ꦧꦼꦕꦶꦏ꧀ꦥꦒꦼꦂꦩꦁꦏꦺꦴꦏ꧀ꦏꦠꦶꦩ꧀ꦧꦁꦥꦒꦼꦂꦠꦺꦩ꧀ꦧꦺꦴꦏ꧀

 

BECIK PAGER TEMBOK TIMBANG PAGER MANGKOK

 

ꦢꦺꦤꦶꦁ꧇ꦩꦂꦓꦫꦺꦠ꧀ꦮꦶꦣꦶꦦꦿꦠꦶꦮꦶ

 

Dening: Margareth Widhy Pratiwi

 

 

꧋ꦱꦥꦠꦱꦶꦁꦲꦺꦴꦫꦠꦼꦥꦸꦁꦏꦫꦺꦴꦢꦺꦤ꧀ꦨꦺꦲꦶ꧉ꦮꦺꦴꦁꦥꦭꦶꦁꦱꦸꦒꦶꦃꦲꦶꦁꦢꦺꦱꦑꦼꦚ꧀ꦕꦸꦂ꧉ꦗꦸꦫꦒꦤ꧀ꦧꦠꦱꦶꦁꦢꦸꦮꦺꦲꦺꦴꦩꦃꦒꦼꦣꦺꦲꦶꦁꦥꦺꦴꦗꦺꦴꦏ꧀ꦢꦺꦱ꧉ꦲꦺꦴꦩꦃꦲꦺꦕꦏꦿꦶꦏ꧀ꦗꦮ꧈ꦔꦉꦥ꧀ꦥꦺꦲꦤꦥꦼꦤ꧀ꦝꦥ꧈ꦭꦠꦂꦗꦼꦩ꧀ꦧꦂꦏꦼꦧꦏ꧀ꦠꦤ꧀ꦢꦸꦂꦫꦤ꧀ꦮꦺꦴꦃꦮꦺꦴꦃꦲꦤ꧀꧈ꦪꦺꦤ꧀ꦭꦒꦶꦩꦮꦺꦴꦃꦏꦼꦧꦏ꧀ꦧꦺꦴꦕꦃꦥꦣꦒꦺꦴꦭꦺꦏ꧀ꦒꦺꦴꦒꦿꦺꦴꦒ꧀ꦒꦤ꧀ꦗꦩ꧀ꦧꦸ꧉ꦱꦭꦶꦪꦤꦺꦲꦺꦴꦩꦃꦒꦼꦣꦺ꧈ꦢꦺꦤ꧀ꦨꦺꦲꦶꦲꦸꦒꦢꦸꦮꦺꦱꦮꦃꦗꦼꦩ꧀ꦧꦂꦥꦶꦫꦁꦥꦶꦫꦁꦏꦺꦴꦛꦏ꧀꧈

꧋ꦗꦼꦤꦼꦁꦲꦱ꧀ꦭꦶꦤꦺꦔꦺꦴꦤꦺꦴꦲꦢꦶꦡꦫꦸꦤ꧈ꦲꦸꦩꦸꦂꦲꦸꦩꦸꦂꦫꦤ꧀ꦤꦺꦲꦸꦢꦏꦫ꧇꧘꧇ꦠꦲꦸꦤ꧀/ꦧꦶꦱꦢꦶꦲꦸꦤꦺꦏ꧀ꦲꦏꦺꦥꦶꦤꦁꦏꦕꦶꦏꦭ꧀ꦧꦏꦭ꧀ꦢꦺꦱꦑꦼꦚ꧀ꦕꦸꦂ꧉ꦮꦺꦴꦁꦧꦼꦕꦶꦏ꧀ꦧꦼꦧꦸꦢꦺꦤ꧀ꦤꦺ꧉ꦱꦼꦤꦼꦁꦠꦼꦠꦸꦭꦸꦁꦭꦤ꧀ꦲꦺꦤ꧀ꦛꦺꦁꦔꦤ꧀ꦠꦔꦤ꧀

꧋ꦲꦮꦤ꧀ꦏꦸꦮꦶ꧈ꦤꦭꦶꦏꦮꦪꦃꦠꦼꦔꦁꦔꦺꦢꦺꦤ꧀ꦨꦺꦲꦶꦤꦶꦭꦶꦏ꧀ꦏꦶꦭꦶꦁꦒꦤ꧀ ꦩꦺꦭꦸꦫꦺꦴꦭꦱ꧀ꦱꦤ꧀ꦏꦫꦺꦴꦥꦫꦧꦸꦫꦸꦃꦲꦺ꧉

꧋꧇ꦮꦺꦃ꧈ꦢꦶꦩꦁꦱꦏ꧀ꦤꦺꦲꦥꦲꦶꦏꦶ?꧇ꦥꦶꦠꦏꦺꦴꦤ꧀ꦤꦺꦢꦺꦤ꧀ꦨꦺꦲꦶꦏꦫꦺꦴꦧꦸꦏꦏ꧀ꦏꦶꦫꦤ꧀ꦠꦁꦫꦤ꧀ꦱꦸꦩꦤ꧀ꦫꦺꦴꦭꦱ꧀ꦱꦤ꧀

꧋꧇ꦗꦔꦤ꧀ꦒꦺꦴꦫꦶꦤꦶꦏꦸ꧈ꦢꦺꦤ꧀꧇ꦱꦼꦩꦲꦸꦂꦫꦺꦨꦸꦮꦁꦏꦫꦺꦴꦮꦶꦱꦸꦃ꧇꧉

꧋꧇ꦮꦃ꧈ꦭꦚꦩ꧀ꦭꦼꦁꦏꦸꦮꦶ꧉ꦗꦔꦤ꧀ꦒꦺꦴꦫꦶꦔꦁꦒꦺꦴꦱꦩ꧀ꦧꦼꦭ꧀ꦠꦿꦱꦶ꧈ꦭꦮꦸꦃꦠꦺꦩ꧀ꦥꦺꦒꦫꦶꦠ꧀꧇꧉

꧋꧇ꦗꦼꦤꦼꦁꦔꦤ꧀ꦤꦶꦏꦸꦭꦺꦴ꧈ꦢꦺꦤ꧀꧈ꦥꦶꦪꦪꦶꦱꦸꦒꦶꦃꦏꦺꦴꦏ꧀ꦪꦲꦶꦱꦶꦃꦏꦼꦂꦱꦗꦔꦤ꧀ꦒꦺꦴꦫꦶ꧇꧉

꧋꧇ꦩꦼꦤꦸꦁꦱꦏꦸꦮꦶꦥꦣꦧꦲꦺ꧈ꦭꦺ꧉ꦱꦸꦒꦶꦃꦩ꧀ꦭꦫꦠ꧀ ꦔꦼꦤ꧀ꦠꦸꦠ꧀ꦥꦣꦲꦩ꧀ꦧꦸꦤꦺꦏꦺꦴꦏ꧀꧈꧈꧈꧇ꦔꦺꦴꦤꦺꦴꦏꦤ꧀ꦝꦤꦺꦢꦺꦤ꧀ꦨꦺꦲꦶ꧈꧇꧉

꧋꧇ꦢꦸꦩꦺꦃꦱꦸꦒꦶꦃꦤꦺꦏ꧀ꦔꦼꦤ꧀ꦠꦸꦠ꧀ꦗꦸꦂꦲꦩ꧀ꦧꦸꦤꦺꦮꦔꦶ꧉ꦏꦼꦤꦢꦶꦢꦺꦴꦭ꧀꧈꧈꧈꧈꧈ꦪꦫ?꧇ꦧꦕꦸꦠ꧀ꦠꦺꦏꦫꦺꦴꦒꦸꦩꦸꦗꦼꦁ꧇꧉

꧋꧇ꦥꦶꦪꦪꦶꦏꦺꦴꦏ꧀ꦝꦒꦼꦭ꧀ ꦭꦺꦴ꧉ꦤꦶꦁꦲꦶꦁꦒꦶꦃꦊꦉꦱ꧀ꦝꦶꦁ꧇꧉

꧋꧇ꦩꦸꦭꦠꦏꦸꦮꦶ꧈꧈꧈꧈ꦱꦸꦒꦶꦃꦲꦥꦩ꧀ꦭꦫꦠ꧀ꦏꦸꦮꦶꦩꦸꦁꦮꦁꦱꦶꦤꦮꦁ꧉ꦧꦤ꧀ꦝꦲꦶꦏꦸꦩꦸꦁꦠꦶꦠꦶꦥ꧀ꦥꦤ꧀ ꦲꦺꦴꦫꦧꦏꦭ꧀ꦢꦶꦒꦮꦩꦠꦶ꧉ꦱꦶꦁꦢꦶꦒꦮꦩꦠꦶꦲꦶꦏꦸꦲꦩꦭ꧀ꦏꦧꦼꦕꦶꦏ꧀ꦏꦤ꧀ ꦫꦸꦏꦸꦤ꧀ꦏꦫꦺꦴꦠꦁꦒ꧈ꦲꦺꦴꦫꦱꦼꦤꦼꦁꦱꦸꦭꦪ꧈ꦲꦺꦴꦫꦒꦩ꧀ꦥꦁꦱꦼꦫꦶꦏ꧀ꦭꦤ꧀ꦥꦤꦱ꧀ꦠꦺꦤ꧀꧇꧉

꧋ꦪꦺꦤ꧀ꦮꦶꦱ꧀ꦢꦶꦠꦸꦠꦸꦂꦫꦶꦔꦺꦴꦤꦺꦴꦏꦸꦮꦶ꧈ꦥꦫꦧꦸꦫꦸꦃꦔꦿꦸꦔꦺꦴꦏ꧀ꦤꦺꦏꦤ꧀ꦛꦶꦠꦼꦩꦼꦤ꧀ꦤꦤ꧀꧈ꦥꦣꦱꦫꦸꦗꦸꦏ꧀ꦩꦫꦁꦏꦤ꧀ꦝꦤꦺꦗꦸꦫꦒꦤ꧀ꦤꦺꦱꦶꦁꦩꦸꦭꦏꦧꦺꦃꦧꦼꦤꦼꦂꦲꦶꦏꦸ꧉

꧋꧇ꦚꦩ꧀ꦧꦸꦠ꧀ꦠꦱꦶꦁꦥꦼꦛꦼꦭ꧀ꦲꦗꦒꦩ꧀ꦥꦁꦔ꧀ꦭꦺꦴꦏꦿꦺꦴ꧉ꦲꦏꦸꦧꦶꦪꦺꦤ꧀ꦪꦩꦸꦁꦧꦸꦫꦸꦃꦩꦕꦸꦭ꧀ꦩꦺꦭꦸꦭꦢꦺꦤ꧀ꦠꦸꦏꦁꦩꦿꦤꦩꦿꦺꦤꦺ꧉ꦲꦺꦤ꧀ꦠꦸꦏ꧀ꦠꦶꦁꦒꦭ꧀ꦭꦤ꧀ꦊꦩꦃꦱꦏꦺꦴꦛꦏ꧀ ꦠꦏ꧀ꦏꦼꦣꦸꦏ꧀ꦏꦶꦏꦁꦒꦺꦴꦒꦮꦺꦧꦠꦲꦶꦏꦶ꧉ꦱꦸꦮꦺꦤꦶꦁꦱꦸꦮꦺ꧈ꦓꦸꦱ꧀ꦠꦶꦄꦭ꧀ꦭꦃꦩꦼꦱ꧀ꦛꦶꦔꦶꦗꦧꦃꦲꦶ꧉ꦪꦠ?꧇꧉

꧋꧇ꦊꦉꦱ꧀ ꦊꦉꦱ꧀ ꦢꦺꦤ꧀꧈꧇ꦮꦁꦱꦸꦭꦤ꧀ꦤꦺꦨꦸꦮꦁꦏꦫꦺꦴꦩꦩꦃꦱꦼꦒ꧉

꧋꧇ꦗꦔꦤ꧀ꦒꦺꦴꦫꦶꦱꦩ꧀ꦧꦼꦭ꧀ꦠꦿꦱꦶꦲꦮꦤ꧀ꦏꦸꦮꦶꦢꦶꦫꦲꦧ꧀ꦥꦶꦧꦉꦁꦧꦉꦁ꧉ꦢꦺꦤ꧀ꦨꦺꦲꦶꦪꦏꦠꦺꦴꦤ꧀ꦝꦺꦴꦏꦺꦴꦃ꧈ꦔꦤ꧀ꦠꦶꦏꦼꦥꦼꦣꦼꦱ꧀ꦱꦼꦤ꧀ꦏꦏꦺꦪꦤ꧀ꦱꦩ꧀ꦧꦼꦭ꧀꧉ꦫꦺꦴꦭꦱ꧀ꦱꦤ꧀ꦏꦿꦱꦭꦸꦮꦶꦃꦧꦼꦂꦒꦶꦱꦶ꧈ꦩꦼꦂꦒꦏꦺꦴꦗꦃꦲꦺꦢꦺꦤ꧀ꦨꦺꦲꦶꦲꦮꦤ꧀ꦏꦸꦮꦶ꧉

***

꧋ꦩꦸꦁꦲꦺꦩꦤ꧀ꦤꦺꦥꦸꦠꦿꦤꦺꦢꦺꦤ꧀ꦨꦺꦲꦶꦧꦺꦢꦧꦔꦼꦠ꧀ꦱꦶꦥꦠ꧀ꦠꦺꦏꦫꦺꦴꦮꦺꦴꦁꦠꦸꦮꦤꦺꦲꦶꦏꦸ꧉ꦥꦸꦠꦿꦤꦺꦏꦁꦩꦸꦁꦲꦺꦴꦤ꧀ꦠꦁꦲꦤ꧀ꦠꦶꦁ꧈ꦱꦶꦗꦶꦛꦶꦭ꧀ꦲꦫꦤ꧀ꦩꦂꦓꦤꦩꦼꦂꦒꦮꦺꦢꦢꦶꦥꦼꦔꦸꦱꦲꦲꦶꦁꦗꦑꦂꦠ꧉ꦮꦶꦱ꧀ꦲꦺꦴꦩꦃꦲꦺꦴꦩꦃꦭꦤ꧀ꦥꦠꦸꦠ꧀ꦠꦤ꧀ꦲꦤꦏ꧀ꦮꦢꦺꦴꦤ꧀ꦱꦶꦗꦶꦏꦁꦩꦚ꧀ꦕꦶꦏ꧀ꦥꦿꦮꦤ꧀ ꦧꦺꦢꦩꦼꦂꦒꦮꦺꦴꦁꦔꦺꦲꦺꦴꦫꦒꦼꦊꦩ꧀ꦱꦿꦮꦸꦁ꧈ꦲꦩ꧀ꦧꦼꦒ꧀ꦭꦤ꧀ꦲꦼꦩꦺꦴꦃꦠꦼꦥꦸꦁꦏꦫꦺꦴꦮꦺꦴꦁꦲꦺꦴꦫꦢꦸꦮꦺ꧉

꧋ꦲꦤꦏꦧꦂꦪꦺꦤ꧀ꦱꦼꦩꦶꦁꦒꦸꦲꦶꦏꦶꦩꦂꦓꦤꦩꦸꦭꦶꦃꦲꦶꦁꦢꦺꦱꦑꦼꦚ꧀ꦕꦸꦂ꧉ꦭꦶꦁꦒꦤ꧀ꦏꦫꦺꦴꦚꦶꦛꦏ꧀ꦧꦠꦧꦏꦭ꧀ꦢꦶꦫꦺꦴꦩ꧀ꦧꦏ꧀ꦏꦁꦒꦺꦴꦲꦺꦴꦩ꧀ꦱꦠꦺ꧉

꧋ꦨꦸꦮꦁꦲꦸꦒꦒꦮꦏꦧꦂꦪꦺꦤ꧀ꦢꦺꦤ꧀ꦨꦺꦲꦶꦭꦒꦶꦒꦼꦫꦃ꧈ꦤꦔꦶꦁꦲꦺꦴꦫꦲꦤꦱꦶꦁꦮꦤꦶꦠꦶꦭꦶꦏ꧀ꦔꦫꦸꦃꦲꦏꦺꦩꦼꦂꦒꦮꦼꦢꦶꦏꦫꦺꦴꦩꦂꦓꦤ꧉ꦲꦺꦴꦫꦱꦧꦼꦤ꧀ꦮꦺꦴꦁꦲꦺꦤ꧀ꦠꦸꦏ꧀ꦤꦶꦭꦶꦏ꧀ꦏꦶꦧꦥꦏ꧀ꦤꦺ꧉ꦩꦂꦓꦤꦧꦏꦭ꧀ꦔꦿꦺꦴꦩ꧀ꦧꦏ꧀ꦲꦺꦴꦩꦃꦏꦤ꧀ꦛꦶꦕꦏꦿꦶꦏ꧀ꦩꦺꦴꦣꦺꦂꦫꦼꦤ꧀ ꦏꦤ꧀ꦛꦶꦒꦪꦱꦼꦥꦚꦺꦴꦭꦤ꧀ꦭꦤ꧀ꦏꦧꦺꦠꦺꦁꦥꦒꦼꦂꦧꦸꦩꦶꦔꦸꦧꦼꦔꦶꦲꦺꦴꦩꦃꦲꦺ꧉ꦮꦶꦠ꧀ꦮꦺꦴꦃꦮꦺꦴꦃꦲꦤ꧀ꦢꦶꦠꦼꦒꦺꦴꦂꦫꦶꦢꦶꦒꦤ꧀ꦠꦶꦠꦩꦤ꧀ꦔꦁꦒꦺꦴꦧ꧀ꦭꦸꦩ꧀ꦧꦁꦱꦶꦁꦲꦤꦧꦚꦸꦩꦤ꧀ꦕꦸꦂꦫꦺꦢꦶꦊꦁꦏꦥ꧀ꦭꦩ꧀ꦥꦸꦭꦩ꧀ꦥꦸ꧉ꦏꦼꦥꦫꦩꦠꦿꦶꦪꦭ꧀ꦩꦠꦿꦶꦪꦭ꧀ꦲꦸꦒꦮꦶꦱ꧀ꦢꦶꦣꦸꦤ꧀ꦏꦺꦲꦶꦁꦢꦊꦩ꧀ꦩꦺꦢꦺꦤ꧀ꦨꦺꦲꦶ꧈ꦔꦼꦧꦏ꧀ꦏꦶꦥ꧀ꦭꦠꦂꦫꦤ꧀꧈

꧋ꦥꦮꦂꦠꦧꦧ꧀ꦭꦶꦁꦒꦤ꧀ꦱꦶꦁꦲꦉꦥ꧀ꦢꦶꦫꦺꦴꦩ꧀ꦧꦏ꧀ꦢꦢꦶꦲꦺꦴꦩ꧀ꦱꦼꦠꦺꦲꦶꦏꦸꦩꦲꦸꦮꦶꦱ꧀ꦧꦼꦤꦼꦂ꧉ꦧꦸꦫꦸꦃꦕꦶꦛꦏ꧀ꦧꦠꦮꦶꦱ꧀ꦥꦣꦢꦶꦭꦺꦫꦺꦤ꧀ꦤꦶ꧉ꦩꦠꦿꦶꦪꦭ꧀ꦮꦶꦱ꧀ꦢꦶꦣꦸꦤ꧀ꦤꦏꦺꦱꦏꦠꦽꦏ꧀ꦠꦽꦏ꧀ ꦥꦱꦶꦂ꧈ ꦮꦠꦸꦮꦠꦸꦥꦸꦠꦶꦃ꧈ꦮꦼꦱꦶꦮꦼꦱꦶꦮꦶꦮꦶꦠ꧀ꦔꦼꦧꦏ꧀ꦏꦶꦱꦕꦼꦣꦏ꧀ꦏꦺꦭꦶꦁꦒꦤ꧀꧈ꦧꦠꦧꦠꦱꦶꦁꦲꦶꦱꦶꦃꦠꦼꦩꦸꦩ꧀ꦥꦸꦏ꧀ꦧꦏꦭ꧀ꦭꦺꦢꦶꦒꦮꦺꦧꦏꦭ꧀ꦭꦤ꧀ꦧꦔꦸꦤ꧀ꦤꦤ꧀ꦲꦺꦴꦩ꧀ꦱꦼꦠꦺ꧉

꧋ꦮꦼꦔꦶꦲꦶꦏꦶꦏꦿꦱꦲꦁꦭꦁꦭꦸꦠ꧀꧈ꦧꦶꦪꦱꦤꦺꦤꦺꦁꦕꦏꦿꦸꦏ꧀ꦥꦼꦫꦺꦴꦤ꧀ꦝꦤ꧀ꦩꦊꦩ꧀ꦩꦁꦒꦸꦒꦪꦼꦁꦭꦤ꧀ꦫꦩꦺ꧉ꦢꦺꦤ꧀ꦨꦺꦲꦶꦱꦶꦁꦲꦺꦴꦫꦏꦼꦗꦠꦃꦫꦺꦴꦤ꧀ꦝꦱꦺꦴꦏ꧀ꦠꦼꦏ꧈ꦲꦁꦒꦮꦥꦕꦶꦠ꧀ꦠꦤ꧀ꦏꦁꦒꦺꦴꦠꦩ꧀ꦧꦲꦝꦼꦩ꧀꧈꧋ꦮꦼꦔꦶꦲꦶꦏꦶꦏꦿꦱꦲꦁꦭꦁꦭꦸꦠ꧀꧈ꦧꦶꦪꦱꦤꦺꦤꦺꦁꦕꦏꦿꦸꦏ꧀ꦥꦼꦫꦺꦴꦤ꧀ꦝꦤ꧀ꦩꦊꦩ꧀ꦩꦁꦒꦸꦒꦪꦼꦁꦭꦤ꧀ꦫꦩꦺ꧉ꦢꦺꦤ꧀ꦨꦺꦲꦶꦱꦶꦁꦲꦺꦴꦫꦏꦼꦗꦠꦃꦫꦺꦴꦤ꧀ꦝꦱꦺꦴꦏ꧀ꦠꦼꦏ꧈ꦲꦁꦒꦮꦥꦕꦶꦠ꧀ꦠꦤ꧀ꦏꦁꦒꦺꦴꦠꦩ꧀ꦧꦲꦝꦼꦩ꧀꧈ꦤꦺꦏ꧀ꦧꦏ꧀ꦱꦺꦴꦤꦺꦭꦶꦏ꧀ꦩꦤ꧀ꦭꦶꦮꦠ꧀ꦪꦢꦶꦕꦼꦒꦠ꧀ ꦏꦧꦺꦃꦮꦲꦺꦲꦺꦤ꧀ꦠꦸꦏ꧀ꦲꦧ꧉ꦲꦸꦢꦸꦠ꧀ꦪꦚꦃꦚꦺꦴꦃꦠꦤ꧀ꦥꦲꦺꦴꦮꦺꦭ꧀꧈ꦱꦲꦶꦏꦶ꧈ꦮꦼꦔꦶꦤꦺꦏꦿꦱꦲꦣꦼꦩ꧀ ꦚꦼꦚꦼꦠ꧀ꦭꦤ꧀ꦠꦶꦤ꧀ꦠꦿꦶꦩ꧀꧈

꧋꧇ꦠꦸꦭꦸꦁ!!ꦠꦸꦭꦸꦁ!!꧇꧉

꧋꧇ꦨꦸꦮꦁꦱꦏꦚ꧀ꦕꦲꦚ꧀ꦗꦼꦁꦒꦶꦫꦠ꧀꧈ꦱ꧀ꦮꦫꦠꦸꦭꦸꦁꦠꦸꦭꦸꦁꦲꦶꦏꦸꦏꦼꦥꦿꦸꦔꦸꦕꦼꦛ꧇꧉

꧋꧇ꦮꦁ꧈꧈꧈ꦱꦏꦲꦺꦴꦩꦃꦲꦺꦢꦺꦤ꧀ꦨꦺꦲꦶ!꧇ꦲꦭꦺꦴꦏ꧀ꦏꦺꦨꦺꦴꦤꦺꦴꦏꦫꦺꦴꦩꦼꦚ꧀ꦕꦺꦴꦭꦺꦴꦠ꧀ꦱꦏꦕꦏꦿꦸꦏ꧀ꦲꦉꦥ꧀ ꦩ꧀ꦭꦪꦸ꧉

꧋꧇ꦏꦺꦴꦱꦶꦏ꧀꧈꧈꧈꧇ꦨꦸꦮꦁꦲꦁꦒꦺꦫꦺꦠ꧀ꦥꦸꦤ꧀ꦞꦏ꧀ꦏꦺꦨꦺꦴꦤꦺꦴꦔꦤ꧀ꦠꦶꦱꦶꦁꦢꦶꦒꦺꦫꦺꦠ꧀ꦏꦼꦗꦼꦁꦏꦁ꧉꧇ꦢꦶꦠꦶꦭꦶꦁꦠꦶꦭꦶꦁꦱꦶꦁꦧꦼꦤꦼꦂ꧇꧉

꧋꧇ꦠꦸꦭꦸꦁ!!ꦠꦸꦭꦸꦁ!!꧇꧉

꧋꧇ꦧꦼꦤꦼꦂ꧈ꦮꦁ꧉ꦏꦲꦺꦱ꧀ꦮꦫꦤꦺꦱꦏꦲꦺꦴꦩꦃꦲꦺꦢꦺꦤ꧀ꦨꦺꦲꦶ꧇꧉

꧋ꦨꦸꦮꦁ꧈ꦨꦺꦴꦤꦺꦴꦭꦤ꧀ꦱꦮꦼꦠꦫꦮꦺꦴꦁꦱꦶꦁꦲꦤꦲꦶꦁꦕꦏꦿꦸꦏ꧀ꦥꦼꦫꦺꦴꦤ꧀ꦝꦤꦤ꧀ꦲꦶꦱꦶꦃꦧꦶꦔꦸꦁ꧈ꦤꦭꦶꦏꦮꦺꦴꦁꦏꦩ꧀ꦥꦸꦁꦱꦶꦗꦶꦭꦺꦴꦫꦺꦴꦮꦶꦮꦶꦠ꧀ꦥꦣꦩ꧀ꦭꦪꦸꦱꦭꦁꦠꦸꦤ꧀ꦗꦁ꧉

꧋꧇ꦏꦺꦴꦧꦺꦴꦁꦔꦤ꧀꧈꧈꧈ꦏꦺꦴꦧꦺꦴꦁꦔꦤ꧀꧇ꦏꦼꦥꦿꦸꦔꦸꦥꦩ꧀ꦧꦼꦔꦺꦴꦏ꧀ꦏꦺꦱꦮꦺꦤꦺꦃꦮꦺꦴꦁ꧇

꧋ꦏꦼꦤ꧀ꦛꦺꦴꦁꦠꦶꦠꦶꦂꦱꦏꦏꦢꦺꦴꦃꦲꦤ꧀ꦩꦔꦩ꧀ꦧꦭ꧀ꦲꦩ꧀ꦧꦭ꧀꧈ꦏꦠꦺꦴꦤ꧀ꦒꦼꦤꦶꦩꦸꦭꦠ꧀ꦩꦸꦭꦠ꧀ꦔꦺꦴꦧꦺꦴꦁꦲꦺꦴꦩꦃꦒꦼꦣꦺꦲꦶꦏꦸ꧉ꦮꦺꦴꦁꦮꦺꦴꦁꦏꦔꦺꦭ꧀ꦭꦤ꧀ꦠꦼꦠꦸꦭꦸꦁꦩꦂꦒꦩꦠꦿꦶꦪꦭ꧀ꦱꦶꦁꦠꦼꦩꦸꦩ꧀ꦥꦸꦏ꧀ꦲꦶꦁꦥ꧀ꦭꦠꦂꦫꦤ꧀꧈ꦒꦼꦤꦶꦱꦶꦁꦩꦲꦸꦤꦺꦕꦶꦭꦶꦏ꧀ꦢꦢꦶꦒꦼꦣꦺ꧈ꦮꦺꦴꦁꦮꦺꦴꦁꦩꦸꦁꦧꦶꦱꦚꦮꦁꦱꦏꦏꦢꦺꦴꦃꦲꦤ꧀꧈ꦩꦺꦴꦧꦶꦭ꧀ꦥꦼꦩꦣꦩ꧀ꦏꦼꦧꦏꦂꦫꦤ꧀ꦱꦶꦁꦠꦼꦏꦤꦺꦫꦢꦠꦼꦭꦠ꧀ ꦲꦺꦴꦫꦧꦶꦱꦲꦚ꧀ꦭꦩꦼꦠ꧀ꦲꦏꦺꦩꦼꦂꦒꦏꦔꦺꦭ꧀ꦭꦤ꧀ ꦩ꧀ꦭꦼꦧꦸ꧈ꦏꦼꦥꦭꦁꦮꦠꦸꦮꦠꦸ꧉

꧋ꦨꦸꦮꦁꦱꦏꦚ꧀ꦕꦲꦺꦴꦫꦚꦼꦣꦏ꧀ ꦩꦭꦃꦏꦼꦥꦫꦥꦣꦕꦼꦁꦏꦺꦭꦏ꧀ꦩꦼꦚꦁꦫꦸꦩꦃꦱꦏꦶꦠ꧀꧉ꦲꦺꦴꦫꦥꦽꦢꦸꦭꦶꦪꦺꦤ꧀ꦲꦺꦴꦫꦲꦺꦤ꧀ꦠꦸꦏ꧀ꦠꦶꦭꦶꦏ꧀꧈ꦏꦧꦺꦃꦥꦣꦏꦼꦥꦺꦔꦶꦤ꧀ꦤꦼꦩꦺꦴꦤ꧀ꦤꦶꦢꦺꦤ꧀ꦨꦺꦲꦶꦲꦶꦁꦫꦸꦩꦃꦱꦏꦶꦠ꧀꧈ꦏꦧꦺꦃꦥꦣꦧꦸꦔꦃꦩꦼꦫꦸꦃꦲꦶꦥꦿꦚꦠꦣꦺꦤ꧀ꦨꦺꦲꦶꦏꦲꦤꦤ꧀ꦤꦺꦫꦩꦸꦠꦮꦠꦶꦫꦶ꧈ꦏꦠꦺꦴꦤ꧀ꦮꦫꦱ꧀ꦩꦸꦁꦲꦶꦱꦶꦃꦏꦸꦢꦸꦔꦱꦺꦴꦱꦮꦼꦠꦫꦲꦶꦁꦫꦸꦩꦃꦱꦏꦶꦠ꧀ꦩꦼꦂꦒꦲꦱꦩ꧀ꦭꦩ꧀ꦧꦸꦁ꧉ꦲꦺꦴꦫꦮꦸꦫꦸꦁꦨꦸꦮꦁꦱꦏꦚ꧀ꦕꦤꦔꦶꦱ꧀ꦲꦶꦁꦔꦉꦥ꧀ꦥꦺꦢꦺꦤ꧀ꦨꦺꦲꦶ꧈ꦚꦿꦶꦠꦏ꧀ꦲꦏꦺꦏꦲꦤꦤ꧀ꦤꦺꦭꦶꦁꦒꦤ꧀ꦭꦤ꧀ꦢꦊꦩ꧀ꦩꦺꦗꦸꦫꦒꦤ꧀ꦏꦸꦮꦶ꧉

꧋꧇ꦱꦶꦁꦧꦏꦼꦤ꧀ꦢꦺꦤ꧀ꦨꦺꦲꦶꦩꦭꦃꦱ꧀ꦭꦩꦼꦠ꧀ꦮꦺꦴꦤ꧀ꦠꦼꦤ꧀ꦩꦿꦶꦏꦶ꧈ꦢꦺꦤ꧀꧇ꦏꦤ꧀ꦝꦤꦺꦨꦸꦮꦁꦲꦶꦱꦶꦃꦏꦩꦶꦱꦼꦱꦼꦒ꧀ꦏꦼꦤ꧀꧉ꦢꦊꦩ꧀ꦥꦸꦤ꧀ꦠꦼꦭꦱ꧀ ꦧꦺꦴꦠꦼꦤ꧀ꦱꦒꦼꦢ꧀ꦢꦶꦱ꧀ꦭꦩꦺꦠ꧀ꦲꦏꦼꦤ꧀ꦩꦼꦂꦒꦶꦏꦥꦮꦭꦁꦩꦠꦿꦶꦪꦭ꧀꧉ꦠꦶꦪꦁꦠꦶꦪꦁꦱꦩꦶꦲꦗꦿꦶꦃꦧꦣꦺꦤꦸꦭꦸꦁꦔꦶ꧈ꦢꦺꦤ꧀꧇

꧋ꦩꦸꦭꦲꦤꦲꦸꦤꦺꦤ꧀ꦲꦸꦤꦺꦤ꧀꧇ꦧꦼꦕꦶꦏ꧀ꦥꦒꦼꦂꦩꦁꦏꦺꦴꦏ꧀ꦏꦠꦶꦩ꧀ꦧꦁꦥꦒꦼꦂꦠꦺꦩ꧀ꦧꦺꦴꦏ꧀꧇꧈ꦠꦼꦒꦼꦱ꧀ꦱꦺꦲꦗꦢꦸꦩꦺꦃꦱꦸꦒꦶꦃꦧꦚ꧀ꦗꦸꦂꦲꦺꦴꦫꦱꦿꦮꦸꦁ꧈ꦲꦺꦴꦫꦠꦼꦥꦸꦁ꧉ꦲꦸꦫꦶꦥ꧀ꦏꦸꦮꦶꦠꦼꦩ꧀ꦧꦪꦠ꧀ꦠꦤ꧀ ꦲꦏꦸꦂ꧈ꦭꦸꦁꦠꦶꦤꦸꦭꦸꦁ꧇꧉ꦢꦺꦤ꧀ꦨꦺꦲꦶꦲꦮꦺꦃꦔꦼꦤ꧀ꦢꦶꦏꦱꦗꦏ꧀ꦒꦼꦠꦸꦤ꧀ꦩꦫꦁꦧꦤ꧀ꦝꦤꦺꦏꦁꦮꦶꦱ꧀ꦏꦺꦴꦧꦺꦴꦁ꧉

꧋꧇ꦮꦶꦱ꧀ꦮꦶꦱ꧀ ꦲꦗꦥꦣꦢꦶꦒꦼꦠꦸꦤ꧀ꦤꦶ꧉ꦲꦏꦸꦠꦲꦸꦏꦤ꧀ꦝ꧈ꦪꦺꦤ꧀ꦧꦤ꧀ꦝꦢꦺꦴꦚꦲꦶꦏꦸꦩꦸꦁꦠꦶꦠꦶꦥ꧀ꦥꦤ꧀꧈ꦲꦤꦏ꧀ꦏꦸꦧꦏꦭ꧀ꦔꦸꦤ꧀ꦝꦸꦃꦮꦺꦴꦃꦲꦶꦁꦥꦏꦂꦠꦶꦤꦺ꧉ꦲꦤꦏ꧀ꦏꦸꦏ꧀ꦭꦺꦫꦸ꧈ꦩꦸꦁꦩꦶꦏꦶꦂꦧꦸꦠꦸꦃꦲꦺꦣꦺꦮꦺ꧈ꦲꦺꦴꦫꦩꦶꦏꦶꦂꦭꦶꦪꦤ꧀꧇꧉

꧋ꦨꦸꦮꦁꦱꦏꦤ꧀ꦕꦩꦼꦤꦼꦁ꧈ꦲꦩ꧀ꦧꦼꦤꦼꦂꦫꦏꦺꦔꦼꦤ꧀ꦢꦶꦏꦤꦺꦢꦺꦤ꧀ꦨꦺꦲꦶ꧉ꦲꦠꦶꦤꦺꦥꦣꦲꦪꦼꦩ꧀ ꦩꦼꦫꦸꦃꦲꦶꦗꦸꦫꦒꦤ꧀ꦤꦺꦏꦠꦺꦴꦤ꧀ꦮꦫꦱ꧀ꦮꦶꦫꦶꦱ꧀ ꦧꦶꦱꦤꦺꦩꦸꦁꦩꦺꦭꦸꦢꦼꦢꦺꦴꦔꦩꦸꦒꦲꦺꦁꦒꦭ꧀ꦧꦭꦶꦏꦪꦮꦶꦔꦶ꧉ꦩꦺꦤꦺꦃꦲꦶꦥꦶꦮꦸꦭꦁꦧꦼꦕꦶꦏ꧀ꦲꦸꦫꦶꦥ꧀ꦠꦼꦩ꧀ꦧꦪꦠ꧀ꦠꦤ꧀ꦩꦸꦫꦶꦃꦠꦼꦤ꧀ꦠꦽꦩ꧀ꦱꦏꦧꦺꦃꦲꦺ꧉ꦲꦺꦴꦫꦩꦸꦁꦱꦸꦒꦶꦃꦧꦤ꧀ꦝ꧈ꦤꦔꦶꦁꦱꦸꦒꦶꦃꦲꦠꦶꦤꦺ꧉

*************

 

*ꦧꦔꦸꦤ꧀ꦲꦺꦱꦸꦏ꧀ ꦥꦿꦪꦤ꧀꧇꧗꧇ꦣꦺꦱꦺꦩ꧀ꦧꦼꦂ꧇꧒꧓꧇