ꦕꦃꦒꦺꦴꦣꦺꦪꦤ꧀ꦏꦼꦕꦼꦏꦼꦭ꧀ꦭꦤ꧀ꦢ

20 December 2023 | 49 kali
Cerkak By : Agung Vendi Setyawan

꧁ꦕꦃꦒꦺꦴꦣꦺꦪꦤ꧀ꦏꦼꦕꦼꦏꦼꦭ꧀ꦭꦤ꧀ꦢ꧂

 

ꦢꦺꦤꦶꦁꦱꦿꦶꦮꦶꦗꦪꦤ꧀ꦠꦶ

 

꧋ꦥꦺꦴꦠꦺꦴꦁꦔꦤ꧀ꦫꦩ꧀ꦧꦸꦠ꧀ꦤꦺꦴꦩ꧀ꦤꦺꦴꦩ꧀ꦩꦤ꧀ꦗꦩꦤ꧀ꦧꦶꦪꦺꦤ꧀ꦥꦠꦁꦥꦸꦭꦸꦃꦠꦲꦸꦤ꧀ꦏꦼꦥꦸꦁꦏꦸꦂꦧꦺꦢꦏꦫꦺꦴꦥꦺꦴꦠꦺꦴꦁꦔꦤ꧀ꦫꦩ꧀ꦧꦸꦠ꧀ꦗꦩꦤ꧀ꦱꦲꦶꦏꦶ꧈ꦫꦩ꧀ꦧꦸꦠ꧀ꦒꦺꦴꦤ꧀ꦢꦿꦺꦴꦁꦢꦢꦶꦲꦶꦣꦺꦴꦭꦤꦺꦗꦠ꧀ꦩꦶꦏꦺꦴꦗꦩꦤ꧀ꦱꦼꦩꦤ꧈ꦗꦠ꧀ꦩꦶꦏꦺꦴꦚꦩ꧀ꦧꦸꦠ꧀ꦒꦮꦺꦤꦺꦲꦶꦁꦏꦸꦛꦗꦏꦂꦠ꧈ꦔꦁꦒꦺꦴꦏꦛꦺꦴꦏ꧀ꦢꦮꦗꦶꦤ꧀꧈ꦏꦕꦩꦠꦲꦶꦉꦁ꧈ꦫꦩ꧀ꦧꦸꦠ꧀ꦢꦮꦒꦺꦴꦤ꧀ꦢꦿꦺꦴꦁ꧈ꦮꦶꦱ꧀ꦥꦱ꧀ꦏꦠꦺꦴꦤ꧀ ꦩ꧀ꦧꦺꦴꦲꦶꦱ꧀꧈

꧋ꦲꦺꦱꦸꦏ꧀ꦏꦸꦮꦶꦗꦠ꧀ꦩꦶꦏꦺꦴꦢꦤ꧀ꦢꦤ꧀꧈ꦠꦠꦠꦠꦱꦶꦪꦥ꧀ꦱꦶꦪꦥ꧀ꦲꦉꦥ꧀ꦭꦸꦭꦸꦔꦤ꧀ꦲꦢꦺꦴꦃꦩꦧꦸꦂꦩꦼꦚꦁꦤꦼꦒꦫꦭꦤ꧀ꦢꦧꦼꦭꦤ꧀ꦝ꧈ꦱꦼꦤꦗꦤ꧀ꦕꦃꦒꦺꦴꦢꦺꦪꦤ꧀ꦱꦶꦁꦚꦩ꧀ꦧꦸꦠꦒꦮꦺꦲꦶꦁꦏꦸꦛꦗꦏꦂꦠꦏꦸꦮꦶꦲꦺꦴꦫꦧꦶꦱꦧꦱꦭꦤ꧀ꦢ꧈ꦤꦔꦶꦁꦧꦶꦱꦧꦱꦆꦁꦒꦿꦶꦱ꧀ꦱꦼꦤꦢꦾꦤ꧀ꦪꦲꦺꦴꦫꦥꦠꦶꦭꦚ꧀ꦕꦂ꧈ꦭꦸꦔꦤꦺꦗꦠ꧀ꦩꦶꦏꦺꦴꦩꦼꦚꦁꦤꦼꦒꦫꦭꦤ꧀ꦢ꧈ꦲꦤ꧀ꦢꦸꦮꦺꦤꦶꦏꦉꦥ꧀ꦔꦸꦢꦶꦥꦼꦔꦭꦩ꧀ꦩꦤ꧀꧈ꦲꦩꦂꦒꦲꦺꦤ꧀ꦠꦸꦏ꧀ꦠꦶꦏꦺꦠ꧀ꦥꦼꦱꦮꦠ꧀ꦒꦿꦠꦶꦱ꧀꧈ꦲꦉꦥ꧀ꦲꦁꦒꦺꦴꦭꦺꦏ꧀ꦏꦶꦥꦩꦤ꧀ꦤꦺꦱꦶꦁꦲꦫꦤ꧀ꦱꦸꦮꦺꦴꦤ꧀ꦢꦺꦴ꧈ꦱꦸꦮꦺꦴꦤ꧀ꦢꦺꦴꦢꦢꦶ꧈ꦠꦺ꧈ꦌꦤ꧀꧈ꦆ꧈ꦠꦼꦤ꧀ꦠꦫꦄꦁꦏꦠꦤ꧀ꦭꦈꦠ꧀ꦱꦸꦫꦧꦪꦲꦺꦴꦭꦺꦃꦠꦸꦒꦱ꧀ꦠꦿꦺꦤꦶꦁꦲꦶꦁꦥꦁꦏꦭ꧀ꦭꦤ꧀ꦄꦁꦏꦠꦤ꧀ꦭꦈꦠ꧀ꦱꦸꦫꦧꦪꦢꦶꦮꦺꦤꦺꦃꦲꦶꦲꦫꦤ꧀꧈ꦏ꧈ꦌꦂ꧈ꦆ꧈ꦥ꦳ꦠꦲꦶꦭ꧀ꦭꦃ꧉

꧋ꦭꦸꦔꦤꦺꦗꦠ꧀ꦩꦶꦏꦺꦴꦩꦶꦁꦣꦺꦮꦺꦲꦺꦴꦫꦏꦫꦺꦴꦱꦥꦱꦥ꧈ꦩꦧꦸꦂꦱꦏꦗꦏꦂꦠꦠꦼꦏꦤ꧀ꦧꦤ꧀ꦝꦫꦱ꧀ꦏꦶꦥꦸꦭ꧀ꦌꦂꦥꦺꦴꦠ꧀ꦲꦶꦁꦤꦒꦫꦭꦤ꧀ꦢ꧈ꦠꦼꦏꦤ꧀ꦲꦶꦁꦧꦤ꧀ꦝꦫꦏꦤ꧈ꦗꦠ꧀ꦩꦶꦏꦺꦴꦚꦮꦁꦏꦲꦤꦤ꧀꧈ꦲꦶꦁꦔꦶꦱꦺꦴꦂꦫꦺꦧꦤ꧀ꦝꦫꦲꦤꦢꦭꦤ꧀ꦒꦼꦣꦺꦱꦶꦁꦤ꧀ꦭꦼꦱꦼꦥ꧀ꦲꦤꦲꦶꦁꦔꦶꦱꦺꦴꦂꦫꦺ꧈ꦲꦶꦁꦏꦺꦴꦤꦺꦴꦲꦸꦒꦲꦤꦱ꧀ꦠꦱꦶꦪꦸꦤ꧀ꦱꦼꦥꦸꦂ꧉

꧋ꦱꦼꦥꦶꦱꦤ꧀ꦤꦤ꧀ꦗꦠ꧀ꦩꦶꦏꦺꦴꦲꦚ꧀ꦗꦸꦗꦸꦒ꧀ꦲꦶꦁꦫꦺꦱ꧀ꦠꦺꦴꦫꦤ꧀ꦆꦤ꧀ꦝꦺꦴꦤꦺꦱꦶꦪ꧈ꦲꦫꦤ꧀ꦫꦺꦱ꧀ꦠꦺꦴꦫꦤ꧀ꦱꦸꦧꦸꦂ꧈ꦱꦶꦁꦱꦸꦮꦺꦥꦿꦶꦪꦪꦶꦱꦭꦏꦁꦲꦫꦤ꧀ꦧꦸꦏꦪꦠ꧀꧈ꦤꦭꦶꦏꦲꦶꦁꦫꦺꦱ꧀ꦠꦺꦴꦫꦤ꧀ꦱꦸꦧꦸꦂ꧈ꦗꦠ꧀ꦩꦶꦏꦺꦴꦔꦼꦠꦺꦴꦏ꧀ꦏꦏꦺꦱꦔꦸꦤꦺꦲꦮꦸꦗꦸꦢ꧀ꦥꦶꦫꦁꦥꦶꦫꦁꦥꦺꦴꦠꦺꦴꦁꦏꦲꦶꦤ꧀ꦧꦠꦶꦏ꧀ꦱꦭ꧈ꦧꦸꦏꦪꦠ꧀ꦫꦸꦩꦁꦱꦏꦼꦥꦿꦤꦤ꧀ꦏꦫꦺꦴꦧꦠꦶꦏ꧀ꦱꦭꦱꦶꦁꦲꦭꦸꦱ꧀ꦭꦤ꧀ꦲꦺꦤꦢꦃꦕꦺꦴꦫꦏ꧀ꦧꦠꦶꦏ꧀ꦏꦺ꧈ꦱꦧꦚ꧀ꦗꦸꦂꦫꦺꦏꦲꦶꦤ꧀ꦧꦠꦶꦏ꧀ꦩꦲꦸꦧꦚ꧀ꦗꦸꦂꦢꦶꦠꦸꦏꦸꦏꦧꦺꦃꦏꦫꦺꦴꦗꦸꦫꦒꦤ꧀ꦤꦺꦫꦺꦱ꧀ꦠꦺꦴꦫꦤ꧀ꦧꦸꦏꦪꦠ꧀꧈ꦱꦼꦮꦼꦔꦶꦗꦠ꧀ꦩꦶꦏꦺꦴꦔꦶꦤꦼꦥ꧀ꦲꦤꦫꦺꦱ꧀ꦠꦺꦴꦫꦤ꧀ꦏꦸꦮꦶꦭꦤ꧀ꦚꦶꦤꦲꦸꦥꦺꦠꦄꦩ꧀ꦱ꧀ꦠꦼꦂꦣꦩ꧀ꦭꦤ꧀ꦩꦺꦴꦣꦠꦿꦤ꧀ ꦱ꧀ꦥꦺꦴꦂꦠꦱꦶꦤꦺꦣꦫꦠ꧀ꦱꦶꦁꦲꦤꦲꦶꦁꦏꦸꦛꦏꦺꦴꦤꦺꦴ꧉

꧋ꦲꦺꦱꦸꦏ꧀ꦏꦺꦗꦠ꧀ꦩꦶꦏꦺꦴꦧꦚ꧀ꦗꦸꦂꦩꦼꦚꦁꦱ꧀ꦠꦱꦶꦪꦸꦤ꧀ꦲꦉꦥ꧀ꦤꦸꦩ꧀ꦥꦏ꧀ꦱꦼꦥꦸꦂ꧈ꦗꦠ꧀ꦩꦶꦏꦺꦴꦕ꧀ꦭꦶꦔꦏ꧀ ꦕ꧀ꦭꦶꦔꦸꦏ꧀꧈ꦲꦺꦴꦫꦮꦼꦠꦫꦱꦸꦮꦺꦱꦼꦥꦸꦂꦱꦶꦁꦢꦶꦠꦸꦁꦒꦸꦠꦼꦏ꧈ꦗꦠ꧀ꦩꦶꦏꦺꦴꦧꦶꦔꦸꦁ꧈ꦱꦼꦧꦧ꧀ꦲꦺꦴꦫꦢꦸꦮꦺꦠꦶꦏꦺꦠ꧀ꦭꦤ꧀ꦲꦺꦴꦫꦔꦼꦂꦠꦶꦥꦁꦒꦺꦴꦤ꧀ꦤꦤ꧀ꦭꦺꦴꦏꦺꦠ꧀ꦱꦶꦁꦢꦺꦴꦢꦺꦴꦭ꧀ꦠꦶꦏꦺꦠ꧀꧈ꦔꦁꦒꦺꦴꦧꦱꦠꦂꦱꦤ꧀ꦗꦠ꧀ꦩꦶꦏꦺꦴꦠꦏꦺꦴꦤ꧀ꦩꦫꦁꦥꦼꦠꦸꦒꦱ꧀ꦱꦶꦁꦲꦤꦏꦺꦴꦤꦺꦴ꧉

꧋ꦥꦼꦠꦸꦒꦱ꧀ꦱꦺꦱꦼꦥꦸꦂꦮꦺꦴꦁꦭꦤ꧀ꦢ꧈ꦲꦥꦶꦏ꧀ꦲꦠꦶꦤꦺ꧈ꦮꦼꦫꦸꦃꦤꦺꦴꦩ꧀ꦤꦺꦴꦩ꧀ꦩꦤ꧀ꦧꦒꦸꦱ꧀ꦱꦏꦆꦤ꧀ꦝꦺꦴꦤꦺꦱꦶꦪꦱꦶꦁꦲꦉꦥ꧀ꦲꦁꦒꦺꦴꦭꦺꦏ꧀ꦏꦶꦥꦩꦤ꧀ꦤꦺ꧈ꦄꦁꦏꦠꦤ꧀ꦭꦈꦠ꧀ꦱꦶꦁꦭꦒꦶꦠꦸꦒꦱ꧀ꦲꦶꦁꦧꦼꦭꦤ꧀ꦝ꧈ꦗꦠ꧀ꦩꦶꦏꦺꦴꦧꦚ꧀ꦗꦸꦂꦠꦼꦫꦸꦱ꧀ꦢꦶꦏꦺꦴꦤ꧀ꦩꦸꦁꦒꦃꦱꦼꦥꦸꦂ꧈ꦗꦠ꧀ꦩꦶꦏꦺꦴꦩꦸꦁꦒꦃꦱꦼꦥꦸꦂꦔꦤ꧀ꦠꦶꦠꦼꦏꦤ꧀ꦠꦸꦗꦸꦮꦤ꧀꧉

꧋ꦩꦼꦣꦸꦤ꧀ꦱꦏꦱꦼꦥꦸꦂ꧈ꦗꦠ꧀ꦩꦶꦏꦺꦴꦧꦚ꧀ꦗꦸꦂꦲꦁꦒꦺꦴꦭꦺꦏ꧀ꦏꦶꦲꦭꦩꦠ꧀ꦠꦺꦥꦩꦤ꧀ꦤꦺ꧈ꦱꦮꦶꦱ꧀ꦱꦺꦏꦼꦠꦼꦩꦸꦲꦱꦿꦩꦤꦺꦥꦩꦤ꧀ꦤꦺ꧈ꦗꦠ꧀ꦩꦶꦏꦺꦴꦧꦶꦔꦸꦁ꧈ꦲꦶꦁꦧꦠꦶꦤ꧀ꦗꦠ꧀ꦩꦶꦏꦺꦴꦏꦤ꧀ꦝ꧈ꦲꦶꦏꦶꦏꦼꦠꦼꦩꦸꦏꦲꦤ꧀ꦤꦺꦲꦱꦿꦩꦱꦶꦁꦧꦔꦸꦤ꧀ꦤꦤ꧀ꦤꦺꦠꦶꦁꦏꦠ꧀꧈ꦲꦥꦶꦏ꧀꧈ꦤꦶꦁꦏꦺꦴꦏ꧀ꦱꦼꦥꦶꦧꦔꦼꦠ꧀ꦪ꧈ꦲꦤꦭꦮꦁꦔꦺꦲꦏꦺꦃ꧈ꦤꦶꦁꦏꦺꦴꦏ꧀ꦠꦸꦠꦸꦥ꧀ꦏꦧꦺꦃ꧈ꦲꦺꦴꦫꦲꦤꦱꦶꦗꦶꦱꦶꦗꦶꦪꦱꦶꦁꦧꦸꦏꦏ꧀꧈

꧋ꦗꦠ꧀ꦩꦶꦏꦺꦴꦠꦼꦫꦸꦱ꧀ ꦩ꧀ꦭꦏꦸꦩ꧀ꦭꦏꦸꦔꦸꦧꦼꦁꦔꦶꦲꦱꦿꦩꦄꦭꦤ꧀ꦮꦼꦫꦸꦃꦤꦺꦴꦩꦼꦂꦭꦤ꧀ꦠꦺꦴꦩ꧀ꦧꦺꦴꦭ꧀ꦲꦶꦁꦠꦺꦩ꧀ꦧꦺꦴꦏ꧀ꦲꦱꦿꦩ꧉

꧋ꦲꦶꦏꦶꦩꦼꦱ꧀ꦛꦶꦤꦺꦴꦩꦺꦴꦂꦏꦩꦂꦲꦱꦿꦩꦤꦺꦥꦩꦤ꧀ꦱꦸꦮꦺꦴꦤ꧀ꦢꦺꦴ꧈ꦥꦶꦏꦶꦂꦫꦺꦗꦠ꧀ꦩꦶꦏꦺꦴ꧉

꧋ꦗꦠ꧀ꦩꦶꦏꦺꦴꦧꦚ꧀ꦗꦸꦂꦩꦼꦚꦺꦠ꧀ꦠꦺꦴꦩ꧀ꦧꦺꦴꦭ꧀ꦤꦺꦴꦩꦼꦂꦏꦩꦂꦲꦱꦿꦩ꧈ꦥꦶꦁꦠꦼꦭꦸꦠꦺꦴꦩ꧀ꦧꦺꦴꦭ꧀ꦩꦲꦸꦢꦶꦥꦼꦚꦺꦠ꧀꧈ꦤꦔꦶꦁꦭꦮꦁꦠꦼꦠꦼꦥ꧀ꦲꦺꦴꦫꦧꦶꦱꦩꦼꦔ꧉

꧋ꦢꦸꦩꦢꦏ꧀ꦏꦤ꧀ꦗꦠ꧀ꦩꦶꦏꦺꦴꦏꦒꦺꦠ꧀꧈ꦏꦼꦥꦿꦸꦔꦸꦱ꧀ꦮꦫꦔꦁꦒꦺꦴꦧꦲꦱꦆꦤ꧀ꦝꦺꦴꦤꦺꦱꦶꦪꦤꦔꦶꦁꦲꦺꦴꦫꦲꦤꦮꦺꦴꦁꦔꦺ꧈ꦤꦏꦺꦴꦤ꧀ꦤꦶꦲꦱꦭ꧀ꦲꦸꦱꦸꦭ꧀ꦭꦺꦗꦠ꧀ꦩꦶꦏꦺꦴꦭꦤ꧀ꦏꦼꦥꦼꦤ꧀ꦠꦶꦁꦔꦤ꧀ꦤꦺ꧈ꦗꦠ꧀ꦩꦶꦏꦺꦴꦩꦁꦱꦸꦭ꧀ꦭꦶꦭꦤ꧀ꦤꦸꦢꦸꦃꦲꦏꦺꦏꦼꦥꦼꦤ꧀ꦠꦶꦁꦔꦤ꧀ꦤꦺ꧈ꦱ꧀ꦮꦫꦠꦤ꧀ꦥꦫꦸꦥꦩꦲꦸꦩꦁꦱꦸꦭ꧀ꦭꦶꦩꦼꦤꦮꦥꦏ꧀ꦱꦸꦮꦺꦴꦤ꧀ꦢꦺꦴꦲꦶꦱꦶꦃꦲꦤꦏ꧀ꦭꦱ꧀ꦲꦶꦁꦱꦗꦿꦺꦴꦤꦺꦥꦁꦏꦭ꧀ꦭꦤ꧀ꦱꦶꦁꦲꦺꦴꦫꦲꦢꦺꦴꦃꦱꦏꦥꦥꦤ꧀ꦲꦱꦿꦩꦤꦺ꧈ꦗꦠ꧀ꦩꦶꦏꦺꦴꦩꦶꦏꦶꦂꦱꦼꦣꦺꦭꦔꦼꦤ꧀ꦢꦶꦲꦱꦭ꧀ꦭꦺꦱ꧀ꦮꦫꦏꦺꦴꦏ꧀ꦧꦶꦱꦧꦲꦱꦆꦤ꧀ꦝꦺꦴꦤꦺꦱꦶꦪ꧈ꦗꦼꦧꦸꦭ꧀ꦭꦤꦺꦲꦶꦁꦏꦺꦴꦤꦺꦴꦲꦤꦩꦶꦏꦿꦺꦴꦥꦺꦴꦤ꧀ꦭꦤ꧀꧈ꦱꦶ꧈ꦱꦶ꧈ꦠꦶ꧈ꦮ꦳ꦶ꧈ꦱꦶꦁꦏꦁꦒꦺꦴꦔꦮꦱ꧀ꦱꦶ꧉

꧋ꦗꦠ꧀ꦩꦶꦏꦺꦴꦩ꧀ꦭꦏꦸꦠꦸꦩꦸꦗꦸꦩꦫꦁꦥꦺꦴꦱ꧀ꦥꦼꦚ꧀ꦗꦒꦲꦤ꧀ꦥꦼꦂꦭꦸꦤꦏꦺꦴꦏ꧀ꦲꦏꦺꦥꦩꦤ꧀ꦤꦺ꧈ꦗꦠ꧀ꦩꦶꦏꦺꦴꦧꦚ꧀ꦗꦸꦂꦢꦶꦒꦮꦱꦺꦏꦾꦸꦫꦶꦠꦶꦭꦤ꧀ꦢ꧈ꦩ꧀ꦭꦼꦧꦸꦫꦸꦮꦁꦥꦼꦩꦼꦫꦶꦏꦱ꧀ꦱꦲꦤ꧀꧈ꦗꦠ꧀ꦩꦶꦏꦺꦴꦢꦶꦒ꧀ꦭꦺꦣꦃ꧈ꦢꦶꦠꦏꦺꦴꦤ꧀ꦠꦏꦺꦴꦤ꧀ꦤꦶꦭꦪꦁꦭꦪꦁꦔꦺ꧈ꦧꦉꦁꦧꦺꦫꦺꦱ꧀ꦱꦏꦧꦺꦃꦲꦤꦺ꧈ꦗꦠ꧀ꦩꦶꦏꦺꦴꦢꦶꦱꦩ꧀ꦧꦸꦁꦲꦏꦺꦱꦫꦤꦠꦺꦭ꧀ꦥꦺꦴꦤ꧀ꦩꦫꦁꦥꦩꦤ꧀ꦤꦺꦪꦱꦸꦮꦺꦴꦤ꧀ꦢꦺꦴ꧉

꧋ꦗꦠ꧀ꦩꦶꦏꦺꦴꦏꦒꦺꦠ꧀ꦱꦧꦧ꧀ꦲꦶꦁꦏꦤꦲꦤꦒꦩ꧀ꦧꦂꦥꦩꦤ꧀ꦤꦺ꧈ꦱꦲꦶꦏꦶꦲꦫꦤ꧀ꦤꦺꦮ꦳ꦶꦣꦶꦪꦺꦴꦏꦭ꧀꧈

꧋ꦧꦼꦤꦼꦂꦏꦸꦮꦶꦧꦺꦴꦕꦃꦤꦺꦴꦩ꧀ꦤꦺꦴꦩ꧀ꦩꦤ꧀ꦱꦏꦆꦤ꧀ꦝꦺꦴꦤꦺꦱꦶꦪ꧈ꦗꦼꦤꦼꦁꦔꦺꦗꦠ꧀ꦩꦶꦏꦺꦴ꧈ꦏꦸꦮꦶꦥꦚ꧀ꦕꦺꦤ꧀ꦥꦺꦴꦤꦏꦤ꧀ꦏꦸ꧈ꦏꦤ꧀ꦝꦤꦺꦱꦸꦮꦺꦴꦤ꧀ꦢꦺꦴ꧉

꧋ꦗꦠ꧀ꦩꦶꦏꦺꦴꦧꦚ꧀ꦗꦸꦂꦢꦶꦠꦲꦤ꧀ꦏꦫꦺꦴꦱꦺꦏꦾꦸꦫꦶꦠꦶꦭꦤ꧀ꦢꦠꦼꦏꦤ꧀ꦱꦺꦴꦫꦺ꧈ꦔꦤ꧀ꦠꦶꦥꦩꦤ꧀ꦤꦺꦧꦸꦧꦂꦗꦩ꧀ꦠꦿꦺꦤꦶꦁ꧉

꧋ꦏꦕꦫꦶꦠꦱꦱꦸꦮꦺꦤꦺꦲꦤꦱꦺꦭ꧀ꦠꦲꦤ꧀ꦤꦤ꧀꧈ꦗꦠ꧀ꦩꦶꦏꦺꦴꦔꦼꦭꦏ꧀꧈ꦲꦶꦁꦏꦺꦴꦤꦺꦴꦲꦤꦣꦶꦱ꧀ꦥꦺꦤꦱꦼꦂ꧈ꦱꦶꦁꦲꦤꦠꦸꦭꦶꦱ꧀ꦱꦤ꧀ꦤꦺꦠꦺꦃꦭꦤ꧀ꦏꦺꦴꦥꦶ꧈ꦗꦠ꧀ꦩꦶꦏꦺꦴꦧꦚ꧀ꦗꦸꦂꦩꦶꦗꦼꦠ꧀ꦠꦸꦭꦶꦱ꧀ꦱꦤ꧀ꦏꦺꦴꦥꦶ꧈ꦗꦼꦁꦒꦶꦫꦠ꧀ꦗꦠ꧀ꦩꦶꦏꦺꦴꦏꦒꦺꦠ꧀꧈ꦲꦤꦒꦼꦭꦱ꧀ꦱꦶꦁꦩꦼꦠꦸꦣꦺꦮꦺꦱꦏꦗꦿꦺꦴꦤꦶꦁꦩꦼꦱꦶꦤ꧀꧈ꦢꦸꦫꦸꦁꦩꦫꦶꦲꦁꦒꦺꦴꦤ꧀ꦤꦺꦣꦼꦒ꧀ꦝꦼꦒ꧀ꦒꦤ꧀꧈ꦲꦤꦮꦺꦢꦁꦏꦺꦴꦥꦶꦩꦶꦭꦶꦩꦚ꧀ꦕꦸꦂ꧈ꦗꦠ꧀ꦩꦶꦏꦺꦴꦧꦶꦔꦸꦁꦏꦼꦥꦶꦪꦺꦕꦫꦤꦺꦔꦼꦤ꧀ꦝꦼꦒ꧀ꦲꦶꦭꦶꦤꦺꦏꦺꦴꦥꦶ꧈ꦣꦺꦮꦺꦏꦺꦮꦼꦢꦶꦧꦏꦭ꧀ꦢꦶꦱꦽꦒꦼꦤꦶꦩꦼꦂꦒꦏꦺꦴꦥꦶꦧꦏꦭ꧀ꦮꦸꦠꦃ꧈ꦤꦔꦶꦁꦧꦉꦁꦒꦼꦭꦱ꧀ꦏꦼꦧꦏ꧀꧈ꦏꦺꦴꦥꦶꦱꦶꦁꦩꦚ꧀ꦕꦸꦂꦩꦲꦸꦩꦤ꧀ꦝꦼꦒ꧀ꦝꦺꦮꦺ꧈ꦗꦠ꧀ꦩꦶꦏꦺꦴꦊꦒꦲꦠꦶꦤꦺ꧉

꧋ꦱꦮꦶꦱ꧀ꦱꦺꦧꦸꦧꦂꦠꦿꦺꦤꦶꦁ꧈ꦱꦸꦮꦺꦴꦤ꧀ꦢꦺꦴꦧꦚ꧀ꦗꦸꦂꦲꦒꦺꦲꦒꦺꦤꦼꦩꦺꦴꦤ꧀ꦤꦶꦥꦺꦴꦤꦏꦤ꧀ꦤꦺ꧈ꦧꦉꦁꦏꦼꦠꦼꦩꦸ꧈ꦗꦠ꧀ꦩꦶꦏꦺꦴꦢꦶꦫꦁꦏꦸꦭ꧀ꦠꦼꦫꦸꦱ꧀ꦢꦶꦥꦸꦏ꧀ꦥꦸꦏ꧀ꦥꦸꦤ꧀ꦝꦏ꧀ꦏꦺ꧉

꧋ꦮꦃꦏꦺꦴꦮꦺꦧꦺꦴꦕꦃꦧꦒꦸꦱ꧀꧈ꦧꦺꦴꦕꦃꦥꦶꦤ꧀ꦠꦼꦂꦠꦸꦂꦏꦼꦤ꧀ꦢꦼꦭ꧀꧈ꦥꦩꦤ꧀ꦫꦸꦩꦁꦱꦱꦼꦤꦼꦁꦭꦤ꧀ꦩꦺꦴꦁꦏꦺꦴꦒ꧀ꦭꦺ꧈ꦩꦼꦂꦒꦏꦺꦴꦮꦺꦧꦶꦱꦠꦼꦏꦤ꧀ꦏꦺꦤꦺ꧈ꦠꦼꦏꦏꦸꦛꦯ꧀ꦏꦺꦆꦣꦩ꧀ꦱꦶꦁꦲꦢꦺꦴꦃꦧꦔꦼꦠ꧀ꦏꦤ꧀ꦛꦶꦱ꧀ꦭꦩꦼꦠ꧀꧈ꦏꦤ꧀ꦝꦤꦺꦱꦸꦮꦺꦴꦤ꧀ꦢꦺꦴ꧉

꧋ꦗꦠ꧀ꦩꦶꦏꦺꦴꦩꦸꦁꦲꦁꦫꦸꦔꦺꦴꦏ꧀ꦲꦏꦺꦔꦼꦤ꧀ꦢꦶꦏꦤ꧀ꦤꦺꦥꦩꦤ꧀ꦤꦺꦏꦫꦺꦴꦚꦮꦁꦭꦤ꧀ꦩꦺꦱꦼꦩ꧀꧈ꦮꦼꦔꦶꦏꦸꦮꦶꦗꦠ꧀ꦩꦶꦏꦺꦴꦧꦚ꧀ꦗꦸꦂꦢꦶꦲꦗꦏ꧀ꦥꦩꦤ꧀ꦤꦺꦔꦶꦤꦼꦥ꧀ꦩꦼꦚꦁꦲꦺꦴꦠꦺꦭ꧀ꦩꦺꦮꦃ꧈ꦲꦤꦕꦿꦶꦠꦲꦤꦺꦃꦏꦁꦢꦶꦲꦭꦩ꧀ꦩꦶꦢꦺꦤꦶꦁꦗꦠ꧀ꦩꦶꦏꦺꦴ꧈ꦗꦠ꧀ꦩꦶꦏꦺꦴꦢꦸꦫꦸꦁꦔꦼꦂꦠꦶꦧꦧ꧀ ꦏ꧀ꦭꦺꦴꦱꦺꦢ꧀ꦝꦸꦣꦸꦏ꧀ꦱꦶꦁꦲꦤꦲꦶꦁꦠꦺꦴꦲꦶꦭꦺꦠ꧀ꦲꦺꦴꦠꦺꦭ꧀꧈ꦩꦸꦭꦤꦺꦤꦭꦶꦏꦗꦠ꧀ꦩꦶꦏꦺꦴꦲꦉꦥ꧀ꦲꦩ꧀ꦧꦼꦧꦸꦮꦁꦏꦤ꧀ꦛꦶꦉꦏꦱꦗꦠ꧀ꦩꦶꦏꦺꦴꦠꦼꦠꦼꦥ꧀ꦲꦤ꧀ꦝꦺꦴꦣꦺꦴꦏ꧀ꦲꦶꦁꦏ꧀ꦭꦺꦴꦱꦠ꧀ꦏꦸꦮꦶ꧉

꧋ꦏ꧀ꦭꦺꦴꦱꦺꦠ꧀ꦏꦺꦴꦏ꧀ꦲꦁꦉꦏꦱꦏ꧀ꦏꦺꦮꦺꦴꦁꦱꦶꦁꦲꦉꦥ꧀ꦲꦩ꧀ꦧꦼꦧꦸꦮꦁ꧈ꦩꦼꦁꦏꦺꦴꦤꦺꦴꦗꦠ꧀ꦩꦶꦏꦺꦴꦒꦽꦤꦼꦔꦤ꧀꧈

꧋ꦮꦼꦏ꧀ꦠꦸꦱꦼꦩꦤꦲꦶꦁꦏꦸꦛꦱ꧀ꦏꦺꦆꦣꦩ꧀ꦭꦒꦶꦩꦸꦱꦶꦩ꧀ꦣꦶꦔꦶꦤ꧀ꦩꦁꦱꦲꦣꦼꦩ꧀꧈ꦏꦼꦩ꧀ꦧꦁꦠꦸꦭꦶꦥ꧀ꦏꦁꦲꦺꦤ꧀ꦢꦃꦮꦶꦱ꧀ꦥꦣꦩꦼꦏꦿꦺꦴꦏ꧀꧈ꦱꦶꦤꦮꦁꦧꦔꦼꦠ꧀ꦤꦼꦁꦱꦼꦩ꧀ꦲꦏꦺ꧈ꦗꦠ꧀ꦩꦶꦏꦺꦴꦩ꧀ꦭꦏꦸꦩ꧀ꦭꦏꦸꦩꦼꦚꦁꦠꦺꦴꦏꦺꦴꦎꦮ꦳ꦼꦂꦏꦺꦴꦠ꧀ꦩꦤ꧀ꦠꦺꦴꦭ꧀ꦏꦁꦒꦺꦴꦤꦲꦤ꧀ꦲꦮꦲꦣꦼꦩ꧀꧈ꦧꦚ꧀ꦗꦸꦂꦢꦶꦁꦒꦺꦴꦩ꧀ꦭꦏꦸꦫꦤꦫꦺꦤꦺ꧈ꦲꦺꦲꦺꦴꦫꦔꦼꦂꦠꦶꦪꦗꦼꦧꦸꦭ꧀ꦭꦺꦎꦮꦼꦂꦏꦺꦴꦠ꧀ꦏꦸꦮꦶꦏꦁꦒꦺꦴꦮꦤꦶꦠ꧈ꦤꦔꦶꦁꦪꦲꦺꦴꦫꦥꦥꦲꦩꦂꦒꦥꦱ꧀ꦢꦶꦁꦒꦺꦴ꧉

꧋ꦢꦶꦤꦕꦤ꧀ꦝꦏ꧀ꦏꦺꦗꦠ꧀ꦩꦶꦏꦺꦴꦕꦸꦏꦸꦂꦫꦩ꧀ꦧꦸꦠ꧀꧈ꦱꦠꦼꦩꦼꦤ꧀ꦤꦺꦏꦢꦢꦺꦪꦤ꧀ꦲꦶꦏꦶꦩꦶꦁꦥꦽꦭꦸꦲꦁꦊꦒꦤꦶꦲꦠꦶ꧈ꦧꦭꦱ꧀ꦝꦼꦤ꧀ꦝꦩ꧀ꦏꦫꦺꦴꦧꦁꦱꦭꦤ꧀ꦢ꧈ꦗꦩꦤ꧀ꦱꦼꦩꦤꦲꦺꦴꦁꦏꦺꦴꦱ꧀ꦱꦺꦥꦎꦠꦺꦴꦁꦫꦩ꧀ꦧꦸꦠ꧀꧇꧑꧕꧇ꦒꦸꦭ꧀ꦝꦼꦤ꧀꧈ꦪꦺꦤ꧀ꦥꦶꦗꦼꦠ꧀ꦠꦩ꧀ꦧꦃ꧇꧑꧐꧇ꦒꦸꦭ꧀ꦝꦼꦤ꧀꧈ꦥꦶꦗꦼꦠ꧀ꦏꦼꦱꦼꦭ꧀꧈ꦩꦸꦭꦱꦶꦁꦢꦶꦥꦶꦗꦼꦠ꧀ꦠꦶꦱꦶꦏꦶꦭ꧀ꦭꦺ꧈ꦗꦠ꧀ꦩꦶꦏꦺꦴꦧꦚ꧀ꦗꦸꦂꦭꦸꦁꦒꦸꦃꦲꦶꦁꦏꦸꦂꦱꦶꦱꦶꦁꦩ꧀ꦭꦶꦒꦶꦧꦶꦱꦢꦶꦱꦼꦠꦺꦭ꧀ꦩꦸꦁꦒꦃꦏꦉꦧ꧀ꦧꦺꦤ꧀ꦱꦶꦏꦶꦭ꧀ꦭꦺꦒꦩ꧀ꦥꦁꦢꦶꦥꦶꦗꦼꦠ꧀ꦠꦶ꧈ꦗꦠ꧀ꦩꦶꦏꦺꦴꦧꦚ꧀ꦗꦸꦂꦲꦺꦴꦩꦺꦴꦁꦏꦫꦺꦴꦠꦸꦏꦁꦥꦺꦴꦠꦺꦴꦁꦲꦱ꧀ꦭꦶꦭꦤ꧀ꦢꦱꦶꦁꦱꦸꦫꦱꦤꦺꦏꦺꦴꦤ꧀ꦩꦺꦴꦠꦺꦴꦁꦫꦩ꧀ꦧꦸꦠ꧀ꦏꦫꦺꦴꦏꦺꦴꦤ꧀ꦩꦶꦗꦼꦠ꧀ꦠꦶꦱꦶꦏꦶꦭ꧀ꦭꦺ꧉

꧋ꦧꦶꦪꦺꦤ꧀ ꦩ꧀ꦧꦃꦩ꧀ꦧꦃꦏꦸꦏꦺꦴꦗꦗꦃ꧈ꦏꦺꦴꦏꦺꦴꦁꦏꦺꦴꦤ꧀ꦱꦒꦼꦊꦩ꧀ꦩꦸ꧈ꦏꦺꦴꦥꦼꦉꦱ꧀ꦠꦼꦤꦒꦤꦺ꧈ꦱꦲꦶꦏꦶꦫꦱꦏ꧀ꦤꦥꦶꦮꦊꦱ꧀ꦏꦸ꧈ꦲꦏꦸꦢꦢꦶꦩꦗꦶꦏꦤ꧀ꦩꦸ꧈ꦏꦺꦴꦮꦺꦢꦢꦶꦥꦼꦩ꧀ꦧꦤ꧀ꦠꦸꦏꦸ꧈ꦲꦪꦺꦴ꧈ꦠꦼꦫꦸꦱ꧀ꦥꦶꦗꦼꦠ꧀ꦠꦶꦱꦶꦏꦶꦭ꧀ꦏꦸꦱꦶꦁꦥꦺꦤꦏ꧀꧈ꦏꦤ꧀ꦝꦤꦺꦗꦠ꧀ꦩꦶꦏꦺꦴꦲꦶꦁꦧꦠꦶꦤ꧀ꦤꦺ꧈ꦩꦁꦏꦺꦴꦤꦺꦴꦗꦠ꧀ꦩꦶꦏꦺꦴꦩꦊꦱ꧀ꦲꦸꦏꦸꦩ꧀ꦩꦫꦁꦭꦤ꧀ꦢ꧉

꧋ꦏꦶꦫꦏꦶꦫꦱꦺꦥꦸꦭꦸꦃꦢꦶꦤꦲꦶꦁꦤꦒꦫꦭꦤ꧀ꦢꦗꦠ꧀ꦩꦶꦏꦺꦴꦮꦶꦱ꧀ꦔꦼꦂꦠꦶꦏꦲꦤꦤ꧀ꦭꦤ꧀ꦏꦲꦺꦤ꧀ꦢꦃꦲꦺꦱꦸꦮꦱꦤꦏꦸꦛꦱ꧀ꦏꦺꦆꦣꦩ꧀꧈ꦗꦠ꧀ꦩꦶꦏꦺꦴꦧꦚ꧀ꦗꦸꦂꦥꦩꦶꦠ꧀ꦠꦤ꧀ꦥꦩꦤ꧀ꦱꦸꦮꦺꦴꦤ꧀ꦢꦺꦴ꧈ꦩꦸꦭꦶꦃꦤꦺꦁꦆꦤ꧀ꦝꦺꦴꦤꦺꦱꦶꦪ꧈ꦤꦭꦶꦏꦤꦺꦗꦠ꧀ꦩꦶꦏꦺꦴꦭꦒꦶꦩ꧀ꦭꦏꦸꦩ꧀ꦭꦏꦸꦲꦶꦁꦧꦤ꧀ꦝꦫꦱ꧀ꦏꦶꦥꦸꦭ꧀ꦲꦺꦂꦥꦺꦴꦠ꧀꧈ꦲꦤ꧀ꦢꦼꦭꦺꦴꦏ꧀ꦢꦼꦭꦺꦴꦏ꧀ꦧꦫꦁꦣꦠꦺꦥ꦳ꦿꦶꦱꦶꦁꦠꦼꦒꦼꦱ꧀ꦱꦺꦧꦫꦁꦥꦗꦼꦒ꧀꧈ꦥꦼꦂꦭꦸꦠꦸꦏꦸꦲꦺꦴꦭꦺꦃꦲꦺꦴꦭꦺꦃ꧈ꦗꦠ꧀ꦩꦶꦏꦺꦴꦲꦁꦒꦺꦴꦭꦺꦏ꧀ꦏꦶꦣꦺꦴꦩ꧀ꦥꦺꦠ꧀꧈ꦗꦼꦧꦸꦭ꧀ꦝꦺꦴꦩ꧀ꦥꦺꦠ꧀ꦠꦺꦲꦺꦴꦫꦲꦤ꧈ꦗꦠ꧀ꦩꦶꦏꦺꦴꦗꦸꦣꦼꦒ꧀ꦭꦤ꧀ꦭꦼꦩꦼꦱ꧀꧈ꦢꦸꦩꦢꦏꦤ꧀ꦏꦿꦸꦔꦸꦱ꧀ꦮꦫꦥꦁꦒꦶꦭ꧀ꦭꦤ꧀꧈ꦱ꧀ꦮꦫꦮꦤꦶꦠꦥꦼꦒꦮꦺꦠꦺꦴꦏꦺꦴꦏꦫꦺꦴꦤꦸꦢꦸꦃꦲꦏꦺꦣꦺꦴꦩ꧀ꦥꦺꦠ꧀꧈ꦱꦶꦁꦲꦺꦴꦫꦭꦶꦪꦪꦣꦺꦴꦩ꧀ꦥꦺꦠ꧀ꦠꦺꦗꦠ꧀ꦩꦶꦏꦺꦴꦱꦶꦁꦭꦒꦶꦢꦶꦒꦺꦴꦭꦺꦏ꧀ꦏꦶ꧈ꦗꦠ꧀ꦩꦶꦏꦺꦴꦩꦼꦚꦠ꧀ ꦩ꧀ꦭꦏꦸꦩꦫꦤꦶꦥꦼꦒꦮꦺꦠꦺꦴꦏꦺꦴꦩꦲꦸ꧈ꦠꦼꦫꦸꦱ꧀ ꦤꦩ꧀ꦥꦤꦶꦣꦺꦴꦩ꧀ꦥꦺꦠ꧀ꦠꦺꦏꦫꦺꦴꦩꦺꦱꦼꦩ꧀ꦔꦠꦸꦂꦫꦏꦺꦥꦤꦸꦮꦸꦤ꧀꧈ꦲꦶꦁꦧꦠꦶꦤ꧀ꦗꦠ꧀ꦩꦶꦏꦺꦴꦔꦸꦢꦫꦱ꧈ꦠꦼꦏꦤ꧀ꦱꦼꦩꦺꦴꦤꦺꦴꦏꦼꦗꦸꦗꦸꦂꦫꦤ꧀ꦤꦺꦮꦺꦴꦁꦭꦤ꧀ꦢ꧈ꦮꦃꦥꦚ꧀ꦕꦺꦤ꧀ꦧꦼꦕꦶꦏ꧀ꦧꦼꦧꦸꦢꦺꦤ꧀ꦤꦺ꧉

꧋ꦗꦠ꧀ꦩꦶꦏꦺꦴꦧꦚ꧀ꦗꦸꦂꦤꦸꦩ꧀ꦥꦏ꧀ꦥꦼꦱꦮꦠ꧀ꦠꦼꦫꦸꦱ꧀ꦩꦸꦭꦶꦃ꧈ꦧꦭꦶꦲꦶꦁꦤꦼꦒꦫꦤꦺꦆꦤ꧀ꦝꦺꦴꦤꦺꦱꦶꦪ꧈ꦱꦮꦶꦱ꧀ꦱꦺꦠꦼꦏꦤ꧀ ꦆꦤ꧀ꦝꦺꦴꦤꦺꦱꦶꦪꦗꦠ꧀ꦩꦶꦏꦺꦴꦩꦸꦭꦶꦃꦲꦶꦁꦢꦊꦩ꧀ꦩꦺꦧꦥꦏ꧀ꦤꦺꦲꦶꦁꦒꦺꦴꦣꦺꦪꦤ꧀꧈ꦏꦢꦢꦺꦪꦤ꧀ꦧꦭꦱ꧀ꦝꦼꦤ꧀ꦝꦩ꧀ꦩꦫꦁꦠꦸꦏꦁꦥꦎꦠꦺꦴꦁꦫꦩ꧀ꦧꦸꦠ꧀ꦢꦶꦕꦿꦶꦠꦏ꧀ꦏꦺꦩꦫꦁꦧꦥꦏ꧀ꦤꦺ꧈ꦧꦶꦪꦺꦤ꧀ꦧꦥꦏ꧀ꦤꦺꦲꦶꦱꦶꦃꦔꦭꦩ꧀ꦩꦶꦲꦸꦫꦶꦥ꧀ꦲꦶꦁꦗꦩꦤ꧀ꦥꦼꦚ꧀ꦗꦗꦃꦲꦤ꧀ꦭꦤ꧀ꦢ꧈ꦧꦥꦏ꧀ꦤꦺꦧꦶꦪꦺꦤ꧀ꦮꦼꦢꦶꦏꦫꦺꦴꦭꦤ꧀ꦢ꧈ꦩꦸꦭꦧꦥꦏ꧀ꦤꦺꦗꦠ꧀ꦩꦶꦏꦺꦴꦲꦁꦒꦺꦴꦤꦺꦩꦶꦉꦁꦔꦏꦺꦠꦼꦤꦤꦤ꧀꧈ꦏꦫꦺꦴꦲꦁꦒꦸꦪꦸꦏꦼꦩꦼꦏꦼꦭ꧀ꦭꦼꦤ꧀꧈

꧋ꦧꦤ꧀ꦠꦸꦭ꧀꧇꧒꧇ꦤꦺꦴꦮ꦳ꦺꦩ꧀ꦧꦼꦂ꧇꧒꧐꧒꧓꧉

 

ꦥꦤꦸꦭꦶꦱ꧀
Panulis
ꦱꦿꦶꦮꦶꦗꦪꦤ꧀ꦠꦶ
Sriwijayanti

Leave a Reply

Your email address will not be published. Required fields are marked *