦶꦏ꧀ꦩꦠꦫꦩ꧀

ꦲꦶꦭꦶꦤꦶꦁꦱꦱ꧀ꦠꦿꦩꦚ꧀ꦗꦶꦁꦲꦠꦶ꧇꧒꧖꧇ꦤꦺꦴꦮ꦳ꦺꦩ꧀ꦧꦼꦂ꧇꧒꧐꧒꧐

Leave a Reply

Your email address will not be published. Required fields are marked *