ꦩꦺꦩ꧀ꦧꦩꦺꦩ꧀ꦧ

20 January 2024 | 177 kali
Cerkak By : Dyah Kurniawati

 

ꦩꦺꦩ꧀ꦧꦩꦺꦩ꧀ꦧ

MEMBA – MEMBA

 

ꦢꦺꦤꦶꦁ꧇ꦢꦾꦃꦏꦸꦂꦤꦶꦪꦮꦠꦶ

Dening: Dyah Kurniawati

 

꧋ꦗꦩ꧀ꦱꦶꦗꦶꦧꦼꦔꦶꦫꦺꦴꦩ꧀ꦧꦺꦴꦔꦤ꧀ꦒꦸꦫꦸꦱ꧈ꦩ꧈ꦥ꧈ꦱꦶꦁꦲꦉꦥ꧀ꦩꦺꦭꦸꦲꦕꦫꦤꦺꦁꦯꦸꦫꦧꦪꦮꦶꦱ꧀ꦱꦶꦪꦒꦤꦺꦁꦗꦼꦫꦺꦴꦧꦶꦱ꧀ꦱꦶꦁꦥꦂꦏꦶꦂꦤꦺꦁꦭꦠꦂꦯꦼꦏꦺꦴꦭꦃ꧉ꦩꦺꦃꦱꦼꦥꦸꦭꦸꦃꦩꦼꦤꦶꦠ꧀ꦩꦼꦱꦶꦤ꧀ꦲꦁꦒꦼꦉꦁ꧉ꦧꦶꦱ꧀ꦮꦶꦱ꧀ꦲꦉꦥ꧀ꦢꦶꦧꦸꦣꦭ꧀ꦏꦺ꧈ꦤꦔꦶꦁꦥꦏ꧀ꦮꦶꦢꦢꦢꦸꦫꦸꦁꦏꦠꦺꦴꦤ꧀ ꦏꦧꦺꦃ  ꦲꦶꦔꦏ꧀ꦲꦶꦔꦸꦏ꧀ꦭꦤ꧀ꦔꦉꦥ꧀ꦔꦉꦥ꧀ꦔꦉꦥ꧀ꦗꦸꦩꦼꦣꦈꦭ꧀ꦭꦺꦥꦏ꧀ꦮꦆꦢꦢ꧉    ꦏꦫꦺꦴꦧꦺꦴꦭꦧꦭꦶꦔꦶꦔꦸꦏ꧀ꦗꦩ꧀ꦠꦔꦤ꧀ꦧꦸꦫꦶꦟꦚꦸꦮꦸꦤꦠꦸꦭꦸꦁꦥꦏ꧀ꦨꦸꦢꦶꦚꦸꦱꦸꦭ꧀ꦥꦏ꧀ꦮꦶꦢꦢꦤꦺꦁꦗꦼꦣꦶꦁ꧈ꦩꦼꦂꦒꦏꦼꦱꦸꦮꦺꦤ꧀꧈

꧇ꦥꦏ꧀ꦨꦸꦢꦶ꧈ꦠꦸꦭꦸꦁꦲꦠꦸꦂꦫꦤꦥꦏ꧀ꦮꦶꦢꦢꦩꦲꦸꦲꦏꦸꦮꦼꦫꦸꦃꦩ꧀ꦭꦪꦸꦠꦸꦩꦸꦗꦸꦗꦼꦣꦶꦁ꧇꧉

꧇ꦭꦺꦴ꧈ꦲꦶꦁꦒꦶꦃꦧꦸ꧈ ꦱꦼꦏꦼꦣꦥ꧀꧇꧉

꧋ꦏꦤ꧀ꦝꦔꦺꦴꦤꦺꦴꦥꦏ꧀ꦧꦸꦢꦶꦱꦼꦠꦼꦔꦃꦩ꧀ꦭꦪꦸꦠꦸꦩꦸꦗꦸꦗꦼꦣꦶꦁꦱꦺꦏꦺꦴꦭꦲꦤ꧀ ꦤꦔꦶꦁꦗꦼꦣꦶꦁꦱꦶꦁꦩꦥꦤ꧀ꦲꦤꦱꦼꦏꦺꦴꦭꦲꦤ꧀ꦲꦶꦏꦶꦢꦶꦲꦸꦧꦼꦁꦔꦶꦏꦧꦺꦃꦏꦠꦺꦴꦤ꧀ꦥꦼꦠꦼꦁꦲꦺꦴꦫꦲꦤꦠꦤ꧀ꦝꦠꦤ꧀ꦝꦩꦼꦤꦸꦁꦱꦤꦺꦁꦗꦼꦫꦺꦴꦤꦺ꧉ꦱꦶꦢꦤꦺꦥꦏ꧀ꦨꦸꦢꦶꦧꦭꦶꦏ꧀ꦩꦤꦺꦃꦠꦤ꧀ꦥꦏꦱꦶꦭ꧀꧉

꧇ꦧꦺꦴꦠꦼꦤ꧀ꦲꦺꦤ꧀ꦠꦼꦤ꧀ꦭꦺꦴ꧈ꦧꦸ꧉꧇

꧇ꦭꦃ꧈ꦩꦲꦸꦲꦏꦸꦔꦼꦂꦠꦶꦥꦏ꧀ꦮꦶꦢꦢꦩ꧀ꦭꦼꦧꦸꦗꦼꦣꦶꦁꦱꦶꦁꦕꦼꦣꦏ꧀ꦫꦸꦮꦁꦧ꧈ꦏ꧈ꦥ꧈꧉ꦧꦸꦫꦶꦟꦱꦼꦩꦲꦸꦂꦏꦫꦺꦴꦩꦼꦠꦸꦱꦏꦧꦶꦱ꧀ꦲꦉꦥ꧀ꦩꦼꦱ꧀ꦛꦺꦏ꧀ꦤꦺꦤꦺꦁꦗꦼꦣꦶꦁ꧉ꦤꦔꦶꦁꦗꦁꦏꦃꦲꦺꦏꦤ꧀ꦝꦼꦒ꧀ꦩꦼꦂꦒꦥꦏ꧀ꦏꦂꦪꦢꦶꦩꦺꦤꦺꦃꦲꦶꦲꦸꦱꦸꦭ꧀

꧇ꦢꦶꦠꦺꦭ꧀ꦥꦺꦴꦤ꧀ꦧꦲꦺꦭꦺꦴ꧈ꦧꦸ꧉꧇

꧇ꦱꦩ꧀ꦥꦸꦤ꧀ꦏꦮꦶꦠ꧀ꦮꦲꦸꦏꦸꦭꦧꦭ꧀ꦧꦺꦭ꧀ꦧꦺꦴꦠꦼꦤ꧀ꦢꦶꦲꦁꦏꦠ꧀꧈꧇

꧋ꦲꦩꦼꦩ꧀ ꦏꦧꦺꦃꦱꦶꦁꦤꦺꦁꦧꦶꦱ꧀ꦥꦣꦚꦺꦴꦧꦔꦸꦧꦸꦔꦶꦥꦏ꧀ꦮꦶꦢꦢꦤꦔꦶꦁꦠꦼꦠꦼꦥ꧀ꦲꦺꦴꦫꦧꦶꦱ꧉ꦥꦤ꧀ꦢꦺꦴꦩ꧀ꦗꦩ꧀ꦠꦼꦫꦸꦱ꧀ꦭꦸꦩꦏꦸ꧈ꦥꦏ꧀ꦫꦸꦱ꧀ꦢꦶꦱꦼꦭꦏꦸꦏꦼꦥꦭꦱꦼꦏꦺꦴꦭꦃꦩꦸꦠꦸꦱꦶ꧈

꧇ꦢꦶꦲꦼꦤ꧀ꦠꦺꦤ꧀ꦤꦶꦱꦼꦥꦿꦥꦠ꧀ꦗꦩ꧀ꦩꦤꦺꦃꦪꦺꦤ꧀ꦥꦏ꧀ꦮꦶꦢꦢꦢꦸꦫꦸꦁꦫꦮꦸꦃꦢꦶꦠꦶꦁꦒꦭ꧀ꦧꦲꦺ꧉꧇

꧋ꦢꦸꦫꦸꦁꦔꦤ꧀ꦠꦶꦫꦩ꧀ꦥꦸꦁꦥꦏ꧀ꦫꦸꦱ꧀ꦢꦶꦔꦼꦤ꧀ꦢꦶꦏ꧈ꦭꦏꦺꦴꦏꦲ꧈ꦥ꧈ꦤꦺꦧꦸꦫꦶꦟꦩꦸꦤꦶꦭꦤ꧀ꦤꦺꦁꦭꦪꦂꦩꦸꦤ꧀ꦕꦸꦭ꧀ꦗꦼꦤꦼꦁꦏꦺꦴꦤ꧀ꦠꦏ꧀ꦥꦏ꧀ꦮꦶꦢꦢ꧈

꧇ꦥꦏ꧀ꦮꦶꦢ꧀ ꦗꦼꦤꦼꦔꦤ꧀ꦲꦶꦏꦶꦤꦺꦁꦲꦼꦤ꧀ꦢꦶꦧꦲꦺꦠ꧈ꦢꦶꦠꦸꦁꦒꦸꦱꦧꦶꦱ꧀ꦔꦤ꧀ꦠꦶꦕꦼꦁꦏ꧀ꦭꦸꦔꦼꦤ꧀꧈

꧇ꦲꦏꦸꦱꦲꦶꦏꦶꦤꦺꦁꦠꦼꦂꦩꦶꦤꦭ꧀ ꦧꦸ꧉ꦮꦶꦔꦶꦮꦶꦱ꧀ꦩꦠꦸꦂꦗꦼꦤꦔꦤ꧀ꦪꦺꦤ꧀ꦲꦏꦸꦤꦸꦁꦒꦸꦤꦺꦁꦠꦼꦂꦩꦶꦤꦭ꧀ꦧꦲꦺ꧉ꦭꦤ꧀ꦏꦶꦲꦏꦸꦤꦸꦁꦒꦸꦩꦺꦃꦱꦗꦩ꧀ꦏꦺꦴꦏ꧀ꦧꦶꦱ꧀ꦲꦺꦴꦫꦤ꧀ꦢꦁꦠꦼꦏꦩꦏꦤꦺꦲꦏꦸꦔꦼꦧꦺꦭ꧀ꦗꦼꦤꦼꦔꦤ꧀꧈

꧋ꦗꦮꦧꦤ꧀ꦠꦼꦭ꧀ꦥꦸꦤ꧀ꦱꦏꦱꦼꦧꦿꦁꦔꦒꦺꦠ꧀ꦏꦺꦮꦺꦴꦁꦱꦧꦶꦱ꧀ ꦗꦼꦭꦭꦃꦱ꧀ꦮꦫꦤꦺꦢꦶꦱ꧀ꦥꦶꦏꦼꦂꦢꦢꦶꦏꦿꦸꦔꦸꦏꦧꦺꦃ꧉

꧇ꦭꦺꦴꦃ꧈ꦲꦏꦸꦩꦲꦸꦮꦼꦫꦸꦃꦗꦼꦤꦼꦔꦤ꧀ꦩ꧀ꦭꦏꦸꦤꦺꦁꦗꦼꦣꦶꦁ꧉ꦠꦿꦸꦱ꧀ꦥꦏ꧀ꦨꦸꦢꦶꦒꦺꦴꦭꦺꦏ꧀ꦏꦶꦩꦿꦤꦏꦺꦴꦏ꧀ꦲꦺꦴꦫꦲꦤ꧉ꦲꦶꦁꦒꦶꦃꦱꦩ꧀ꦥꦸꦤ꧀ꦧꦼꦫꦂꦠꦶꦧꦶꦱ꧀ꦭꦁꦱꦸꦁꦩꦼꦭꦸꦤ꧀ꦕꦸꦂꦤꦺꦁꦠꦼꦂꦩꦶꦤꦭ꧀꧈꧇

ꦥꦼꦠ꧀ꦲꦸꦗꦸꦒꦲꦸꦗꦸꦒ꧀ꦠꦺꦭ꧀ꦥꦸꦤ꧀ꦩꦠꦶ꧉

꧋ꦏꦫꦺꦴꦒꦶꦢꦿꦺꦴꦒꦶꦢꦿꦺꦴꦚꦧ꧀ꦭꦺꦏ꧀ꦏꦶꦥꦸꦥꦸꦤꦺꦣꦺꦮꦺ꧈ꦧꦸꦫꦶꦟꦒꦸꦩꦸꦤ꧀ꦤꦺꦲꦺꦴꦫꦮꦶꦱ꧀ꦮꦶꦱ꧀

꧇ꦭꦲꦶꦪꦠ꧈ꦩꦲꦸꦲꦏꦸꦮꦼꦫꦸꦃꦠꦼꦤꦤ꧀ꦭꦺꦴꦥꦏ꧀ꦮꦶꦢꦢꦔꦒꦼꦩ꧀ꦗꦏꦺꦠ꧀ꦲꦶꦉꦁꦲꦁꦒ꧀ꦭꦸꦤꦸꦱ꧀ꦤꦺꦁꦗꦼꦣꦶꦁꦱꦶꦁꦕꦼꦣꦏ꧀ꦫꦸꦮꦁꦧ꧈ꦥ꧈꧉ꦠꦼꦤꦤ꧀ ꦲꦺꦴꦫꦔꦥꦸꦱꦶ꧉꧇

꧋ꦱ꧀ꦮꦱꦤꦠꦩ꧀ꦧꦃꦫꦩꦺꦤꦭꦶꦏꦥꦏ꧀ꦨꦃꦠꦶꦪꦂꦔꦼꦤ꧀ꦢꦶꦏ꧈

꧇ꦲꦏꦸꦩꦲꦸꦪꦮꦼꦫꦸꦃꦥꦏ꧀ꦮꦶꦢꦢꦊꦁꦒꦃꦤꦺꦁꦫꦸꦮꦁꦮꦏꦩꦢ꧀ꦩꦣꦼꦥ꧀ꦔꦭꦺꦴꦂ꧈ꦠꦏ꧀ꦗꦏ꧀ꦤꦺꦁꦧꦶꦱ꧀ꦩꦼꦤꦼꦁꦧꦲꦺꦱꦶꦏ꧀ꦏꦠꦽꦩ꧀ꦏꦫꦺꦴꦲ꧈ꦥ꧈ꦤꦺ꧇

꧇ꦭꦢꦭꦃ꧈ꦒꦺꦏ꧀ꦱꦥꦏꦸꦮꦶ!꧇ꦧꦸꦯꦶꦠꦶꦧꦼꦔꦺꦴꦏ꧀ꦭꦤ꧀ꦭꦸꦁꦒꦸꦃꦲꦺꦠꦤ꧀ꦱꦪꦢꦶꦥꦺꦥꦺꦠ꧀ꦤꦺꦲꦏꦸ꧉ꦏꦱꦏ꧀ꦏꦸꦱꦸꦏ꧀ꦥꦣꦲꦁꦒꦸꦤꦼꦩ꧀ꦏꦼꦢꦢꦺꦪꦤ꧀ꦲꦲꦺꦁꦏꦁꦭꦒꦶꦧꦲꦺꦏ꧀ꦭꦏꦺꦴꦤ꧀꧈

꧋ꦢꦸꦫꦸꦁꦲꦶꦭꦁꦫꦱꦩꦿꦶꦤ꧀ꦢꦶꦁꦔꦺ꧈ꦥꦏ꧀ꦑꦼꦥꦭꦱꦶꦁꦊꦁꦒꦃꦏꦸꦂꦱꦶꦔꦉꦥ꧀ꦩꦺꦭꦸꦤꦶꦩ꧀ꦧꦿꦸꦁꦱꦶꦁꦤꦩ꧀ꦧꦃꦲꦶꦱ꧀ꦮꦱꦤꦠꦤ꧀ꦱꦪꦚꦼꦚꦼꦠ꧀

꧇ꦗꦩ꧀ꦱꦶꦗꦶꦏꦸꦫꦁꦱꦼꦥꦿꦥꦠ꧀ꦏꦸꦠꦼꦏꦤ꧀ꦱꦼꦏꦺꦴꦭꦃꦧꦧ꧀ꦭꦱ꧀ꦠꦸꦩꦸꦗꦸꦫꦸꦮꦔꦤ꧀ꦏꦸꦱꦥꦽꦭꦸꦗꦸꦥꦸꦏ꧀ꦧꦫꦁꦱꦶꦁꦏꦺꦫꦶ꧉ꦫꦢꦏꦒꦺꦠ꧀ꦤꦭꦶꦏꦤꦺꦁꦏꦺꦴꦤꦺꦴꦮꦶꦱ꧀ꦲꦤꦥꦏ꧀ꦮꦶꦢꦢꦭꦸꦁꦒꦸꦃꦤꦺꦁꦱꦺꦴꦥ꦳ꦗꦏꦺꦠꦤ꧀ꦲꦶꦉꦁ꧉꧇

꧋ꦥꦏ꧀ꦏꦼꦥꦭꦲꦩ꧀ꦧꦼꦒꦤ꧀ꦭꦤ꧀ꦝꦸꦁ꧈ꦏꦧꦺꦃꦤꦸꦁꦒꦸꦧꦕꦸꦠ꧀ꦠꦺꦕꦿꦶꦠ꧉

꧇ꦮꦼꦫꦸꦃꦲꦏꦸꦠꦼꦏ꧈ꦥꦏ꧀ꦮꦶꦢꦢꦩꦭꦃꦩꦼꦠꦸꦏꦫꦺꦴꦔꦼꦤ꧀ꦢꦶꦏ꧈

[꧇ꦩꦁꦒꦥꦏ꧀ ꦲꦺꦁꦒꦭ꧀ꦩꦮꦺꦴꦤ꧀ꦧꦶꦱ꧀ꦱꦩ꧀ꦥꦸꦤ꧀ꦱꦸꦩꦢꦾ꧉꧇]꧈ꦱꦶꦢꦤꦺꦫꦢꦏꦼꦱꦸꦱꦸꦲꦏꦸꦤꦸꦠꦸꦠ꧀ꦠꦶꦧꦧ꧀ꦭꦱ꧀ꦤꦺꦁꦭꦥꦔꦤ꧀ꦤꦔꦶꦁꦏꦺꦴꦏ꧀ꦥꦏ꧀ꦮꦶꦢꦢꦩꦭꦃꦲꦺꦴꦫꦲꦤ꧇꧉

꧇ꦄꦔꦸꦢ꦳ꦸꦧꦶꦭ꧀ꦭꦃꦲꦶꦩꦶꦤꦱ꧀ꦱꦾꦲꦶꦠꦺꦴꦤ꧀ꦤꦶꦂꦫꦺꦴꦗꦶꦩ꧀꧇

꧇ꦧꦶꦱ꧀ꦩꦶꦭ꧀ꦭꦃ꧈ꦩꦸꦒꦩꦸꦒꦱ꧀ꦭꦩꦼꦼꦠ꧀ꦲꦺꦴꦫꦲꦤꦲꦭꦔꦤ꧀ꦲꦥꦲꦥ꧇꧉

꧇ꦄꦩꦶꦤ꧀꧈꧇

꧋ꦏꦧꦺꦃꦩꦼꦤꦼꦁꦲꦺꦴꦫꦲꦤꦱꦶꦁꦮꦤꦶꦏꦸꦩꦼꦕꦥ꧀ ꦱꦶꦧꦸꦏ꧀ꦏꦫꦺꦴꦲꦭꦩ꧀ꦥꦶꦏꦶꦂꦫꦤꦺꦣꦺꦮꦺꦣꦺꦮꦺ꧉ꦲꦺꦴꦫꦏꦿꦱꦭꦏꦸꦤꦺꦧꦶꦱ꧀ꦮꦶꦱ꧀ꦚꦼꦣꦏ꧀ꦏꦶꦠꦼꦂꦩꦶꦤꦭ꧀꧈ꦱꦏꦏꦢꦺꦴꦃꦲꦤ꧀ꦏꦠꦺꦴꦤ꧀ꦥꦏ꧀ꦮꦶꦢꦢꦤꦺꦁꦥꦶꦁꦒꦶꦂꦢꦭꦤ꧀ꦔꦉꦥ꧀ꦠꦼꦂꦩꦶꦤꦭ꧀꧈

꧇ꦲꦺ꧈ꦢꦼꦭꦼꦁꦔꦼꦤ꧀ꦱꦶꦏ꧀ꦥꦏ꧀ꦮꦶꦢꦢꦔꦩ꧀ꦧꦃꦊꦩꦃꦲꦥꦲꦺꦴꦫ꧇꧉

꧇ꦲꦸꦱ꧀ ꦮꦶꦱ꧀ꦲꦺꦴꦫꦲꦸꦱꦃꦢꦶꦧꦲꦱ꧀ꦩꦸꦤ꧀ꦝꦏ꧀ꦥꦶꦭꦶꦂꦫꦤꦺꦲꦺꦴꦫꦏꦫꦸꦮꦤ꧀꧈

꧋ꦲꦏꦶꦂꦫꦺꦏꦧꦺꦃꦱꦼꦥꦏꦠ꧀ꦲꦺꦴꦫꦕꦿꦶꦠꦏꦼꦢꦢꦺꦪꦤ꧀ꦲꦶꦏꦶꦩꦤꦺꦃꦲꦶꦁꦔꦉꦥ꧀ꦥꦺꦥꦏ꧀ꦮꦶꦢꦢ꧈ꦱꦸꦥꦪꦥꦶꦏꦶꦂꦫꦤ꧀ꦠꦼꦤꦁ꧉ꦱꦢꦮꦤꦺꦢꦭꦤ꧀ꦢꦽꦩꦶꦩꦶꦭ꧀ꦏꦧꦺꦃꦢꦺꦴꦔꦏꦱ꧀ꦭꦩꦼꦠ꧀ꦠꦤ꧀꧈ꦄꦭ꧀ꦲꦩ꧀ꦢꦸꦭꦶꦭ꧀ꦭꦃꦧꦸꦣꦭ꧀ꦩꦸꦭꦶꦃꦭꦤ꧀ꦕꦂ꧈ꦏꦧꦺꦃꦲꦶꦱꦶꦃꦧꦶꦤꦼꦂꦏꦃꦲꦤ꧀ꦫꦃꦩꦠ꧀ꦠꦺꦓꦸꦱ꧀ꦠꦶꦄꦭ꧀ꦭꦃꦏꦁꦲꦏꦂꦪꦗꦒꦢ꧀꧈

꧋ꦱꦺꦱꦸꦏ꧀ꦏꦺꦤꦭꦶꦏꦤꦺꦁꦏꦤ꧀ꦠꦺꦴꦂꦭꦒꦶꦮꦤꦶꦕꦿꦶꦠ꧉ꦥꦏ꧀ꦮꦶꦢꦢꦩꦸꦁꦢ꧀ꦭꦺꦴꦔꦥ꧀ ꦢ꧀ꦭꦺꦴꦔꦺꦴꦥ꧀ꦲꦶꦱꦶꦃꦲꦺꦴꦫꦥꦼꦂꦕꦪ꧈ꦧꦺꦴꦭꦧꦭꦶꦲꦁꦒꦿꦪꦃꦲꦶꦒꦶꦛꦺꦴꦏ꧀ꦏꦺꦱꦶꦁꦩꦼꦁꦏꦶꦫꦶꦒ꧀꧈ꦲꦏꦸꦠꦤ꧀ꦱꦪꦛꦺꦴꦁꦛꦺꦴꦁꦔꦼꦤ꧀꧈

**********

 

#ꦩꦢꦶꦪꦸꦤ꧀꧇꧒꧓꧇ꦎꦏ꧀ꦠꦺꦴꦧꦼꦂ꧇꧒꧐꧒꧓꧇

#ꦮꦶꦱ꧀ꦏꦥꦕꦏ꧀ꦲꦶꦁꦏꦭꦮꦂꦠꦶꦗꦪꦧꦪꦤꦺꦴꦩꦼꦂ꧇꧑꧑꧇ꦩꦶꦁꦒꦸ꧇꧒꧇ꦤꦺꦴꦥꦺꦩ꧀ꦧꦼꦂ꧇꧒꧐꧒꧓꧇ꦫꦸꦧꦿꦶꦏ꧀ꦲꦤꦲꦤꦧꦲꦺ

 

Leave a Reply

Your email address will not be published. Required fields are marked *