ꦕꦸꦮꦶꦭ꧀ꦭꦤ꧀ꦮꦼꦏ꧀ꦠꦸ

30 December 2023 | 141 kali
Cerkak By : Dyah Kurniawati

 

 

 

ꦕꦸꦮꦶꦭ꧀ꦭꦤ꧀ꦮꦼꦏ꧀ꦠꦸ

 

CUWILAN WEKTU

 

ꦢꦺꦤꦶꦁ꧇ꦢꦾꦃꦏꦸꦂꦤꦶꦪꦮꦠꦶ

Dening: Dyah Kurniawati

 

꧋ꦩꦶꦁꦒꦺꦴꦤ꧀ꦏꦸꦧꦸꦛꦼꦏ꧀꧈ꦢꦶꦤꦱꦶꦁꦧꦔꦼꦠ꧀ꦠꦏ꧀ꦲꦉꦥ꧀ꦲꦉꦥ꧀ꦱꦱꦸꦮꦺꦤꦺꦤꦼꦩ꧀ꦢꦶꦤꦚꦩ꧀ꦧꦸꦠ꧀ꦒꦮꦺ꧈ꦱꦶꦁꦠꦏ꧀ꦒꦣꦁꦢꦢꦶꦢꦶꦤꦱꦶꦁꦥꦭꦶꦁꦚꦼꦤꦼꦁꦏꦺꦚꦠꦤꦺꦩꦭꦃꦱꦸꦮꦭꦶꦏ꧀ꦏꦺ꧉ꦥꦼꦂꦏꦫꦤꦺꦗꦤꦺꦩꦸꦁꦱꦼꦥꦺꦭꦺ꧈ꦤꦶꦁꦪꦺꦤ꧀ꦱꦼꦥꦺꦭꦺꦢꦶꦠꦸꦩ꧀ꦥꦸꦏ꧀ꦠꦸꦩ꧀ꦥꦸꦏ꧀ꦢꦢꦶꦤꦺꦧ꧀ꦭꦼꦣꦺꦴꦱ꧀ꦏꦪꦲꦶꦏꦶꦩꦲꦸ꧉ꦱꦸꦩ꧀ꦥꦼꦏ꧀ ꦗꦶꦧꦼꦏ꧀ ꦧꦸꦤꦼꦏ꧀ ꦢꦢꦶꦱꦶꦗꦶ꧉

꧋ꦠꦏ꧀ꦉꦼꦩ꧀ꦏꦺꦩꦤꦺꦃꦩꦿꦶꦥꦠ꧀ꦏꦸ꧈ꦲꦺꦴꦫꦏꦿꦱꦭꦸꦃꦢ꧀ꦭꦺꦮꦼꦂꦫꦤ꧀ꦤꦼꦊꦱ꧀ꦱꦶꦧꦤ꧀ꦠꦭ꧀ꦏꦁꦠꦤ꧀ꦱꦃꦱꦼꦠꦾꦔꦤ꧀ꦕꦤꦶꦢꦶꦤꦢꦶꦤꦱꦼꦥꦶꦏꦸ꧈ꦧꦤ꧀ꦠꦭ꧀ꦱꦶꦁꦱꦧꦂꦔꦿꦸꦔꦺꦴꦏ꧀ꦤꦺꦏꦧꦺꦃꦱꦩ꧀ꦧꦠ꧀ꦏꦸ꧉ꦲꦶꦱꦶꦃꦢꦸꦩꦼꦭꦶꦁꦥꦢꦸꦢꦺꦴꦤ꧀ꦏꦫꦺꦴꦧꦺꦴꦗꦺꦴꦏꦸꦩꦲꦸꦲꦺꦱꦸꦏ꧀ꦱꦢꦸꦫꦸꦁꦔꦺꦣꦺꦮꦺꦏꦺꦧꦸꦣꦭ꧀ꦔꦼꦠꦼꦂꦏꦺꦲꦣꦶꦮꦢꦺꦴꦤ꧀ꦤꦺ꧉

꧋꧇ꦩꦱ꧀ꦲꦏꦸꦱꦸꦏ꧀ꦑꦼꦩꦶꦱ꧀ꦲꦺꦤꦺꦏ꧀ꦲꦸꦤ꧀ꦝꦔꦤ꧀ꦲꦶꦁꦥ꦳ꦶꦭ꧀ꦭꦣꦲꦺꦫꦃꦒꦸꦤꦸꦁꦮꦶꦭꦶꦱ꧀ ꦲꦏꦸꦚꦸꦮꦸꦤ꧀ꦗꦼꦤꦼꦁꦔꦤ꧀ꦠꦼꦂꦏꦺꦕꦺꦏ꧀ꦭꦺꦴꦏꦱꦶꦠꦶꦤꦶꦩ꧀ꦧꦁꦧꦺꦱꦸꦏ꧀ꦢꦢꦏ꧀ꦒꦺꦴꦭꦺꦏ꧀ꦒꦺꦴꦭꦺꦏ꧀꧈꧇

꧋꧇ꦲꦭꦃ꧈ꦗꦩꦤ꧀ꦱꦲꦶꦏꦶꦪꦢꦼꦭꦺꦴꦏ꧀ꦒꦸꦒꦼꦭ꧀ꦩꦺꦥ꧀ꦲꦥꦠꦏꦺꦴꦤ꧀ꦲꦤ꧀ꦕꦼꦂꦲꦤ꧀ꦕꦼꦂꦭꦏ꧀ꦧꦺꦫꦺꦱ꧀꧇ꦗꦮꦧ꧀ꦧꦺꦧꦺꦴꦗꦺꦴꦏꦸꦏꦪꦲꦺꦴꦫꦢꦸꦮꦺꦢꦺꦴꦱ꧈ꦤꦔꦶꦁꦏꦿꦱꦲꦤ꧀ꦗꦺꦴꦗꦺꦴꦃꦣꦣꦏꦸ꧉

꧋ꦲꦏꦸꦢꦢꦶꦤꦫꦱꦸꦩ꧀ꦧꦼꦂꦢꦢꦶꦪꦏꦸꦢꦸꦗꦒꦩꦸꦠ꧀ꦧꦺꦤ꧀ꦱꦸꦮꦱꦤꦤꦺꦲꦠꦶꦏꦸꦚꦩꦤ꧀ ꦩꦺꦤꦺꦃꦲꦶꦩꦠꦺꦫꦶꦏꦸꦢꦸꦠꦼꦤꦁ꧇꧉

꧋꧇ꦩꦁꦏꦤꦺꦤꦺꦏ꧀ꦲꦢꦺꦴꦃꦫꦱꦃꦢꦶꦠꦩ꧀ꦥ꧈ꦗꦭꦸꦏ꧀ꦥꦤꦶꦠꦶꦪꦩꦥꦏ꧀ꦤꦺꦏ꧀ꦲꦺꦴꦫꦪꦧꦠꦭ꧀ꦤꦧꦲꦺ꧈ꦏꦶꦩꦼꦁꦏꦺꦴꦲꦏꦸꦔꦼꦠꦼꦂꦏꦺꦢꦶꦟꦶꦧ꧀ꦭꦤ꧀ꦗꦏꦁꦒꦺꦴꦱꦸꦏꦸꦂꦫꦤ꧀ꦩꦸꦁꦒꦃꦥꦁꦏꦠ꧀ꦱꦺꦱꦸꦏ꧀꧇

꧋꧇ꦗꦤ꧀ꦤꦺꦚꦥꦠꦩꦱ꧀ꦤꦺꦏ꧀ꦔꦼꦠꦼꦂꦏꦺꦲꦏꦸꦏꦶꦲꦧꦺꦴꦠ꧀ꦲꦺꦫꦩ꧀ ꦤꦔꦶꦁꦪꦺꦤ꧀ꦔꦼꦠꦼꦂꦏꦺꦱꦼꦢꦸꦭꦸꦂꦲꦏꦱ꧀ꦧꦔꦼꦠ꧀꧈ꦩꦶꦁꦓꦸꦮꦶꦔꦶꦠꦏ꧀ꦱꦸꦮꦸꦤ꧀ꦤꦶꦠꦸꦭꦸꦁꦔꦼꦠꦼꦂꦏꦺꦒꦺꦴꦭꦺꦏ꧀ꦧꦸꦏꦸꦏꦁꦒ꧀ꦒꦺꦴꦧꦲꦤ꧀ꦥꦤꦭꦶꦠꦺꦤ꧀ꦩꦭꦃꦔꦼꦧꦺꦴꦠ꧀ꦏꦺꦔꦼꦠꦼꦂꦏꦺꦩ꧀ꦧꦏ꧀ꦪꦸꦗꦼꦤꦼꦁꦔꦤ꧀ꦫꦺꦪꦸꦤꦶ꧈ ꦩꦶꦁꦓꦸꦣꦺꦏ꧀ꦲꦼꦩ꧀ꦧꦺꦤ꧀ꦏꦲꦺꦲꦭꦱ꧀ꦱꦤ꧀ꦔꦼꦠꦼꦂꦏꦺꦲꦶꦧꦸꦗꦼꦤꦼꦁꦔꦤ꧀ꦥꦿꦶꦏ꧀ꦱ꧈ꦱꦲꦶꦏꦶꦩꦭꦃꦲꦉꦥ꧀ꦔꦼꦠꦼꦂꦏꦺꦲꦣꦶꦏ꧀ꦗꦼꦤꦼꦁꦔꦤ꧀ꦱꦶꦁꦩꦤ꧀ꦗꦏꦸꦮꦶ꧉ꦭꦧꦺꦴꦗꦺꦴꦤꦺꦢꦶꦟꦶꦱꦶꦁꦩꦤ꧀ꦠꦸꦏꦼꦱꦪꦁꦔꦤ꧀ꦒꦸꦤꦤꦺꦏꦺꦴꦤ꧀ꦚꦥ?꧇꧉

꧋꧇ꦧꦺꦴꦗꦺꦴꦤꦺꦢꦶꦟꦶꦭꦒꦶꦩꦸꦭꦶꦃꦢꦶꦤꦼꦱ꧀ꦱꦏꦭꦸꦮꦂꦏꦺꦴꦠꦗꦫꦺꦱꦶꦏ꧀ꦏꦼꦱꦼꦭ꧀ ꦩꦺꦸꦭꦤꦺꦗꦭꦸꦏ꧀ꦠꦸꦭꦸꦁꦲꦏꦸ꧇꧉

꧋꧇ꦠꦿꦸꦱ꧀ꦪꦺꦤ꧀ꦗꦼꦤꦼꦁꦔꦤ꧀ꦲꦺꦴꦫꦢꦸꦮꦺꦮꦼꦏ꧀ꦠꦸꦏꦁꦒꦺꦴꦲꦏꦸ꧈ꦧꦤ꧀ꦗꦸꦂꦲꦏꦸꦗꦭꦸꦏ꧀ꦠꦸꦭꦸꦁꦱꦥ?ꦥꦼꦱꦼꦤ꧀ꦒꦺꦴꦗꦺꦏ꧀ꦒꦏ꧀ꦲꦺꦴꦭꦺꦃ꧈ꦤꦸꦩ꧀ꦥꦏ꧀ꦒꦿꦺꦥ꧀ꦪꦏꦸꦢꦸꦱꦺꦴꦥꦶꦂꦫꦺꦮꦺꦢꦺꦴꦏ꧀꧈ꦗꦼꦤꦼꦁꦔꦤ꧀ꦏꦸꦮꦶꦢꦶꦠꦶꦠꦶꦥ꧀ꦥꦶꦮꦺꦴꦁꦠꦸꦮꦏꦸꦗꦒꦲꦏꦸꦤꦔꦶꦁꦏꦺꦴꦏ꧀ꦲꦶꦱꦶꦃꦩꦼꦤ꧀ꦠꦶꦁꦏꦺꦏ꧀ꦭꦸꦮꦂꦒꦗꦼꦤꦼꦁꦔꦤ꧀ꦧꦲꦺ꧉ꦲꦸꦥꦩꦥꦶꦱꦤ꧀ꦥꦶꦤ꧀ꦝꦺꦴꦲꦺꦴꦫꦲꦥꦲꦥꦤꦔꦶꦁꦏꦺꦴꦏ꧀ꦪꦏꦼꦧꦔꦼꦠ꧀ꦠꦼꦤ꧀꧈꧈꧈ꦲꦸ꧈꧈꧈ꦲꦸ꧈꧈꧈ꦲꦸ꧈꧈꧈꧇꧉

꧋ꦠꦏ꧀ꦧꦿꦺꦴꦭ꧀ꦏꦺꦠꦔꦶꦱ꧀ꦏꦸꦲꦸꦁꦏꦼꦥ꧀ꦲꦸꦁꦏꦼꦥ꧀ꦱꦣꦸꦮꦸꦂꦫꦺꦧꦤ꧀ꦠꦭ꧀ꦔꦤ꧀ꦠꦶꦱꦲꦶꦏꦶ꧉ꦱꦗꦤ꧀ꦤꦺꦲꦏꦸꦲꦶꦱꦧꦸꦣꦭ꧀ꦝꦺꦮꦺꦤꦔꦶꦁꦱꦧꦼꦤꦼꦂꦫꦺꦲꦶꦏꦸꦩꦸꦁꦏꦁꦒꦺꦴꦲꦊꦱ꧀ꦱꦤ꧀ꦱꦸꦥꦪꦲꦶꦱꦩ꧀ꦭꦏꦸꦧꦉꦁꦧꦺꦴꦗꦺꦴ꧉ꦧꦺꦤ꧀ꦏꦪꦏꦤ꧀ꦕꦏꦸꦪꦺꦤ꧀ꦩꦶꦁꦓꦸꦩꦼꦱ꧀ꦛꦶꦱ꧀ꦠꦠꦸꦱ꧀ꦱꦺꦩ꧀ꦭꦏꦸꦧꦉꦁꦧꦺꦴꦗꦺꦴꦤꦺ꧈ꦩꦱꦶꦪꦩꦸꦁꦧ꧀ꦭꦤ꧀ꦗꦲꦸꦠꦮꦔꦺꦴꦥꦶꦔꦺꦴꦤꦺꦴꦧꦲꦺꦮꦶꦱ꧀ꦱꦼꦤꦼꦁ꧉ꦤꦔꦶꦁꦱꦱꦸꦮꦺꦤꦺꦠꦼꦭꦸꦁꦠꦲꦸꦤ꧀ꦲꦏꦸꦲꦺꦴꦩꦃꦲꦺꦴꦩꦃꦏꦼꦤꦢꦶꦲꦺꦠꦸꦁꦢꦿꦶꦗꦶꦢꦺꦴꦭꦤ꧀ꦏꦫꦺꦴꦧꦺꦴꦗꦺꦴ꧈ꦲꦶꦏꦸꦧꦲꦺꦔꦗꦏ꧀ꦏꦼꦭꦸꦮꦂꦒꦤꦺ꧈ꦲꦏꦸꦩꦸꦁꦢꦶꦲꦼꦁꦒꦺꦴꦒꦼꦤꦼꦥ꧀ꦒꦼꦤꦼꦥ꧀꧈ꦏꦉꦥ꧀ꦏꦸꦪꦧꦺꦤ꧀ꦤꦩ꧀ꦧꦃꦲꦶꦏꦼꦩꦶꦱ꧀ꦠꦿꦶꦏꦢꦶꦢꦺꦤꦺꦮꦺꦴꦁꦧꦼꦧꦺꦴꦗꦺꦴꦮꦤ꧀ ꦲꦸꦃ꧉

꧋ꦠꦏ꧀ꦭꦶꦫꦶꦏ꧀ꦗꦩ꧀ꦲꦶꦁꦠꦺꦩ꧀ꦧꦺꦴꦏ꧀ꦮꦶꦱ꧀ꦤꦸꦣꦸꦃꦏꦺꦲꦁꦏꦱꦼꦮꦼꦭꦱ꧀꧈ꦕꦼꦏꦺꦏꦭ꧀ꦲꦏꦸꦠꦔꦶꦲꦉꦥ꧀ꦲꦢꦸꦱ꧀꧈ꦲꦺꦴꦫꦠꦏ꧀ꦒꦥꦺꦧꦺꦴꦗꦺꦴꦏꦸꦱꦶꦁꦔꦼꦠꦺꦴꦏ꧀ꦤꦺꦩꦺꦴꦧꦶꦭ꧀ꦲꦉꦥ꧀ꦧꦸꦣꦭ꧀ꦔꦼꦠꦼꦂꦏꦺꦲꦣꦶꦤꦺ꧉ꦲꦏꦸꦏꦸꦢꦸꦧꦶꦱꦚꦼꦤꦼꦁꦏꦺꦲꦮꦏ꧀ꦏꦸꦣꦺꦮꦺ꧈ꦲꦗꦔꦤ꧀ꦠꦶꦭꦫꦲꦠꦶꦚꦼꦧꦧ꧀ꦏꦺꦫꦸꦱꦏ꧀ꦏꦺꦫꦒꦏꦸ꧉ꦱꦧꦸꦧꦂꦫꦺꦲꦢꦸꦱ꧀ꦧꦤ꧀ꦗꦸꦂꦩꦔꦤ꧀ꦭꦮꦸꦃꦱꦩ꧀ꦧꦼꦭ꧀ꦧꦮꦁꦭꦤ꧀ꦠꦺꦩ꧀ꦥꦺꦒꦺꦴꦫꦺꦁꦲꦺꦴꦭꦺꦃꦏꦸꦩꦱꦏ꧀ꦲꦺꦱꦸꦏ꧀ꦩꦲꦸ꧉ꦲꦺꦴꦫꦭꦭꦶꦚꦿꦸꦥꦸꦠ꧀ꦏꦺꦴꦥꦶꦥꦲꦶꦠ꧀ꦏꦁꦒꦺꦴꦧꦭꦺꦏ꧀ꦤꦺꦕꦃꦪꦏꦸꦧꦺꦤ꧀ꦧꦭꦶꦱꦸꦩꦸꦤꦂꦥꦣꦁꦗꦶꦁꦒ꧀ꦭꦁ꧉

꧋ꦏꦫꦺꦴꦩꦩꦃꦱꦼꦒꦲꦏꦸꦢꦸꦮꦺꦲꦶꦢꦺꦲꦉꦥ꧀ꦩꦼꦠꦸꦧꦲꦺꦒꦺꦴꦭꦺꦏ꧀ꦲꦮꦗꦧ꧉ꦲꦏꦸꦏꦺꦭꦶꦁꦔꦤ꧀ꦥꦁꦒꦺꦴꦤ꧀ꦤꦤ꧀ꦔꦺꦴꦥꦶꦗꦩꦤ꧀ꦝꦶꦱꦶꦏ꧀ꦱꦢꦸꦫꦸꦁꦔꦺꦫꦧꦶ꧉ꦧꦶꦪꦱꦤꦺꦲꦏꦸꦚꦼꦥꦶꦤꦺꦁꦲꦁꦏꦿꦶꦔꦤ꧀ꦱꦥꦶꦁꦒꦶꦂꦫꦺꦲꦭꦱ꧀ꦭꦺꦫꦺꦁꦒꦸꦤꦸꦁꦮꦶꦭꦶꦱ꧀꧈ꦲꦶꦁꦏꦺꦴꦤꦺꦴꦲꦏꦺꦃꦲꦁꦏꦿꦶꦔꦤ꧀ꦏꦫꦶꦩꦶꦭꦶꦃꦩꦼꦤꦸꦤꦺ꧉ꦱꦥꦩꦤꦺꦃꦱꦶꦁꦲꦉꦥ꧀ꦔꦿꦧꦸꦏ꧀ꦏꦧꦒꦾꦤ꧀ꦪꦺꦤ꧀ꦢꦸꦢꦸꦲꦮꦏ꧀ꦏꦺꦣꦺꦮꦺ꧈ꦲꦉꦥ꧀ꦠꦏ꧀ꦫꦧꦸꦏ꧀ꦚꦮꦏꦸꦏꦤ꧀ꦛꦶꦕꦫꦏꦸꦣꦺꦮꦺ꧉

꧋ꦲꦺꦴꦫꦔꦤ꧀ꦠꦶꦱꦗꦩ꧀ꦮꦶꦱ꧀ꦩꦁꦏꦿꦺꦴꦁꦱꦣꦸꦮꦸꦂꦫꦺꦩꦶꦪꦺꦴꦏꦸ꧉ꦠꦏ꧀ꦕꦺꦏ꧀ꦩꦤꦺꦃꦒꦮꦤ꧀ꦱꦶꦁꦮꦶꦒꦠꦶ꧈ꦭꦺꦥ꧀ꦠꦺꦴꦥ꧀ ꦲꦥꦺ꧈ ꦲꦺꦢ꧀ꦱꦺꦠ꧀ ꦩꦺꦴꦱ꧀ꦭꦤ꧀ꦝꦺꦴꦩ꧀ꦥꦺꦠ꧀꧉ꦧꦺꦫꦺꦱ꧀ ꦱꦢꦸꦫꦸꦁꦔꦺꦠꦏ꧀ꦱꦼꦠꦠꦼꦂꦲꦺꦴꦫꦭꦭꦶꦲꦺꦢ꧀ꦱꦺꦠ꧀ꦠꦏ꧀ꦱꦸꦩ꧀ꦥꦺꦭ꧀ꦏꦺꦏꦸꦥꦶꦁꦏꦶꦮꦭꦤ꧀ꦱꦶꦁꦠꦼꦔꦼꦤ꧀ꦲꦺꦴꦫꦠꦏ꧀ꦱꦸꦩ꧀ꦥꦼꦭ꧀ꦭꦶꦥꦼꦂꦭꦸꦤꦺꦏꦁꦒꦺꦴꦏꦼꦱ꧀ꦭꦩꦼꦠ꧀ꦠꦤ꧀ꦲꦩꦼꦂꦒꦩ꧀ꦭꦏꦸꦲꦶꦁꦢꦭꦤ꧀ꦲꦏꦺꦃꦩꦺꦴꦠꦺꦴꦂ꧉ꦏꦫꦺꦴꦚꦼꦠꦺꦭ꧀ꦭꦶꦫꦶꦃ꧇ꦩꦼꦱꦶꦤ꧀ꦮꦏ꧀ꦠꦸꦤꦺ꧇ꦨꦸꦢꦶꦣꦺꦴꦫꦺꦩꦶ꧈ꦲꦭꦺꦴꦤ꧀ꦲꦭꦺꦴꦤ꧀ꦒꦽꦩꦼꦠ꧀ꦱꦶꦤꦩ꧀ꦧꦶꦔꦽꦱꦼꦥ꧀ꦥꦶꦱꦼꦱꦮꦁꦔꦤ꧀ꦲꦭꦱ꧀ꦗꦠꦶꦲꦶꦁꦱꦏꦶꦮꦠꦼꦔꦼꦤ꧀ꦤꦺꦢꦭꦤ꧀ꦠꦸꦩꦸꦗꦸꦭꦺꦫꦺꦁꦒꦸꦤꦸꦁꦮꦶꦭꦶꦱ꧀꧈

꧋ꦏꦶꦫꦏꦶꦫꦗꦩ꧀ꦱꦶꦗꦶꦠꦼꦏꦤ꧀ꦲꦁꦏꦿꦶꦔꦤ꧀ꦱꦶꦁꦠꦏ꧀ꦠꦸꦗꦸ꧉ꦱ꧀ꦮꦱꦤꦤꦺꦲꦶꦱꦶꦃꦏꦪꦠꦼꦭꦸꦁꦠꦲꦸꦤ꧀ꦤꦭꦶꦏꦲꦏꦸꦩꦿꦺꦤꦺꦥꦸꦁꦏꦱ꧀ꦱꦤ꧀꧈ꦱꦼꦮꦸꦭꦤ꧀ꦱꦢꦸꦫꦸꦁꦁꦁꦔꦺꦲꦺꦴꦩꦃꦲꦺꦴꦩꦃ꧉ꦥꦁꦒꦺꦴꦤ꧀ꦤꦤ꧀ꦥꦥꦺꦴꦫꦶꦠ꧀ꦏꦸꦲꦶꦱꦶꦃꦏꦺꦴꦱꦺꦴꦁ꧉ꦱꦮꦶꦱ꧀ꦱꦺꦥꦼꦱꦼꦤ꧀ꦏꦺꦴꦥꦶꦭꦤ꧀ꦒꦺꦴꦫꦺꦁꦔꦤ꧀ꦲꦏꦸꦠꦸꦩꦸꦗꦸꦏꦸꦂꦱꦶꦥꦺꦴꦗꦺꦴꦏ꧀ꦏꦸꦭꦺꦴꦤ꧀ꦱꦶꦁꦱꦶꦤꦮꦁꦔꦤ꧀ꦤꦺꦭꦁꦱꦸꦁꦲꦭꦱ꧀ꦗꦠꦶꦱꦶꦁꦲꦶꦗꦺꦴꦫꦺꦴꦪꦺꦴꦫꦺꦴꦪꦺꦴ꧉ꦕꦸꦮꦕꦤꦤꦺꦥꦱ꧀ꦲꦺꦤꦏ꧀ꦭꦤ꧀ꦲꦺꦴꦫꦲꦸꦱꦸꦩ꧀ꦲꦼꦤ꧀ꦛꦸꦁꦗꦠꦶ꧉ꦧꦏꦭ꧀ꦗꦼꦫꦶꦠ꧀ꦗꦼꦫꦶꦠ꧀ꦪꦺꦤ꧀ꦮꦼꦫꦸꦃꦥꦠꦶꦁꦏ꧀ꦭꦼꦊꦂꦩꦸꦣꦸꦤ꧀ꦱꦏꦣꦸꦮꦸꦂ꧈ꦲꦶ꧈꧈꧈꧈ꦩꦿꦶꦤ꧀ꦢꦶꦁ꧉

꧋ꦠꦏ꧀ꦧꦸꦏꦭꦺꦥ꧀ꦠꦺꦴꦥ꧀ꦭꦤ꧀ꦏꦧꦺꦃꦲꦸꦧꦫꦩ꧀ꦥꦺꦤꦺꦠꦏ꧀ꦱꦶꦪꦥ꧀ꦏꦺ꧉ꦲꦏꦸꦮꦶꦮꦶꦠ꧀ꦔꦼꦠꦶꦏ꧀ꦕꦿꦶꦠꦏꦼꦢꦢꦺꦪꦤ꧀ꦱꦶꦁꦠꦏ꧀ꦫꦱꦏ꧀ꦤꦺꦢꦶꦤꦲꦶꦏꦶ꧉ꦮꦶꦱ꧀ꦢꦢꦶꦏꦧꦶꦪꦱꦲꦤ꧀ꦏꦸꦪꦺꦤ꧀ꦲꦠꦶꦭꦒꦶꦱꦸꦩ꧀ꦥꦼꦏ꧀ꦩꦼꦱ꧀ꦛꦶꦠꦏ꧀ꦧꦿꦺꦴꦭ꧀ꦏꦺꦭꦺꦮꦠ꧀ꦠꦸꦭꦶꦱ꧀ꦱꦤ꧀ ꦭꦸꦩꦪꦤ꧀ꦪꦺꦤ꧀ꦏꦥꦕꦏ꧀ꦲꦶꦁꦏꦭꦮꦂꦠꦶꦲꦶꦱꦏꦁꦒꦺꦴꦔꦺꦴꦥꦶꦩꦤꦺꦃ꧉ꦲꦺꦴꦫꦭꦭꦶꦠꦏ꧀ꦥꦱꦁꦲꦺꦢ꧀ꦱꦺꦠ꧀ꦲꦶꦁꦏꦸꦥꦶꦁꦏꦶꦮꦠꦼꦔꦼꦤ꧀ꦱꦸꦥꦪꦏꦺꦴꦤ꧀ꦱꦺꦤ꧀ꦠꦿꦱꦶꦲꦺꦴꦫꦏꦼꦒꦁꦒꦸ꧉ꦔꦤ꧀ꦠꦶꦩꦱ꧀ꦱꦶꦁꦔꦼꦠꦼꦂꦏꦺꦏꦺꦴꦥꦶꦭꦤ꧀ꦒꦺꦴꦫꦺꦁꦔꦤ꧀ꦔꦢꦼꦒ꧀ꦱꦸꦮꦺꦲꦶꦁꦔꦉꦥ꧀ꦏꦸꦲꦺꦴꦫꦮꦼꦫꦸꦃꦱꦏꦶꦁꦏꦠꦽꦩ꧀ꦩꦺꦢꦸꦢꦸꦭ꧀ꦭꦶꦏꦶꦧꦺꦴꦠ꧀ꦭꦺꦥ꧀ꦠꦺꦴꦥ꧀꧈

꧋ꦱꦶꦤꦩ꧀ꦧꦶꦉꦔꦼꦁꦉꦔꦼꦁꦭꦒꦸꦤꦺꦩꦱ꧀ꦨꦸꦢꦶꦣꦺꦴꦫꦺꦩꦶꦲꦔꦼꦤ꧀ꦏꦸꦩꦭꦶꦃꦔ꧀ꦭꦩ꧀ꦧꦿꦁꦲꦶꦁꦊꦭꦏꦺꦴꦤ꧀ꦏꦥꦸꦁꦏꦸꦂ꧉ꦧꦥꦏ꧀ꦲꦶꦧꦸꦏꦸꦏꦼꦏꦤ꧀ꦕꦤ꧀ꦲꦏꦿꦧ꧀ꦏꦫꦺꦴꦧꦥꦏ꧀ꦲꦶꦧꦸꦩꦫꦠꦸꦮꦏꦸꦭꦤ꧀ꦥꦺꦔꦶꦤ꧀ꦔꦿꦏꦼꦠ꧀ꦠꦏꦺꦥꦱꦼꦢꦸꦭꦸꦂꦫꦤ꧀꧈ꦗꦼꦭꦭꦃꦏꦺꦴꦏ꧀ꦥꦸꦠꦿꦤꦺꦩꦤꦸꦠ꧀ꦧꦲꦺꦢꦶꦗꦺꦴꦣꦺꦴꦏ꧀ꦤꦺꦏꦫꦺꦴꦲꦏꦸ꧉ꦲꦏꦸꦱꦶꦁꦮꦼꦏ꧀ꦠꦸꦲꦶꦏꦸꦭꦒꦶꦱ꧀ꦏꦿꦶꦥ꧀ꦱꦶꦲꦺꦴꦫꦩꦶꦏꦶꦂꦢꦮ꧈ꦮꦼꦒꦃꦤꦩ꧀ꦧꦃꦥꦼꦂꦏꦫ꧉ꦥꦺꦴꦏꦺꦴꦏ꧀ꦥꦶꦏꦶꦂꦏꦸꦪꦺꦤ꧀ꦧꦥꦏ꧀ꦲꦶꦧꦸꦱꦼꦤꦼꦁꦲꦏꦸꦩꦤꦸꦠ꧀ꦧꦲꦺ꧉

꧋ꦭꦢꦭꦃ꧈ꦲꦺꦴꦫꦔꦤ꧀ꦠꦶꦫꦺꦴꦁꦮꦸꦭꦤ꧀ꦏꦼꦭꦏꦺꦴꦤ꧀ꦥꦺꦱ꧀ꦠꦒꦼꦣꦺꦤ꧀ꦭꦤ꧀ꦲꦏꦸꦱꦶꦁꦮꦼꦏ꧀ꦠꦸꦲꦶꦏꦸꦲꦶꦱꦶꦃꦲꦶꦁꦪꦺꦴꦓ꧀ꦪꦧꦺꦴꦭꦧꦭꦶꦫꦺꦥ꦳ꦶꦱꦶꦱ꧀ꦏꦿꦶꦥ꧀ꦱꦶꦪꦩꦸꦁꦥꦱꦿꦃꦱꦶꦁꦤꦺꦁꦲꦺꦴꦩꦃ꧉ꦩꦸꦭꦶꦃꦱꦼꦩꦶꦁꦒꦸꦱꦢꦸꦫꦸꦁꦔꦺꦲꦕꦫꦭꦤ꧀ꦏꦧꦺꦃꦮꦶꦱ꧀ꦧꦺꦫꦺꦱ꧀꧈ꦱꦼꦩꦶꦁꦒꦸꦲꦏꦸꦤꦺꦁꦲꦺꦴꦩꦃꦲꦺꦴꦫꦲꦺꦴꦭꦺꦃꦩꦼꦠꦸꦢꦶꦥꦶꦔꦶꦠ꧀ꦏꦢꦶꦢꦺꦤꦺꦕꦭꦺꦴꦤ꧀ꦩꦤ꧀ꦠꦺꦤ꧀ ꦤꦔꦶꦁꦲꦏꦸꦮꦶꦱ꧀ꦧꦺꦴꦱꦼꦤ꧀ꦧꦔꦼꦠ꧀꧈ꦗꦼꦭꦭꦃꦩꦼꦕꦸꦔꦸꦭ꧀ꦪꦟ꧀ꦠꦶ꧈ꦏꦤ꧀ꦕꦏꦸꦢꦺꦴꦭꦤ꧀ꦱꦶꦁꦲꦺꦴꦩꦃꦲꦺꦠꦸꦁꦒꦭ꧀ ꦫ꧈ꦠ꧈ꦏꦫꦺꦴꦲꦏꦸ꧈ꦲꦶꦱꦤꦩ꧀ꦧꦤꦶꦮꦼꦏ꧀ꦠꦸꦏꦸꦱꦶꦁꦧꦺꦴꦱꦼꦤ꧀ꦏꦺ꧉ꦤꦔꦶꦁꦠꦼꦏꦤꦺꦪꦟ꧀ꦠꦶꦲꦶꦏꦸꦩꦲꦸꦩꦭꦃꦢꦢꦺꦏ꧀ꦤꦺꦲꦏꦸꦏꦼꦥꦶꦏꦶꦂꦫꦤ꧀ꦔꦤ꧀ꦠꦶꦱꦲꦶꦏꦶ꧉

꧋꧇ꦲꦺꦃꦟꦶꦁ꧈ꦲꦶꦱꦶꦃꦲꦺꦭꦶꦁꦩꦱ꧀ꦝꦟꦂꦒꦏ꧀?꧇꧉

꧋ꦲꦠꦶꦏꦸꦠꦿꦠꦧ꧀ꦧꦤ꧀ꦏꦿꦸꦔꦸꦗꦼꦤꦼꦁꦔꦺꦩꦱ꧀ꦝꦟꦂꦢꦶꦱꦼꦧꦸꦠ꧀ꦪꦟ꧀ꦠꦶ꧉ꦱꦧꦼꦤꦼꦂꦫꦺꦲꦏꦸꦲꦶꦱꦶꦃꦲꦤꦒꦤ꧀ꦗꦼꦭ꧀ꦭꦤ꧀ꦏꦫꦺꦴꦩꦱ꧀ꦝꦟꦂ꧈ꦲꦼꦩ꧀ꦧꦸꦃꦫꦱꦤꦺꦲꦺꦴꦫꦧꦶꦱꦢꦶꦒꦩ꧀ꦧꦂꦤꦺ꧉ꦮꦶꦮꦶꦠ꧀ ꦱ꧈ꦢ꧈ꦩꦱ꧀ꦝꦟꦂꦒꦺꦴꦣꦤꦶꦲꦏꦸ꧈ꦔꦼꦭꦺꦴꦏ꧀ꦤꦺꦏꦸꦭꦶꦠ꧀ꦏꦸꦱꦶꦁꦲꦶꦉꦁꦲꦶꦏꦶ꧉ꦭꦤ꧀ꦲꦏꦸꦏꦺꦴꦏ꧀ꦩꦭꦃꦱꦼꦤꦼꦁꦪꦺꦤ꧀ꦢꦶꦭꦺꦴꦏ꧀ꦤꦺ꧈ꦱꦸꦮꦺꦱꦸꦮꦺꦏꦼꦠꦒꦶꦃꦲꦤ꧀ꦢꦶꦭꦺꦴꦏ꧀ꦤꦺꦩꦱ꧀ꦝꦟꦂ꧉

꧋ꦤꦔꦶꦁꦱꦮꦶꦱ꧀ꦱꦺꦲꦏꦸꦱ꧈ꦩ꧈ꦄ꧈ꦏꦼꦭꦱ꧀ꦠꦼꦭꦸꦭꦤ꧀ꦧꦤ꧀ꦗꦸꦂꦏꦸꦭꦶꦪꦃꦮꦶꦱ꧀ꦗꦫꦁꦏꦼꦠꦼꦩꦸꦩꦱ꧀ꦝꦟꦂꦩꦤꦺꦃ꧉ꦣꦺꦮꦺꦏꦺꦱꦶꦧꦸꦏ꧀ꦏꦸꦭꦶꦪꦃꦲꦶꦁꦯꦸꦫꦧꦪꦭꦤ꧀ꦲꦏꦸꦏꦼꦠꦩ꧀ꦥꦏꦸꦭꦶꦪꦃꦲꦶꦁꦪꦺꦴꦓ꧀ꦪ꧉ꦏꦣꦁꦏꦭꦪꦩꦏ꧀ꦚꦸꦠ꧀ꦏꦺꦭꦶꦁꦔꦤ꧀꧈ꦱꦗꦺꦴꦒ꧀ꦒꦺꦲꦶꦏꦸꦮꦶꦱ꧀ꦲꦺꦴꦫꦤꦠꦺꦔꦼꦭꦺꦴꦏ꧀ꦤꦺꦩꦤꦺꦃꦭꦤ꧀ꦏꦼꦠꦼꦩꦸꦩꦸꦁꦩꦺꦱꦼꦩ꧀ꦠꦸꦂꦠꦤ꧀ꦱꦃꦔꦶꦁꦒꦠ꧀ꦠꦶꦱꦥꦠꦼꦩꦺꦴꦤ꧀ꦏꦫꦺꦴꦲꦏꦸ꧉ꦩꦱꦶꦪꦲꦺꦴꦩꦃꦲꦺꦩꦸꦁꦏꦼꦭꦼꦠ꧀ꦠꦤ꧀ꦥꦶꦠꦸꦁꦲꦺꦴꦩꦃꦭꦤ꧀ꦪꦺꦤ꧀ꦥꦿꦺꦲꦶꦪꦤ꧀ꦩꦼꦱ꧀ꦛꦶꦢꦺꦴꦭꦤ꧀ꦲꦶꦁꦲꦺꦴꦩꦃꦏꦸꦩꦼꦂꦒꦏꦤ꧀ꦕꦤꦺꦩꦱ꧀ꦏꦸꦧꦉꦥ꧀꧈ꦠꦥꦶꦮꦶꦱ꧀ꦲꦺꦴꦫꦱꦥꦲꦫꦸꦃꦩꦤꦺꦃ꧈ꦲꦏꦸꦪꦩꦭꦶꦃꦭꦶꦁꦱꦼꦩ꧀ꦪꦺꦤ꧀ꦏꦼꦠꦼꦩꦸꦣꦺꦮꦺꦏꦺ꧉ꦲꦭꦸꦮꦸꦁꦚꦶꦁꦏꦿꦶꦃ꧈ꦤꦶꦁꦏꦣꦁꦏꦭꦔꦶꦤ꧀ꦕꦼꦁꦲꦸꦠꦮꦔꦸꦥꦶꦁꦪꦺꦤ꧀ꦝꦺꦮꦺꦏꦺꦔꦺꦴꦧꦿꦺꦴꦭ꧀ꦏꦫꦺꦴꦩꦱ꧀ꦏꦸ꧉

꧋꧇ꦲꦺ꧈ꦭꦏꦺꦴꦏ꧀ꦩꦭꦃꦧꦼꦔꦺꦴꦁ꧈꧇ꦪꦟ꧀ꦠꦶꦧꦼꦔꦺꦴꦏ꧀ꦭꦤ꧀ꦔꦶꦥꦠ꧀ꦏꦺꦠꦔꦤ꧀ꦤꦺꦤꦺꦁꦔꦉꦥ꧀ꦩꦿꦶꦥꦠ꧀ꦏꦸ꧉

꧋꧇ꦲꦼꦩ꧀꧈꧈꧈ꦲꦥꦩꦲꦸ꧈ꦥꦶꦪꦺ꧇ꦲꦏꦸꦒ꧀ꦭꦒꦼꦥ꧀ꦥꦤ꧀ꦏꦺꦴꦤꦁꦔꦤ꧀ꦔꦭꦩꦸꦤ꧀꧈

꧋꧇ꦩꦱ꧀ꦝꦟꦂꦠꦲꦸꦕꦿꦶꦠꦤꦺꦁꦲꦏꦸꦥꦱ꧀ꦱꦧꦸꦧꦂꦫꦺꦲꦮꦏ꧀ꦩꦸꦭꦩꦂꦫꦤ꧀꧈ꦮꦺꦴꦁꦁꦁꦔꦺꦕꦺꦴꦏ꧀ꦭꦺꦏ꧀ꦲꦠꦶꦤꦺ꧇꧉

꧋꧇ꦕꦺꦴꦏ꧀ꦭꦺꦏ꧀ꦥꦶꦪꦺ꧈ꦲꦥꦏꦺꦴꦏ꧀ꦠꦺꦴꦭꦏ꧀꧈ꦲꦺꦲꦺ꧈꧈꧈꧇꧉

꧋꧇ꦔꦮꦸꦂꦧꦲꦺ꧈ꦏꦸꦮꦭꦶꦏ꧀ꦪ꧉ꦱꦧꦼꦤꦼꦂꦫꦺꦩꦱ꧀ꦝꦟꦂꦏꦶꦔꦼꦱꦶꦂꦲꦮꦏ꧀ꦩꦸꦭꦤ꧀ꦱꦧꦂꦤꦸꦁꦒꦸꦱ꧀ꦏꦿꦶꦥ꧀ꦱꦶꦩꦸꦫꦩ꧀ꦥꦸꦁ꧉ꦭꦤ꧀ꦉꦼꦤ꧀ꦕꦤꦤꦺꦔ꧀ꦭꦩꦂꦱꦮꦶꦱ꧀ꦱꦺꦮꦶꦱꦸꦣꦤꦺꦲꦮꦏ꧀ꦩꦸ꧈ꦤꦔꦶꦁꦏꦼꦣꦶꦱꦶꦏꦤ꧀ꦢꦶꦭꦩꦂꦮꦺꦴꦁꦭꦶꦪ꧇꧉

꧋ꦏꦪꦏꦼꦱꦩ꧀ꦧꦼꦂꦧ꧀ꦭꦼꦣꦺꦒ꧀ꦫꦱꦤꦺꦮꦼꦏ꧀ꦠꦸꦲꦶꦏꦸ꧈ꦤꦔꦶꦁꦏꦧꦺꦃꦲꦶꦏꦸꦮꦶꦱ꧀ꦕꦿꦶꦠꦏꦮꦸꦫꦶꦲꦺꦴꦫꦏꦼꦤꦢꦶꦧꦭꦺꦤ꧀ꦤꦶ꧉ꦲꦸꦥꦩꦧꦶꦱꦧꦭꦺꦤ꧀ꦤꦶꦮꦼꦏ꧀ꦠꦸꦲꦉꦥ꧀ꦠꦏ꧀ꦥꦸꦠꦼꦂꦩꦤꦺꦃꦱꦸꦥꦪꦤꦸꦁꦒꦸꦭꦩꦂꦫꦤꦺꦩꦱ꧀ꦝꦟꦂꦱꦶꦁꦱꦢꦸꦫꦸꦁꦔꦺꦗꦼꦗꦺꦴꦒꦺꦢ꧀ꦢꦤ꧀ꦱꦗꦿꦺꦴꦤꦺꦶꦁꦲꦠꦶꦏꦸ꧉

꧋ꦲꦺꦴꦫꦏꦿꦱꦭꦺꦥ꧀ꦠꦺꦴꦥ꧀ꦲꦺꦶꦁꦔꦉꦥ꧀ꦏꦸꦧꦠꦿꦺꦤꦺꦲꦼꦤ꧀ꦠꦺꦏ꧀ꦠꦏ꧀ꦠꦶꦁꦒꦭ꧀ꦔꦭꦩꦸꦤ꧀ꦩꦱ꧀ꦝꦟꦂꦭꦤ꧀ꦪꦟ꧀ꦠꦶꦩꦲꦸ꧉ꦲꦸꦤ꧀ꦠꦸꦁꦏꦼꦠꦶꦏ꧀ꦏꦤ꧀ꦮꦶꦱ꧀ꦠꦏ꧀ꦱꦶꦩ꧀ꦥꦼꦤ꧀꧈ꦤꦔꦶꦁꦲꦏꦸꦏꦺꦴꦏ꧀ꦏꦿꦱꦲꦤꦱꦶꦁꦔꦸꦮꦱ꧀ꦱꦶ꧉ꦲꦏꦸꦩꦺꦔꦺꦴꦲꦶꦁꦏꦸꦂꦱꦶꦥꦺꦴꦗꦺꦴꦏ꧀ꦲꦺꦠꦤ꧀꧈ꦩꦏ꧀ꦠꦿꦠꦧ꧀ꦲꦶꦁꦏꦺꦴꦤꦺꦴꦲꦤꦥꦮꦺꦴꦁꦔꦤ꧀ꦱꦶꦁꦲꦺꦴꦫꦲꦱꦶꦁꦏꦁꦒꦺꦴꦏꦸ꧉ꦩꦼꦔꦁꦒꦺꦴꦏꦕꦩꦠꦲꦶꦉꦁ꧈ꦏꦲꦺꦴꦱ꧀ꦲꦶꦉꦁꦕ꧀ꦭꦤꦏꦿꦺꦩ꧀ꦭꦒꦶꦩꦤ꧀ꦢꦼꦁꦲꦏꦸ꧉

꧋꧇ꦭꦺꦴꦃ꧈ꦲꦶꦏꦸꦏꦪꦩꦱ꧀ꦢꦟꦂ?꧇ꦧꦠꦶꦤ꧀ꦏꦸꦏꦿꦺꦴꦤ꧀ꦕꦭ꧀ꦭꦤ꧀꧈ꦒꦒꦺꦠꦏ꧀ꦱꦿꦸꦥꦸꦠ꧀ꦏꦺꦴꦥꦶꦏꦸꦱꦶꦁꦮꦶꦱ꧀ꦲꦣꦼꦩ꧀ꦏꦁꦒꦺꦴꦔꦣꦼꦩ꧀ꦏꦺꦲꦠꦶꦏꦸꦱꦶꦁꦏꦿꦺꦴꦤ꧀ꦕꦭ꧀ꦭꦤ꧀꧈ꦲꦏꦸꦲꦺꦴꦫꦮꦤꦶꦩꦺꦔꦺꦴꦥꦺꦴꦗꦺꦴꦏ꧀ꦲꦺꦠꦤ꧀ꦩꦤꦺꦃ꧉ꦩꦸꦒꦩꦸꦒꦩꦸꦁꦲꦭꦸꦱꦶꦤꦱꦶꦏꦸꦮꦼꦫꦸꦃꦮꦼꦮꦪꦁꦔꦤꦺꦩꦱ꧀ꦣꦟꦂ꧉ꦠꦏ꧀ꦫꦶꦁꦏꦼꦱ꧀ꦱꦶꦧꦫꦁꦁꦏꦸꦭꦤ꧀ꦥꦺꦔꦶꦤ꧀ꦒꦒꦺꦏꦸꦏꦸꦠ꧀ꦱꦏꦏꦺꦤꦺ꧈ꦩꦸꦤ꧀ꦝꦏ꧀ꦧꦺꦴꦗꦺꦴꦏꦸꦱꦼꦭꦏ꧀ꦩꦸꦭꦶꦃ꧉ꦲꦏꦸꦫꦸꦩꦁꦱꦏꦢꦺꦴꦱꦤ꧀ꦩꦼꦠꦸꦩꦲꦸꦲꦺꦴꦫꦥꦩꦶꦠ꧀ꦩꦼꦂꦒꦤꦼꦱꦸ꧉

꧋ꦭꦒꦶꦧꦲꦺꦔꦢꦼꦒ꧀ ꦲꦶꦁꦥꦂꦏꦶꦂꦫꦤ꧀ꦲꦤꦱ꧀ꦮꦫꦩꦺꦴꦠꦺꦴꦂꦢꦶꦒꦱ꧀ꦧꦤ꧀ꦠꦼꦂ꧉ꦥꦼꦤꦱꦫꦤ꧀ꦏꦫꦺꦴꦱꦶꦁꦔꦼꦒꦱ꧀ ꧇ꦭꦺꦴꦃꦲꦶꦏꦸꦏꦤ꧀ꦩꦱ꧀ꦩꦲꦸ꧈ꦩꦱ꧀ꦝꦟꦂ꧇꧉ꦠꦏ꧀ꦏꦶꦥꦠ꧀ꦏꦺꦩꦤꦺꦃꦮꦼꦮꦪꦁꦔꦤ꧀ꦲꦶꦏꦸ꧉ꦣꦸꦃ꧉

꧋ꦤꦭꦶꦏꦲꦉꦥ꧀ꦧꦪꦂꦤꦺꦁꦏꦱꦶꦂꦏꦒꦺꦠ꧀ꦏꦸꦠꦤ꧀ꦱꦪꦤꦼꦩꦼꦤ꧀꧈

꧋꧇ꦥꦶꦤ꧀ꦠꦼꦤ꧀ ꦩ꧀ꦧꦏ꧀?꧇꧉

꧋꧇ꦱꦩ꧀ꦥꦸꦤ꧀ꦢꦶꦧꦪꦂꦫꦶꦩꦱ꧀ꦏꦭꦮꦲꦸ꧈ꦩ꧀ꦧꦏ꧀꧇꧉

꧋꧇ꦭꦺꦴꦃ꧈꧇ꦩꦿꦶꦥꦠ꧀ꦏꦸꦭꦁꦱꦸꦁꦩꦼꦤ꧀ꦢꦼꦭꦶꦏ꧀ꦏꦶꦩ꧀ꦧꦏ꧀ꦏꦱꦶꦂ꧇꧉

꧋꧇ꦲꦶꦁꦒꦶꦃ꧈ꦩꦱ꧀ꦏꦲꦺꦴꦱ꧀ꦲꦶꦉꦁꦕ꧀ꦭꦤꦏꦿꦺꦩ꧀꧇ꦮꦁꦱꦸꦭꦤ꧀ꦤꦺꦩ꧀ꦧꦏ꧀ꦏꦺꦏꦊꦩ꧀ꦤꦔꦶꦁꦏꦱꦶꦭ꧀ꦔꦤ꧀ꦠꦼꦩ꧀ꦫꦱꦏꦸꦱꦏꦪꦁꦔꦺ꧉

 

******

 

ꦕꦸꦛꦼꦭ꧀

꧋ꦩꦢꦶꦪꦸꦤ꧀ ꧇꧔꧇ꦣꦺꦱꦺꦩ꧀ꦧꦼꦂ꧇꧒꧐꧒꧒꧇꧉

꧋ꦮꦶꦱ꧀ꦤꦠꦺꦏꦥꦕꦏ꧀ꦲꦶꦁꦭꦺꦤ꧀ꦱꦱꦱ꧀ꦠꦿ꧉

Cuwilan Wektu

 

 

 

Leave a Reply

Your email address will not be published. Required fields are marked *