ꦚꦸꦮꦶꦭ꧀ꦕꦿꦶꦠꦲꦶꦁꦩꦭꦶꦪꦧꦫ

22 December 2023 | 186 kali
Cerkak By : Sulton Ali

 

 

ꦚꦸꦮꦶꦭ꧀ꦕꦿꦶꦠꦲꦶꦁꦩꦭꦶꦪꦧꦫ

 

ꦢꦺꦤꦶꦁ꧇ꦢꦾꦃꦑꦸꦂꦤꦶꦪꦮꦠꦶ

 

꧋ꦲꦶꦁꦏꦺꦤꦺꦢꦏ꧀ꦫꦁꦒꦺꦃꦥꦿꦱ꧀ꦠꦮꦥꦸꦭꦸꦃꦲꦤ꧀ꦠꦲꦸꦤ꧀ꦏꦼꦥꦸꦁꦏꦸꦂ꧉ ꦲꦶꦱꦶꦃꦏꦸꦩ꧀ꦭꦺꦧꦠ꧀ꦮꦼꦮꦪꦁꦔꦤ꧀ꦩꦸꦏꦁꦠꦤ꧀ꦱꦃꦔꦶꦁꦒꦠ꧀ꦠꦶꦪꦺꦤ꧀ꦱꦥꦠꦼꦩꦼꦤ꧀ꦏꦫꦺꦴꦲꦏꦸ꧉ ꦭꦤ꧀ꦲꦶꦁꦢꦭꦤ꧀ꦲꦶꦏꦶꦱꦪꦤꦩ꧀ꦧꦃꦲꦶꦕꦿꦶꦠꦤꦼꦭꦁꦱꦗꦩꦤ꧀ꦥꦸꦠꦶꦃꦧꦶꦫꦸ꧉ ꦱꦱꦸꦮꦺꦤꦺꦠꦼꦭꦸꦁꦠꦲꦸꦤ꧀ꦔꦁꦱꦸꦏꦮꦿꦸꦃꦲꦶꦁꦧꦁꦏꦸꦥꦸꦠꦶꦃꦧꦶꦫꦸ꧈ꦲꦺꦴꦫꦢꦏ꧀ꦮꦼꦫꦸꦃꦲꦶꦒꦺꦤꦺꦪꦱꦶꦏꦥ꧀ꦩꦸꦩꦭꦶꦏ꧀ꦒꦿꦺꦩ꧀ꦧꦾꦁꦩꦫꦁꦲꦏꦸ꧉ꦲꦺꦴꦫꦏꦪꦤꦭꦶꦏꦤꦺꦲꦶꦱꦶꦃꦱꦿꦒꦩ꧀ꦩꦤ꧀ꦥꦸꦠꦶꦃꦲꦧꦁꦱꦶꦁꦠꦤ꧀ꦱꦃꦏꦼꦧꦏ꧀ꦏꦧꦒꦾꦤ꧀꧈ꦒꦼꦒꦺꦴꦗꦺꦒ꧀ꦒꦤ꧀ꦲꦺꦴꦫꦲꦤꦏꦁꦔꦭꦁꦲꦭꦁꦔꦶ꧉ ꦱꦧꦼꦤ꧀ꦱꦧꦼꦤ꧀ꦢꦏ꧀ꦲꦺꦴꦚ꧀ꦕꦺꦏ꧀ꦏꦶꦲꦥꦱꦭꦃꦏꦸ꧈ꦩ꧀ꦧꦺꦴꦏ꧀ꦩꦼꦤꦮꦲꦤꦥꦔꦸꦕꦥ꧀ꦲꦸꦠꦮꦠꦶꦤ꧀ꦢꦏ꧀ꦠꦤ꧀ꦢꦸꦏ꧀ꦏꦸꦱꦶꦁꦒꦮꦺꦒꦼꦭꦤꦶꦁꦲꦠꦶꦩꦸ꧉ꦤꦔꦶꦁꦔꦤ꧀ꦠꦶꦫꦺꦴꦁꦥꦸꦭꦸꦃꦠꦲꦸꦤ꧀ꦭꦒꦶꦢꦏ꧀ꦮꦼꦫꦸꦃꦲꦶꦲꦥꦱꦼꦧꦧ꧀ꦏꦁꦒꦮꦺꦒꦺꦴꦫꦺꦃꦲꦶꦁꦲꦠꦶꦏꦸ꧉

꧋ꦤꦭꦶꦏꦥꦼꦥꦶꦱꦃꦲꦤ꧀ꦚꦺꦴꦥꦺꦴꦠ꧀ꦱꦿꦒꦩ꧀ꦥꦸꦠꦶꦃꦧꦶꦫꦸ꧈ꦱꦼꦏꦺꦴꦭꦃꦲꦺꦲꦮꦏ꧀ꦏꦺꦣꦺꦮꦺꦢꦺꦴꦭꦤ꧀ꦲꦶꦁꦪꦺꦴꦒꦾ꧉ꦪꦢꦭꦤ꧀ꦲꦶꦏꦶ꧈ꦗꦩ꧀ꦱꦼꦩꦺꦤꦺꦲꦠꦶꦏꦸꦤꦼꦭꦁꦱꦚꦸꦩꦸꦫꦸꦥ꧀ꦥꦶꦱ꧀ꦭꦶꦫꦩꦸꦒꦺꦴꦗꦺꦒ꧀ꦏꦫꦺꦴꦏꦚ꧀ꦕꦏꦚ꧀ꦕꦮꦺꦢꦺꦴꦏ꧀ꦭꦶꦪꦤ꧀ꦤꦺꦱꦶꦤꦩ꧀ꦧꦶꦩꦶꦭꦶꦃꦏꦲꦺꦴꦱ꧀꧉ ꦲꦺꦴꦫꦱꦼꦔꦗꦤꦭꦶꦏꦲꦶꦏꦸꦲꦏꦸꦲꦸꦒꦭꦒꦶꦩꦶꦭꦶꦃꦏꦲꦺꦴꦱ꧀꧉ ꦢꦸꦩꦢꦏ꧀ꦏꦤ꧀ꦩꦠꦥꦥꦠ꧀ꦠꦼꦩ꧀ꦥꦸꦏ꧀ꦭꦤ꧀ꦫꦱꦤꦺꦩꦏ꧀ꦱꦼꦂ꧈ꦲꦶꦱꦢꦶꦧꦪꦁꦏꦺꦧꦺꦴꦏ꧀ꦩꦼꦤꦮꦥꦶꦥꦶꦏꦸꦮꦼꦏ꧀ꦠꦸꦏꦸꦮꦶꦩꦼꦱ꧀ꦛꦶ”ꦲꦸꦩꦲꦶꦫ” ꦲꦺꦲꦺ꧉ ꦱ꧀ꦭꦶꦫꦩꦸꦏꦠꦺꦴꦤ꧀ꦏꦼꦕꦶꦥꦸꦲꦤ꧀ꦭꦤ꧀ꦒꦿꦒꦥ꧀ꦥꦤ꧀꧉ ꦏꦤ꧀ꦛꦶꦲꦭꦺꦴꦤ꧀ꦱꦶꦏꦶꦭ꧀ꦩꦸꦗꦸꦩꦁꦏꦃꦱꦸꦩꦶꦁꦏꦶꦂꦚꦼꦣꦏ꧀ꦏꦶꦏꦚ꧀ꦕꦏꦚ꧀ꦕꦮꦺꦢꦺꦴꦏ꧀ꦭꦶꦪꦤ꧀ꦤꦺ꧉ ꦲꦠꦶꦏꦸꦉꦩꦸꦏ꧀꧈ꦒꦺꦤꦺꦪꦏꦫꦺꦴꦏꦚ꧀ꦕꦮꦺꦢꦺꦴꦏ꧀ꦭꦶꦪꦤ꧀ꦤꦺꦱ꧀ꦭꦶꦫꦩꦸꦲꦶꦱꦒꦼꦒꦺꦴꦗꦺꦒ꧀ꦒꦤ꧀ꦭꦺꦴꦱ꧀ꦤꦔꦶꦁꦏꦫꦺꦴꦲꦏꦸꦏꦺꦴꦏ꧀ꦧ꧀ꦭꦁꦏꦼꦩ꧀ꦩꦼꦤ꧀꧉ ꦢꦏ꧀ꦒꦺꦫꦺꦠ꧀ꦏꦚ꧀ꦕꦱꦼꦠꦶꦪꦏꦸꦱꦶꦁꦗꦼꦤꦼꦁꦔꦺꦮꦠꦶꦭꦤ꧀ꦫꦶꦤꦠꦢꦏ꧀ꦗꦏ꧀ꦔꦭꦶꦃꦱꦏꦥꦥꦤ꧀ꦏꦺꦴꦤꦺꦴ꧉ ꦱꦢꦸꦫꦸꦁꦔꦺꦏꦧꦺꦃꦮꦼꦫꦸꦃꦒꦒꦺꦢꦏ꧀ꦲꦸꦱꦥ꧀ꦥꦶꦧꦚꦸꦩꦠꦱꦶꦁꦏꦼꦩ꧀ꦧꦼꦁꦏꦼꦩ꧀ꦧꦼꦁꦩꦺꦃꦕꦼꦧ꧀ꦭꦺꦴꦏ꧀꧉
꧋ꦱꦮꦶꦱ꧀ꦱꦺꦥꦸꦭꦸꦃꦲꦤ꧀ꦠꦲꦸꦤ꧀꧈ꦲꦠꦶꦏꦸꦮꦶꦱ꧀ꦲꦶꦱꦔ꧀ꦭꦭꦺꦏ꧀ꦤꦺꦥꦿꦱ꧀ꦠꦮꦲꦶꦏꦸꦫꦺꦥꦺꦴꦠ꧀ꦔꦸꦫꦸꦱ꧀ꦱꦶꦒꦮꦺꦪꦤ꧀ꦲꦺꦴꦩꦃꦭꦤ꧀ꦏꦤ꧀ꦠꦺꦴꦂ꧉ ꦏꦪꦏꦪꦗꦼꦤꦼꦁꦩꦸꦮꦶꦱ꧀ꦲꦺꦴꦫꦲꦤꦲꦶꦁꦣꦥ꦳꧀ꦠꦂꦂꦏꦚ꧀ꦕꦱꦶꦁꦧꦔꦼꦠ꧀ꦩꦁꦏꦼꦭ꧀ꦲꦏꦺ꧉ ꦮꦶꦱ꧀ꦲꦺꦴꦫꦏꦺꦴꦧꦼꦂꦩꦤꦺꦃꦩꦶꦏꦶꦂꦮꦼꦮꦪꦁꦔꦤ꧀ꦩꦸꦱꦶꦁꦮꦶꦱ꧀ꦏꦼꦠꦶꦊꦥ꧀ꦮꦼꦏ꧀ꦠꦸꦏꦁꦠꦼꦫꦸꦱ꧀ꦭꦸꦩꦏꦸ꧉

꧋ꦢꦸꦩꦢꦏ꧀ꦏꦤ꧀ꦕꦿꦶꦠꦏꦸꦮꦶꦧꦭꦶꦔꦽꦫꦶꦣꦸꦲꦠꦶꦫꦶꦁꦏꦶꦃꦲꦶꦏꦶ꧉ ꦢꦶꦤꦏꦸꦮꦶꦲꦠꦶꦏꦸꦠꦿꦠꦧ꧀ꦧꦤ꧀ꦮꦼꦫꦸꦃꦗꦼꦤꦼꦁꦩꦸꦏꦕꦛꦼꦠ꧀ꦲꦶꦁꦣꦥ꦳꧀ꦠꦂꦫꦺꦪꦸꦤꦶꦥꦸꦠꦶꦃꦧꦶꦫꦸ꧉ ꦱꦮꦶꦱ꧀ꦱꦺꦭꦸꦭꦸꦱ꧀ꦔꦤ꧀ꦠꦶꦲꦮꦏ꧀ꦏꦺꦣꦺꦮꦺꦮꦶꦱ꧀ꦥꦣꦲꦺꦴꦩꦃꦲꦺꦴꦩꦃꦢꦸꦫꦸꦁꦤꦠꦺꦱꦼꦱꦩ꧀ꦧꦸꦁꦔꦤ꧀ꦩꦤꦺꦃ꧈ꦲꦥꦩꦤꦺꦃꦏꦼꦥꦼꦛꦸꦏ꧀ꦭꦁꦱꦸꦁ꧈ ꦠꦺꦭ꧀ꦥꦸꦤ꧀ꦭꦤ꧀ꦭꦪꦁꦭꦪꦁꦁꦔꦤ꧀ꦪꦲꦺꦴꦫꦤꦠꦺ꧉ ꦧꦶꦪꦺꦤ꧀ꦠꦲꦸꦚꦺꦴꦧꦢꦏ꧀ꦒꦺꦴꦭꦺꦏ꧀ꦏꦶꦢꦸꦤꦸꦁꦩꦸꦔꦤ꧀ꦠꦶꦮꦸꦱꦤꦤꦺꦢꦏ꧀ꦥꦸꦥꦸꦱ꧀꧈ꦢꦏ꧀ꦕꦸꦛꦼꦭ꧀ꦥꦼꦥꦺꦔꦶꦤ꧀ꦤꦤ꧀ꦏꦼꦠꦼꦩꦸꦱ꧀ꦭꦶꦫꦩꦸ꧉

꧋ꦏꦤ꧀ꦛꦶꦲꦠꦶꦲꦺꦴꦫꦏꦫꦸꦮꦤ꧀ꦲꦏꦸꦚꦺꦴꦧꦠꦏꦺꦴꦤ꧀ꦏꦧꦂꦏꦼꦭꦸꦮꦂꦒꦩꦸꦲꦶꦁꦒꦿꦸꦥ꧀ ꦮꦺ꧈ꦄ꧈ꦲꦶꦱꦶꦃꦣꦒ꧀ꦣꦶꦒ꧀ꦣꦸꦒ꧀ꦢꦏ꧀ꦠꦸꦁꦒꦸꦗꦮꦧ꧀ꦧꦤ꧀ꦩꦸ꧉ ꦲꦶꦏꦶꦱꦼꦗꦠꦶꦤꦺꦩꦸꦁꦩꦺꦴꦣꦸꦱ꧀ꦲꦭꦸꦱ꧀꧉ ꦏꦼꦧꦼꦤꦼꦂꦫꦤ꧀ꦏꦼꦭꦸꦮꦂꦒꦏꦸꦭꦤ꧀ꦏꦼꦭꦸꦮꦂꦒꦩꦸꦏꦼꦤꦭ꧀ꦲꦥꦶꦏ꧀꧉ ꦏꦤ꧀ꦛꦶꦒꦼꦩꦼꦠꦼꦂꦠꦢꦏ꧀ꦫꦁꦒꦺꦃꦲꦥꦺꦤꦭꦶꦏꦲꦤꦥꦼꦱꦼꦤ꧀ꦩ꧀ꦭꦼꦧꦸꦭꦤ꧀ꦢꦏ꧀ꦲꦶꦚ꧀ꦕꦼꦁꦠꦶꦧꦏ꧀ꦏꦺꦱ꧀ꦭꦶꦫꦩꦸꦱꦶꦁꦲꦩ꧀ꦧꦊꦱ꧀ꦥꦶꦠꦏꦺꦴꦤ꧀ꦏꦸꦩꦲꦸ꧉

꧋ꦲꦺꦴꦫꦒꦤ꧀ꦠꦭꦤ꧀ꦱꦸꦮꦺꦲꦤꦕ꦳ꦠ꧀ꦩ꧀ꦭ꧀ꦭꦼꦱꦏꦱ꧀ꦭꦶꦫꦩꦸ꧈ ꦤꦔꦶꦁꦲꦺꦴꦫꦲꦤꦲꦶꦁꦒꦿꦸꦥ꧀ꦫꦺꦪꦸꦤꦶꦩꦤꦺꦃꦤꦔꦶꦁꦗꦥꦿꦶ꧉ꦮꦶꦮꦶꦠꦤ꧀ꦤꦺꦏꦏꦸ꧈ꦧꦚ꧀ꦗꦸꦂꦲꦭꦺꦴꦤ꧀ꦲꦭꦺꦴꦤ꧀ꦠꦠ꧀ꦏꦭꦲꦠꦶꦏꦸꦱꦶꦁꦏꦿꦺꦴꦚ꧀ꦕꦭ꧀ꦭꦤ꧀ꦲꦺꦴꦫꦏꦫꦸꦮꦤ꧀꧉ ꦱꦮꦶꦱ꧀ꦱꦺꦲꦩ꧀ꦧꦼꦒ꧀ꦒꦤ꧀ꦭꦤ꧀ꦛꦸꦁꦲꦏꦸꦮꦶꦱ꧀ꦧꦶꦱꦔ꧀ꦭꦼꦉꦩ꧀ꦏꦺꦲꦺꦮꦺꦴꦤ꧀ꦫꦱꦏꦁꦩꦸꦊꦒ꧀ꦲꦶꦁꦲꦸꦠꦼꦒ꧀ꦏꦸꦤꦼꦩ꧀ꦧꦸꦱ꧀ꦥꦺꦴꦗꦺꦴꦏ꧀ꦏꦶꦁꦏꦭ꧀ꦧꦸ꧉ ꦱꦸꦗꦸꦤꦺꦧꦲꦺꦱ꧀ꦭꦶꦫꦩꦸꦲꦺꦴꦫꦠꦺꦭ꧀ꦥꦸꦤ꧀ꦭꦁꦱꦸꦁ꧈ ꦲꦸꦩ꧀ꦥꦩꦲꦶꦪꦭꦏ꧀ꦩꦭꦃꦒꦮꦺꦲꦩ꧀ꦧꦾꦂꦠꦼꦤꦤ꧀꧉ ꦱ꧀ꦭꦶꦫꦩꦸꦧꦚ꧀ꦗꦸꦂꦕꦿꦶꦠꦱꦏꦧꦺꦲꦤ꧀ꦤꦺ꧉ ꦱꦮꦶꦱ꧀ꦱꦺꦚꦺꦴꦥꦺꦴꦠ꧀ꦱꦿꦒꦩ꧀ꦥꦸꦠꦶꦃꦧꦶꦫꦸꦱ꧀ꦭꦶꦫꦩꦸꦲꦤ꧀ꦣꦺꦫꦺꦏ꧀ꦏꦏꦺꦮꦺꦴꦁꦠꦸꦮꦩꦸꦥꦶꦤ꧀ꦣꦃꦭꦸꦮꦂꦏꦺꦴꦠ꧉ ꦱꦧꦼꦤꦼꦂꦫꦺꦱ꧀ꦭꦶꦫꦩꦸꦮꦼꦏ꧀ꦠꦸꦏꦸꦮꦶꦥꦺꦔꦶꦤ꧀ꦥꦩꦶꦠꦤ꧀ꦏꦫꦺꦴꦲꦏꦸꦤꦔꦶꦁꦲꦺꦴꦫꦲꦤꦮꦼꦏ꧀ꦠꦸꦲꦩꦼꦂꦒꦱꦼꦭꦏ꧀ꦲꦩ꧀ꦧꦸꦫꦸꦮꦼꦏ꧀ꦠꦸꦧꦪꦁꦔꦤ꧀꧉ ꦗꦫꦺꦩꦸꦲꦉꦥ꧀ꦤꦸꦭꦶꦱ꧀ꦭꦪꦁꦧꦲꦺꦲꦺꦴꦫꦮꦤꦶ꧈ ꦲꦩꦂꦒꦮꦼꦏ꧀ꦠꦸꦏꦸꦮꦶꦲꦮꦏ꧀ꦏꦺꦣꦺꦮꦺꦲꦺꦴꦫꦠꦏꦺꦴꦤ꧀ꦥꦶꦠꦏꦺꦴꦤ꧀ꦤꦤ꧀ꦏꦁꦲꦺꦴꦫꦲꦤꦱꦼꦧꦧ꧀ꦧꦺ꧉

꧋ꦱ꧀ꦭꦶꦫꦩꦸꦕꦿꦶꦠꦭꦒꦶꦲꦺꦴꦩꦃꦲꦺꦴꦩꦃꦱꦮꦶꦱ꧀ꦱꦺꦩꦸꦥꦸꦱ꧀ꦤꦭꦶꦏꦮꦼꦫꦸꦃꦲꦏꦸꦮꦶꦱ꧀ꦲꦺꦴꦩꦃꦲꦺꦴꦩꦃꦤꦭꦶꦏꦢꦶꦕꦿꦶꦠꦤꦶꦏꦚ꧀ꦕꦏꦚ꧀ꦕꦏꦸ꧉ꦱ꧀ꦭꦶꦫꦩꦸꦔ꧀ꦭꦼꦒꦺꦮꦪꦺꦤ꧀ꦲꦮꦏ꧀ꦏꦺꦣꦺꦮꦺꦲꦺꦴꦫꦢꦶꦒꦫꦶꦱ꧀ꦏꦺꦢꦢꦶꦱꦶꦗꦶ꧉

꧋ꦤꦭꦶꦏꦥꦿꦱ꧀ꦠꦮꦲꦶꦁꦩꦭꦶꦪꦧꦫꦱ꧀ꦭꦶꦫꦩꦸꦕꦿꦶꦠꦗꦫꦺꦪꦔꦿꦱꦏ꧀ꦏꦺꦲꦥꦱꦶꦁꦤꦠꦺꦢꦏ꧀ꦫꦱꦏ꧀ꦏꦺ꧉ ꦏꦼꦤꦔꦥꦲꦶꦁꦮꦼꦏ꧀ꦠꦸꦏꦸꦮꦶꦔꦶꦁꦒꦠ꧀ꦠꦶꦲꦏꦸꦲꦩꦂꦒꦲꦺꦴꦫꦏꦸꦮꦠ꧀ꦤꦠꦲꦠꦶꦱꦶꦁꦏꦿꦺꦴꦚ꧀ꦕꦭ꧀ꦭꦤ꧉ ꦲꦸꦤ꧀ꦠꦸꦁꦔꦺꦲꦶꦁꦏꦤꦏꦚ꧀ꦕꦏꦚ꧀ꦕꦮꦺꦢꦺꦴꦏ꧀ꦲꦏꦺꦃꦱꦶꦁꦧꦶꦱꦔꦭꦶꦃꦲꦏꦺꦫꦱꦱꦶꦁꦔꦼꦧꦏ꧀ꦏꦶꦣꦣ꧉ ꦱ꧀ꦭꦶꦫꦩꦸꦲꦸꦒꦕꦿꦶꦠ꧈ ꦱꦮꦶꦱ꧀ꦱꦺꦲꦏꦸꦭꦸꦔꦱꦏꦥꦥꦤ꧀ꦠꦸꦏꦸꦏꦲꦺꦴꦱ꧀ꦲꦶꦏꦸꦱꦧꦼꦤꦼꦂꦫꦺꦥꦺꦔꦶꦤ꧀ꦲꦩ꧀ꦭꦪꦺꦴꦤ꧀ꦤꦶꦲꦏꦸꦤꦔꦶꦁꦱꦶꦏꦶꦭ꧀ꦩꦸꦏꦪꦲꦤꦱꦶꦁꦚꦼꦚ꧀ꦕꦁ꧈ ꦲꦺꦴꦫꦧꦶꦱꦲꦺꦴꦧꦃ꧉ ꦔꦤ꧀ꦠꦶꦠꦼꦏꦤ꧀ꦲꦺꦴꦩꦃ꧈ ꦥꦶꦫꦁꦥꦶꦫꦁꦢꦶꦤꦱ꧀ꦭꦶꦫꦩꦸꦠꦤ꧀ꦱꦃꦏꦚ꧀ꦕꦶꦭ꧀ꦭꦼꦤ꧀꧈ ꦠꦸꦫꦸꦲꦺꦴꦫꦲꦁꦊꦂ꧈ ꦩꦔꦤ꧀ꦲꦺꦴꦫꦲꦺꦤꦏ꧀꧈ ꦢꦺꦴꦭꦤ꧀ꦲꦺꦴꦫꦗꦼꦤꦏ꧀ꦠꦤ꧀ꦱꦃꦏꦠꦺꦴꦤ꧀ꦏꦠꦺꦴꦤ꧀ꦤꦼꦤ꧀ꦲꦏꦸ꧉

꧋ꦢꦸꦫꦸꦁꦫꦩ꧀ꦥꦸꦁꦩꦕꦕꦿꦶꦠꦩꦸꦲꦶꦁꦮꦺ꧈ꦄ꧈ ꦲꦮꦏ꧀ꦏꦸꦱꦏꦭꦲꦚꦼꦧ꧀ꦗꦼꦗꦼꦠ꧀꧈ꦗꦤ꧀ꦠꦸꦁꦏꦸꦩꦤ꧀ꦣꦼꦒ꧀ꦭꦤ꧀ꦲꦔꦼꦤ꧀ꦲꦶꦏꦶꦧꦚ꧀ꦗꦸꦂꦩ꧀ꦭꦪꦸꦲꦶꦁꦩꦁꦱꦏꦮꦸꦫꦶ꧉ ꦲꦸꦩ꧀ꦥꦩꦧꦲꦺꦱ꧀ꦭꦶꦫꦩꦸꦲꦺꦴꦫꦔꦶꦁꦒꦠ꧀ꦠꦶꦲꦏꦸꦭꦤ꧀ꦲꦺꦴꦫꦔꦺꦴꦮꦃꦲꦺꦴꦮꦃꦲꦶꦲꦢꦠ꧀ꦧꦺꦴꦏꦩꦼꦤꦮꦏꦼꦢꦢꦺꦪꦤꦺꦲꦺꦴꦫꦏꦪꦩꦁꦏꦺꦤꦺ꧉ ꦤꦔꦶꦁꦲꦏꦸꦲꦸꦒꦫꦸꦩꦁꦱꦱꦸꦏꦸꦂꦏꦫꦺꦴꦢꦭꦤ꧀ꦱꦶꦁꦮꦶꦱ꧀ꦠꦶꦤꦏ꧀ꦢꦶꦂꦢꦺꦤꦶꦁꦏꦁꦔꦼꦕꦺꦠ꧀ꦠꦺꦫꦺꦴꦁ꧉ ꦓꦸꦱ꧀ꦠꦶꦭꦸꦮꦶꦃꦥꦶꦂꦱꦲꦥꦱꦶꦁꦥꦭꦶꦁꦲꦥꦶꦏ꧀ꦏꦁꦒꦺꦴꦲꦸꦩꦠ꧀ꦠꦺ꧉ ꦄꦭ꧀ꦲꦩ꧀ꦢꦸꦭꦶꦭ꧀ꦭꦃꦲꦮꦏ꧀ꦏꦺꦣꦺꦮꦺꦱ꧀ꦭꦩꦼꦠ꧀ꦱꦏꦭꦏꦸꦱꦶꦁꦲꦺꦴꦫꦥꦼꦤꦼꦂꦲꦶꦁꦮꦼꦏ꧀ꦠꦸꦩꦸꦣ꧉ ꦲꦩꦂꦒꦮꦼꦏ꧀ꦠꦸꦲꦶꦏꦸꦭꦒꦶꦤꦼꦣꦼꦁꦔꦺꦩꦼꦏꦂꦧꦶꦱꦧꦲꦺꦲꦮꦏ꧀ꦏꦺꦣꦺꦮꦺꦱꦭꦃꦢꦭꦤ꧀꧉

꧋ꦩꦏ꧀ꦒꦿꦒꦥ꧀ꦲ꧈ꦥꦺ꧈ ꦲꦶꦁꦠꦔꦤ꧀ꦏꦸꦧꦺꦴꦭꦧꦭꦶꦒꦼꦩꦼꦠꦼꦂ꧈ ꦠꦶꦧꦏ꧀ꦏꦺꦲꦶꦏꦶꦩꦲꦸꦱ꧀ꦭꦶꦫꦩꦸꦢꦏ꧀ꦠꦶꦁꦒꦭ꧀ꦩꦧꦸꦂꦲꦶꦁꦲꦮꦁꦲꦮꦁ꧉ ꦕ꦳ꦠ꧀ꦩꦸꦔꦼꦧꦏ꧀ꦏꦶ꧈ꦲ꧈ꦥꦺ꧈ꦏꦸꦏꦪꦏꦪꦏꦧꦺꦃꦏꦁꦏꦺꦴꦏ꧀ꦏꦼꦩ꧀ꦥꦶꦠ꧀ꦱꦱꦸꦮꦺꦤꦺꦫꦺꦴꦁꦥꦸꦭꦸꦃꦠꦲꦸꦤ꧀ꦏꦺꦴꦏ꧀ꦧꦿꦺꦴꦭ꧀ꦏꦺꦏꦧꦺꦃ꧉ ꦢꦏ꧀ꦭꦶꦫꦶꦏ꧀ꦕ꦳ꦠ꧀ ꦮꦺ꧈ꦄ꧈ ꦩꦸꦱꦶꦤꦩ꧀ꦧꦶꦲꦩ꧀ꦧꦼꦒ꧀ꦒꦤ꧀ꦭꦤ꧀ꦣꦸꦁ꧈ ꦢꦏ꧀ꦧꦺꦴꦭꦤ꧀ꦧꦭꦺꦤ꧀ꦤꦶꦲꦸꦏꦫꦱꦶꦁꦧꦔꦼꦠ꧀ꦒꦮꦺꦏꦒꦺꦠ꧀ꦏꦸ꧈

꧋ꦯꦫꦶ꧈ ꦏꦁꦒꦺꦴꦏꦸꦗꦼꦤꦼꦁꦩꦸꦠꦤ꧀ꦱꦃꦥ꧀ꦭꦪꦺꦴꦤ꧀ꦔꦶꦠꦼꦂꦫꦶꦲꦠꦶꦏꦸ꧉ ꦏꦸꦮꦶꦧꦶꦪꦺꦤ꧀ꦱꦢꦸꦫꦸꦁꦔꦺꦲꦏꦸꦤꦼꦩꦺꦴꦏ꧀ꦤꦺꦒꦼꦒꦤ꧀ꦛꦶꦭꦤ꧀ꦲꦠꦶꦱꦶꦁꦱꦲꦶꦏꦶꦢꦏ꧀ꦠꦽꦱ꧀ꦤꦤꦶ꧉ ꦥꦿꦪꦺꦴꦒꦤꦺꦮꦼꦂꦤꦗꦩ꧀ꦧꦺꦴꦤ꧀ꦱꦶꦁꦧꦶꦪꦺꦤ꧀ꦤꦠꦺꦛꦸꦏꦸꦭ꧀ꦔꦿꦼꦩ꧀ꦧꦏꦲꦺꦴꦫꦲꦸꦱꦃꦢꦶꦧꦸꦱꦼꦏ꧀ꦤꦔꦶꦁꦱꦲꦶꦏꦶꦢꦶꦠꦩ꧀ꦧꦃꦲꦶꦮꦼꦂꦤꦧꦶꦫꦸ꧈ꦲꦶꦗꦺꦴ꧈ꦲꦧꦁ꧈ꦕꦺꦴꦏ꧀ꦭꦠ꧀꧈ꦥꦸꦠꦶꦃꦭꦤ꧀ꦱꦏꦧꦺꦃꦲꦺꦮꦂꦤꦱꦸꦥꦪꦤꦩ꧀ꦧꦃꦲꦶꦫꦏꦼꦠ꧀ꦠꦶꦁꦥꦱꦼꦢꦸꦭꦸꦂꦫꦤ꧀ꦲꦤ꧀ꦠꦫꦤꦺꦏꦶꦠ꧉ ꦮꦶꦶꦮꦶꦠ꧀ꦢꦶꦤꦲꦶꦏꦶꦢꦏ꧀ꦲꦁꦒꦼꦥ꧀ꦲꦮꦏ꧀ꦩꦸꦏꦪꦢꦺꦤꦺꦲꦣꦶꦏꦸꦮꦢꦺꦴꦤ꧀꧉ ꦥꦶꦪꦺ꧈ꦯ?
꧋ꦲꦺꦴꦫꦏꦿꦱꦭꦸꦃꦢ꧀ꦭꦺꦮꦺꦂꦫꦤ꧀ꦲꦶꦁꦥꦶꦥꦶꦏꦸ꧈ ꦢꦏ꧀ꦲꦸꦱꦥ꧀ꦲꦭꦺꦴꦤ꧀ꦤꦔꦶꦁꦏꦺꦴꦏ꧀ꦠꦤ꧀ꦱꦪꦢꦼꦉꦱ꧀ꦲꦶꦭꦶꦤꦺ꧉ ꦲꦏꦸꦧꦶꦔꦸꦁꦥꦶꦪꦺꦲꦉꦥ꧀ꦥꦺꦚꦲꦸꦫꦶ꧉ ꦱ꧀ꦮꦫꦲꦶꦁꦲꦠꦶꦏꦸꦱꦶꦁꦮꦶꦮꦶꦠ꧀ꦫꦩꦺꦏꦿꦺꦴꦚ꧀ꦕꦭ꧀ꦭꦤ꧀ꦱꦲꦶꦏꦶꦠꦩ꧀ꦧꦃꦒ꧀ꦭꦺꦴꦣꦒ꧀ꦒꦤ꧀꧉ ꦔ꧀ꦭꦸꦮꦶꦃꦲꦶꦫꦩꦺꦤꦺꦢꦭꦤ꧀ꦩꦭꦶꦪꦧꦫꦥꦁꦒꦺꦴꦤꦤ꧀ꦏꦸꦭꦸꦁꦒꦸꦃꦱꦺꦴꦫꦺꦲꦶꦏꦶ꧉ ꦲꦺꦴꦫꦢꦏ꧀ꦥꦲꦺꦭꦸꦮꦺꦴꦁꦮꦺꦴꦁꦱꦶꦁꦱ꧀ꦭꦶꦮꦂꦱ꧀ꦭꦶꦮꦼꦂꦭꦶꦮꦠ꧀ꦲꦶꦁꦔꦉꦥ꧀ꦏꦸ꧉ ꦱꦏ꧀ꦗꦤꦺꦪꦲꦶꦱꦶꦤ꧀꧈ ꦤꦔꦶꦁꦧꦺꦤ꧀ꦲꦃꦩꦤ꧀ꦣꦏ꧀ꦲꦺꦴꦫꦏꦼꦤꦭ꧀ꦧꦲꦺꦭ꦳ꦺꦴ꧉

꧋ꦥꦶꦪꦺ꧈ꦯ꧈ꦢꦏ꧀ꦠꦸꦁꦒꦸꦮꦁꦱꦸꦭ꧀ꦭꦤ꧀ꦩꦸ꧈ꦤꦺꦏ꧀ꦲꦶꦱꦱꦲꦶꦏꦶꦧꦺꦤ꧀ꦥ꧀ꦭꦺꦴꦁꦫꦱꦤꦺꦲꦠꦶꦏꦸ꧈ ꦏꦤ꧀ꦣꦩꦸꦩꦤꦺꦃꦱꦼꦠꦼꦔꦃꦩꦼꦏ꧀ꦱ꧉

꧋ꦱꦶꦏ꧀ꦠ꧈ꦨꦒꦸꦱ꧀꧉ꦲꦏꦸꦢꦸꦫꦸꦁꦧꦶꦱꦩꦁꦱꦸꦭ꧀ꦭꦶꦱꦲꦶꦏꦶ꧉ ꦲꦏꦸꦮꦼꦢꦶꦪꦺꦤ꧀ꦲꦶꦏꦸꦩꦸꦁꦩ꧀ꦧꦭꦺꦏ꧀ꦏꦏꦺꦮꦂꦤꦗꦩ꧀ꦧꦺꦴꦤ꧀ꦔꦽꦩ꧀ꦧꦸꦪꦸꦁꦩꦤꦺꦃ꧉ ꦲꦏꦸꦮꦼꦢꦶꦔ꧀ꦭꦁꦒꦂꦮꦼꦮꦊꦂꦫꦶꦁꦲꦒꦩ꧉ ꦲꦮꦏ꧀ꦏꦺꦣꦺꦮꦺꦱꦲꦶꦏꦶꦮꦶꦱ꧀ꦥꦣꦢꦸꦮꦺꦥꦱꦁꦔꦤ꧀ꦲꦸꦫꦶꦥ꧀ꦭꦤ꧀ꦮꦶꦱ꧀ꦔꦶꦏꦿꦂꦏꦺꦗꦚ꧀ꦗꦶꦱꦸꦕꦶꦩꦶꦤꦁꦏꦠꦶꦠꦃꦲꦶꦁꦓꦸꦱ꧀ꦠꦶ꧉ ꦲꦼꦩꦺꦴꦃ꧈ꦲꦏꦸꦮꦼꦢꦶ꧉ ꦢꦿꦶꦗꦶꦏꦸꦱ꧀ꦥꦺꦴꦤ꧀ꦠꦤ꧀ꦔꦼꦠꦶꦏ꧀ꦤꦺꦴꦭꦏ꧀ꦲꦭꦸꦱ꧀ꦥꦔꦗꦏ꧀ꦩꦸ꧉

꧋ꦗꦸꦱ꧀ꦠꦿꦸꦩꦭꦃꦔ꧀ꦭꦼꦧꦸꦫꦏꦺꦮꦼꦂꦤꦗꦩ꧀ꦧꦺꦴꦤ꧀ꦲꦶꦏꦸꦲꦩꦂꦒꦮꦶꦱ꧀ꦏꦼꦕꦩ꧀ꦥꦸꦂꦮꦼꦂꦤꦭꦶꦪꦤꦺ꧉ ꦲꦏꦸꦥꦺꦔꦶꦤ꧀ꦔꦼꦤꦭ꧀ꦲꦏꦺꦧꦺꦴꦗꦺꦴꦭꦤ꧀ꦲꦤꦏ꧀ꦏꦸꦩꦫꦁꦏꦼꦭꦸꦮꦂꦒꦩꦸ꧉ ꦤꦔꦶꦁꦱꦶꦗꦶꦱꦶꦁꦢꦏ꧀ꦮꦼꦭꦶꦁꦭꦤ꧀ꦏꦸꦢꦸꦩ꧀ꦧꦺꦴꦏ꧀ꦒꦼꦒꦼꦩ꧀ꦏꦤ꧀ꦛꦶꦥꦿꦼꦩꦠꦶ꧈ ꦲꦗꦔꦤ꧀ꦠꦶꦔꦽꦩ꧀ꦧꦸꦪꦸꦁꦔꦺꦮꦼꦂꦤꦗꦩ꧀ꦧꦺꦴꦤ꧀ꦲꦶꦁꦲꦠꦶꦤꦺꦲꦮꦏ꧀ꦏꦺꦣꦺꦮꦺꦩ꧀ꦧꦶꦪꦺꦤ꧀ꦢꦶꦮꦼꦫꦸꦃꦲꦶꦢꦺꦤꦶꦁꦮꦺꦴꦁꦭꦶꦪ꧉ ꦕꦸꦏꦸꦥ꧀ꦲꦮꦏ꧀ꦏꦺꦣꦺꦮꦺꦧꦲꦺꦱꦶꦁꦔꦿꦱꦏ꧀ꦏꦺꦭꦤ꧀ꦮꦼꦂꦤꦗꦩ꧀ꦧꦺꦴꦤ꧀ꦲꦶꦏꦸꦲꦪꦺꦴꦮꦶꦮꦶꦠ꧀ꦱꦲꦶꦏꦶꦢꦶꦔ꧀ꦤꦧꦸꦂꦏꦫꦺꦴꦮꦼꦂꦤꦭꦶꦪꦤꦺ꧉ ꦏꦥꦤ꧀ꦏꦥꦤ꧀ꦲꦺꦴꦭꦺꦃ꧈ꦠ꧈ꦏꦼꦭꦸꦮꦂꦒꦏꦸꦢꦏ꧀ꦲꦗꦏ꧀ꦢꦺꦴꦭꦤ꧀ꦩꦼꦚꦁꦲꦺꦴꦩꦃꦩꦸ꧉ ꦏꦤ꧀ꦛꦶꦥꦮꦢꦤ꧀‍ꦚꦩ꧀ꦧꦸꦁꦥꦱꦼꦢꦸꦭꦸꦂꦫꦤ꧀ꦏꦶꦠꦭꦤ꧀ꦲꦸꦒꦲꦤ꧀ꦠꦫꦤꦺꦮꦺꦴꦁꦠꦸꦮꦤꦺꦲꦮꦏ꧀ꦏꦺꦣꦺꦮꦺ꧉ ꦲꦪꦺꦴ꧈ ꦥ꧀ꦭꦶꦱ꧀ꦒꦼꦔ꧀ꦤꦩ꧀꧈ꦠ꧉ ꦠꦸꦭꦸꦁꦪ꧈ꦯꦫꦶ꧉ ꦧꦊꦱ꧀ꦱꦤ꧀ꦩꦸꦲꦶꦱꦔꦿꦸꦤ꧀ꦠꦸꦃꦲꦏꦺꦲꦠꦶꦏꦸꦱꦶꦁꦮꦶꦱ꧀ꦮꦶꦮꦶꦠ꧀ꦩꦥꦤ꧀꧉


꧋ꦲꦏꦸꦏꦸꦢꦸꦥꦶꦪꦺꦲꦶꦏꦶ꧉ꦱꦮꦶꦱ꧀ꦱꦺꦔꦸꦚ꧀ꦗꦭ꧀ꦲꦩꦧꦼꦒ꧀ꦒꦤ꧀ꦧꦚ꧀ꦗꦸꦂꦢꦏ꧀ꦮꦁꦱꦸꦭ꧀ꦭꦶ꧈

꧋ꦲꦏꦸꦠꦫꦺꦤ꧀ꦧꦺꦴꦗꦺꦴꦏꦸ꧈ꦪ꧈ꦩꦼꦁꦏꦺꦴꦪꦺꦤ꧀ꦮꦶꦱ꧀ꦧꦭꦶꦲꦶꦁꦩꦢꦶꦪꦸꦤ꧀‍‍ꦚꦺꦴꦧꦢꦏ꧀ꦉꦩ꧀ꦧꦸꦒ꧀ꦒꦤ꧀ꦣꦶꦱꦶꦏ꧀꧉ ꦲꦶꦏꦶꦲꦏꦸꦢꦺꦴꦭꦤ꧀ꦪꦺꦴꦒꦾꦱ꧀ꦠꦸꦢꦶꦧꦤ꧀ꦝꦶꦁꦏꦫꦺꦴꦏꦚ꧀ꦕꦱꦏꦤ꧀ꦠꦺꦴꦂ꧉

ꦔꦽꦠꦶꦒꦏ꧀ꦨꦒꦸꦱ꧀꧈ ꦲꦏꦸꦱꦲꦶꦏꦶꦭꦒꦶꦭꦸꦁꦒꦸꦃꦲꦶꦁꦢꦭꦤ꧀ꦩꦭꦶꦪꦧꦫꦤꦥꦏ꧀ꦠꦶꦭꦱ꧀ꦔ꧀ꦤꦭꦶꦏꦤ꧀ꦏꦼꦥꦸꦁꦏꦸꦂ꧉ ꦏꦺꦴꦏ꧀ꦔꦼꦥꦱ꧀ꦱꦶꦲꦶꦱꦤꦼꦩꦺꦴꦏ꧀ꦏꦺꦱ꧀ꦭꦶꦫꦩꦸꦲꦶꦁꦒꦿꦸꦥ꧀ꦫꦺꦪꦸꦤꦶ꧉ ꦮꦶꦱ꧀ꦪ꧉꧉꧉ ꦭꦶꦪꦮꦼꦏ꧀ꦠꦸꦢꦶꦱꦩ꧀ꦧꦸꦁꦩꦤꦺꦃ꧉ ꦢꦏ꧀ꦏꦶꦫꦶꦩ꧀ꦥꦼꦱꦼꦤ꧀ꦥꦸꦁꦏꦱ꧀ꦱꦤ꧀ꦧꦚ꧀ꦗꦸꦂꦢꦏ꧀ꦥꦠꦺꦤ꧀ꦤꦶꦲ꧈ꦥꦺ꧈ꦲꦏꦸꦧꦺꦤ꧀ꦲꦺꦴꦫꦩ꧀ꦧꦺꦴꦏ꧀ꦏꦶꦠꦼꦂꦧꦲꦺ꧉


꧋ꦏꦫꦺꦴꦲꦶꦱꦶꦃꦲꦸꦮꦏ꧀ꦲꦸꦮꦶꦏ꧀ꦲ꧈ꦥꦺ꧈ꦱꦶꦁꦮꦶꦱ꧀ꦩꦠꦶ꧈ ꦥꦶꦏꦶꦂꦫꦤ꧀ꦏꦸꦲꦶꦱꦶꦃꦏꦼꦧꦏ꧀ꦭꦼꦭꦏꦺꦴꦤ꧀ꦏꦥꦸꦁꦏꦸꦂ꧉ ꦱꦏ꧀ꦗꦤꦺꦲꦏꦸꦪꦏꦼꦥꦺꦔꦶꦤ꧀ꦤꦩ꧀ꦥꦥꦔꦗꦏ꧀ꦩꦸꦚꦩ꧀ꦧꦸꦁꦥꦱꦼꦢꦸꦭꦸꦂꦫꦤ꧀꧉ ꦤꦔꦶꦁꦲꦥꦲꦺꦴꦫꦩꦭꦃꦤꦩ꧀ꦧꦃꦲꦶꦥꦼꦂꦏꦫ꧉ ꦮꦶꦱ꧀ꦥꦸꦭꦸꦃꦲꦤ꧀ꦠꦲꦸꦤ꧀ꦲꦁꦒꦺꦴꦭꦺꦏ꧀ꦏꦶꦱ꧀ꦭꦶꦫꦩꦸꦭꦤ꧀ꦱꦲꦶꦏꦶꦏꦼꦠꦼꦩꦸꦩꦭꦃꦲꦏꦸꦧꦶꦔꦸꦁꦣꦺꦮꦺ꧉ ꦩ꧀ꦧꦸꦃꦏꦥꦶꦁꦥꦶꦫꦧꦲꦺꦲꦺꦴꦭꦺꦃꦏꦸꦲꦸꦚ꧀ꦗꦭ꧀ꦲꦩ꧀ꦧꦼꦒ꧀ꦒꦤ꧀ꦏꦁꦒꦺꦴꦔꦸꦮꦱꦤꦶꦏꦲꦤꦤ꧀꧉ ꦩꦭꦶꦪꦧꦫꦱꦪꦱꦸꦫꦸꦥ꧀꧈ ꦱꦤ꧀ꦢꦾꦏꦭꦮꦶꦮꦶꦠ꧀ꦲꦁꦱ꧀ꦭꦸꦥ꧀ꦩꦔꦸꦭꦺꦴꦤ꧀꧉ ꦧꦧꦉꦁꦔꦤ꧀ꦏꦫꦺꦴꦧꦼꦔꦺꦴꦏ꧀ꦏꦺ ꦧꦸꦢꦾꦤ꧀ꦏꦚ꧀ꦕꦏꦸꦱꦏ꧀ꦧꦶꦱ꧀ꦱꦶꦁꦧꦶꦔꦸꦁꦲꦁꦒꦺꦴꦭꦺꦏ꧀ꦏꦶꦲꦏꦸꦲꦩꦂꦒꦮꦶꦱ꧀ꦢꦶꦠꦸꦁꦒꦸꦫꦺꦴꦩ꧀ꦧꦺꦴꦁꦔꦤ꧀ꦲꦉꦥ꧀ꦧꦭꦶꦔꦺꦠꦤ꧀ꦩꦼꦚꦁꦩꦢꦶꦪꦸꦤ꧀꧉


꧋ꦲꦏꦸꦩꦤꦸꦠ꧀ꦧꦲꦺ꧈ꦠꦔꦤ꧀ꦏꦸꦢꦶꦒ꧀ꦭꦤ꧀ꦣꦁꦧꦸꦢꦾꦤ꧀ꦩ꧀ꦭꦏꦸꦉꦫꦶꦏꦠꦤ꧀ꦩꦫꦩꦼꦚꦁꦥꦥꦤ꧀ꦥꦂꦏꦶꦂꦧꦶꦱ꧀꧉ ꦭꦤ꧀ꦱꦶꦢꦤꦺꦲꦺꦴꦫꦏꦺꦴꦧꦼꦂꦠꦸꦏꦸꦲꦺꦴꦭꦺꦃꦲꦺꦴꦭꦺꦃꦏꦁꦒꦺꦴꦲꦤꦏ꧀ꦏꦸ꧉ ꦩꦸꦁꦱꦕꦸꦮꦶꦭ꧀ꦕꦿꦶꦠꦱꦶꦁꦢꦏ꧀ꦒꦮꦱꦏꦩꦭꦶꦪꦧꦫꦏꦤ꧀ꦛꦶꦱꦏꦧꦺꦃꦲꦺꦫꦱ꧉

********
#ꦩꦭꦶꦪꦧꦫꦩꦥꦒ꧀ꦠꦸꦩꦼꦏꦤꦺꦱꦤ꧀ꦢꦾꦏꦭ꧈꧇꧒꧒꧇꧑꧒꧇꧒꧐꧒꧑꧇

Leave a Reply

Your email address will not be published. Required fields are marked *