ꦈꦢꦤ꧀ꦮꦪꦃꦱꦺꦴꦫꦺ

9 January 2024 | 142 kali
Cerkak By : Suprayitno Fitra

ꦢꦺꦤꦶꦁ ꦓꦪꦸꦃ꧇ꦬ꧉꧇ꦯꦥꦸꦠꦿ

 

ꦈꦢꦤ꧀ꦮꦶꦮꦶꦠ꧀ꦲꦮꦤ꧀ꦲꦶꦱꦶꦃꦢꦸꦫꦸꦁꦠꦼꦫꦁ꧉ꦏꦼꦥꦫꦩꦭꦃꦠꦤ꧀ꦱꦪꦢꦼꦉꦱ꧀ꦕꦩ꧀ꦥꦸꦂꦄꦔꦶꦤ꧀꧈ꦒꦺꦴꦝꦺꦴꦁꦒꦺꦴꦝꦺꦴꦁꦥꦼꦊꦩ꧀ꦥꦝꦒꦺꦴꦒꦿꦺꦴꦒ꧀ꦥꦠꦶꦁꦧ꧀ꦭꦱꦃꦆꦁꦥ꧀ꦭꦠꦂꦫꦤ꧀ꦏꦺꦴꦱ꧀ꦏꦺꦴꦱ꧀ꦱꦤ꧀ꦯꦭꦶꦤ꧀ꦢꦿꦶ꧉ꦎꦫꦄꦤꦧꦺꦴꦕꦃꦏꦺꦴꦱ꧀ꦏꦺꦴꦱ꧀ꦱꦤ꧀ꦏꦁꦭꦸꦁꦒꦸꦃꦲꦤ꧀ꦲꦤꦔꦉꦥ꧀ꦏꦩꦂ꧉ꦏꦧꦺꦃꦥꦝꦠꦸꦠꦸꦥ꧀ꦥꦤ꧀ꦭꦮꦁꦔꦺꦄꦮꦶꦠ꧀ꦱꦩꦂꦪꦺꦤ꧀ꦏꦼꦠꦩ꧀ꦥꦺꦴꦤ꧀ꦧꦚꦸꦈꦢꦤ꧀꧈ꦲꦮꦤꦺꦮꦶꦮꦶꦠ꧀ꦏꦿꦱꦄꦝꦼꦩ꧈ꦤ꧀ꦢꦢꦺꦏ꧀ꦏꦏꦺꦧꦺꦴꦕꦃꦏꦺꦴꦱ꧀ꦥꦝꦧꦼꦠꦃꦄꦤꦗꦼꦫꦺꦴꦏꦩꦂ꧉ꦩ꧀ꦧꦺꦴꦏ꧀ꦩꦼꦤꦮꦥꦶꦭꦶꦃꦠꦸꦫꦸꦄꦁꦊꦂꦠꦶꦤꦶꦩ꧀ꦧꦁꦒꦺꦴꦗꦺꦒ꧀ꦲꦸꦠꦮꦗꦒꦺꦴꦁꦔꦤ꧀ꦏꦫꦺꦴꦏꦚ꧀ꦕꦤꦺ꧉

ꦧꦺꦢꦩꦤꦺꦃꦏꦫꦺꦴꦄꦪꦸ꧉ꦱꦭꦒꦶꦤꦺꦈꦢꦤ꧀ꦤꦺꦆꦱꦶꦃꦢꦼꦉꦱ꧀ꦝꦺꦮꦺꦏ꧀ꦏꦺꦩꦭꦃꦄꦉꦥ꧀ꦩꦼꦠꦸ꧉ꦲꦭꦺꦴꦤ꧀ꦲꦭꦺꦴꦤ꧀ꦝꦺꦮꦺꦏ꧀ꦏꦺꦩ꧀ꦧꦸꦏꦏ꧀ꦭꦮꦁꦏꦩꦂꦏꦁꦩꦥꦤ꧀ꦥꦭꦶꦁꦥꦺꦴꦗꦺꦴꦏ꧀ꦝꦺꦮꦺ꧉ꦱꦤꦭꦶꦏꦏꦒꦺꦠ꧀ꦮꦼꦫꦸꦃꦱꦼꦥꦠꦸꦤꦺꦏꦁꦄꦉꦥ꧀ꦢꦶꦒꦮꦺꦩꦭꦶꦃꦠꦼꦊꦱ꧀ꦏꦼꦕꦶꦥꦿꦠ꧀ꦠꦤ꧀ꦧꦚꦸꦈꦢꦤ꧀꧈ꦤꦭꦶꦏꦈꦢꦤ꧀ꦭꦭꦶꦎꦫꦢꦶꦊꦧꦺꦴꦏ꧀ꦏꦏꦺ꧉ꦧꦼꦒ꧀ꦗꦤ꧀ꦤꦺꦆꦱꦶꦃꦄꦤꦱꦤ꧀ꦝꦭ꧀ꦲꦶꦁꦗꦼꦫꦺꦴꦏꦩꦂ꧈ꦱꦼꦤꦗꦤ꧀ꦭꦮꦱ꧀ꦤꦔꦶꦁꦆꦱꦶꦃꦥꦤ꧀ꦠꦼꦱ꧀ꦢꦶꦒꦮꦺꦩꦼꦠꦸ꧉ꦩꦤ꧀ꦠꦼꦭ꧀ꦭꦮꦏꦁꦕꦸꦩꦤ꧀ꦛꦺꦴꦭ꧀ꦲꦶꦁꦠꦺꦩ꧀ꦧꦺꦴꦏ꧀ꦲꦺꦁꦒꦭ꧀ꦢꦶꦒꦮꦺ꧉ꦱꦺꦴꦫꦺꦏꦸꦮꦶꦄꦪꦸꦤꦺꦏꦠ꧀ꦧꦸꦝꦭ꧀ꦩꦼꦚꦁꦏꦥ꦳ꦺꦭꦠꦂꦫꦺꦄꦉꦥ꧀ꦤꦺꦴꦁꦏꦿꦺꦴꦁꦏꦫꦺꦴꦌꦤ꧀ꦝꦁ꧉

ꦄꦪꦸꦏꦒꦺꦠ꧀ꦮꦼꦫꦸꦃꦮꦶꦢꦢꦔꦿꦺꦴꦏꦺꦴꦏ꧀ꦲꦤꦔꦉꦥ꧀ꦏꦥ꦳ꦺ꧉ꦮꦶꦢꦢꦭꦸꦁꦒꦸꦃꦆꦗꦺꦤ꧀ꦤꦤ꧀ꦩꦝꦼꦥ꧀ꦫꦠꦤ꧀ꦱꦶꦤꦩ꧀ꦧꦶꦚꦮꦁꦈꦢꦤ꧀꧈ꦝꦺꦮꦺꦏ꧀ꦏꦺꦎꦫꦔꦶꦫꦪꦺꦤ꧀ꦏꦚ꧀ꦕꦤꦺꦏꦁꦝꦶꦏꦼꦤꦭ꧀ꦩꦼꦤꦼꦁꦭꦤ꧀ꦲꦤ꧀ꦠꦼꦁꦏꦸꦮꦶꦗꦼꦧꦸꦭ꧀ꦢꦺꦴꦪꦤ꧀ꦫꦺꦴꦏꦺꦴꦏ꧀꧈ꦱꦔꦼꦂꦠꦶꦤꦺꦱꦏꦏꦚ꧀ꦕꦤꦺꦭꦤꦁꦏꦁꦎꦫꦔꦿꦺꦴꦏꦺꦴꦏ꧀ꦩꦸꦁꦮꦶꦢꦢꦝꦺꦮꦺ꧉ꦭꦶꦪꦤ꧀ꦤꦺꦩꦭꦃꦥꦝꦔ꧀ꦊꦥꦸꦱ꧀ꦏꦪꦱꦼꦥꦸꦂ꧉ꦩꦭꦃꦄꦤꦏꦁꦱꦼꦤꦼꦁꦔꦤ꧀ꦤꦺꦔ꧀ꦒꦮꦩ꧀ꦧꦏꦺꦴꦭꦶꦤ꧀ꦠꦶꦁꦔꦤ꧀꧈ꦗꦫꦺꦤꦺꦉꦒꦫꦺꦴꦏꦺꦴꦏ꧀ꦱꦲꦶꦏꦶꦭꦫꦁ꧉ꦩꦸꦭꦥꦶꦭꦶꦃꦔ꧀ꦭꦶꦤ꧀ꦠꦁꦱꦶꦁꦥꦼꦤ꧀ꦠꦶꦁꦩꦼꦠꦸꦏꦼꦭꦸꦏ꧀ꦏꦺ꧉

ꦄꦁꦒꦺꦴꦤ꧀ꦤꦺꦏꦼꦠꦼꦩꦸꦮꦶꦢꦢꦎꦫꦢꦶꦱꦼꦔꦗ꧉ꦄꦪꦸꦥꦚ꧀ꦕꦺꦤ꧀ꦢꦸꦮꦺꦗꦤ꧀ꦗꦶꦏꦫꦺꦴꦌꦤ꧀ꦝꦁ꧉ꦝꦺꦮꦺꦏ꧀ꦏꦺꦄꦉꦥ꧀ꦕꦸꦂꦲꦠ꧀ꦔꦼꦤꦤꦶꦭꦏꦺꦴꦤ꧀ꦤꦺꦏꦁꦭꦒꦶꦏꦸꦫꦁꦄꦥꦶꦏ꧀꧈ꦊꦭꦏꦺꦴꦤ꧀ꦲꦱ꧀ꦩꦫꦤꦺꦏꦺꦫꦶꦏꦺꦫꦶꦆꦏꦶꦤ꧀ꦢꦢꦺꦏ꧀ꦏꦏꦺꦥꦶꦏꦂꦫꦤ꧀ꦤꦺꦧꦶꦔꦸꦁ꧉ꦱꦼꦱꦩ꧀ꦧꦸꦁꦔꦤ꧀ꦤꦺꦏꦫꦺꦴꦪꦸꦢꦺꦴꦥꦚ꧀ꦕꦺꦤ꧀ꦭꦒꦶꦉꦁꦒꦁ꧉ꦏꦼꦥꦫꦩꦭꦃꦮꦶꦱ꧀ꦲꦺꦴꦫꦠꦲꦸꦱꦼꦱꦩ꧀ꦧꦸꦁꦔꦤ꧀ꦩꦤꦺꦃ꧉ꦤꦺꦴꦩꦼꦂꦫꦺꦈꦒꦎꦫꦄꦏ꧀ꦠꦶꦥ꦳꧀꧈ꦧꦧ꧀ꦏꦸꦮꦶꦱꦶꦁꦤ꧀ꦢꦢꦺꦏ꧀ꦏꦏꦺꦥꦶꦏꦶꦂꦫꦤ꧀ꦤꦺꦄꦪꦸꦏꦼꦩꦿꦸꦁꦱꦸꦁ꧉ꦄꦉꦥ꧀ꦔꦥꦮꦲꦺꦠꦤ꧀ꦱꦃꦎꦫꦗꦼꦤꦏ꧀꧈

꧇ꦪꦃꦩꦺꦤꦺꦏꦺꦴꦮꦺꦏꦺꦴꦏ꧀ꦮꦶꦱ꧀ꦲꦤꦏꦺꦤꦺ꧈ꦮꦶꦢ꧀?꧇ꦕ꧀ꦭꦸꦭꦸꦏ꧀ꦏꦺꦄꦪꦸꦱꦮꦶꦱ꧀ꦱꦺꦩꦸꦝꦸꦤ꧀ꦱꦏꦩꦺꦴꦠꦺꦴꦂꦫꦺ꧉

꧇ꦌꦃ꧈ꦆꦪ꧉ꦒꦺꦴꦭꦺꦏ꧀ꦲꦶꦧꦸꦂꦫꦤ꧀ꦮꦲꦺ꧈ꦪꦸ꧉ꦏꦺꦴꦮꦺꦝꦺꦮꦺꦈꦢꦤ꧀ꦲꦸꦢꦤ꧀ꦏꦺꦴꦏ꧀ꦩꦭꦃꦩꦿꦺꦤꦺ?ꦄꦉꦥ꧀ꦑꦼꦠꦼꦩꦸꦮꦤ꧀?꧇ꦮꦁꦱꦸꦭ꧀ꦭꦤ꧀ꦤꦺꦮꦶꦢꦢ꧉

꧇ꦎꦫ꧈ꦆꦏꦶꦩꦲꦸꦗꦤ꧀ꦗꦶꦪꦤ꧀ꦏꦫꦺꦴꦌꦤ꧀ꦝꦁ꧉ꦄꦏꦸꦢꦏ꧀ꦭꦸꦁꦒꦸꦃꦏꦺꦤꦺꦝꦶꦱꦶꦏ꧀ꦪ꧈ꦱꦶꦤꦩ꧀ꦧꦶꦔꦼꦤ꧀ꦠꦺꦤ꧀ꦤꦶꦝꦺꦮꦺꦏ꧀ꦏꦺꦠꦺꦏ꧉꧇

ꦮꦶꦢꦢꦎꦫꦏꦧꦺꦴꦠ꧀ꦠꦤ꧀꧈ꦏꦼꦏꦫꦺꦴꦤ꧀ꦤꦺꦥꦚ꧀ꦕꦺꦤ꧀ꦏꦚ꧀ꦕꦄꦏꦿꦧ꧀ꦱꦼꦤꦗꦤ꧀ꦧꦺꦢꦏꦼꦭꦱ꧀꧈ꦭꦸꦁꦒꦸꦃꦮꦺꦴꦁꦭꦺꦴꦫꦺꦴꦄꦤꦏꦥ꦳ꦺꦎꦫꦤ꧀ꦢꦢꦺꦏ꧀ꦏꦏꦺꦱꦸꦁꦏꦤ꧀ꦱꦶꦗꦶꦭꦤ꧀ꦱꦶꦗꦶꦤꦺ꧉ꦮꦶꦢꦢꦔꦼꦂꦠꦶꦪꦺꦤ꧀ꦄꦪꦸꦥꦕꦁꦔꦤ꧀ꦤꦺꦪꦸꦢꦺꦴ꧈ꦩꦲꦱꦶꦱ꧀ꦮꦱꦺꦤ꧀ꦢꦿꦠꦱꦶꦏ꧀ꦏꦁꦈꦒꦏꦚ꧀ꦕꦤ꧀ꦤꦺꦧꦶꦪꦺꦤ꧀ꦤꦭꦶꦏꦆꦁ꧇ꦈ꧇ꦏ꧇ꦩ꧇ꦩꦸꦱꦶꦏ꧀꧈ꦢꦺꦤꦺꦄꦪꦸꦝꦺꦮꦺꦈꦒꦔꦼꦂꦠꦶꦪꦺꦤ꧀ꦮꦶꦢꦢꦗꦺꦴꦩ꧀ꦭꦺꦴ꧈ꦄꦮꦶꦠ꧀ꦥꦚ꧀ꦕꦺꦤ꧀ꦲꦺꦴꦫꦠꦲꦸꦔ꧀ꦒꦤ꧀ꦝꦺꦁꦕꦺꦮꦺꦏ꧀꧈

꧇ꦏꦺꦴꦮꦺꦱꦲꦶꦏꦶꦔꦿꦺꦴꦏꦺꦴꦏ꧀ ꦮꦶꦢ꧀?꧇ꦥꦶꦠꦏꦺꦴꦤ꧀ꦤꦺꦄꦪꦸ꧉

꧇ꦪꦩꦸꦁꦤꦺꦏ꧀ꦥꦺꦔꦶꦤ꧀ꦮꦲꦺ꧈ꦪꦸ꧈꧇ꦏꦤ꧀ꦝꦤꦺꦕꦼꦏꦏ꧀꧈

꧇ꦢꦼꦔꦫꦺꦤ꧀ꦏꦺꦴꦏ꧀ꦱꦧꦏꦥ꦳ꦺꦄꦮꦏ꧀ꦩꦸ꧈ꦏꦛꦶꦏ꧀ꦲꦶꦗꦺꦤ꧀ꦥꦶꦱꦤ꧀꧈ꦄꦢꦠ꧀ꦠꦺꦄꦤꦄꦁꦏꦿꦶꦁꦔꦤ꧀ꦔꦺꦴꦤꦺꦴ꧉ꦄꦥꦄꦤꦱꦶꦁꦢꦶꦠꦸꦁꦒꦸ?꧇

꧇ꦄꦃ꧈ꦎꦫꦏꦺꦴꦏ꧀꧈ꦄꦮꦏ꧀ꦩꦸꦮꦲꦺꦱꦶꦁꦎꦫꦠꦲꦸꦮꦼꦫꦸꦃ꧈꧇ꦮꦁꦱꦸꦭꦤ꧀ꦤꦺꦮꦶꦢꦢꦔ꧀ꦒꦸꦪꦸꦮꦼꦫꦸꦃꦄꦪꦸꦔ꧀ꦒꦸꦩꦸꦤ꧀꧈

ꦱꦶꦤꦩ꧀ꦧꦶꦔꦼꦤ꧀ꦠꦺꦤ꧀ꦤꦶꦌꦤ꧀ꦝꦁꦠꦼꦏ꧈ꦄꦪꦸꦧꦤ꧀ꦗꦸꦂꦥꦼꦱꦼꦤ꧀ꦔꦺꦴꦩ꧀ꦧꦺꦠꦶꦤꦶꦩ꧀ꦧꦁꦭꦸꦁꦒꦸꦃꦩꦸꦁꦒꦫꦶꦁꦔꦤ꧀꧈ꦢꦶꦱꦮꦁꦏꦺꦴꦥꦶꦆꦁꦔꦉꦥ꧀ꦥꦺꦮꦶꦢꦢꦮꦶꦱ꧀ꦩꦺꦃꦲꦼꦤ꧀ꦠꦺꦏ꧀꧈ꦄꦪꦸꦚꦺꦴꦧꦤꦮꦤ꧀ꦤꦶꦱꦸꦥꦪꦥꦼꦱꦼꦤ꧀ꦩꦤꦺꦃꦤꦔꦶꦁꦮꦶꦢꦢꦎꦫꦒꦼꦊꦩ꧀꧈

꧇ꦏꦸꦮꦶꦏꦺꦴꦥꦶꦄꦥꦏꦺꦴꦏ꧀ꦲꦤꦒꦸꦭꦄꦧꦁꦔꦺ꧈ꦮꦶꦢ꧀?꧇

꧇ꦎ꧈ꦆꦏꦶꦏꦺꦴꦥꦶꦕꦺꦴꦏꦺꦴꦠ꧀꧈꧇

꧇ꦏꦺꦴꦥꦶꦕꦺꦴꦏꦺꦴꦠ꧀?ꦥꦶꦪꦺꦏꦸꦮꦶ?꧇ꦄꦪꦸꦠꦏꦺꦴꦤ꧀ꦩꦤꦺꦃꦩꦼꦂꦒꦭꦒꦶꦮꦼꦫꦸꦃꦏꦸꦮꦶꦄꦤꦏꦺꦴꦥꦶꦕꦺꦴꦏꦺꦴꦠ꧀꧈

꧇ꦏꦺꦴꦥꦶꦥꦲꦶꦠ꧀ꦏꦫꦺꦴꦒꦸꦭꦄꦧꦁ꧉ꦒꦸꦭꦤꦺꦢꦶꦱꦺꦭꦺꦃꦄꦤꦭꦺꦥꦺꦏ꧀꧈ꦕꦫꦤꦺꦔꦺꦴꦩ꧀ꦧꦺꦒꦸꦭꦤꦺꦢꦶꦕꦺꦴꦏꦺꦴꦠ꧀ꦝꦶꦱꦶꦏ꧀ꦧꦤ꧀ꦗꦸꦂꦏꦺꦴꦥꦶꦤꦺꦢꦶꦱꦿꦸꦥꦸꦠ꧀꧈ꦄꦏꦸꦱꦼꦤꦼꦁꦄꦤꦏꦥ꦳ꦺꦆꦏꦶꦩꦼꦂꦒꦏꦺꦴꦥꦶꦤꦺꦌꦤꦏ꧀꧈꧇

꧇ꦎꦫꦥꦲꦶꦠ꧀?꧇

꧇ꦪꦺꦤ꧀ꦥꦲꦶꦠ꧀ꦏꦸꦮꦶꦩꦼꦱ꧀ꦛꦶ꧈ꦮꦺꦴꦁꦗꦼꦤꦼꦁꦔꦺꦮꦲꦺꦏꦺꦴꦥꦶꦠꦤ꧀ꦥꦒꦸꦭ꧉ꦩꦸꦭꦱꦢꦸꦫꦸꦁꦔꦺꦔꦺꦴꦩ꧀ꦧꦺꦏꦸꦢꦸꦚꦺꦴꦏꦺꦴꦠ꧀ꦒꦸꦭꦄꦧꦁꦝꦶꦱꦶꦏ꧀꧈ꦏꦤ꧀ꦛꦶꦕꦫꦔꦺꦴꦤꦺꦴꦄꦮꦏ꧀ꦏꦺꦝꦺꦮꦺꦧꦶꦱꦚꦼꦠꦺꦭ꧀ꦝꦺꦮꦺꦈꦏꦸꦂꦫꦤ꧀ꦤꦺꦊꦒꦶ꧉ꦤꦃ꧈ꦒꦸꦭꦤꦺꦱꦶꦁꦥꦭꦶꦁꦌꦤꦏ꧀ꦒꦸꦭꦄꦫꦺꦤ꧀꧈ꦪꦺꦤ꧀ꦲꦺꦴꦫꦄꦤꦒꦸꦭꦠꦼꦧꦸꦪꦏꦼꦤ꧉ꦚꦺꦴꦧꦥꦶꦪꦺ?꧇

꧇ꦮꦶꦱ꧀ꦄꦃ꧉ꦎꦫꦏꦸꦭꦶꦤꦔꦺꦴꦩ꧀ꦧꦺꦏꦺꦴꦥꦶ꧉ꦄꦥꦩꦤꦺꦃꦏꦺꦴꦥꦶꦥꦲꦶꦠ꧀꧈꧇

꧇ꦎꦫꦥꦲꦶꦠ꧀ꦏꦺꦴꦏ꧀꧈ꦫꦱꦤ꧀ꦤꦺꦌꦤꦏ꧀ꦧꦔꦼꦠ꧀ꦱꦮꦶꦱ꧀ꦱꦺꦢꦶꦱꦿꦸꦥꦸꦠ꧀꧈ꦥꦲꦶꦠ꧀ꦕꦩ꧀ꦥꦸꦂꦊꦒꦶ꧈ꦏꦪꦈꦫꦶꦥ꧀ꦏꦸ꧈꧇ꦱꦺꦥꦶꦱꦤ꧀ꦩꦤꦺꦃꦮꦶꦢꦢꦔ꧀ꦒꦸꦪꦸꦔꦏꦏ꧀꧈

꧇ꦏꦺꦴꦮꦺꦭꦒꦶꦒꦭꦲꦸ?ꦧꦤ꧀ꦗꦸꦂꦩꦿꦺꦤꦺꦆꦏꦶ?꧇ꦥꦶꦠꦏꦺꦴꦤ꧀ꦤꦺꦄꦪꦸꦱꦗꦏ꧀ꦔꦺꦴꦪꦏ꧀꧈

ꦮꦶꦢꦢꦩꦸꦁꦩꦺꦱꦼꦩ꧀꧈ꦢꦶꦱꦮꦁꦄꦪꦸꦏꦁꦥꦚ꧀ꦕꦺꦤ꧀ꦲꦪꦸꦏꦸꦮꦶꦱꦗꦏ꧀ꦧꦶꦔꦸꦁꦏꦫꦺꦴꦠꦸꦩꦁꦒꦥ꧀ꦥꦺ꧉ꦮꦁꦱꦸꦭꦤ꧀ꦤꦺꦏꦁꦥꦸꦁꦏꦱ꧀ꦱꦤ꧀ꦏꦸꦮꦶꦤ꧀ꦢꦢꦺꦏ꧀ꦏꦏꦺꦄꦪꦸꦏꦼꦥꦺꦔꦺꦤ꧀ꦔꦼꦂꦠꦶꦧꦔꦼꦠ꧀꧈ꦩ꧀ꦧꦺꦴꦏ꧀ꦩꦼꦤꦮꦭꦒꦶꦒꦭꦲꦸꦏꦪꦏꦁꦢꦶꦫꦱꦏ꧀ꦏꦏꦺꦄꦪꦸ꧉ꦤꦔꦶꦁꦏꦫꦺꦴꦱꦥ?ꦩꦸꦁꦮꦲꦺꦱꦱꦸꦮꦺꦤꦺꦏꦼꦤꦭ꧀ꦩꦺꦃꦥꦠꦁꦠꦲꦸꦤ꧀ꦭꦮꦱ꧀ꦱꦺꦢꦸꦫꦸꦁꦠꦲꦸꦮꦼꦫꦸꦃꦮꦶꦢꦢꦔ꧀ꦒꦤ꧀ꦝꦺꦁꦕꦺꦮꦺꦏ꧀ꦲꦤꦏꦩ꧀ꦥꦸꦱ꧀꧈ꦕꦿꦶꦠꦕꦿꦶꦠꦔꦼꦤꦤ꧀ꦤꦶꦮꦺꦴꦁꦱꦶꦁꦢꦶꦱꦼꦤꦼꦁꦔꦶꦈꦒꦎꦫꦠꦲꦸꦢꦶꦫꦸꦔꦸ꧉ꦮꦶꦢꦢꦥꦚ꧀ꦕꦺꦤ꧀ꦮꦺꦴꦁꦩꦂꦢꦶꦏꦏꦁꦎꦫꦢꦸꦮꦺꦠꦁꦒꦸꦁꦔꦤ꧀ꦲꦥꦲꦥꦏꦼꦗꦧꦠꦸꦒꦱ꧀ꦏꦩ꧀ꦥꦸꦱ꧀꧈ꦄꦢꦠ꧀ꦠꦺꦪꦺꦤ꧀ꦏꦤ꧀ꦕꦤ꧀ꦤꦺꦱꦶꦁꦢꦸꦮꦺꦥꦕꦁꦔꦤ꧀ꦩꦼꦱ꧀ꦛꦶꦔ꧀ꦭꦺꦴꦝꦁꦔꦏꦺꦮꦼꦏ꧀ꦠꦸꦏꦔ꧀ꦒꦺꦴꦆꦏꦶꦭꦤ꧀ꦲꦶꦏꦸ꧉ꦏꦤ꧀ꦕꦏꦤ꧀ꦕꦤ꧀ꦤꦺꦈꦒꦎꦫꦄꦤꦏꦁꦔꦼꦂꦠꦶꦮꦤꦶꦠꦱꦥꦱꦶꦁꦢꦶꦱꦼꦤꦼꦁꦔꦶꦮꦶꦢꦢ꧉

꧇ꦲꦺꦃ꧈ꦢꦶꦠꦏꦺꦴꦤ꧀ꦤꦶꦏꦺꦴꦏ꧀ꦩꦸꦁꦩꦺꦱꦩ꧀ꦩꦺꦱꦼꦩ꧀!ꦏꦺꦴꦮꦺꦒꦭꦲꦸꦠ꧈ꦮꦶꦢ꧀?꧇ꦱꦼꦥꦶꦱꦤ꧀ꦩꦤꦺꦃꦄꦪꦸꦠꦏꦺꦴꦤ꧀꧈

꧇ꦎꦫ꧈ꦪ꧉ꦢꦸꦥꦺꦃꦄꦏꦸꦩꦸꦤꦶꦔꦺꦴꦤꦺꦴꦧꦤ꧀ꦗꦸꦂꦩ꧀ꦧꦺꦴꦏ꧀ꦲꦫꦤ꧀ꦤꦶꦒꦭꦲꦸꦏꦪꦄꦮꦏ꧀ꦩꦸ꧉ꦎꦫꦱꦧꦼꦤ꧀ꦒꦭꦲꦸꦭꦤ꧀ꦱꦶꦁꦢꦏ꧀ꦥꦶꦏꦶꦂꦏꦸꦮꦶꦄꦤꦒꦼꦥꦺꦴꦏ꧀ꦱꦺꦁꦒꦺꦴꦭ꧀ꦭꦺꦏꦫꦺꦴꦧꦧꦒ꧀ꦒꦤ꧀ꦏꦠꦽꦱ꧀ꦤꦤ꧀꧈ꦪꦺꦤ꧀ꦱꦧꦼꦤ꧀ꦩꦱꦭꦃꦩ꧀ꦧꦺꦴꦏ꧀ꦲꦁꦒꦼꦥ꧀ꦮꦺꦴꦁꦭꦫꦄꦠꦶꦩꦼꦂꦒꦢꦶꦕꦶꦢꦿꦤ꧀ꦤꦶ꧈ꦮꦃꦈꦫꦶꦥ꧀ꦩꦸꦗꦤ꧀ꦧꦸꦕꦶꦤ꧀ꦧꦔꦼꦠ꧀ ꦩꦸꦁꦢꦶꦧꦸꦫꦸꦠꦽꦱ꧀ꦤꦠꦼꦫꦸꦱ꧀ꦠꦼꦫꦸꦱ꧀ꦱꦤ꧀ꦲꦺꦴꦫꦄꦤꦫꦩ꧀ꦥꦸꦁꦔꦺ꧉꧇

꧇ꦏꦺꦴꦏ꧀ꦏꦺꦴꦮꦺꦔꦼꦂꦠꦶ?꧇ꦄꦪꦸꦏꦒꦺꦠ꧀꧈

꧇ꦪꦩꦸꦁꦔꦶꦫꦔꦶꦫꦮꦲꦺ꧉ꦄꦮꦏ꧀ꦩꦸꦏꦤ꧀ꦫꦠꦸꦤ꧀ꦤꦺꦒꦭꦲꦸ꧈꧇ꦮꦶꦢꦢꦔ꧀ꦒꦸꦪꦸꦔꦏꦏ꧀ꦱꦶꦤꦩ꧀ꦧꦶꦚꦿꦸꦥꦸꦠ꧀ꦏꦺꦴꦥꦶꦤꦺ꧉

ꦢꦸꦫꦸꦁꦔꦤ꧀ꦠꦶꦢꦶꦮꦁꦱꦸꦭ꧀ꦭꦶꦮꦶꦱ꧀ꦏꦼꦠꦼꦏꦤ꧀ꦥꦿꦩꦸꦱꦗꦶꦏꦁꦔꦼꦠꦼꦂꦫꦏꦺꦥ꦳ꦤꦶꦭ꧀ꦭꦭꦠ꧀ꦠꦺꦭꦤ꧀ꦏꦼꦤ꧀ꦠꦁꦒꦺꦴꦫꦺꦁꦥꦼꦱꦼꦤ꧀ꦤꦤ꧀ꦤꦺꦄꦪꦸ꧉ꦮꦼꦫꦸꦃꦪꦺꦤ꧀ꦏꦺꦴꦥꦶꦤꦺꦮꦶꦱ꧀ꦲꦼꦤ꧀ꦠꦺꦏ꧀ ꦮꦶꦢꦢꦧꦤ꧀ꦗꦸꦂꦥꦼꦱꦼꦤ꧀ꦭꦺꦴꦥꦶꦱꦸꦱꦸꦏꦁꦒꦺꦴꦔꦤ꧀ꦕꦤ꧀ꦤꦶꦄꦪꦸ ꦎꦩꦺꦴꦁꦎꦩꦺꦴꦁꦔꦤ꧀꧈ꦄꦱ꧀ꦧꦏ꧀ꦲꦶꦁꦔꦉꦥ꧀ꦥꦺꦢꦶꦱꦺꦭꦺꦃꦆꦁꦩꦺꦗꦱꦤ꧀ꦝꦁꦔꦺ꧉ꦫꦺꦴꦏꦺꦴꦏ꧀ꦏꦁꦭꦒꦶꦮꦲꦺꦢꦶꦠꦸꦏꦸꦧꦤ꧀ꦗꦸꦂꦢꦶꦊꦧꦺꦴꦏ꧀ꦏꦏꦺꦄꦱ꧀ꦧꦏ꧀꧈

꧇ꦤꦁꦔꦶꦁꦎꦩꦺꦴꦁꦔꦤ꧀ꦩꦸꦧꦼꦤꦼꦂꦏꦺꦴꦏ꧀ ꦮꦶꦢ꧀꧈꧇

ꦄꦪꦸꦔꦿꦸꦩꦁꦱꦤ꧀ꦤꦶꦄꦥꦏꦁꦢꦶꦏꦤ꧀ꦝꦏ꧀ꦏꦺꦏꦺꦮꦶꦢꦢꦥꦚ꧀ꦕꦺꦤ꧀ꦧꦼꦤꦼꦂ꧉ꦱꦱꦸꦮꦺꦤꦺꦢꦸꦮꦺꦥꦕꦁꦔꦤ꧀ꦩꦼꦱ꧀ꦛꦶꦏꦼꦉꦥ꧀ꦠꦸꦏꦂꦫꦤ꧀꧈ꦲꦼꦩ꧀ꦧꦸꦃꦏꦸꦮꦶꦏꦫꦺꦴꦱꦥꦮꦲꦺ꧉ꦏꦝꦁꦏꦭꦥꦼꦂꦏꦫꦤꦺꦩꦸꦁꦱꦼꦥꦺꦭꦺꦧꦤ꧀ꦗꦸꦂꦢꦢꦶꦫꦩꦺ꧉ꦮꦸꦱꦤꦤꦺꦱꦼꦱꦩ꧀ꦧꦸꦁꦔꦤ꧀ꦤꦺꦥꦼꦝꦺꦴꦠ꧀꧈ꦪꦺꦤ꧀ꦲꦠꦶꦤꦺꦮꦶꦱ꧀ꦏꦼꦭꦫꦤ꧀ꦝꦺꦮꦺꦏ꧀ꦏꦺꦩ꧀ꦧꦶꦔꦸꦁꦔꦶꦏꦤ꧀ꦕꦤꦺ꧉ꦏꦧꦺꦃꦢꦶꦗꦏ꧀ꦕꦿꦶꦠꦔꦭꦺꦴꦂꦔꦶꦢꦸꦭ꧀ꦠꦤ꧀ꦥꦄꦤꦱꦺꦴꦭꦸꦱꦶꦤꦺ꧉ꦏꦩꦁꦏꦏꦁꦤ꧀ꦗꦭꦂꦫꦶꦧꦶꦔꦸꦁꦏꦸꦮꦶꦱꦺꦗꦠꦶꦤꦺꦱꦏꦄꦮꦏ꧀ꦏꦺꦝꦺꦮꦺ꧉ꦩꦸꦁꦝꦺꦮꦺꦏ꧀ꦏꦺꦢꦸꦫꦸꦁꦔꦼꦂꦠꦶꦏꦼꦥꦿꦶꦪꦺꦕꦫꦤꦺꦔꦝꦼꦥ꧀ꦥꦶꦏꦲꦤꦤ꧀꧈

꧇ꦔꦺꦤꦺꦭꦺꦴ꧈ꦪꦸ꧉ꦪꦺꦤ꧀ꦥꦼꦂꦏꦫꦄꦱ꧀ꦩꦫꦏꦪꦔꦺꦤꦺꦮꦲꦺꦏꦺꦴꦮꦺꦎꦫꦧꦶꦱꦔꦝꦼꦥ꧀ꦥꦶ꧈ꦏꦼꦥꦿꦶꦪꦺꦪꦺꦤ꧀ꦏꦺꦴꦮꦺꦄꦤꦩꦱꦭꦃꦏꦁꦭꦸꦮꦶꦃꦒꦼꦝꦺꦩꦤꦺꦃ?ꦆꦏꦶꦏꦺꦴꦮꦺꦢꦸꦫꦸꦁꦫꦧꦶꦭꦺꦴ꧉꧇

꧇ꦏꦺꦴꦮꦺꦥꦚ꧀ꦕꦺꦤ꧀ꦲꦺꦴꦫꦔꦿꦱꦏ꧀ꦏꦏꦺꦏꦺꦴꦏ꧀ ꦮꦶꦢ꧀꧈ ꦔꦺꦴꦩꦺꦴꦁꦏꦸꦮꦶꦒꦩ꧀ꦥꦁ꧈ꦤꦔꦶꦁꦎꦫ ꦏꦪꦩꦁꦏꦺꦴꦤꦺꦴꦏꦚꦠꦤ꧀ꦤꦺ꧉ꦫꦱꦤꦺꦥꦼꦒꦼꦭ꧀ꦲꦠꦶꦆꦏꦶ꧉꧇

꧇ꦥꦚ꧀ꦕꦺꦤ꧀ꦲꦏꦸꦎꦫꦔꦿꦱꦏ꧀ꦤꦺꦄꦥꦱꦶꦁꦩ꧀ꦧꦺꦴꦏ꧀ꦫꦱꦏ꧀ꦤꦺꦏꦺꦴꦏ꧀ ꦪꦸ꧉ꦤꦔꦶꦁꦄꦏꦸꦩꦸꦝꦼꦁꦄꦫꦃꦲꦺ ꦥꦶꦏꦶꦂꦫꦤ꧀ꦩꦸ꧉ꦱꦧꦼꦤ꧀ꦲꦤꦩꦱꦭꦃꦏꦺꦴꦮꦺꦩꦼꦱ꧀ꦛꦶꦏꦼꦩꦿꦸꦁꦱꦸꦁꦔꦺꦴꦤꦺꦴꦏꦸꦮꦶ꧉ꦩ꧀ꦧꦶꦔꦸꦁꦔꦶꦏꦉꦥ꧀ꦩꦸꦝꦺꦮꦺ꧉ꦕꦺꦴꦧꦌꦭꦶꦁꦌꦭꦶꦁꦔꦼꦤ꧀꧈ꦥꦕꦁꦔꦤ꧀ꦩꦸꦆꦁꦏꦺꦤꦺꦱꦥꦮꦲꦺ?ꦤꦭꦶꦏꦆꦱꦶꦃꦏꦫꦺꦴꦮꦶꦗꦤꦂꦏꦧꦶꦪꦺꦤ꧀ ꦱꦧꦼꦤ꧀ꦠꦸꦏꦂꦫꦤ꧀ꦏꦺꦴꦮꦺꦩꦼꦱ꧀ꦛꦶꦔꦼꦠꦺꦴꦏ꧀ꦏꦏꦺꦗꦸꦫꦸꦱ꧀ꦲꦤ꧀ꦢꦭ꧀ꦭꦤ꧀ꦩꦸ꧈ꦪꦆꦏꦸꦮꦼꦒꦃꦏꦸꦭꦶꦪꦃ꧉ꦏꦉꦥ꧀ꦩꦸꦫꦏ꧀ꦱꦸꦥꦪꦤꦫꦶꦏ꧀ꦏꦮꦶꦒꦠꦺꦤ꧀ꦤꦺꦮꦶꦗꦤꦂꦏꦔꦥꦶꦏ꧀ꦔꦥꦶꦏ꧀ꦏꦶꦏꦺꦴꦮꦺꦤ꧀ꦗꦭꦸꦏ꧀ꦱꦼꦥꦸꦫ꧈ꦏꦪꦏꦪꦱꦶꦁꦏ꧀ꦭꦺꦫꦸꦮꦶꦗꦤꦂꦏ꧉ꦤꦔꦶꦁꦠꦸꦗꦸꦤꦺꦮꦶꦗꦤꦂꦏꦏꦸꦮꦶꦥꦶꦤ꧀ꦠꦼꦂ꧉ꦝꦺꦮꦺꦏ꧀ꦏꦺꦎꦫꦔ꧀ꦒꦥꦺꦏꦫꦺꦴꦠꦸꦩꦶꦤ꧀ꦢꦏ꧀ꦩꦸ꧉ꦱꦧꦤ꧀ꦗꦸꦂꦫꦺꦏꦫꦺꦴꦗꦏ꧉ꦩꦼꦂꦒꦗꦏꦏꦸꦮꦶꦥꦼꦔꦸꦫꦸꦱ꧀꧇ꦨꦺꦩ꧀꧇꧈ꦮꦼꦏ꧀ꦠꦸꦤꦺꦄꦏꦺꦃꦆꦶꦁꦎꦂꦒꦤꦶꦱꦱꦶ꧉ꦏꦺꦴꦮꦺꦧꦤ꧀ꦗꦸꦂꦤ꧀ꦢꦏ꧀ꦮꦱꦶꦁꦎꦫꦎꦫꦪꦺꦤ꧀꧇ꦮ꧇ꦄ꧇ꦩꦸꦎꦫꦌꦁꦒꦭ꧀ꦢꦶꦧꦊꦱ꧀ꦱꦶ꧉ꦱꦶꦁꦗꦫꦺꦕꦼꦝꦏ꧀ꦏꦫꦺꦴꦄꦁꦒꦺꦴꦠꦤꦺꦭꦤ꧀ꦭꦶꦪꦭꦶꦪꦤꦺ꧉ꦒꦤ꧀ꦠꦶꦱꦲꦶꦏꦶꦏꦫꦺꦴꦪꦸꦢꦺꦴꦩꦭꦃꦠꦤ꧀ꦱꦪꦏꦼꦉꦥ꧀ꦲꦁꦒꦺꦴꦤ꧀ꦩꦸꦥꦢꦸ꧉ꦆꦪꦎꦫ?꧇

꧇ꦲ꧈ꦪꦸꦢꦺꦴꦄꦥꦕꦿꦶꦠꦏꦫꦺꦴꦏꦺꦴꦮꦺ꧈ꦮꦶꦢ꧀?ꦮꦃ꧈ꦩꦼꦱ꧀ꦛꦶꦤꦺꦔꦺꦭꦺꦏ꧀ꦲꦺꦭꦺꦏ꧀ꦲꦏꦸ꧉ꦆꦪꦏꦤ꧀?ꦔꦺꦴꦤꦺꦴꦏꦸꦮꦶꦭꦺꦴ꧉ꦔꦥꦤ꧀ꦢꦢꦏ꧀ꦕꦿꦶꦠꦏ꧀ꦕꦿꦶꦠꦧꦫꦁ꧈꧇ꦮꦁꦱꦸꦭ꧀ꦭꦤ꧀ꦤꦺꦄꦪꦸꦩꦁꦏꦼꦭ꧀꧈

꧇ꦱꦶꦏ꧀ꦠ꧈ꦢꦸꦫꦸꦁꦱꦸꦮꦺꦩꦶꦁꦏꦼꦩ꧀ꦏꦺꦴꦮꦺꦮꦶꦱ꧀ꦢꦏ꧀ꦮꦱꦶꦁꦎꦫꦎꦫ꧉ꦪꦔꦺꦤꦺꦆꦏꦶꦭꦺꦴꦱꦸꦮꦺꦱꦸꦮꦺꦮꦺꦴꦁꦭꦤꦁꦧꦶꦱꦎꦫꦧꦼꦠꦃꦏꦫꦺꦴꦏꦺꦴꦮꦺ꧉ꦪꦸꦢꦺꦴꦎꦫꦠꦲꦸꦔꦺꦭꦺꦏ꧀ꦲꦺꦭꦺꦏ꧀ꦏꦺꦴꦮꦺ꧉ꦝꦺꦮꦺꦏ꧀ꦏꦺ ꦩꦸꦩꦼꦠ꧀ꦩꦶꦏꦶꦂꦏꦺꦕꦫꦤꦺꦔꦝꦼꦥ꧀ꦥꦶꦄꦮꦏ꧀ꦩꦸ꧉ꦄꦥꦱꦭꦃꦲꦺꦪꦺꦤ꧀ꦕꦿꦶꦠ?ꦏꦺꦴꦮꦺꦝꦺꦮꦺꦩꦭꦃꦫꦠꦸꦤꦺꦠꦸꦏꦁꦕꦿꦶꦠ꧉ꦱꦧꦼꦤ꧀ꦏꦺꦴꦮꦺꦭꦒꦶꦠꦸꦏꦂꦫꦤ꧀ꦩꦼꦱ꧀ꦛꦶꦔ꧀ꦒꦸꦥꦸꦃꦲꦶꦏꦤ꧀ꦕꦩꦸ꧈ꦕꦿꦶꦠꦩꦫꦁꦌꦤ꧀ꦝꦁ꧈ꦱꦶꦠꦶ꧈ꦭꦤ꧀ꦱꦤ꧀ꦠꦶ꧉ꦧꦺꦴꦕꦃꦠꦼꦭꦸꦏꦲꦺꦩ꧀ꦧꦺꦴꦏ꧀ꦕꦼꦏꦺꦴꦏ꧀ꦏꦶꦏ꧀ꦕꦿꦶꦠꦏ꧀ꦕꦿꦶꦠꦩꦸꦎꦫꦧꦏꦭ꧀ꦩꦺꦤꦺꦃꦲꦶꦱꦺꦴꦭꦸꦱꦶ꧉ꦧꦶꦱꦤꦺꦩꦸꦁꦔꦶꦪꦤ꧀ꦤꦶꦎꦩꦺꦴꦁꦔꦤ꧀ꦩꦸ꧈ꦗꦭꦫꦤ꧀ꦲꦮꦏ꧀ꦩꦸꦝꦺꦮꦺꦪꦺꦤ꧀ꦢꦶꦏꦤ꧀ꦝꦤꦶꦄꦔꦺꦭ꧀ꦭꦤ꧀ꦫꦸꦩꦁꦱꦥꦭꦶꦁꦧꦼꦤꦼꦂꦝꦺꦮꦺ꧉ꦗꦤ꧀ꦗꦤ꧀ꦤꦺꦱꦸꦩ꧀ꦧꦼꦂꦫꦺꦩꦱꦭꦃꦭꦤ꧀ꦱꦶꦁꦩꦫꦲꦶꦩꦸꦊꦒ꧀ꦪꦄꦮꦏ꧀ꦩꦸꦝꦺꦮꦺ꧉ꦩꦱꦭꦃꦱꦼꦥꦺꦭꦺꦩ꧀ꦧꦺꦴꦏ꧀ꦒꦮꦺꦫꦸꦮꦼꦠ꧀ ꦮꦸꦱꦤꦤꦺꦎꦫꦈꦮꦭ꧀ꦱꦏꦧꦫꦁꦱꦶꦁꦩꦸꦊꦒ꧀ ꦔ꧀ꦒꦸꦧꦼꦠ꧀ꦲꦮꦏ꧀ꦩꦸꦝꦺꦮꦺ꧉ꦢꦏ꧀ꦲꦺꦴꦩꦺꦴꦁꦔꦶꦪ꧈ꦱꦏ꧀ꦗꦤ꧀ꦤꦺ ꦏꦺꦴꦮꦺꦕꦿꦶꦠꦩꦁꦏꦺꦴꦤꦺꦴꦏꦸꦮꦶꦥꦝꦏꦫꦺꦴꦔꦸꦩ꧀ꦧꦂꦮꦢꦶꦩꦸꦝꦺꦮꦺ꧈꧇ꦱꦼꦥꦶꦱꦤ꧀ꦩꦤꦺꦃꦮꦶꦢꦢꦤꦩ꧀ꦧꦃꦲꦶ꧉

ꦩꦏ꧀ꦝꦼꦒ꧀꧈ꦝꦝꦤꦺꦄꦪꦸꦏꦿꦱꦄꦩ꧀ꦥꦼꦒ꧀꧈ꦭꦒꦶꦥꦶꦱꦤ꧀ꦲꦶꦏꦶꦄꦤꦏꦤ꧀ꦕꦤꦺꦩꦸꦤꦶꦏꦪꦩꦁꦏꦺꦴꦤꦺꦴ꧉ꦎꦫꦔꦶꦫꦪꦺꦤ꧀ꦧꦏꦭ꧀ꦢꦶꦏꦺꦴꦗꦃꦲꦶꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦤ꧀ꦢꦺꦤꦶꦁꦮꦶꦢꦢ꧉ꦱꦼꦤꦗꦤ꧀ꦲꦺꦴꦫꦤꦼꦱꦸꦤꦔꦶꦁꦎꦩꦺꦴꦁꦔꦤ꧀ꦤꦺꦮꦶꦢꦢꦠꦼꦒꦼꦱ꧀꧈ꦏꦧꦺꦃꦠꦸꦩꦶꦤ꧀ꦢꦏ꧀ꦏꦺꦱꦶꦁꦏ꧀ꦭꦺꦫꦸꦢꦶꦧꦺꦧꦺꦂꦄꦤꦔꦉꦥ꧀ꦥꦺ꧉ꦄꦪꦸꦮꦶꦱ꧀ꦲꦺꦴꦫꦧꦶꦱꦩ꧀ꦧꦺꦭꦏꦼꦗꦧꦩꦸꦁꦩꦼꦤꦼꦁ꧉ꦄꦮꦏ꧀ꦏꦺꦱꦤꦭꦶꦏꦊꦩꦼꦱ꧀ ꦄꦤꦫꦱꦒꦼꦠꦸꦤ꧀ꦭꦤ꧀ꦲꦶꦱꦶꦤ꧀꧈ ꦒꦼꦠꦸꦤ꧀ꦩꦼꦂꦒꦠꦸꦩꦶꦤ꧀ꦢꦏ꧀ꦏꦺꦱꦱꦸꦮꦺꦤꦺꦆꦏꦶꦗꦼꦧꦸꦭ꧀ꦭꦺꦏ꧀ꦭꦺꦫꦸꦭꦤ꧀ꦲꦶꦱꦶꦤ꧀ꦩꦼꦂꦒꦱꦶꦁꦔꦤ꧀ꦝꦤ꧀ꦤꦶꦏꦸꦮꦶꦮꦺꦴꦁꦭꦤꦁ꧉

ꦱꦲꦸꦤ꧀ꦠꦫꦏꦸꦮꦶꦆꦁꦗꦧꦈꦢꦤ꧀ꦤꦺꦆꦱꦶꦃꦤꦽꦕꦶꦃ꧉ꦒ꧀ꦭꦸꦝꦸꦒ꧀ꦒꦺꦆꦱꦶꦃꦏꦼꦥꦿꦸꦔꦸꦱꦼꦤꦗꦤ꧀ꦲꦶꦁꦗꦼꦫꦺꦴꦎꦫꦏꦭꦃꦫꦩꦺꦤꦺꦏꦫꦺꦴꦱ꧀ꦮꦫꦭꦒꦸꦭꦒꦸ꧉ꦎꦫꦊꦠ꧀ꦱꦸꦮꦺꦄꦤ꧇ꦮ꧇ꦄ꧇ꦱꦏꦌꦤ꧀ꦝꦁꦏꦁꦎꦫꦧꦶꦱꦩꦼꦚꦁꦏꦥ꦳ꦺꦩꦼꦂꦒꦆꦱꦶꦃꦈꦢꦤ꧀ꦭꦤ꧀ꦲꦺꦴꦫꦄꦤ꧀ꦲꦺꦴꦫꦏꦼꦤ꧀ꦝꦫꦤ꧀ꦱꦶꦁꦧꦶꦱꦢꦶꦱꦶꦭꦶꦃ꧉ꦲꦥꦺꦧꦤ꧀ꦗꦸꦂꦢꦶꦱꦺꦭꦺꦃꦲꦏꦺꦩꦺꦗꦩꦤꦺꦃ꧉ꦝꦺꦮꦺꦏꦧꦭꦶꦤꦼꦫꦸꦱ꧀ꦱꦏꦺꦎꦩꦺꦴꦁꦎꦩꦺꦴꦁꦔꦤ꧀ꦏꦫꦺꦴꦮꦶꦢꦢ꧉

꧇ꦠꦿꦱ꧀ꦤꦱꦶꦧ꧀ꦏꦸꦏꦫꦺꦴꦪꦸꦢꦺꦴꦥꦶꦪꦺ꧈ꦮꦶꦢ꧀?ꦄꦏꦸꦩꦸꦁꦥꦺꦔꦺꦤ꧀ꦝꦺꦮꦺꦏ꧀ꦏꦺꦔꦼꦂꦠꦺꦤ꧀ꦤꦶꦄꦏꦸ꧉ꦧ꧀ꦭꦏꦮꦲꦺ꧈ꦱꦼꦤꦗꦤ꧀ꦲꦏꦸꦄꦚꦼꦭ꧀ ꦤꦔꦸꦁꦪꦸꦢꦺꦴꦆꦏꦶꦮꦺꦴꦁꦔꦺꦱꦧꦂ꧈꧇ꦱ꧀ꦮꦫꦤꦺꦄꦪꦸꦄꦭꦺꦴꦤ꧀꧈

꧇ꦱꦎꦫꦎꦫꦤꦺꦄꦮꦏ꧀ꦏꦺꦝꦺꦮꦺꦏꦸꦢꦸꦱꦺꦭꦺꦃꦄꦁꦒꦺꦴꦤ꧀ꦤꦺꦔꦝꦼꦥ꧀ꦥꦶꦩꦱꦭꦃꦭꦤ꧀ꦏꦸꦢꦸꦮꦼꦤꦶꦁꦄꦁꦒꦺꦴꦤ꧀ꦤꦺꦩꦶꦏꦶꦂ꧉ꦗꦫꦺꦩꦸꦮꦶꦱ꧀ꦮꦼꦒꦃꦏꦫꦺꦴꦪꦸꦢꦺꦴ꧈ꦩꦸꦭꦄꦗꦢꦶꦢꦶꦭꦠ꧀ꦩꦤꦺꦃ꧉ꦩꦼꦱꦏ꧀ꦤꦺꦪꦸꦢꦺꦴꦪꦺꦤ꧀ꦠꦼꦫꦸꦱ꧀ꦠꦼꦫꦸꦱ꧀ꦱꦤ꧀ꦧꦺꦴꦏ꧀ꦱꦭꦃꦤꦺ꧉ꦏꦺꦴꦮꦺꦝꦺꦮꦺꦈꦒꦔꦼꦂꦠꦺꦤ꧀ꦤꦤꦥꦼꦫꦱꦄꦤ꧀ꦤꦪꦸꦢꦺꦴ꧉꧇

꧇ꦤꦔꦶꦁꦄꦔꦺꦭ꧀ ꦮꦶꦢ꧀꧈ ꦔꦺꦤꦺꦆꦏꦶꦩꦭꦶꦃꦎꦫꦱꦼꦩꦔꦠ꧀ꦧꦧꦂꦧ꧀ꦭꦱ꧀꧈꧇

꧇ꦮꦶꦱ꧀!ꦆꦭꦁꦔꦤꦈꦏꦫꦩꦸꦱꦶꦁꦎꦫꦩꦸꦠꦸꦏꦸꦮꦶ꧉ꦏꦺꦴꦮꦺꦏꦸꦮꦶꦄꦪꦸꦎꦫꦩꦸꦁꦗꦼꦤꦼꦁꦩꦸꦮꦲꦺ꧉ꦱꦥꦮꦺꦴꦁꦎꦫꦏꦼꦱꦼꦁꦱꦼꦩ꧀ꦏꦫꦺꦴꦄꦪꦸꦩꦸ?ꦪꦺꦤ꧀ꦏꦺꦴꦮꦺꦆꦱꦶꦃꦏꦪꦩꦁꦏꦺꦴꦤꦺꦴꦩꦸꦁꦔ꧀ꦒꦼꦝꦺꦏ꧀ꦏꦏꦺꦌꦒꦺꦴꦩꦸꦪꦏꦪꦱꦶꦁꦈꦮꦶꦱ꧀ꦲꦸꦮꦶꦱ꧀ꦔꦺꦤꦺꦆꦏꦶ꧉ꦩꦸꦭꦏꦸꦢꦸꦧꦶꦱꦩꦶꦏꦶꦂꦱꦶꦁꦝꦶꦮꦱꦭꦤ꧀ꦲꦗꦏꦪꦧꦺꦴꦕꦃꦕꦶꦭꦶꦏ꧀꧈꧇

꧇ꦢꦏ꧀ꦫꦺꦮꦁꦔꦶꦈꦢꦤ꧀ꦲꦸꦢꦤ꧀ꦩꦿꦺꦤꦺꦆꦏꦶꦩꦲꦸꦩꦸꦁꦩ꧀ꦧꦺꦴꦏ꧀ꦏꦺꦴꦗꦃꦲꦶꦏꦪꦔꦺꦤꦺꦆꦏꦶ꧈ꦮꦶꦢ꧀꧈ꦧꦼꦒ꧀ꦗꦄꦏꦸꦏꦼꦠꦼꦩꦸꦄꦮꦏ꧀ꦩꦸ꧉ꦩꦭꦃꦌꦤ꧀ꦝꦁꦎꦫꦱꦶꦢꦩꦿꦺꦤꦺ꧉ꦱꦆꦏꦶꦄꦏꦸꦒꦤ꧀ꦠꦶꦠꦏꦺꦴꦤ꧀ ꦏꦺꦴꦮꦺꦄꦥ ꦒꦭꦲꦸ?꧇

ꦮꦶꦢꦢꦔ꧀ꦒꦸꦪꦸꦔꦏꦏ꧀ꦧꦉꦁꦢꦶꦠꦏꦺꦴꦤ꧀ꦤꦶꦏꦪꦩꦁꦏꦺꦴꦤꦺꦴ꧉ꦏꦺꦴꦥꦶꦱꦸꦱꦸꦱꦶꦁꦆꦱꦶꦃꦥꦤꦱ꧀ꦲꦺꦁꦒꦭ꧀ꦢꦶꦱꦿꦸꦥꦸꦠ꧀꧈ꦄꦉꦥ꧀ꦢꦸꦢꦸꦠ꧀ꦫꦺꦴꦏꦺꦴꦏ꧀ꦧꦤ꧀ꦗꦸꦂꦢꦶꦮꦸꦫꦸꦁꦔꦏꦺ꧉ꦝꦺꦮꦺꦏ꧀ꦏꦺꦭꦭꦶꦪꦺꦤ꧀ꦭꦒꦶꦏꦫꦺꦴꦄꦪꦸꦆꦁꦔꦉꦥ꧀ꦥꦺ꧉

꧇ꦄꦏꦸꦆꦏꦶꦎꦫꦒꦭꦲꦸꦏꦪꦱꦶꦁꦩ꧀ꦧꦺꦴꦏ꧀ꦧꦪꦁꦏꦺ꧈ꦪꦸ꧉ꦧꦶꦱꦔꦺꦴꦩ꧀ꦧꦺꦏꦺꦴꦥꦶꦔꦺꦤꦺꦆꦏꦶꦩꦶꦤꦁꦏꦮꦸꦗꦸꦢ꧀ꦫꦱꦩꦉꦩ꧀ꦭꦤ꧀ꦱꦾꦸꦏꦸꦂꦏꦸꦢꦺꦤꦺꦆꦱꦶꦃꦢꦶꦥꦫꦶꦁꦔꦶꦱꦼꦒꦼꦂꦮꦫꦱ꧀ ꦏ꧀ꦊꦧꦸꦮꦺꦴꦁꦠꦸꦮꦏꦸꦱꦶꦁꦄꦤꦢꦺꦱ ꦆꦱꦶꦃꦫꦺꦴꦱꦠꦼꦤꦒꦤꦺꦏꦁꦒꦺꦴꦩꦏꦂꦪ꧉ꦩꦸꦭꦏꦧꦺꦃꦏꦸꦮꦶꦏꦸꦢꦸꦢꦶꦤꦶꦏ꧀ꦩꦠꦶ꧉ꦏꦺꦴꦮꦺꦎꦫꦈꦱꦃꦧꦶꦔꦸꦁꦪꦺꦤ꧀ꦥꦼꦝꦺꦴꦠ꧀ꦏꦫꦺꦴꦪꦸꦢꦺꦴ꧉ꦩꦼꦁꦏꦺꦴꦪꦺꦤ꧀ꦠꦼꦏꦠꦶꦠꦶꦮꦤ꧀ꦕꦶꦤꦺꦫꦏ꧀ꦧꦏꦭ꧀ꦲꦤꦮꦺꦴꦁꦱꦶꦁꦒꦼꦊꦩ꧀ꦤꦩ꧀ꦥꦏꦺꦴꦮꦺꦄꦥꦄꦤꦤꦺ꧈꧇ꦏꦤ꧀ꦝꦤꦺꦮꦶꦢꦢ꧉

ꦲꦮꦄꦝꦼꦩ꧀ꦏꦁꦒꦶꦤꦮꦈꦢꦤ꧀ꦲꦭꦺꦴꦤ꧀ꦲꦭꦺꦴꦤ꧀ꦧꦸꦏꦏ꧀ꦥꦶꦏꦶꦂꦫꦤ꧀ꦤꦺꦄꦪꦸ꧉ꦄꦠꦶꦤꦺꦮꦶꦮꦶꦠ꧀ꦥꦝꦁ꧈ꦥꦶꦏꦶꦂꦫꦤ꧀ꦤꦺꦱꦶꦁꦄꦧꦺꦴꦠ꧀ꦮꦶꦮꦶꦠ꧀ꦏꦿꦱꦌꦤ꧀ꦛꦺꦁ꧉ꦈꦢꦤ꧀ꦮꦪꦃꦱꦺꦴꦫꦺꦮꦶꦱ꧀ꦢꦢꦶꦱꦼꦏ꧀ꦱꦶꦄꦁꦒꦺꦴꦤ꧀ꦤꦺꦔꦸꦝꦂꦫꦶꦧꦺꦴꦭꦃꦫꦸꦮꦼꦠ꧀ꦏꦁꦱꦱꦸꦮꦺꦤꦺꦆꦏꦶꦔ꧀ꦒꦸꦧꦼꦠ꧀ꦝꦺꦮꦺꦏ꧀ꦏꦺ꧉

Leave a Reply

Your email address will not be published. Required fields are marked *