ꦱꦼꦤꦼꦁꦔ꧀ꦭꦸꦪꦸꦂ

19 January 2024 | 95 kali
Cerkak By : Suprayitno Fitra

ꦄꦤꦄꦤꦧꦲꦺ

ꦱꦼꦤꦼꦁꦔ꧀ꦭꦸꦪꦸꦂ

ꦢꦺꦤꦶꦁ ꦢꦾꦃꦑꦸꦂꦤꦶꦪꦮꦠꦶ

ꦆꦁꦢꦺꦱꦏꦸꦄꦤꦱꦶꦩ꧀ꦧꦃꦥꦸꦠꦿꦶꦄꦱ꧀ꦩꦤꦺꦱꦶꦩ꧀ꦧꦃꦑꦼꦩ꧀ꦱꦶꦁꦪꦸꦱ꧀ꦮꦤꦺꦈꦢꦏꦫꦱꦔꦁꦥꦸꦭꦸꦃꦲꦤ꧀꧈ꦥꦶꦪꦤ꧀ꦠꦸꦤ꧀ꦤꦺꦆꦶꦱꦶꦃꦌꦛꦺꦱ꧀ꦧꦔꦼꦠ꧀ꦭꦤ꧀ꦱꦧꦼꦤ꧀ꦢꦶꦤꦩꦶꦢꦼꦂꦎꦫꦒꦼꦊꦩ꧀ꦩꦼꦤꦼꦁ꧉ꦱꦧꦼꦤ꧀ꦠꦏ꧀ꦠꦏꦺꦴꦤ꧀ꦤꦶꦆꦱꦶꦃꦔ꧀ꦒꦼꦤꦃꦢꦢꦶꦢꦸꦫꦸꦁꦥꦶꦏꦸꦤ꧀ꦧꦔꦼꦠ꧀꧈ꦄꦩꦂꦒꦏꦤ꧀ꦕꦏꦤ꧀ꦕꦱꦧꦫꦏꦤ꧀ꦤꦺꦮꦶꦱ꧀ꦥꦝꦏꦥꦸꦤ꧀ꦝꦸꦠ꧀ ꦥꦶꦪꦩ꧀ꦧꦏ꧀ꦏꦺꦏꦪꦮꦺꦴꦁꦧꦶꦔꦸꦁꦒꦺꦴꦭꦺꦏ꧀ꦏꦤ꧀ꦕꦎꦩꦺꦴꦁ꧉ꦗꦼꦭꦭꦃꦄꦤꦏ꧀ꦭꦤ꧀ꦥꦸꦠꦸꦤꦺꦱꦶꦁꦔꦤ꧀ꦕꦤ꧀ꦤꦶꦥꦝꦱꦶꦧꦸꦏ꧀ꦢꦢꦶꦄꦱꦿꦶꦁꦩꦸꦭꦶꦃꦧꦼꦔꦶ꧉ꦱꦶꦩ꧀ꦧꦃꦑꦼꦩ꧀ꦱꦶꦁꦏꦱꦼꦥꦼꦤ꧀ꦧꦶꦪꦱꦤꦺꦩꦸꦁꦛꦼꦔꦸꦏ꧀ꦛꦼꦔꦸꦏ꧀ꦲꦶꦁꦭꦶꦤ꧀ꦕꦏ꧀ꦲꦺꦩ꧀ꦥꦺꦂꦫꦤ꧀ꦲꦺꦴꦩꦃꦏꦫꦺꦴꦚꦮꦁꦮꦺꦴꦁꦭꦺꦮꦠ꧀꧈ꦤꦔꦶꦁꦊꦠ꧀ꦱꦼꦝꦺꦭꦩꦼꦱ꧀ꦛꦶꦮꦶꦱ꧀ꦲꦸꦕꦸꦭ꧀ꦩꦤꦺꦃ꧉ꦱꦧꦼꦤ꧀ꦲꦸꦕꦸꦭ꧀ꦩꦼꦠꦸꦔ꧀ꦭꦸꦪꦸꦂ꧈ꦮꦺꦴꦁꦮꦺꦴꦁꦢꦺꦱꦏꦸꦱꦶꦁꦏꦼꦠꦼꦩꦸꦱꦶꦩ꧀ꦥꦁꦔꦤ꧀ꦲꦶꦁꦢꦭꦤ꧀ꦩꦼꦱ꧀ꦛꦶꦔꦼꦠꦼꦂꦏꦺꦧꦭꦶꦏ꧀ꦱꦶꦩ꧀ꦧꦃꦑꦼꦩ꧀ ꦄꦩꦂꦒꦫꦸꦩꦁꦱꦩꦺꦭꦸꦤ꧀ꦢꦸꦮꦺꦤꦶꦱꦶꦩ꧀ꦧꦃꦑꦼꦩ꧀ꦏꦪꦱꦶꦩ꧀ꦧꦃꦲꦺꦝꦺ ꦮꦺ꧉ꦱꦧꦼꦤ꧀ꦢꦶꦤꦭꦺꦮꦠ꧀ꦔꦉꦥ꧀ꦲꦺꦴꦩꦃꦏꦸꦌꦤꦺꦏ꧀ꦤꦺꦏ꧀ꦥꦶꦁꦁꦱꦼꦮꦶꦢꦏ꧀ꦗꦫꦤ꧀ꦏꦲꦺ꧈ꦲꦺꦲꦺ꧉

ꦏꦪꦧꦶꦪꦱꦤꦺꦱꦏꦌꦠꦤ꧀ꦮꦶꦱ꧀ꦏꦠꦺꦴꦤ꧀ꦲꦤꦏ꧀ꦭꦺꦝꦁꦔꦺꦩ꧀ꦧꦃꦑꦼꦩ꧀ꦏꦫꦺꦴꦠꦥꦶꦃꦲꦺꦫꦢꦢꦶꦕꦶꦤ꧀ꦕꦶꦁꦔꦏꦺꦧꦺꦤ꧀ꦲꦺꦴꦫꦚꦿꦶꦩ꧀ꦥꦼꦠ꧀ꦠꦶ꧉ꦤꦭꦶꦏꦠꦼꦏꦤ꧀ꦔꦉꦥ꧀ꦏꦸꦠꦏ꧀ꦠꦏꦺꦴꦤ꧀ꦤꦶ꧉

꧇ꦄꦗꦼꦁꦠꦼꦁꦥꦸꦤ꧀ꦢꦶ꧈ꦩ꧀ꦧꦃ?ꦥꦶꦤꦫꦏ꧀ꦩꦿꦶꦏꦶꦭꦺꦴ꧈ꦏꦸꦭꦢꦩꦼꦭ꧀ꦏꦺꦠꦺꦃ꧈꧇ꦱꦥꦏꦸꦔꦼꦤ꧀ꦝꦼꦒ꧀ꦭꦏꦸꦤꦺꦱꦶꦩ꧀ꦧꦃꦑꦼꦩ꧀꧈

꧇ꦔ꧀ꦒꦺꦤ꧀ꦤꦺꦧꦸꦪꦸꦠ꧀ꦏꦸꦏꦸꦭꦺꦴꦤ꧀ꦏꦺꦴꦤꦺꦴꦭꦺꦴ꧈ꦄꦏꦸꦮꦶꦱ꧀ꦧꦂꦔꦺꦴꦩ꧀ꦧꦺꦠꦺꦃꦆꦏꦶꦩꦲꦸ꧈꧇ꦱꦶꦩ꧀ꦧꦃꦑꦼꦩ꧀ꦩꦤ꧀ꦝꦼꦒ꧀ꦱꦼꦝꦺꦭꦏꦫꦺꦴꦱꦸꦩꦲꦸꦂ꧉

꧇ꦮꦺꦴꦔꦠꦼꦤ꧀ ꦔꦠꦺꦴꦱ꧀ꦔꦠꦺꦴꦱ꧀ꦩꦮꦺꦴꦤ꧀꧈꧇

ꦏꦫꦺꦴꦆꦱꦶꦃꦚꦮꦁꦱꦶꦩ꧀ꦧꦃꦑꦼꦩ꧀ꦱꦶꦁꦤꦼꦫꦸꦱ꧀ꦱꦏꦺꦭꦏꦸꦩꦔꦸꦭꦺꦴꦤ꧀ ꦄꦏꦸꦩ꧀ꦧꦠꦶꦤ꧀ꦩꦼꦱ꧀ꦛꦺꦶ ꦱꦼꦝꦺꦭꦩꦤꦺꦃꦄꦤꦱꦶꦁꦔ꧀ꦒꦺꦴꦤ꧀ꦕꦺꦁꦔꦼꦠꦼꦂꦏꦺꦩ꧀ꦧꦭꦶꦏ꧀ꦩꦼꦚꦁꦎꦩꦃꦲꦺ꧉

ꦲ꧈ꦲ꧈ꦲ꧉ꦠꦼꦤꦤ꧀ꦢꦸꦫꦸꦁꦔꦤ꧀ꦠꦶꦫꦺꦴꦁꦩꦼꦤꦶꦠ꧀ ꦱꦏꦏꦸꦭꦺꦴꦤ꧀ꦱꦶꦩ꧀ꦧꦃꦑꦼꦩ꧀ꦮꦶꦱ꧀ꦢꦶꦒꦺꦴꦤ꧀ꦕꦺꦁꦥꦏ꧀ꦓꦸ ꦤ꧀ꦠꦁꦒꦏꦸꦄꦉꦥ꧀ꦢꦶꦠꦼꦂꦏꦺꦩꦸꦭꦶꦃ꧉ꦥꦏ꧀ꦓꦸꦤ꧀ꦚꦮꦁꦄꦏꦸꦏꦫꦺꦴꦔ꧀ꦒꦸꦪꦸꦚꦼꦔꦶꦂ꧉ꦱꦄꦭ꧀ꦭꦺꦮꦶꦱ꧀ꦲꦥꦭ꧀ꦩꦼꦁꦏꦺꦴꦱꦶꦩ꧀ꦧꦃꦑꦼꦩ꧀ꦭꦏ꧀ꦲꦸꦕꦸꦭ꧀ꦩꦤꦺꦃꦤꦺꦏ꧀ꦮꦺꦴꦱ꧀ꦠꦼꦏꦤ꧀ꦲꦺꦴꦩꦃ꧉

ꦏꦫꦺꦴꦤꦸꦠꦸꦒ꧀ꦤꦺꦚꦥꦸꦌꦩ꧀ꦥꦺꦂ꧈ꦭꦏꦺꦴꦏ꧀ꦊꦠ꧀ꦱꦼꦝꦺꦭꦱꦶꦩ꧀ꦧꦃꦑꦼꦩ꧀ꦭꦺꦮꦠ꧀ꦩꦤꦺꦃꦏꦪꦩꦲꦸꦠꦿꦸꦱ꧀ꦧꦤ꧀ꦗꦸꦂꦄꦏꦸꦧꦱꦧꦱꦶꦠꦏꦺꦴꦤ꧀ꦩꦤꦺꦃ꧉

꧇ꦲ꧀ꦭꦺꦴꦏꦺꦴꦏ꧀ꦧꦭꦶꦏ꧀ ꦒꦺꦏ꧀ꦲꦗꦼꦁꦠꦼꦁꦥꦸꦤ꧀ꦢꦶꦩꦭꦶꦃ?꧇

꧇ꦠꦼꦤ꧀ꦏꦶꦭꦺꦤ꧀ꦩꦿꦶꦏꦸ꧈ꦔꦺꦤ꧀ꦝꦁꦔꦶꦧꦸꦪꦸꦠ꧀ꦏꦸꦭ꧈꧇ꦱꦶꦩ꧀ꦧꦃꦑꦼꦩ꧀ꦱꦼꦩꦲꦸꦂꦏꦪꦩꦲꦸꦧꦤ꧀ꦗꦸꦂꦧꦧ꧀ꦭꦱ꧀ꦔꦸꦭꦺꦴꦤ꧀ꦲꦫꦃꦤꦺꦁꦎꦩꦃꦲꦺꦄꦤꦏ꧀ꦏꦺꦱꦶꦁꦮꦶꦱ꧀ꦢꦸꦮꦺꦥꦸꦠꦸ꧉ꦢꦢꦶꦥꦼꦂꦤꦃꦲꦺꦧꦸꦪꦸꦠ꧀ꦠꦺꦱꦶꦩ꧀ꦧꦃꦑꦼꦩ꧀꧈

ꦢꦸꦫꦸꦁꦫꦩ꧀ꦥꦸꦁꦎꦭꦺꦃꦏꦸꦚꦥꦸꦭꦠꦂ꧈ꦩꦏ꧀ꦮꦼꦂꦄꦤꦱꦼꦥꦼꦝꦩꦺꦴꦠꦺꦴꦂꦭꦺꦮꦠ꧀꧈ꦆꦁꦧꦠꦶꦤ꧀ꦲꦏꦸꦮꦶꦱ꧀ꦔꦶꦫꦏꦸꦮꦶꦩꦼꦱ꧀ꦛꦶꦔ꧀ꦒꦺꦴꦤ꧀ꦕꦺꦁꦱꦶꦩ꧀ꦧꦃꦑꦼꦩ꧀꧈ꦭꦫꦏ꧀ꦠꦼꦤꦤ꧀ꦱꦩ꧀ꦧꦃꦑꦼꦩ꧀ꦮꦶꦱ꧀ꦏꦼꦠꦫꦔ꧀ꦒꦤ꧀ꦝꦺꦴꦭ꧀ꦤꦶꦁꦒꦺꦴꦤ꧀ꦕꦺꦁꦔꦤ꧀ꦤꦺꦥꦏ꧀ꦨꦱ꧀꧈ꦄꦏꦸꦚꦮꦁꦱꦶꦁꦥꦝꦤꦸꦩ꧀ꦥꦏ꧀ꦩꦺꦴꦠꦺꦴꦂꦏꦫꦺꦴꦔ꧀ꦒꦸꦪꦸꦧꦲꦺ꧉ꦎꦮꦭꦃꦱꦶꦩ꧀ꦧꦃꦑꦼꦩ꧀ꦩꦸꦒꦩꦸꦒꦱꦺꦲꦠ꧀ ꦢꦢꦶꦱꦧꦼꦤ꧀ꦢꦶꦤꦏꦸꦮꦶꦄꦤꦥꦸꦭꦸꦃꦲꦤ꧀ꦩꦺꦴꦠꦺꦴꦂꦭꦺꦮ ꦠ꧀ꦲꦩꦂꦒꦔ꧀ꦒꦮꦱꦶꦩ꧀ꦧꦃꦑꦼꦩ꧀ꦱꦶꦁꦈꦕꦸꦭ꧀꧈ꦄꦤꦄꦤꦧꦲꦺ꧈ꦱꦶꦩ꧀ꦧꦃꦄꦉꦥ꧀ꦤꦁꦔ꧀ꦒꦺꦴꦤ꧀ꦤꦺꦧꦸꦪꦸꦠ꧀ꦠꦺꦏꦺꦴꦏ꧀ꦢꦶꦠꦼꦂꦏꦺꦩꦸꦭꦶꦃ꧉ꦲꦺꦲꦺꦲꦺ꧉꧉꧉

꧋ꦮꦶꦱ꧀ꦏꦥꦕꦏ꧀ꦲꦶꦁꦏꦭꦮꦂꦠꦶꦗꦪꦧꦪꦤꦺꦴꦩꦼꦂ꧇꧓꧑꧇꧈ꦩꦶꦁꦒꦸ꧇꧑꧇꧈ꦄꦥꦿꦶꦭ꧀꧇꧒꧐꧒꧒꧇꧈ꦏꦕ꧇꧒꧒꧇ꦫꦸꦧꦿꦶꦏ꧀꧇ꦄꦤꦄꦤꦧꦲꦺ꧇꧉

Leave a Reply

Your email address will not be published. Required fields are marked *