ꦧ꧀ꦭꦸꦤ꧀ꦢꦼꦂ

 

BLUNDER

 

ꦢꦺꦤꦶꦁ꧇ꦄꦂꦂꦢꦶꦤꦶꦦꦔꦱ꧀ꦠꦸꦠꦶꦧ꧈ꦤ꧈

 

Dening: Ardini Pangastuti Bn

 

 

꧋ꦏꦫꦺꦴꦩꦼꦕꦸꦕꦸꦭꦤ꧀ꦒꦿꦸꦤ꧀ꦢꦼꦭ꧀ꦭꦤ꧀ꦲꦺꦴꦫꦮꦶꦱ꧀ꦮꦶꦱ꧀ ꦩꦂꦑꦺꦴꦤꦃꦲꦁꦒꦺꦴꦤꦺꦲꦁꦒꦸꦪꦁꦔꦶꦗꦺꦴꦧꦶꦤ꧀ꦠꦺꦫꦱ꧀ꦲꦺꦴꦩꦃꦲꦺꦱꦶꦁꦩꦩ꧀ꦧꦸꦥꦼꦱꦶꦁꦩꦼꦂꦒꦲꦸꦪꦸꦃꦏꦸꦕꦶꦁ꧉

꧋꧇ꦏꦸꦕꦶꦁꦲꦺꦴꦫꦲꦸꦫꦸꦱ꧀꧈ꦒꦮꦺꦉꦏꦱꦤꦺꦮꦺꦴꦁ꧉ꦒꦽꦒꦼꦠ꧀ꦠꦼꦤ꧀ꦩꦼꦁꦏꦺꦴꦠꦏ꧀ꦫꦕꦸ

ꦤ꧀꧇ꦒꦽꦤꦼꦁꦔꦺꦏꦫꦺꦴꦩꦼꦕꦸꦕꦸ꧉ꦲꦠꦶꦤꦺꦩꦁꦏꦼꦭ꧀ꦠꦼꦤꦤ꧀꧈ꦢꦶꦤꦩꦶꦁꦒꦸꦏꦸꦢꦸꦤꦺꦧꦶꦱꦱꦤ꧀ꦠꦲꦶ꧈ꦏꦼꦥꦼꦏ꧀ꦱꦏꦸꦢꦸꦔꦼꦥꦺꦭ꧀꧉ꦩꦼꦂꦒꦲꦩ꧀ꦧꦸꦲꦸꦪꦸꦃꦲꦶꦁꦠꦺꦫꦱ꧀ꦲꦺꦴꦩꦃꦲꦺꦲꦁꦒꦩ꧀ꦧꦽꦠ꧀ꦧꦔꦼꦠ꧀꧈ꦩꦸꦧꦭ꧀ꦠꦼꦏꦤ꧀ꦔꦼꦤ꧀ꦢꦶꦲꦼꦤ꧀ꦢꦶ꧉

꧋꧇ꦲꦺꦱꦸꦏ꧀ꦲꦺꦱꦸꦏ꧀ꦏꦺꦴꦏ꧀ꦮꦶꦱ꧀ꦤꦼꦱꦸꦏꦶꦒꦺꦏ꧀ꦔꦥꦠ꧈ꦧꦸ?ꦩꦫꦏ꧀ꦤꦺꦔꦢꦺꦴꦃꦏꦺꦉꦗꦼꦏꦶ꧈꧇ꦲꦭꦺꦴꦏ꧀ꦏꦺꦲꦺꦫꦸ꧈ꦧꦺꦴꦗꦺꦴꦤꦺꦱꦶꦁꦩꦼꦤ꧀ꦠꦱ꧀ꦮꦲꦺꦩꦼꦠꦸꦱꦏꦏꦩꦂ꧈ꦫꦺꦏꦤꦺꦲꦉꦥ꧀ꦔꦿꦱꦏ꧀ꦤꦺꦲꦔꦼꦠ꧀ꦠꦺꦱꦽꦔꦺꦔꦺ꧈ꦤꦔꦶꦁꦠꦼꦏꦤ꧀ꦠꦺꦫꦱ꧀ꦮꦼꦫꦸꦃꦱꦶꦁꦮꦢꦺꦴꦤ꧀ꦲꦸꦭꦠ꧀ꦠꦺꦥꦼꦠꦼꦁꦏꦫꦺꦴꦔꦺꦴꦩꦺꦭ꧀ꦔꦺꦴꦩꦺꦭ꧀ꦲꦺꦴꦫꦕꦼꦛ꧈ꦥꦼꦥꦺꦔꦶꦤ꧀ꦤꦤ꧀ꦏꦁꦒꦺꦴꦣꦺꦣꦺꦱꦶꦤꦩ꧀ꦧꦶꦲꦺꦴꦭꦃꦫꦒꦲꦶꦁꦭꦠꦂꦢꦢꦶꦕꦧꦂ꧉ꦲꦺꦫꦸꦮꦶꦱ꧀ꦏꦺꦭꦁꦔꦤ꧀ꦒꦽꦒꦼꦠ꧀ꦮꦼꦫꦸꦃꦫꦲꦶꦤꦺꦱꦺꦴꦁꦮꦢꦺꦴꦤ꧀ꦱꦶꦁꦏꦠꦺꦴꦤ꧀ꦧꦼꦱꦼꦔꦸꦠ꧀꧈

꧋ꦏꦿꦸꦔꦸꦲꦸꦗꦂꦫꦺꦱꦶꦁꦭꦤꦁ꧈ꦩꦂꦑꦺꦴꦤꦃꦏꦪꦲꦺꦴꦭꦺꦃꦥꦼꦚꦭꦸꦂꦫꦤ꧀ꦚꦸꦤ꧀ꦠꦏ꧀ꦫꦱꦩꦁꦏꦼꦭ꧀꧈

꧋꧇ꦱꦩ꧀ꦥꦺꦪꦤ꧀ꦏꦶꦢꦢꦶꦮꦺꦴꦁꦭꦤꦁꦏꦸꦫꦁꦠꦼꦒꦱ꧀꧈ꦮꦶꦱ꧀ꦧꦺꦴꦭꦧꦭꦶꦲꦏꦸꦏꦤ꧀ꦝ꧈ꦲꦩ꧀ꦧꦺꦴꦏ꧀ꦥꦼꦂꦏꦫꦏꦸꦕꦶꦁꦢꦶꦒꦮꦲꦺꦶꦁꦫꦥꦠ꧀ ꦫ꧈ꦠ꧉ꦩꦺꦴꦱꦺꦴꦏ꧀ꦱꦧꦼꦤ꧀ꦲꦺꦱꦸꦏ꧀ꦏꦸꦢꦸꦔꦽꦱꦶꦏ꧀ꦏꦶꦲꦸꦪꦸꦃꦏꦸꦕꦶꦁ꧉ꦏꦸꦮꦶꦢꦸꦫꦸꦁꦏꦊꦧꦸꦠꦼꦭꦺꦏ꧀ꦏꦺꦱꦶꦁꦥꦠꦶꦁꦥꦼꦛꦸꦤ꧀ꦛꦏ꧀ꦲꦶꦁꦕꦼꦣꦏ꧀ꦥꦒꦼꦂ꧉ꦪꦺꦤ꧀ꦥꦤ꧀ꦕꦺꦤ꧀ꦱꦩ꧀ꦥꦺꦪꦤ꧀ꦲꦺꦴꦫꦒꦼꦊꦩ꧀ ꦩꦼꦁꦏꦺꦴꦲꦏꦸꦱꦶꦁꦩꦗꦸꦭꦥꦺꦴꦂꦚꦁꦫ꧈ꦠ꧈꧉ꦏꦸꦕꦶꦁꦏꦸꦕꦶꦁꦏꦸꦮꦶꦮꦶꦱ꧀ꦲꦺꦴꦫꦧꦶꦱꦢꦶꦠꦺꦴꦭꦺꦫꦤ꧀ꦱꦶ꧈ꦥꦏ꧀꧈

꧋꧇ꦲ꧀ꦭꦤꦶꦁꦲꦮꦏ꧀ꦏꦺꦣꦺꦮꦺꦫꦏ꧀ꦲꦺꦴꦫꦔꦼꦂꦠꦶꦏꦸꦮꦶꦏꦸꦕꦶꦁꦔꦺꦱꦥꦱꦶꦁꦒꦮꦺꦤꦺꦔꦸꦪꦸꦃꦭꦤ꧀ꦤꦼꦭꦺꦏ꧀ꦱꦲꦺꦁꦒꦺꦴꦤ꧀ꦲꦼꦁꦒꦺꦴꦤ꧀ꦲꦶꦏꦸ꧈꧇ꦏꦤ꧀ꦝꦤꦺꦱꦶꦁꦭꦤꦁꦱꦫꦺꦃ꧉

꧋꧇ꦩꦸꦭꦱꦏꦏꦸꦮꦶꦥꦏ꧀ ꦩꦠꦸꦂꦥꦏ꧀ ꦫ꧈ꦠ꧈꧉ꦥꦫꦮꦂꦒꦱꦶꦁꦢꦸꦮꦺꦏꦸꦕꦶ꧇ꦏꦉꦧꦺꦤ꧀ꦢꦶꦲꦸꦤ꧀ꦢꦁ꧈ꦏꦁꦒꦺꦴꦔꦽꦩ꧀ꦧꦸꦒ꧀ꦏꦸꦕꦶꦁꦱꦶꦁꦲꦩ꧀ꦧꦶꦪꦪꦃꦲꦶꦏꦸ꧉ꦪꦺꦤ꧀ꦥꦤ꧀ꦕꦺꦤ꧀ꦲꦤꦱꦶꦁꦔꦶꦔꦸ꧈ꦪꦢꦶꦲꦺꦴꦥꦺꦤ꧀ꦤꦶꦱꦆꦁꦧꦼꦤꦼꦂ꧈ꦢꦶꦏꦤ꧀ꦝꦁꦲꦥꦠꦏꦼꦥꦿꦶꦪꦺꦔꦺꦴꦤꦺꦴ꧉ꦪꦺꦤ꧀ꦥꦤ꧀ꦕꦺꦤ꧀ꦏꦸꦮꦶꦏꦸꦕꦶꦁꦭꦶꦪꦂ꧈ꦪꦢꦶꦉꦩ꧀ꦧꦸꦒ꧀ꦥꦿꦶꦪꦺꦕꦫꦤꦺꦚꦶꦁꦏꦶꦂꦫꦏꦺ꧉꧇

꧋ꦚꦶꦁꦏꦶꦂꦫꦏꦺ?ꦮꦃ꧈ꦩ꧀ꦧꦺꦴꦏ꧀ꦪꦲꦗꦏꦼꦗꦼꦩ꧀ꦧꦔꦼꦠ꧀ꦏꦪꦲꦶꦏꦸꦠꦧꦸ꧈꧇ꦠꦸꦩꦁꦒꦥ꧀ꦥꦺꦲꦺꦫꦸꦏꦫꦺꦴꦱꦸꦩꦶꦁꦏꦶꦂ꧉ꦪꦺꦤ꧀ꦱꦶꦁꦮꦢꦺꦴꦤ꧀ꦮꦶꦱ꧀ꦢꦸꦮꦺꦏꦉꦥ꧀ꦥꦤ꧀ꦕꦺꦤ꧀ꦲꦔꦺꦭ꧀ꦝꦶꦭꦸꦏ꧀ꦩꦸꦭꦝꦺꦮꦺꦏ꧀ꦏꦺꦠꦿꦶꦩꦱꦸꦩꦶꦁꦏꦶꦂ꧉ꦮꦼꦒꦃꦲꦺꦱꦸꦏ꧀ꦲꦺꦱꦸꦏ꧀ꦲꦸꦢꦸꦂꦥꦽꦏꦫꦏꦸꦕꦶꦁ꧉

꧋ꦫꦸꦩꦁꦱꦲꦺꦴꦫꦢꦶꦒꦥꦺꦢꦺꦤꦶꦁꦱꦶꦁꦭꦤꦁ꧈ꦫꦩ꧀ꦥꦸꦁꦔꦽꦱꦶꦏ꧀ꦏꦶꦠꦺꦫꦱ꧀ ꦩꦂꦑꦺꦴꦤꦃꦭꦁꦱꦸꦁꦩꦼꦚꦁꦲꦺꦴꦩꦃꦲꦺꦥꦏ꧀ ꦫ꧈ꦠ꧈ꦱꦶꦁꦩꦸꦁꦧꦺꦢꦒꦁ꧉ꦠꦼꦏꦤꦺꦢꦶꦠꦩ꧀ꦥꦢꦺꦤꦶꦁꦭꦶꦟ꧈ꦒꦂꦮꦤꦺꦥꦏ꧀ ꦫ꧈ꦠ꧈ꦱꦶꦁꦭꦒꦶꦉꦱꦶꦏ꧀ꦉꦱꦶꦏ꧀ꦲꦤꦔꦉꦥ꧀ꦥꦤ꧀꧉

꧋꧇ꦮꦺꦴꦤ꧀ꦠꦼꦤ꧀ꦩꦼꦤꦥꦧꦸꦲꦺꦫꦸ꧈ꦏꦺꦴꦏ꧀ꦢꦶꦔꦫꦺꦤ꧀ꦲꦺꦤ꧀ꦗꦁꦲꦺꦤ꧀ꦗꦁꦠꦶꦤ꧀ꦢꦏ꧀ꦩꦿꦶꦏꦶ꧉ꦩꦁꦒꦏꦠꦸꦫꦤ꧀ꦥꦶꦤꦫꦏ꧀ ꦩ꧀ꦭꦼꦧꦼꦠ꧀꧈ꦲꦭꦺꦴꦏ꧀ꦏꦺꦭꦶꦟꦏꦫꦺꦴꦚꦺꦭꦺꦃꦲꦏꦺꦒꦸꦤ꧀ꦠꦶꦁꦱꦶꦁꦢꦶꦲꦁꦒꦺꦴꦩꦺꦴꦠꦺꦴꦁꦔꦶꦒꦺꦴꦝꦺꦴꦁꦱꦶꦁꦏꦸꦤꦶꦁꦏꦸꦤꦶꦁ꧉ꦧꦤ꧀ꦗꦸꦂꦒꦶꦠꦒꦶꦠꦩꦥꦒ꧀ꦒꦏꦺꦩꦂꦑꦺꦴꦤꦃꦱꦶꦁꦮꦶꦱ꧀ꦔꦚꦸꦂꦲꦶꦁꦔꦉꦥ꧀ꦭꦮꦁꦥꦒꦼꦂ꧇

꧋꧇ꦥꦏ꧀ ꦫ꧈ꦠ꧈ꦮꦺꦴꦤ꧀ꦠꦼꦤ꧀?꧇

꧋꧇ꦎꦃ꧈ꦱꦮꦼꦒ꧀ꦥꦶꦠ꧀ꦥꦶꦠ꧀ꦠꦤ꧀ꦏꦭꦶꦪꦤ꧀ꦛꦺꦴꦭꦺ꧇ꦲ꧀ꦭꦮꦺꦴꦤ꧀ꦠꦼꦤ꧀ꦤꦥ꧈ꦠ?ꦩꦁꦒꦏꦠꦸꦫꦤ꧀ꦥꦶꦤꦫꦏ꧀ ꦩ꧀ꦭꦼꦧꦼꦠ꧀꧇ꦲꦸꦗꦂꦫꦺꦭꦶꦟꦫꦩꦃ꧉ꦮꦺꦴꦁꦭꦺꦴꦫꦶꦧꦤ꧀ꦗꦸꦂꦭꦸꦁꦒꦸꦃꦲꦣꦼꦥ꧀ꦲꦣꦼꦥ꧀ꦥꦤ꧀ꦲꦶꦁꦏꦸꦂꦱꦶꦠꦺꦫꦱ꧀ ꦩꦼꦂꦒꦩꦂꦑꦺꦴꦤꦃꦲꦺꦴꦫꦒꦼꦊꦩ꧀ꦢꦶꦗꦏ꧀ꦭꦸꦁꦒꦸꦃꦗꦼꦫꦺꦴ꧈ꦲꦶꦁꦫꦸꦮꦁꦠꦩꦸ꧉

꧋꧇ꦭꦁꦱꦸꦁꦩꦮꦺꦴꦤ꧀ꦧꦸꦫ꧈ꦠ꧈ꦏꦸꦭꦲꦗꦼꦁꦩꦠꦸꦂ꧈꧇ꦲꦭꦺꦴꦏ꧀ꦏꦺꦩꦂꦑꦺꦴꦤꦃꦏꦫꦺꦴꦫꦢꦤꦠꦲꦠꦶꦤꦺ꧉

꧋꧇ꦩꦁꦒ꧈ꦧꦸ꧉ꦧꦣꦺꦩꦠꦸꦂꦥꦸꦤꦥ?ꦏꦸꦭꦱꦶꦪꦥ꧀ꦩꦶꦫꦼꦁꦔꦏꦼꦤ꧀꧇ꦮꦁꦱꦸꦭ꧀ꦭꦤꦺꦭꦶꦟꦏꦫꦺꦴꦫꦢꦔꦶꦁꦱꦼꦠ꧀ꦭꦸꦁꦒꦸꦃꦲꦺ꧈ꦱꦸꦥꦪꦧꦶꦱꦭꦸꦮꦶꦃꦕꦼꦛꦲꦁꦒꦺꦴꦤꦺꦲꦉꦥ꧀ꦔꦿꦸꦔꦺꦴꦏ꧀ꦤꦺꦲꦥꦱꦶꦁꦲꦉꦥ꧀ꦢꦶꦏꦤ꧀ꦝꦏ꧀ꦤꦺꦢꦺꦤꦶꦁꦠꦩꦸꦤꦺꦏꦸꦮꦶ꧉

꧋ꦔꦠꦼꦤ꧀ꦭꦺꦴꦧꦸꦫ꧈ꦠ꧈ꦏꦸꦭꦤꦶꦏꦶꦗꦺꦁꦏꦺꦭ꧀ꦱꦔꦼꦠ꧀ꦏꦭꦶꦪꦤ꧀ꦏꦸꦕꦶꦁꦲꦶꦁꦏꦁꦱꦺꦴꦏ꧀ꦱꦧꦒꦿꦶꦪꦏꦸꦭ꧉ꦱꦧꦼꦤ꧀ꦢꦶꦤ꧀ꦠꦼꦤ꧀ꦤꦩꦸꦁꦢꦩꦼꦭ꧀ꦏꦶꦱꦿꦸꦃꦭꦤ꧀ꦢꦩꦼꦭ꧀ꦲꦸꦫꦶꦥ꧀ꦧꦺꦴꦠꦼꦤ꧀ꦗꦼꦤ꧀ꦗꦼꦩ꧀꧈ꦩꦺꦃꦱꦧꦼꦤ꧀ꦢꦶꦤ꧀ꦠꦼꦤ꧀ꦏꦸꦭꦫꦶꦧꦸꦠ꧀ꦏꦭꦶꦪꦤ꧀ꦧꦺꦴꦗꦺꦴꦏꦸꦭꦲꦶꦁꦒꦶꦃꦒꦫꦒꦫꦏꦸꦕꦶꦁ꧉

꧋ꦩꦁꦏꦺꦫꦸꦩꦶꦪꦶꦤ꧀ꦠ꧈ꦧꦸ꧉ꦲ꧀ꦭꦏꦸꦕꦶꦁꦔꦺꦱꦶꦤ꧀ꦠꦼꦤ꧀ꦤꦶꦏꦸ?ꦫꦏ꧀ꦱꦒꦼꦢ꧀ꦱꦤ꧀ꦗꦁꦏꦭꦶꦪꦤ꧀ꦲꦶꦁꦏꦁꦏꦒꦸꦔꦤ꧀꧇ꦲꦭꦺꦴꦏ꧀ꦏꦺꦭꦶꦟꦱꦫꦺꦃ꧉

꧋ꦲꦸꦥꦩꦶꦏꦸꦭꦔꦼꦂꦠꦺꦴꦱ꧀ꦱꦶꦤ꧀ꦠꦼꦤ꧀ꦲꦶꦁꦏꦁꦒꦣꦃ꧈ꦏꦸꦭꦧꦺꦴꦠꦼꦤ꧀ꦥꦽꦭꦸꦏꦼꦫꦪꦫꦪꦱꦺꦴꦮꦤ꧀ꦩꦿꦶꦏꦶ꧈ꦧꦸꦫ꧈ꦠ꧈꧇ꦲꦸꦗꦂꦫꦺꦩꦂꦑꦤꦃꦱꦼꦔꦏ꧀

꧋ꦲ꧀ꦭꦩꦼꦤꦮꦶꦩꦏꦠꦼꦤ꧀ ꦭꦗꦼꦁꦏꦼꦂꦱꦤꦶꦥꦸꦤ꧀ꦧꦸꦲꦺꦫꦸꦩꦼꦤꦥ?꧇

꧋ꦏꦸꦭꦚꦸꦮꦸꦤ꧀ꦏꦤ꧀ꦛꦶꦱꦔꦼꦠ꧀ ꦥꦽꦏꦮꦶꦱ꧀ꦏꦸꦕꦶꦁꦩꦼꦤꦶꦏꦢꦶꦥꦸꦤ꧀ꦉꦼꦩ꧀ꦧꦒ꧀ꦮꦺꦴꦤ꧀ꦠꦼꦤ꧀ꦫꦥꦠ꧀ ꦫ꧈ꦠ꧈꧉ꦲꦮꦶꦠ꧀ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦠꦠꦫꦤ꧀ꦗꦼꦭꦺꦃꦲꦶ꧈ꦲꦁꦒꦁꦒꦸꦭꦶꦁꦏꦸꦔꦤ꧀꧈ꦥꦺꦴꦏꦺꦴꦏ꧀ꦏꦺꦥꦿꦶꦥꦸꦤ꧀ꦕꦫꦤꦶꦥꦸꦤ꧀ꦲꦩꦿꦶꦃꦏꦸꦕꦶꦁꦏꦸꦕꦶꦁꦩꦼꦤꦶꦏꦧꦺꦴꦠꦼꦤ꧀ꦲꦁꦒꦁꦒꦸꦩꦭꦶꦃ꧈꧇ꦱꦮꦶꦱ꧀ꦱꦺꦔꦤ꧀ꦝꦏ꧀ꦏꦺꦲꦸꦤꦼꦒ꧀ꦲꦸꦤꦺꦒ꧀ꦒꦺꦩꦫꦁꦧꦸꦫ꧈ꦠ꧈꧈ꦩꦂꦑꦤꦃꦲꦺꦁꦒꦭ꧀ꦥꦩꦶꦠ꧀ꦠꦤ꧀ꦧꦭꦶ꧉ꦱꦲꦺꦴꦫꦲꦺꦴꦫꦤꦺꦲꦠꦶꦤꦺꦮꦶꦱ꧀ꦫꦢꦕꦸꦩꦼꦥ꧀ꦭꦺꦴꦁꦱꦲꦶꦏꦶ꧉

꧋ꦭꦶꦟꦣꦼꦊꦒ꧀ꦝꦼꦊꦒ꧀ꦱꦮꦶꦱ꧀ꦱꦺꦩꦂꦑꦺꦴꦤꦃꦧꦭꦶ꧉ꦢꦢꦶꦫ꧈ꦠ꧈ꦏꦶꦥꦤ꧀ꦕꦺꦤ꧀ꦏꦸꦢꦸꦱꦧꦂꦠꦼꦤꦤ꧀ ꦢꦮꦲꦸꦱꦸꦱ꧀ꦱꦺꦭꦤ꧀ꦗꦼꦩ꧀ꦧꦂꦲꦠꦶꦤꦺ꧉ꦲꦮꦶꦠ꧀ꦏꦸꦢꦸꦧꦶꦱꦔꦼꦩꦺꦴꦁꦮꦂꦒꦤꦺꦱꦶꦁꦢꦸꦮꦺꦤꦶꦮꦠꦏ꧀ꦧꦺꦢꦧꦺꦢ꧉ꦗꦤꦺꦣꦺꦮꦺꦏ꧀ꦏꦺꦧꦶꦪꦺꦤ꧀ꦏꦸꦫꦁꦱꦼꦠꦸꦗꦸꦪꦺꦤ꧀ꦱꦶꦁꦭꦤꦁꦢꦶꦥꦶꦭꦶꦃꦢꦢꦶꦫ꧈ꦠ꧈꧉ꦤꦔꦶꦁꦪꦲꦉꦥ꧀ꦏꦼꦥꦿꦶꦪꦺꦩꦤꦺꦃ꧈ꦮꦂꦒꦮꦶꦱ꧀ꦩꦶꦭꦶꦃꦏꦤ꧀ꦛꦶꦱ꧀ꦮꦫꦲꦏ꧀ꦭꦩꦱꦶ꧉ꦮꦺꦴꦁꦏꦧꦺꦃꦮꦂꦒꦲꦶꦁꦥꦼꦫꦸꦩꦃꦲꦤ꧀ꦲꦺꦴꦫꦲꦤꦱꦶꦁꦒꦼꦊꦩ꧀ꦢꦶꦗꦒꦺꦴꦏ꧀ꦏꦏꦺꦢꦢꦶꦫ꧈ꦠ꧈꧉ꦩꦼꦂꦒꦢꦢꦶꦫ꧈ꦠ ꧈ꦏꦶꦥꦤ꧀ꦕꦺꦤ꧀ꦲꦧꦺꦴꦠ꧀ ꦢꦢꦶꦧꦥꦏ꧀ꦭꦤ꧀ꦱꦶꦩ꧀ꦧꦺꦴꦏ꧀ꦏꦺꦮꦂꦒꦱꦫ꧈ꦠ꧈꧉

꧋꧇ꦩꦱ꧀ꦩꦲꦸꦧꦸꦲꦺꦫꦸꦩꦿꦺꦤꦺ꧈꧇ꦏꦤ꧀ꦝꦤꦺꦭꦶꦟꦭꦁꦱꦸꦁꦤꦭꦶꦏꦱꦶꦁꦭꦤꦁꦧꦭꦶꦱꦏꦥꦶꦠ꧀ꦥꦶꦠ꧀ꦠꦤ꧀ ꦒꦺꦴꦭꦺꦏ꧀ꦏꦿꦶꦔꦼꦠ꧀꧈

꧋ꦲ꧀ꦭꦲꦤꦲꦥꦲꦺꦱꦸꦏ꧀ꦲꦺꦱꦸꦏ꧀ꦩꦫꦣꦪꦺꦴꦃ?ꦥꦶꦠꦏꦺꦴꦤ꧀ꦤꦺꦦꦶꦠꦪꦱꦼꦩꦸꦒꦸꦩꦸꦤ꧀꧈ꦲꦥꦩꦤꦺꦃꦲꦤ꧀ꦢꦸꦭꦸꦥꦿꦲꦺꦤꦤ꧀ꦤꦺꦱꦶꦁꦮꦢꦺꦴꦤ꧀ꦱꦶꦁꦧꦺꦢꦏꦫꦺꦴꦥꦢꦠꦤ꧀꧈ꦏꦠꦺꦴꦤ꧀ꦫꦢꦧꦸꦛꦼꦒ꧀꧈

꧋ꦭꦶꦟꦧꦤ꧀ꦗꦸꦂꦚꦿꦶꦠꦏ꧀ꦏꦏꦺꦲꦥꦱꦶꦁꦢꦶꦏꦤ꧀ꦝꦏ꧀ꦤꦺꦩꦂꦑꦺꦴꦤꦃꦲꦭꦶꦪꦱ꧀ꦧꦸꦲꦺꦫꦸ꧉

꧋꧇ꦪ꧈ꦱꦺꦱꦸꦏ꧀ꦪꦺꦤ꧀ꦥꦱ꧀ꦲꦫꦶꦱꦤ꧀ꦧꦥꦏ꧀ꦧꦥꦏ꧀ꦧꦶꦱꦢꦶꦉꦩ꧀ꦧꦸꦒ꧀ꦥꦿꦶꦪꦺꦲꦥꦶꦏ꧀ꦏꦺ꧈ ꦮꦁꦱꦸꦭꦤꦺꦦꦶꦠꦪꦱꦫꦺꦃ꧉

꧋ꦥꦱ꧀ꦲꦫꦶꦱꦤ꧀ꦧꦥꦏ꧀ꦧꦥꦏ꧀ꦲꦶꦁꦲꦕꦫꦭꦲꦶꦤ꧀ꦭꦲꦶꦤ꧀ ꦦꦶꦠꦪꦔꦤ꧀ꦝꦂꦫꦏꦺꦲꦥꦱꦶꦁꦢꦢꦶꦥꦔꦸꦤꦼꦒ꧀ꦲꦸꦤꦼꦒ꧀ꦒꦺꦱꦭꦃꦱꦶꦗꦶꦮꦂꦒ꧈ꦪꦲꦶꦏꦸꦥꦽꦏꦫꦏꦸꦕꦶꦁ꧉

꧋ꦥꦽꦏꦮꦶꦱ꧀ꦏꦸꦕꦶꦁꦥꦸꦤꦶꦏꦏꦢꦺꦴꦱ꧀ꦥꦸꦤ꧀ꦢꦶꦱꦲꦺꦤꦶꦥꦸꦤ꧀ꦩꦁꦒꦏꦶꦠꦉꦩ꧀ꦧꦒ꧀ꦱꦼꦱꦉꦁꦔꦤ꧀꧈ꦩꦁꦒꦱꦶꦤ꧀ꦠꦼꦤ꧀ꦲꦶꦁꦏꦁꦧꦣꦺꦔꦼꦤ꧀ꦢꦶꦏꦫꦸꦩꦶꦪꦶꦤ꧀

?ꦲꦸꦗꦂꦫꦺꦦꦶꦠꦪꦱꦫꦺꦃ꧉

꧋ꦥꦏ꧀ꦲꦺꦫꦸꦔꦕꦸꦁꦭꦸꦮꦶꦃꦣꦶꦱꦶꦏ꧀꧈꧇ꦏꦛꦃꦲꦶꦥꦸꦤ꧀ꦏꦸꦕꦶꦁꦲꦶꦁꦏꦮꦱꦤ꧀ ꦫ꧈ꦠ꧈ꦏꦶꦠꦥꦸꦤꦶꦏꦫꦶꦤꦲꦺꦴꦱ꧀ꦱꦩ꧀ꦥꦸꦤ꧀ꦲꦁꦒꦁꦒꦸꦱꦔꦼꦠ꧀꧈ꦲ꧀ꦭꦥꦿꦶꦥꦸꦤ꧀ ꦮꦤ꧀ꦠꦸꦤ꧀ꦩꦺꦤꦺꦏ꧀ꦩꦶꦁꦒꦃꦥꦾꦤ꧀ꦲꦺꦴꦪꦏ꧀ꦲꦺꦴꦪꦏ꧀ꦏꦤ꧀ ꦱ꧀ꦮꦤ꧀ꦠꦼꦤ꧀ꦤꦺꦥꦠꦶꦁꦒ꧀ꦭꦺꦴꦣꦏ꧀ꦥꦠꦶꦁꦒ꧀ꦭꦸꦣꦸꦏ꧀ꦲꦁꦒꦁꦒꦸꦠꦶꦪꦁꦠꦶꦊꦩ꧀꧈ꦧꦺꦴꦠꦼꦤ꧀ꦤꦩꦸꦁꦥꦸꦤꦶꦏ꧈ꦤꦼꦭꦺꦏ꧀ꦭꦤ꧀ꦔꦸꦪꦸꦃꦲꦸꦒꦶꦱꦲꦼꦁꦒꦺꦴꦤ꧀ꦲꦼꦁꦒꦺꦴꦤ꧀꧈ꦒꦿꦶꦪꦏꦸꦭꦲꦩ꧀ꦧꦼꦠꦶꦥꦸꦤ꧀ꦱꦩ꧀ꦥꦸꦤ꧀ꦏꦢꦺꦴꦱ꧀ꦱꦸꦮꦏꦩꦂꦒꦱꦠ꧀ꦮ꧉ꦲꦤ꧀ꦗꦭꦂꦫꦶꦩꦺꦃꦱꦧꦼꦤ꧀ꦢꦶꦤ꧀ꦠꦼꦤ꧀ꦏꦸꦭꦥꦢꦸꦏꦭꦶꦪꦤ꧀ꦱꦶꦩ꧀ꦧꦺꦴꦏ꧀ꦮꦺꦢꦺꦴꦏ꧀ꦒꦫꦒꦫꦠꦼꦭꦺꦏ꧀ꦏꦸꦕꦶꦁ꧉ꦱꦶꦤ꧀ꦠꦼꦤ꧀ꦲꦶꦁꦏꦁꦏꦒꦸꦔꦤ꧀ꦏꦸꦕꦶꦁ꧈ꦲꦩ꧀ꦧꦺꦴꦏ꧀ꦲꦶꦁꦒꦶꦃꦲꦢꦶꦥꦸꦤ꧀ꦏꦤ꧀ꦝꦁ꧈ꦱꦸꦥꦢꦺꦴꦱ꧀ꦲꦩ꧀ꦧꦺꦴꦠꦼꦤ꧀ ꦏ꧀ꦭꦪꦥꦤ꧀꧈ꦪꦺꦤ꧀ꦲꦩ꧀ꦧꦺꦴꦠꦼꦤ꧀ꦲꦶꦁꦒꦶꦃꦢꦶꦥꦱꦁꦔꦶꦏꦭꦸꦁꦩꦶꦤꦁꦏꦠꦤ꧀ꦝ꧈ꦢꦢꦺꦴꦱ꧀ꦪꦺꦤ꧀ꦮꦺꦴꦤ꧀ꦠꦼꦤ꧀ꦤꦥꦤꦥ꧈ꦲꦸꦥꦩꦶꦲꦤ꧀ꦗꦼꦧ꧀ꦭꦺꦴꦏ꧀ꦏꦏꦼꦤ꧀ꦥꦾꦤ꧀ ꦩꦁꦏꦺꦏꦤ꧀ꦠꦸꦤ꧀ꦤꦸꦠꦸꦃꦲꦶꦁꦏꦁꦒꦣꦃꦏꦼꦂꦱꦤꦶꦥꦸꦤ꧀ꦠꦁꦒꦸꦁꦗꦮꦧ꧀꧇ꦲꦸꦗꦂꦫꦺꦥꦏ꧀ꦲꦺꦫꦸꦢꦮ꧉

꧋꧇ꦏꦸꦕꦶꦁꦠꦼꦁꦒꦿꦶꦪꦏꦛꦃ꧈ꦤꦔꦶꦁꦩꦼꦤꦮꦶꦏꦸꦭꦏꦭꦸꦁꦔꦶꦥꦿꦶꦥꦸꦤ꧀ ꦔ꧀ꦒꦶꦃ꧈꧈꧈ꦮꦺꦴꦁꦏꦸꦕꦶꦁꦏꦸꦕꦶꦁꦤꦶꦏꦸꦱꦤꦺꦱ꧀ꦒꦣꦃꦲꦤ꧀ꦏꦸꦭ꧉ꦏꦸꦭꦤꦩꦸꦁꦱꦽꦩꦶꦩꦏꦤꦶ꧉ꦤꦩꦸꦁꦏꦿꦤꦩꦼꦱꦏ꧀ꦏꦏꦼꦤ꧀ꦩꦮꦺꦴꦤ꧀ ꦥꦢꦺꦴꦱ꧀ꦠꦼꦠꦼꦣꦤ꧀ꦱꦩꦼꦤꦶꦏꦧꦺꦴꦠꦼꦤ꧀ꦒꦩ꧀ꦥꦶꦭ꧀ꦠꦸꦩꦿꦥ꧀ꦥꦶꦥꦸꦤ꧀ꦏꦸꦕꦶꦁꦲꦶꦁꦏꦁꦧꦺꦴꦠꦼꦤ꧀ꦒꦣꦃꦠꦸꦮꦤ꧀ꦲꦭꦶꦪꦱ꧀ꦏꦸꦕꦶꦁꦭꦶꦪꦂ꧉ꦩꦶꦭꦪꦺꦤ꧀ꦱꦸꦩꦼꦫꦥ꧀ꦏꦸꦕꦶꦁꦲꦶꦁꦏꦁꦏꦼꦭꦸꦮꦺꦤ꧀ꦭꦗꦼꦁꦏꦸꦭꦥꦏꦤ꧀ꦤꦶ꧉ꦤꦶꦁꦏꦸꦕꦶꦁꦏꦸꦕꦶꦁꦮꦲꦸꦧꦤ꧀ꦗꦸꦂꦠꦸꦩꦤ꧀ ꦧꦺꦴꦠꦼꦤ꧀ꦥꦸꦫꦸꦤ꧀ꦏꦺꦱꦃ꧈꧇ꦲꦸꦗꦂꦫꦺꦥꦏ꧀ꦯꦤ꧀ꦠ꧉

꧋ꦏꦸꦭꦲꦶꦁꦒꦶꦃꦱꦩꦶꦥꦏ꧀ ꦯꦤ꧀ꦠ꧈ꦱꦢꦽꦩꦶꦩꦏꦤꦶ꧈ꦧꦺꦴꦠꦶꦤ꧀ꦔꦶꦔꦸꦱꦼꦤꦺꦴꦱꦮꦺꦴꦤ꧀ꦠꦼꦤ꧀ꦒꦿꦺꦴꦪꦮꦺꦴꦤ꧀ꦠꦼꦤ꧀ꦏꦸꦕꦶꦁ꧇ꦲꦸꦗꦂꦫꦺꦥ꧀ ꦯꦶꦤ꧀ ꦱꦶꦁꦲꦺꦴꦩꦃꦲꦺꦲꦸꦁꦏꦸꦂꦲꦸꦁꦏꦸꦂꦫꦤ꧀ꦏꦫꦺꦴꦥꦏ꧀ꦲꦺꦫꦸ꧉

꧋ꦭꦶꦪꦭꦶꦪꦤꦺꦥꦣꦥꦠꦶꦁꦠ꧀ꦭꦼꦧꦸꦁ꧉ꦩꦭꦃꦲꦤꦱꦶꦁꦕꦿꦶꦠ꧈ꦪꦺꦤ꧀ꦲꦺꦱꦸꦏ꧀ꦲꦺꦱꦸꦏ꧀ ꦧꦸꦏꦏ꧀ꦭꦮꦁ꧈ꦲꦤꦏꦸꦕꦶꦁꦕꦕꦃꦥꦥꦠ꧀ꦢꦶꦧꦸꦮꦁꦲꦶꦁꦭꦠꦂꦲꦺꦴꦩꦃꦲꦺ꧉ꦲꦼꦩ꧀ꦧꦸꦃꦱꦥꦱꦶꦁꦧꦸꦮꦁ꧉ꦲꦺꦴꦫꦠꦼꦒꦲꦤ꧀ꦢꦸꦭꦸꦏꦲꦤꦤ꧀ꦤꦺꦏꦸꦕꦶꦁꦱꦶꦁꦩꦼꦩꦼꦭꦱ꧀꧈ꦧꦤ꧀ꦗꦸꦂꦢꦶꦲꦺꦴꦥꦺꦤ꧀ꦤꦶ꧈ꦱꦲꦶꦏꦶꦏꦸꦕꦶꦁꦏꦸꦮꦶꦮꦶꦱ꧀ꦒꦼꦣꦺꦒꦼꦣꦺ꧉

꧋꧇ꦏꦸꦭꦔꦺꦴꦥꦺꦤ꧀ꦤꦶꦏꦸꦕꦶꦁꦤꦩꦸꦁꦲꦣꦺꦣꦱꦂꦫꦱꦏꦼꦩꦤꦸꦱꦶꦪꦲꦤ꧀ꦩꦮꦺꦴꦤ꧀ꦫꦱꦲꦱꦶꦃꦣꦸꦩꦠꦼꦁꦱꦼꦱꦩꦶꦒꦼꦱꦁ꧈ꦲꦶꦁꦏꦁꦱꦩꦶꦱꦩꦶꦠꦶꦠꦃꦲꦺꦓꦸꦱ꧀ꦠꦶ꧉ꦩꦶꦭꦩꦁꦒꦲꦶꦁꦏꦁꦲꦩ꧀ꦧꦺꦴꦏ꧀ꦧꦶꦭꦶꦃꦏꦼꦂꦱꦔꦣꦺꦴꦥ꧀ꦱꦶꦏꦸꦕꦶꦁꦲꦶꦁꦏꦁꦮꦺꦴꦤ꧀ꦠꦼꦤ꧀ꦥꦁꦒꦺꦤ꧀ꦤꦤ꧀ꦏꦸꦭ꧈ꦏꦸꦭꦩꦠꦸꦂꦤꦸꦮꦸꦤ꧀ꦱꦔꦼꦠ꧀꧇ꦔꦼꦤ꧀ꦝꦶꦏꦤꦺꦥꦏ꧀ꦄꦂꦭꦶ꧈ꦮꦂꦒꦱꦶꦁꦥꦭꦶꦁꦠꦸꦮꦲꦶꦁꦫ꧈ꦠ꧈ꦏꦺꦴꦤꦺꦴ꧈ꦩꦸꦭꦢꦶꦲꦁꦒꦼꦥ꧀ꦩꦶꦤꦁꦏꦱꦼꦱꦼꦥꦸꦃ꧉

ꦕꦼꦥ꧀!

꧋ꦮꦺꦴꦁꦮꦺꦴꦁꦲꦺꦴꦫꦲꦤꦱꦶꦁꦕꦼꦩꦸꦮꦶꦠ꧀꧈ꦱꦶꦁꦱꦼꦤꦼꦁꦏꦫꦺꦴꦏꦸꦕꦶꦁꦫꦸꦩꦁꦱꦏꦪꦲꦤꦏꦁꦧꦺꦭꦤꦶꦏꦤ꧀ꦛꦶꦥꦿꦚꦠꦤ꧀ꦩꦲꦸ꧉ꦩꦸꦭꦥꦶꦉꦩ꧀ꦧꦸꦏ꧀ꦏꦤ꧀ꦔꦼꦤꦤꦶꦏꦸꦕꦶꦁꦢꦶꦱꦶꦒꦼꦒ꧀ꦠꦼꦏꦤ꧀ꦱꦼꦩꦺꦴꦤꦺꦴ꧉ꦫꦥꦠ꧀ꦧꦤ꧀ꦗꦸꦂꦢꦶꦠꦸꦠꦸꦥ꧀ꦩꦼꦂꦒꦮꦶꦱ꧀ꦲꦺꦴꦫꦲꦤꦩꦤꦺꦃꦱꦶꦁꦏꦸꦢꦸꦢꦶꦉꦩ꧀ꦧꦸꦒ꧀꧈

꧋ꦲꦺꦫꦸꦧꦭꦶꦏꦤ꧀ꦛꦶꦫꦒꦏꦁꦊꦩꦼꦱ꧀ ꦏꦪꦮꦼꦂꦑꦸꦢꦫꦲꦶꦭꦁꦒꦥꦶꦠ꧀ꦠꦺ꧉

꧋꧇ꦥꦶꦪꦺꦥꦏ꧀ ꦲꦱꦶꦭ꧀ꦭꦺꦫꦥꦠ꧀?ꦥꦶꦠꦏꦺꦴꦤ꧀ꦤꦺꦩꦂꦑꦺꦴꦤꦃꦱꦶꦁꦩꦼꦛꦸꦏ꧀ꦏꦏꦺꦠꦼꦏꦤꦺꦱꦶꦁꦭꦤꦁ꧉

꧋꧇ꦧ꧀ꦭꦸꦤ꧀ꦢꦼꦂ꧈꧇ꦮꦁꦱꦸꦭꦤ꧀ꦤꦺꦲꦺꦫꦸꦭꦺꦴꦪꦺꦴ꧉

꧋꧇ꦧ꧀ꦭꦸꦤ꧀ꦢꦼꦂꦏꦼꦥꦿꦶꦪꦺ꧈ꦠ?꧇ꦥꦶꦠꦏꦺꦴꦤ꧀ꦤꦺꦩꦂꦑꦺꦴꦤꦃꦥꦼꦤꦱꦫꦤ꧀꧈

꧋ꦲꦼꦫꦸꦧꦤ꧀ꦗꦸꦂꦚꦿꦶꦠꦏ꧀ꦏꦏꦺꦭꦏꦸꦤꦺꦫꦥꦠ꧀꧈ꦏꦧꦺꦃꦢꦶꦕꦿꦶꦠꦏ꧀ꦤꦺꦒꦩ꧀ ꦧ꧀ꦭꦁꦠꦤ꧀ꦥꦲꦤꦱꦶꦁꦏꦼꦕꦶꦕꦶꦂ꧉

꧋꧇ꦪꦺꦤ꧀ꦔꦺꦴꦤꦺꦴꦲꦏꦸꦧꦏꦭ꧀ꦩꦶꦒꦸꦤꦏ꧀ꦏꦏꦺꦕꦫꦏꦸꦣꦺꦮꦺꦏꦁꦒꦺꦴꦔꦥꦺꦴꦏ꧀ꦏꦏꦺꦏꦸꦕꦶꦁꦏꦸꦕꦶꦁꦏꦸꦮꦶ꧉ꦏꦼꦱꦧꦂꦫꦤꦏꦸꦮꦶꦱ꧀ꦲꦼꦤ꧀ꦠꦺꦏ꧀!꧇ꦲꦸꦗꦂꦫꦺꦩꦂꦑꦺꦴꦤꦃꦏꦤ꧀ꦛꦶꦏꦼꦧꦏ꧀ꦥꦔꦶꦒꦶꦠ꧀ꦲꦶꦒꦶꦠ꧀꧈

꧋꧇ꦲꦺꦴꦫꦱꦃꦤꦺꦏꦤꦺꦏꦭ꧀ꦲꦺꦴ꧈ꦧꦸ꧈꧇ꦲꦺꦫꦸꦔꦺꦭꦶꦏ꧀ꦏꦏꦺ꧉ꦤꦔꦶꦁꦩꦂꦏꦑꦺꦴꦤꦃꦮꦶꦱ꧀ꦲꦺꦴꦫꦲꦁꦒꦸꦧꦿꦶꦱ꧀ꦲꦠꦶꦤꦺꦮꦶꦱ꧀ꦢꦶꦏꦼꦧꦏ꧀ꦏꦶꦢꦺꦤꦶꦁꦫꦱꦱꦼꦔꦶꦠ꧀꧈ꦱꦼꦔꦶꦠ꧀ꦩꦫꦁꦏꦸꦕꦶꦁꦏꦸꦕꦶꦁꦱꦶꦁꦲꦩ꧀ꦧꦼꦭꦶꦁꦏꦸꦮꦶ꧉

꧋ꦱꦺꦱꦸꦏ꧀ꦏꦺꦧꦭꦶꦱꦏꦏꦤ꧀ꦠꦺꦴꦂꦩꦂꦑꦺꦴꦤꦃꦭꦁꦱꦸꦁꦩꦩ꧀ꦥꦶꦂꦒꦺꦴꦭꦺꦏ꧀ꦫꦕꦸꦤ꧀ꦠꦶꦏꦸꦱ꧀꧈ꦩꦫꦁꦧꦏꦸꦭ꧀ꦭꦺꦺꦣꦺꦮꦺꦏ꧀ꦏꦺꦤꦼꦩ꧀ꦧꦸꦁꦫꦕꦸꦤ꧀ꦱꦶꦁꦥꦭꦶꦁꦏꦼꦫꦱ꧀꧈ꦩꦶꦏꦶꦂꦫꦺ꧈ꦲꦸꦏꦸꦂꦫꦤ꧀ꦠꦶꦏꦸꦱ꧀ꦭꦤ꧀ꦏꦸꦕꦶꦁꦫꦏ꧀ꦧꦺꦢ꧈ꦪꦺꦤ꧀ꦲꦺꦴꦫꦱꦶꦁꦥꦭꦶꦁꦏꦼꦫꦱ꧀ꦩꦼꦁꦏꦺꦴꦩꦸꦤ꧀ꦝꦏ꧀ꦲꦺꦴꦫꦩꦗꦿꦱ꧀꧈

꧋ꦠꦼꦏꦤ꧀ꦲꦺꦴꦩꦃꦮꦶꦱ꧀ꦱꦺꦴꦫꦺ꧉ꦱꦮꦶꦱ꧀ꦱꦺꦕꦸꦕꦸꦭ꧀ꦥꦼꦔꦁꦒꦺꦴꦫꦕꦸꦤ꧀ꦲꦺꦁꦒꦭ꧀ꦢꦶꦱꦸꦤ꧀ꦠꦏ꧀ꦲꦶꦁꦮꦣꦃꦏꦼꦂꦣꦸꦱ꧀ꦥꦔꦤ꧀ꦤꦤ꧀꧈ꦢꦶꦕꦩ꧀ꦥꦸꦂꦏꦫꦺꦴꦲꦶꦮꦏ꧀ꦥꦶꦠꦶꦏ꧀ꦱꦶꦁꦮꦶꦱ꧀ꦢꦶꦱꦶꦪꦥ꧀ꦥꦏꦺꦱꦢꦸꦫꦸꦁꦔꦺ꧉ꦱꦸꦥꦪꦫꦕꦸꦤ꧀ꦤꦺꦧꦶꦱꦕꦩ꧀ꦥꦸꦂꦫꦠ꧈ꦩꦂꦑꦺꦴꦤꦃꦏꦼꦥꦼꦏ꧀ꦱꦩꦺꦴꦭꦏ꧀ꦩꦭꦶꦏ꧀ꦥꦺꦴꦠꦺꦴꦁꦔꦤ꧀ꦲꦶꦮꦏ꧀ꦩꦲꦸ꧈ꦢꦶꦥꦼꦤꦼꦠ꧀ꦥꦼꦤꦼꦠ꧀ꦠꦏꦺꦲꦶꦁꦫꦕꦸꦤ꧀꧈ꦲꦁꦏꦃꦲꦺꦩꦼꦁꦏꦺꦴꦱꦸꦫꦸꦥ꧀ ꦮꦼꦏ꧀ꦠꦸꦤꦺꦏꦸꦕꦶꦁꦏꦸꦕꦶꦁꦥꦣꦩꦼꦠꦸ꧈ꦫꦕꦸꦤ꧀ꦏꦸꦮꦶꦲꦉꦥ꧀ꦢꦶꦥꦱꦁꦲꦶꦁꦥꦥꦤ꧀ꦱꦶꦁꦧꦶꦪꦱꦢꦶꦱꦧꦏꦸꦕꦶꦁ꧉ꦢꦸꦩꦢꦏꦤ꧀꧉꧉꧉꧉

ꦤꦶꦁꦤꦺꦴꦁ꧉꧉꧉

ꦧꦺꦭ꧀ꦠꦩꦸꦩꦸꦤꦶꦒꦼꦩꦺꦴꦤ꧀ꦠꦁꦱꦼꦫꦸ꧉

꧋ꦩꦂꦏꦺꦴꦤꦃꦚꦺꦭꦺꦃꦲꦏꦺꦏꦼꦂꦣꦸꦱ꧀ꦮꦣꦃꦲꦶꦮꦏ꧀ꦥꦶꦠꦶꦏ꧀ꦱꦶꦁꦮꦶꦱ꧀ꦢꦶꦕꦩ꧀ꦥꦸꦂꦫꦕꦸꦤ꧀ ꦢꦶꦒ꧀ꦭꦺꦛꦏ꧀ꦏꦏꦺꦔꦺꦴꦤꦺꦴꦮꦲꦺꦲꦶꦁꦕꦼꦣꦏ꧀ꦥꦁꦒꦺꦴꦤ꧀ꦤꦤ꧀ꦲꦱꦃꦲꦱꦃ꧉ꦣꦺꦮꦺꦏ꧀ꦏꦺꦚꦺꦴꦥꦺꦴꦠ꧀ꦱꦫꦸꦁꦠꦔꦤ꧀ꦥ꧀ꦭꦱ꧀ꦠꦶꦏ꧀ꦱꦶꦁꦢꦶꦒꦸꦤꦏ꧀ꦏꦏꦺꦏꦁꦒꦺꦴꦚꦩ꧀ꦥꦸꦂꦫꦕꦸꦤ꧀ ꦧꦤ꧀ꦗꦸꦂꦒꦒꦺꦩꦼꦚꦁꦔꦉꦥ꧀ꦱꦥꦼꦂꦭꦸꦧꦸꦏꦏ꧀ꦭꦮꦁ꧉

꧋꧇ꦎꦃ꧈ꦕꦃꦧꦒꦸꦱ꧀ꦠꦱꦶꦁꦠꦼꦏ꧈ꦏꦺꦴꦏ꧀ꦲꦺꦴꦫꦏꦧꦂꦏꦧꦂꦤꦺꦴꦏ꧀ꦪꦺꦤ꧀ꦲꦉꦥ꧀ꦩꦿꦺꦤꦺ꧈꧇ꦲꦸꦗꦂꦫꦺꦩꦫꦁꦠꦩꦸꦱꦶꦁꦠꦼꦏ꧈ꦏꦁꦲꦺꦴꦫꦭꦶꦪꦲꦤꦏ꧀ꦏꦺꦮꦺꦢꦺꦴꦏ꧀ꦱꦶꦁꦩꦥꦤ꧀ꦲꦤ꧀ꦱꦺꦗꦺꦏꦼꦕꦩꦠ꧀ꦠꦤ꧀꧈

꧋꧇ꦲꦶꦏꦶꦩꦲꦸꦏꦼꦥꦼꦤꦼꦂꦫꦤ꧀ꦲꦤꦲꦕꦫꦲꦶꦁꦕꦼꦣꦏ꧀ꦏꦺꦤꦺ꧈ꦧꦸ꧉ꦩꦼꦱꦶꦱꦤ꧀ꦩꦩ꧀ꦥꦶꦂ꧈꧇ꦮꦁꦱꦸꦭꦤ꧀ꦤꦺꦡꦫꦶ꧈ꦲꦤꦏ꧀ꦏꦺꦮꦢꦺꦴꦤ꧀

꧋꧇ꦊꦉꦱ꧀ ꦧꦸ꧉꧇ꦡꦶꦤ꧀ꦡꦺꦴꦤ꧀ ꦩꦤ꧀ꦠꦸꦤꦺꦚꦩ꧀ꦧꦸꦁꦔꦶꦧꦼꦤꦼꦂꦫꦏꦺ꧉

꧋꧇ꦏꦺꦤꦺꦏꦺꦤꦺꦩ꧀ꦭꦼꦧꦸꦏꦺꦤꦺ꧈ ꦩꦸꦤꦶꦔꦺꦴꦤꦺꦴꦏꦫꦺꦴꦚꦤ꧀ꦝꦏ꧀ꦥꦸꦠꦸꦭꦤꦁꦱꦶꦁꦭꦒꦶꦲꦸꦩꦸꦂꦱꦼꦠꦼꦔꦃꦠꦲꦸꦤ꧀ꦏꦸꦮꦶ꧉

꧋ꦮꦺꦴꦁꦠꦼꦭꦸꦧꦤ꧀ꦗꦸꦂꦥꦣꦗꦒꦺꦴꦁꦔꦤ꧀ꦲꦶꦁꦫꦸꦮꦁꦠꦩꦸꦏꦫꦺꦴꦒꦺꦴꦗꦺꦒ꧀ꦒꦤ꧀ꦔꦸꦢꦁꦨꦒꦱ꧀ ꦥꦸꦠꦸꦤꦺꦩꦂꦑꦤꦃꦱꦶꦁꦧꦒꦸꦱ꧀ꦝꦺꦮꦺ꧉

꧋꧇ꦏꦺꦴꦏ꧀ꦧꦥꦏ꧀ꦫꦏꦺꦠꦺꦴꦏ꧀ ꦧꦸ?꧇ꦲꦭꦺꦴꦏ꧀ꦏꦺꦡꦫꦶꦔꦤ꧀ꦠꦶꦱꦲꦸꦤ꧀ꦠꦫꦧꦥꦭ꧀ꦏꦺꦲꦺꦴꦫꦏꦺꦠꦺꦴꦏ꧀ꦲꦶꦫꦸꦁꦔꦺ꧉

꧋꧇ꦎꦃ꧈ꦧꦥꦏ꧀ꦩꦸꦩꦲꦸꦠꦸꦫꦸ꧉ꦪ꧈ꦠꦏ꧀ꦒꦸꦒꦃꦲꦺ꧉ꦠꦸꦫꦸꦏꦺꦴꦏ꧀ꦲꦺꦴꦫꦔꦼꦂꦠꦶꦮꦪꦃ꧉ꦮꦶꦱ꧀ꦩꦺꦃꦱꦸꦫꦸꦥ꧀ꦢꦸꦫꦸꦁꦠꦔꦶ꧈꧇ꦏꦤ꧀ꦝꦤꦺꦏꦫꦺꦴꦩꦼꦚꦠ꧀꧈ꦲꦉꦥ꧀ꦲꦁꦒꦸꦒꦃꦱꦶꦁꦭꦤꦁ꧉ꦭꦒꦶꦩꦶꦁꦱꦼꦠ꧀ꦲꦭꦺꦃꦭꦶꦩꦁꦗꦁꦏꦃ꧈ꦏꦼꦥꦿꦸꦔꦸꦱ꧀ꦮꦫꦥꦩ꧀ꦧꦼꦔꦺꦴꦏ꧀ꦱꦏꦲꦫꦃꦥꦮꦺꦴꦤ꧀꧉꧉꧉

꧋꧇ꦧꦸ꧉꧉꧉ꦠꦸꦭꦸ꧉꧉꧉꧇꧉

꧋ꦩꦂꦑꦺꦴꦤꦃꦒꦒꦺꦗꦿꦤ꧀ꦠꦭ꧀ꦩꦫꦤꦶꦥꦼꦂꦤꦃꦲꦺꦱ꧀ꦮꦫ꧉ꦠꦼꦏꦤ꧀ꦔꦼꦁꦒꦺꦴꦤ꧀ꦝꦺꦮꦺꦏ꧀ꦏꦺꦏꦒꦼꦠ꧀ꦱꦼꦠꦼꦔꦃꦩꦠꦶ꧉ꦲꦺꦫꦸ꧈ꦧꦺꦴꦗꦺꦴꦤꦺꦔ꧀ꦭꦸꦩ꧀ꦥꦿꦸꦏ꧀ꦲꦶꦁꦔꦉꦥ꧀ꦏꦩꦂꦩꦤ꧀ꦝꦶꦏꦫꦺꦴꦤꦼꦏꦼꦩꦶꦮꦼꦠꦼꦁꦔꦺ꧉ꦠꦸꦠꦸꦏ꧀ꦏꦺꦩꦸꦩ꧀ꦥ꧀ꦭꦸꦏ꧀ ꦫꦲꦶꦤꦺꦥꦸꦕꦼꦠ꧀꧉꧉꧉

꧋꧇ꦠꦸꦭꦸꦁ꧉꧉꧉ ꦩꦂꦑꦺꦴꦤꦃꦧꦼꦔꦺꦴꦏ꧀ꦧꦼꦔꦺꦴꦏ꧀꧈

꧋ꦠꦁꦒꦠꦁꦒꦥꦣꦠꦼꦏ꧉ꦲꦺꦫꦸꦲꦺꦁꦒꦭ꧀ꦲꦺꦁꦒꦭ꧀ꦢꦶꦥ꧀ꦭꦪꦺꦴꦏ꧀ꦤꦺꦩꦼꦚꦁꦫꦸꦩꦃꦱꦏꦶꦠ꧀꧈ꦠꦸꦗꦸꦤꦺꦢꦸꦫꦸꦁꦠꦼꦭꦠ꧀꧈ꦚꦮꦤꦺꦲꦶꦱꦶꦃꦏꦼꦠꦸꦠꦸꦠ꧀ꦠꦤ꧀꧈ꦩꦼꦂꦒꦫꦕꦸꦤ꧀ꦱꦶꦁꦩ꧀ꦭꦼꦧꦸꦲꦶꦁꦮꦼꦠꦼꦁꦔꦺꦲꦶꦏꦸꦏꦊꦧꦶꦫꦕꦸꦤ꧀ꦱꦶꦁꦒꦤꦱ꧀ꦏꦼꦂꦗꦤꦺꦕꦼꦥꦼꦠ꧀꧈

꧋ꦱꦮꦶꦱ꧀ꦱꦺꦏꦺꦴꦤ꧀ꦝꦶꦱꦶꦏꦼꦱꦺꦲꦠ꧀ꦠꦤꦺꦲꦺꦫꦸꦮꦶꦱ꧀ꦥꦸꦭꦶꦃ꧈ꦣꦺꦮꦺꦏ꧀ꦏꦺꦕꦿꦶꦠꦭꦫꦃꦭꦫꦃꦲꦺꦲꦺꦴꦭꦺꦲꦺꦏꦼꦫꦕꦸꦤ꧀ꦤꦤ꧀꧈ꦠꦔꦶꦠꦸꦫꦸꦤꦭꦶꦏꦲꦉꦥ꧀ꦩꦼꦚꦁꦏꦩꦂꦩꦤ꧀ꦝꦶꦏꦺꦴꦏ꧀ꦲꦤꦣꦺꦴꦱ꧀ꦲꦶꦱꦶꦲꦪꦩ꧀ꦱꦶꦁꦒꦸꦩ꧀ꦭꦺꦛꦏ꧀ꦲꦶꦁꦕꦼꦣꦏ꧀ꦲꦱꦃꦲꦱꦃꦲꦤ꧀꧈ꦢꦶꦏꦶꦫꦱꦶꦁꦮꦢꦺꦴꦤ꧀ꦭꦭꦶꦩꦼꦂꦒꦱꦼꦭꦏ꧀ꦏꦼꦱꦸꦱꦸ-ꦱꦸꦱꦸꦤꦩꦺꦴꦤꦶꦠꦩꦸ꧉ꦢꦺꦤꦶꦁꦲꦺꦫꦸꦣꦺꦴꦱ꧀ꦧꦤ꧀ꦗꦸꦂꦢꦶꦲꦩꦤ꧀ꦏꦺ꧈ꦢꦶꦱꦺꦭꦺꦃꦩꦺꦗꦩꦏꦤ꧀꧈ꦲꦺꦫꦸꦗꦸꦥꦸꦏ꧀ꦱꦥꦺꦴꦠꦺꦴꦁ ꦩꦼꦂꦒꦏꦺꦠꦺꦴꦏ꧀ꦏꦺꦲꦺꦤꦏ꧀꧈ꦧꦸꦧꦂꦩꦔꦤ꧀ꦮꦼꦠꦼꦁꦔꦺꦏꦿꦱꦱ꧀ꦭꦼꦩꦼꦠ꧀ꦱ꧀ꦭꦼꦩꦼꦠ꧀ꦭꦤ꧀ꦒꦸꦭꦸꦤꦺꦏꦿꦱꦏꦪꦏꦼꦧꦏꦂ꧉ꦣꦺꦮꦺꦏꦺꦱꦣꦂꦪꦺꦤ꧀ꦮꦶꦱ꧀ꦱꦭꦃꦩꦔꦤ꧀꧈ ꦩꦸꦭꦧꦤ꧀ꦗꦸꦂꦧꦼꦔꦺꦴꦏ꧀ꦗꦭꦸꦏ꧀ꦠꦸꦭꦸꦁ꧉

꧋ꦩꦂꦏꦑꦺꦴꦤꦃꦫꦸꦩꦁꦱꦏꦼꦮꦶꦫꦁꦔꦤ꧀ꦭꦤ꧀ꦏꦼꦥꦼꦏ꧀ꦱꦏꦸꦢꦸꦔꦏꦺꦴꦤꦶꦪꦺꦤ꧀ꦲꦪꦩ꧀ꦱꦶꦁꦢꦶꦕꦶꦕꦶꦥ꧀ꦥꦶꦢꦺꦤꦶꦁꦱꦶꦁꦭꦤꦁꦏꦸꦮꦶꦥꦤ꧀ꦕꦺꦤ꧀ꦮꦶꦱ꧀ꦢꦶꦕꦩ꧀ꦥꦸꦂꦫꦶꦫꦕꦸꦤ꧀ꦭꦤ꧀ꦲꦁꦏꦃꦲꦺꦏꦁꦒꦺꦴꦔꦿꦕꦸꦤ꧀ꦏꦸꦕꦶꦁꦱꦮꦶꦱ꧀ꦱꦺꦉꦩ꧀ꦧꦸꦒ꧀ꦒꦤ꧀ꦲꦶꦁꦫꦥꦠ꧀ ꦫ꧈ꦠ꧈ꦩꦸꦁꦧ꧀ꦭꦸꦤ꧀ꦢꦼꦂ꧉ꦲꦺꦴꦫꦲꦤꦱꦺꦴꦭꦸꦱꦶ꧉

꧋꧇ꦱꦸꦏ꧀ꦩꦤꦺꦃꦪꦺꦤ꧀ꦠꦶꦤ꧀ꦢꦏ꧀ꦱꦠꦶꦤ꧀ꦢꦏ꧀ꦏꦶꦏꦸꦢꦸꦢꦶꦥꦶꦏꦶꦂꦩꦠꦼꦁ꧉ꦮꦺꦴꦁꦠꦸꦩꦶꦤ꧀ꦢꦏ꧀ꦧꦼꦕꦶꦏ꧀ꦧꦏꦭ꧀ꦤꦼꦩꦸꦧꦼꦕꦶꦏ꧀ ꦱꦸꦮꦭꦶꦏ꧀ꦏꦺꦮꦺꦴꦁꦠꦸꦩꦶꦤ꧀ꦢꦏ꧀ꦲꦭꦏꦸꦮꦶꦲꦺꦴꦫꦧꦺꦢꦏꦫꦺꦴꦔꦸꦤ꧀ꦕꦭ꧀ꦭꦏꦺꦮꦠꦸꦩꦼꦚꦁꦣꦸꦮꦸꦂ꧈ꦲꦺꦴꦫꦮꦸꦫꦸꦁꦮꦠꦸꦏꦸꦮꦶꦧꦏꦭ꧀ꦩꦸꦣꦸꦤ꧀ꦤꦶꦧꦤꦶꦱꦶꦁꦔꦸꦤ꧀ꦕꦭ꧀ꦭꦏꦺ꧉ꦱꦪꦒꦼꦣꦺꦮꦠꦸꦱꦶꦁꦢꦶꦲꦸꦤ꧀ꦕꦭ꧀ꦭꦏꦺ꧈ꦩꦼꦱ꧀ꦛꦶꦤꦺꦲꦸꦒꦱꦪꦭꦫꦫꦱꦤꦺ꧈꧇ꦔꦼꦤ꧀ꦢꦶꦏꦤꦺꦥꦏ꧀ꦄꦂꦭꦶꦤꦭꦶꦏꦤꦶꦭꦶꦏ꧀ꦏꦶꦥꦏ꧀ꦲꦺꦫꦸ꧉

꧋ꦩꦂꦏꦑꦺꦴꦤꦃꦱꦪꦲꦶꦱꦶꦤ꧀ꦭꦤ꧀ꦫꦸꦩꦁꦱꦒꦼꦠꦸꦤ꧀ꦏꦫꦺꦴꦲꦥꦏꦁꦮꦶꦱ꧀ꦢꦶꦠꦶꦤ꧀ꦢꦏ꧀ꦲꦏꦺ꧉

 

******

 

꧋ꦪꦺꦴꦒ꧀ꦪꦏꦂꦠ꧈ꦣꦺꦱꦺꦩ꧀ꦧꦼꦂ ꧇꧒꧐꧒꧓  ꧇꧉