ꦧꦏꦸꦭ꧀ꦠꦺꦴꦩꦠ꧀ꦚꦭꦮꦢꦶ

18 December 2023 | 41 kali
Cerkak By : Dyah Kurniawati

 

 

ꦧꦏꦸꦭ꧀ꦠꦺꦴꦩꦠ꧀ꦚꦭꦮꦢꦶ

 

BAKUL TOMAT NYALAWADI

 

ꦢꦺꦤꦶꦁ꧇ ꦢꦾꦃꦏꦸꦂꦤꦶꦪꦠꦶ

 

Dening: Dyah Kurniawati

 

꧋ꦲꦮꦤꦺꦱꦸꦩꦸꦏ꧀ꦧꦔꦼꦠ꧀ꦢꦶꦤꦲꦶꦏꦶ꧉ꦠꦏ꧀ꦢꦼꦊꦁꦗꦩ꧀ꦱꦶꦁꦕꦸꦩꦤ꧀ꦛꦺꦭ꧀ꦲꦶꦁꦠꦺꦩ꧀ꦧꦺꦴꦏ꧀ꦮꦶꦱ꧀ꦤꦸꦢꦸꦃꦲꦏꦺꦲꦁꦏꦱꦼꦮꦼꦭꦱ꧀ꦭꦸꦮꦶꦃ꧈ꦠꦶꦧꦏꦺꦮꦶꦱ꧀ꦩꦤ꧀ꦗꦶꦁꦭꦸꦲꦸꦂ꧉ꦲꦸꦥꦩꦲꦶꦧꦸꦲꦺꦴꦫꦤꦶꦩ꧀ꦧꦭꦶꦥꦭꦶꦁꦲꦏꦸꦲꦶꦱꦶꦃꦔꦭꦩꦸꦤ꧀ꦲꦶꦁꦏꦺꦤꦺꦏꦫꦺꦴꦢꦿꦺꦴꦢꦺꦴꦱ꧀ꦱꦤ꧀ꦭꦸꦃꦔꦿꦱꦏ꧀ꦤꦺꦭꦫꦤꦺꦲꦮꦏ꧀ꦏꦸꦱꦶꦁꦮꦶ      ꦱ꧀ꦲꦺꦴꦫꦏꦫꦸꦮꦤ꧀ꦲꦶꦏꦶ꧈ꦩꦠꦶꦫꦩꦠꦶꦲꦸꦫꦶꦥ꧀ꦲꦺꦴꦫꦲꦸꦫꦶꦥ꧀꧈ꦠꦏ꧀ꦭꦏꦺꦴꦏ꧀ꦤꦺꦲꦭꦺꦴꦤ꧀ꦲꦭꦺꦴꦤ꧀ꦏꦸꦂꦱꦶꦫꦺꦴꦣꦱꦶꦁꦠꦤ꧀ꦱꦃꦱꦼꦠꦾꦔꦚ꧀ꦕꦤꦶꦢꦶꦤꦢꦶꦤꦏꦸꦏꦁꦩꦿꦶꦲꦠꦶꦤ꧀ꦤꦏꦺ꧉ꦲꦏꦸꦩꦼꦠꦸꦩꦫꦤꦶꦲꦶꦧꦸꦱꦶꦁꦱꦗꦏ꧀ꦒꦪꦼꦁꦔꦼꦤ꧀ꦢꦶꦏꦤ꧀ꦤꦺꦁꦭꦠꦂ꧈ꦩ꧀ꦧꦸꦃꦏꦫꦺꦴꦱꦥ꧉ꦱꦗꦺꦴꦏꦺꦭꦫꦲꦏꦸꦠꦤ꧀ꦱꦪꦔ꧀ꦭꦺꦴꦏꦿꦺꦴꦭꦤ꧀ꦭꦸꦮꦶꦃꦧꦼꦕꦶꦏ꧀ꦢꦸꦮꦼꦭ꧀ꦲꦶꦁꦗꦼꦫꦺꦴꦲꦺꦴꦩꦃ꧉ꦲꦫꦱ꧀ꦲꦫꦱ꧀ꦱꦼꦤ꧀ꦪꦺꦤ꧀ꦏꦼꦠꦼꦩꦸꦮꦺꦴꦁꦪꦺꦤ꧀ꦩꦸꦁꦤꦏꦺꦴꦏ꧀ꦤꦺꦭꦫꦏꦸꦱꦶꦁꦲꦺꦩ꧀ꦧꦸꦃꦲꦶꦱꦩꦫꦶꦲꦥꦲꦺꦴꦫ꧉ꦲꦏꦸꦮꦶꦱ꧀ꦏꦼꦱꦼꦭ꧀ꦲꦶꦁꦢꦺꦴꦚꦲꦶꦏꦶ꧈ꦲꦺꦴꦫꦩꦸꦁꦫꦒꦏꦸꦤꦔꦶꦁꦗꦶꦮꦏꦸꦲꦸꦒꦭꦸꦮꦶꦃꦭꦫ꧉ꦲꦸꦥꦩꦱꦲꦶꦏꦶꦢꦶꦥꦸꦤ꧀ꦝꦸꦠ꧀ꦏꦫꦺꦴꦱꦶꦁꦏꦸꦮꦱꦲꦏꦸꦮꦶꦱ꧀ꦥꦱꦿꦃ꧈ꦥꦱꦿꦃ꧉

꧋ꦩ꧀ꦚꦸꦠ꧀ꦲꦏꦸꦏꦺꦭꦶꦁꦔꦤ꧀ꦧꦥꦏ꧀ꦏꦸꦱ꧀ꦮꦂꦒꦶ꧈꧇ꦥꦔꦥꦸꦤ꧀ꦠꦼꦤ꧀ꦧꦥꦏ꧀ꦏꦸꦭꦢꦺꦫꦺꦁꦢꦢꦺꦴꦱ꧀ꦲꦤꦏ꧀ꦲꦶꦁꦏꦁꦧꦼꦏ꧀ꦠꦶꦩꦭꦃꦠꦤ꧀ꦱꦃꦔꦿꦺꦥꦺꦴꦠ꧀ꦏꦺ꧇꧉ꦲꦏꦸꦤꦔꦶꦱ꧀ꦲꦁꦒꦸꦒꦸꦏ꧀ꦩꦤꦺꦃꦪꦺꦤ꧀ꦔꦺꦭꦶꦁꦔꦶꦏꦸꦕꦶꦮꦤꦺꦧꦥꦭ꧀ꦩꦫꦁꦲꦏꦸ꧉ꦱꦤꦗꦤ꧀ꦲꦺꦴꦫꦏꦮꦼꦠꦸꦤꦔꦶꦁꦥꦤ꧀ꦗꦼꦤꦼꦔꦤꦺꦏꦠꦺꦴꦤ꧀ꦒꦼꦭꦤꦺꦴꦤ꧀ꦠꦺꦴꦤ꧀ꦥꦺꦴꦭꦃꦏꦸꦱꦶꦁꦲꦺꦴꦫꦧꦶꦱꦔꦠꦸꦂꦧ꧀ꦭꦚ꧀ꦗ꧉ꦔꦤ꧀ꦠꦶꦔꦸꦠꦁꦩꦿꦤꦩꦿꦺꦤꦺꦩꦸꦁꦏꦁꦒꦺꦴꦠꦸꦏꦸꦧꦫꦁꦱꦶꦁꦲꦺꦴꦫꦥꦠꦶꦪꦥꦼꦤ꧀ꦠꦶꦁ꧉ꦏꦣꦁꦏꦭꦩꦸꦁꦲꦩ꧀ꦧꦸꦫꦸꦱꦼꦤꦼꦁꦔꦺꦲꦠꦶꦔꦤ꧀ꦠꦶꦲꦺꦴꦫꦏꦿꦱꦲꦼꦤ꧀ꦠꦺꦏ꧀ꦲꦼꦤ꧀ꦠꦺꦏ꧀ꦏꦤ꧀꧈ꦧꦪꦂꦏꦸꦭꦤ꧀ꦧꦪꦂꦫꦺꦧꦺꦴꦗꦺꦴꦏꦸꦏꦠꦸꦠ꧀ꦠꦏ꧀ꦒꦣꦺꦏ꧀ꦤꦺ꧈ꦏꦧꦺꦃꦧꦫꦁꦱꦶꦁꦠꦏ꧀ꦢꦸꦮꦺꦤꦶꦲꦸꦒꦏꦢꦺꦴꦭ꧀꧈ꦤꦱꦢ꧀ꦤꦏꦁꦒꦺꦴꦩꦔꦤ꧀ꦧꦲꦺꦤꦸꦤꦸꦠ꧀ꦮꦺꦴꦁꦠꦸꦮ꧉ꦱꦗꦤꦺꦲꦏꦸꦲꦶꦱꦶꦤ꧀ꦤꦔꦶꦁꦥꦶꦪꦺꦩꦤꦺꦃ꧉

꧋ꦲꦩꦂꦒꦧꦤ꧀ꦠꦼꦂꦫꦺꦥꦶꦏꦶꦂꦧꦤ꧀ꦗꦸꦂꦢꦢꦶꦭꦫꦏꦸ꧉ꦗꦼꦤꦼꦔꦺꦮꦺꦴꦁꦠꦸꦮꦥꦶꦪꦺꦥꦶꦪꦺꦥꦁꦒꦃꦩꦶꦏꦶꦂꦏꦺꦩꦱꦭꦃꦲꦤꦏ꧀꧈ꦩꦱꦶꦪꦩꦱꦭꦃꦏꦸꦮꦶꦱ꧀ꦠꦏ꧀ꦝꦼꦭꦶꦏ꧀ꦏꦺꦏꦤ꧀ꦛꦶꦥꦿꦶꦩ꧀ꦥꦼꦤ꧀ꦤꦔꦶꦁꦱꦸꦮꦺꦱꦸꦮꦺꦮꦺꦴꦁꦠꦸꦮꦲꦸꦒꦏꦿꦱ꧉ꦲꦥꦩꦤꦺꦃꦭꦶꦩꦁꦠꦲꦸꦤ꧀ꦤꦤ꧀ꦲꦶꦏꦶꦲꦏꦸꦩ꧀ꦭꦼꦧꦸꦩꦼꦠꦸꦫꦸꦩꦃꦱꦏꦶꦠ꧀꧈ꦲꦶꦏꦶꦱꦶꦁꦢꦢꦺꦏ꧀ꦤꦺꦧꦥꦏ꧀ꦏꦸꦠꦤ꧀ꦱꦪꦲꦧꦺꦴꦠ꧀ꦥꦼꦁꦒꦭꦶꦃꦲꦺ꧉ꦲꦏꦸꦩꦶꦤꦁꦏꦲꦤꦏ꧀ꦲꦩ꧀ꦧꦉꦥ꧀ꦱꦶꦁꦢꦶꦒꦣꦁꦒꦣꦁꦩꦺꦭꦸꦔꦼꦤ꧀ꦠꦱ꧀ꦲꦣꦶꦲꦣꦶꦏꦸꦏꦺꦴꦏ꧀ꦩꦭꦃꦢꦢꦶꦏꦼꦩ꧀ꦧꦁꦲꦩ꧀ꦧꦺꦤ꧀ꦭꦤ꧀ꦔꦼꦤ꧀ꦠꦺꦏ꧀ꦤꦺꦧꦤ꧀ꦝꦢꦺꦴꦚ꧉ꦲꦺꦴꦩꦃꦭꦒꦶꦩꦢꦼꦒ꧀ꦗꦼꦒꦽꦒ꧀ꦢꦸꦫꦸꦁꦱꦸꦮꦺꦔꦿꦱꦏ꧀ꦤꦺꦔꦶꦪꦸꦥ꧀ꦲꦺꦴꦩꦃꦣꦺꦮꦺꦮꦶꦱ꧀ꦢꦶꦲꦸꦗꦶꦢꦺꦤꦶꦁꦓꦸꦱ꧀ꦠꦶ꧉

꧋ꦧꦥꦏ꧀ꦏꦸꦱꦺꦢꦫꦺꦴꦁꦠꦲꦸꦤ꧀ꦏꦼꦥꦸꦁꦏꦸꦂꦒꦼꦫꦃꦗꦤ꧀ꦠꦸꦁꦢꦢꦏꦤ꧉ꦏꦩꦁꦏꦧꦥꦏ꧀ꦱꦭꦮꦱ꧀ꦱꦺꦲꦫꦂꦁꦒꦼꦫꦃꦭꦤ꧀ꦢꦸꦫꦸꦁꦤꦠꦺꦲꦺꦴꦥ꧀ꦤꦩꦼ꧉ꦔꦤ꧀ꦠꦶꦩꦺꦃꦱꦺꦢꦤꦺꦲꦺꦴꦫꦏꦼꦂꦱꦢꦶꦒꦮꦩꦼꦚꦁꦫꦸꦩꦃꦱꦏꦶꦠ꧀ꦩꦸꦁꦫꦮꦠ꧀ꦗꦭꦤ꧀꧈ ꦭꦤ꧀ꦱꦶꦢꦤꦺꦲꦺꦴꦫꦏꦸꦮꦠ꧀ꦲꦁꦒ꧀ꦭꦮꦠ꧀ꦧꦤ꧀ꦗꦸꦂꦤꦺꦁꦲꦣꦶꦏꦸꦱꦶꦁꦥꦼꦫꦮꦠ꧀ꦢꦶꦱꦫꦤ꧀ꦏꦺꦩ꧀ꦭꦼꦧꦸꦈ꧈ꦒ꧈ꦣ꧉ꦩꦸꦁꦱꦼꦢꦶꦤꦧꦥꦏ꧀ꦔꦶꦤꦼꦥ꧀ ꦈ꧈ꦒ꧈ꦣ꧈ꦧꦥꦏ꧀ꦮꦶꦱ꧀ꦱꦺꦴꦮꦤ꧀ꦩꦫꦁꦓꦸꦱ꧀ꦠꦶꦴꦄꦭ꧀ꦭꦃ꧉ꦲꦏꦸꦱꦶꦁꦫꦸꦩꦁꦱꦥꦭꦶꦁꦏꦢꦺꦴꦱ꧀ꦱꦤꦩꦺꦭꦸꦢꦢꦶꦭꦪꦠ꧀ꦠꦤ꧈ꦱꦼꦩꦥꦸꦠ꧀ꦲꦺꦴꦫꦱꦶꦪꦥ꧀ꦤꦩ꧀ꦥꦏꦚꦠꦤ꧀꧈

꧋꧇ꦫꦶꦤ꧀ ꦩꦿꦺꦤꦺꦪꦣꦶꦭꦸꦠ꧀ ꦒꦼꦤ꧀ꦝꦸꦏ꧀꧇ꦔꦼꦤ꧀ꦢꦶꦏꦤꦺꦲꦶꦧꦸꦧꦸꦲꦩ꧀ꦧꦸꦪꦂꦫꦏꦺꦲꦔꦼꦤ꧀ꦏꦸ꧉

꧋꧇ꦲꦺꦴꦃꦤꦶꦏꦶꦠꦧꦸꦥꦸꦠꦿꦤꦺꦲꦶꦁꦏꦁꦱꦏꦶꦠ꧀?꧇ꦥꦶꦠꦏꦺꦴꦤꦺꦮꦺꦴꦁꦭꦤꦁꦱꦶꦁꦏꦮꦶꦠ꧀ꦩꦲꦸꦔꦼꦤ꧀ꦢꦶꦏꦤ꧀ꦏꦫꦺꦴꦲꦶꦧꦸꦧꦤ꧀ꦗꦸꦂꦚꦼꦝꦏ꧀ꦏꦶꦲꦏꦸꦔꦗꦏ꧀ꦱꦭꦩꦤ꧀꧈ꦱꦗꦤꦺꦲꦏꦸꦮꦼꦒꦃꦪꦺꦤ꧀ꦩꦸꦁꦧꦱꦧꦱꦶꦱꦶꦁꦲꦩ꧀ꦧꦺꦴꦱꦼꦤ꧀ꦏꦺꦔꦺꦤꦺꦲꦶꦏꦶ꧉ꦤꦺꦁꦱꦤ꧀ꦝꦶꦁꦔꦺꦲꦺꦤꦺꦏ꧀ꦱꦼꦥꦼꦣꦩꦺꦴꦠꦺꦴꦂꦭꦮꦱ꧀ꦭꦤ꧀ꦢꦶꦥꦱꦁꦔꦶꦲꦺꦴꦧꦿꦺꦴꦏ꧀ꦲꦶꦱꦶꦠꦺꦴꦩꦠ꧀꧈ꦥꦭꦶꦁꦤꦧꦏꦸꦭ꧀ꦱꦶꦁꦭꦒꦶꦲꦶꦢꦼꦂ꧉ꦤꦔꦶꦁꦏꦺꦴꦏ꧀ꦏꦪ꧀ꦮꦶꦱ꧀ꦏꦼꦤꦭ꧀ꦱꦸꦮꦺꦩꦫꦁꦲꦏꦸ꧈ꦠꦸꦩꦤ꧀ꦢꦸꦏ꧀ꦏꦺꦱꦺꦴꦏ꧀ꦉꦼꦩꦏꦼꦠ꧀ꦚꦸꦩꦢꦸꦭꦸꦂ꧉ꦤꦔꦶꦁꦲꦠꦶꦏꦸꦮꦶꦱ꧀ꦏꦣꦸꦁꦲꦺꦴꦫꦢꦸꦮꦺꦢꦪꦏꦁꦒꦺꦴꦲꦸꦫꦶꦥ꧀꧈ꦢꦢꦶꦲꦺꦴꦫꦧꦶꦱꦲꦩ꧀ꦧꦺꦢꦏ꧀ꦏꦏꦺꦮꦺꦴꦁꦲꦥꦶꦏ꧀ꦲꦥꦮꦺꦴꦁꦲꦭ꧈ꦲꦏꦸꦮꦶꦱ꧀ꦩꦠꦶꦫꦱ꧉

꧋ꦥꦤ꧀ꦗꦼꦤꦼꦔꦤ꧀ꦲꦱ꧀ꦭꦶꦤꦺꦠꦶꦪꦁꦱꦲꦺꦲ꧀ꦭꦺꦴ꧈ꦩ꧀ꦧꦏ꧈ꦥꦸꦫꦸꦤ꧀ꦏꦸꦭꦠꦩ꧀ꦧꦤꦶ?꧇ꦲꦸꦗꦸꦒ꧀ꦲꦸꦗꦸꦒ꧀ꦮꦺꦴꦁꦏꦸꦮꦶꦱꦺꦴꦏ꧀ꦲꦁꦒꦸꦫꦺꦴꦤꦶꦏꦪꦮꦼꦫꦸꦲꦮꦼꦫꦸꦃꦲꦭꦫꦏꦸꦧꦲꦺ꧉ꦲꦏꦸꦢꦶꦥꦤ꧀ꦢꦼꦁꦠꦗꦼꦩ꧀ꦤꦼꦩ꧀ꦧꦸꦱ꧀ꦠꦺꦏꦤ꧀ꦱꦗꦿꦺꦴꦤꦶꦁꦏꦭ꧀ꦧꦸ꧉ꦱꦏ꧀ꦏꦭ꧀ꦩꦼꦁꦏꦺꦴꦫꦺꦴꦒ꧀ꦒꦶꦛꦺꦴꦏ꧀ꦏꦸ꧈ꦲꦏꦸꦧꦤ꧀ꦗꦸꦂꦩ꧀ꦭꦺꦔꦺꦴꦱ꧀ꦔꦶꦥꦠ꧀ꦏꦺꦫꦱꦲꦤꦺꦃꦱꦶꦁꦲꦤ꧀ꦗꦭꦂꦱꦫꦤ꧀ꦢꦸꦤꦺꦲꦮꦏ꧀ꦲꦶꦏꦶ꧉ꦮꦼꦢꦶ꧈ꦲꦁꦒꦸꦩꦸꦤ꧀ ꦒꦼꦛꦶꦁ꧈ꦏꦸꦢꦸꦤꦔꦶꦱ꧀ꦭꦤ꧀ꦏꦸꦩꦸꦢꦸꦩ꧀ꦭꦪꦸꦱꦏꦏꦺꦤꦺ꧉ꦮꦼꦫꦸꦃꦲꦏꦸꦏꦠꦺꦴꦤ꧀ꦧꦶꦔꦸꦁ꧈ꦲꦶꦧꦸꦲꦤ꧀ꦗꦮꦶꦭ꧀ꦲꦏꦸꦏꦫꦺꦴꦲꦩ꧀ꦧꦶꦱꦶꦏ꧀ꦏꦶ꧈꧇ꦮꦶꦱ꧀ꦠꦫꦶꦟ꧀ ꦩꦤꦸꦠꦧꦲꦺ꧉ꦱꦥꦮꦼꦫꦸꦃꦲꦶꦏꦶꦢꦢꦶꦱꦿꦤꦲꦶꦭꦁꦔꦺꦭꦫꦩꦸ꧉ꦒꦼꦭꦼꦩ꧀ꦪ꧈ꦒꦺꦤ꧀ꦝꦸꦏ꧀ ꦨꦶꦱ꧀ꦩꦶꦭ꧀ꦭꦃ꧇꧉

꧋ꦲꦶꦁꦒꦶꦃ꧈ꦩꦁꦒꦏꦼꦂꦱꦲꦶꦧꦸꦩꦮꦺꦴꦤ꧀꧇ꦏꦤ꧀ꦝꦏꦸꦏꦫꦺꦴꦝꦶꦁꦏ꧀ꦏꦸꦏ꧀ꦔꦩ꧀ꦥꦼꦠ꧀ꦱꦏꦧꦺꦃꦲꦺꦫꦱ꧉ꦧꦶꦱꦏꦸꦩꦸꦁꦩꦤꦸꦠ꧀ꦭꦤ꧀ꦥꦱꦿꦃ꧉ꦫꦱꦤꦺꦮꦶꦱ꧀ꦲꦺꦴꦫꦲꦤꦥꦔꦉꦥ꧀ꦲꦉꦥ꧀ꦩꦤꦺꦃ꧉ꦠꦲꦸꦤ꧀ꦤꦤ꧀ꦮꦶꦱ꧀ꦩꦼꦂꦠꦩ꧀ꦧꦩꦿꦤꦩꦽꦤꦺ꧈ꦩ꧀ꦭꦼꦧꦸꦩꦼꦠꦸꦫꦸꦩꦃꦱꦏꦶꦠ꧀꧈ꦲꦺꦴꦫꦏꦸꦫꦁꦏꦸꦫꦁꦫꦒꦢ꧀ꦱꦶꦁꦲꦩ꧀ꦧꦾꦂ꧈ꦲꦸꦥꦩꦢꦶꦲꦶꦠꦸꦁꦮꦶꦱ꧀ꦧꦶꦱꦒꦮꦺꦲꦺꦴꦩꦃꦠꦶꦁꦏꦠ꧀ꦱꦺꦭꦮꦺ꧈ꦤꦔꦶꦁꦭꦫꦏꦸꦲꦺꦴꦫꦱꦸꦢꦩꦭꦃꦠꦤ꧀ꦱꦪꦤꦼꦩꦼꦤ꧀꧈ꦭꦤ꧀ꦱꦶꦁꦥꦭꦶꦁꦤꦩ꧀ꦧꦲꦶꦲꦏꦸꦠꦤ꧀ꦱꦪꦲꦁꦭꦸꦃꦤꦭꦶꦏꦠꦼꦭꦸꦁꦮꦸꦭꦤ꧀ꦮꦶꦔꦶꦢꦿꦶꦗꦶꦱꦶꦏꦶꦭ꧀ꦏꦸꦏꦸꦢꦸꦢꦶꦲꦩ꧀ꦥꦸꦠꦱꦶ꧉ꦢꦺꦴꦚꦏꦸꦏꦪꦮꦶꦱ꧀ꦏꦶꦪꦩꦠ꧀ ꦲꦥꦩꦤꦺꦃꦱꦧꦸꦧꦂꦫꦺꦲꦺꦴꦥꦿꦱꦶꦱꦏꦧꦺꦃꦲꦺꦮꦏ꧀ꦏꦸꦲꦧꦺꦴꦃ꧈ꦮꦼꦠꦼꦁꦏꦸꦒꦺꦣꦶꦏꦪꦮꦺꦴꦁꦩꦼꦠꦼꦁꦱꦔꦁꦮꦸꦭꦤ꧀꧈ꦩꦸꦁꦢꦢꦶꦏꦼꦩ꧀ꦧꦁꦲꦩ꧀ꦧꦺꦤ꧀ꦒꦮꦺꦫꦺꦥꦺꦴꦠ꧀ꦠꦺꦏ꧀ꦏꦸꦮꦂꦒꦏꦸ꧉ꦪꦺꦤ꧀ꦢꦼꦊꦁꦲꦤꦏ꧀ꦲꦤꦏ꧀ꦏꦸꦱꦶꦁꦲꦶꦱꦶꦃꦕꦶꦭꦶꦏ꧀ꦤꦸꦁꦒꦺꦴꦤꦶꦲꦏꦸꦏꦫꦺꦴꦥꦚꦮꦁꦲꦁꦭꦸꦃꦫꦱꦤꦺꦏꦸꦢꦸꦲꦤ꧀ꦗꦼꦫꦶꦠ꧀ꦗꦼꦫꦶꦠ꧀ꦏꦲꦺ꧉ꦲꦸꦩꦸꦂꦏꦸꦭꦒꦶ꧇꧔꧐꧇ꦠꦲꦸꦤ꧀ꦭꦒꦶꦤꦼꦣꦼꦁꦤꦼꦣꦼꦁꦔꦺꦔꦿꦱꦏ꧀ꦤꦺꦒꦸꦩꦼꦧꦾꦂꦢꦺꦴꦚ꧉

꧋꧇ꦤꦶꦏꦶ꧈ꦩ꧀ꦧꦏ꧀ ꦕꦺꦴꦧꦶꦢꦶꦲꦸꦤ꧀ꦗꦸꦏ꧀ꦫꦶꦪꦶꦤ꧀ꦱꦒꦼꦭꦱ꧀ꦩꦮꦺꦴꦤ꧀꧇ꦮꦺꦴꦭꦤꦁꦱꦶꦁꦥꦿꦚꦠꦧꦏꦸꦭ꧀ꦠꦺꦴꦩꦠ꧀ꦏꦸꦮꦶꦔꦸꦭꦸꦁꦏꦺꦒꦼꦭꦱ꧀ꦭꦤ꧀ꦧꦺꦴꦠꦺꦴꦭ꧀ꦲꦶꦱꦶꦧꦚꦸꦥꦸꦠꦶꦃ꧉

꧋꧇ꦤꦥ꧈ꦥꦏ꧀?꧇ꦱꦼꦩꦲꦸꦂꦏꦸꦏꦫꦺꦴꦱꦼꦩꦸꦤꦺꦲꦺꦴꦫꦥꦼꦂꦕꦪ꧉

꧋꧇ꦲꦶꦏꦶꦧꦚꦸꦭꦺꦃꦏꦸꦤ꧀ꦗꦸꦥꦸꦏ꧀ꦤꦺꦁꦥꦮꦺꦴꦤ꧀ ꦠꦿꦸꦱ꧀ꦢꦶꦢꦺꦴꦔꦤꦶꦧꦥꦏꦺꦲꦶꦏꦶ꧉ꦒꦺꦏ꧀ꦗꦗꦭ꧀ꦲꦺꦴꦩ꧀ꦧꦺꦤꦼꦤ꧀ ꦒꦼꦤ꧀ꦝꦸꦏ꧀꧉꧇ꦲꦶꦧꦸꦤꦼꦫꦁꦲꦏꦺꦲꦩꦿꦶꦃꦲꦏꦸꦒꦼꦊꦩ꧀ꦔꦺꦴꦩ꧀ꦧꦺꦧꦚꦸꦏꦸꦮꦶ꧉

꧋ꦱꦢꦸꦫꦸꦁꦔꦺꦧꦚꦸꦤꦺꦁꦒꦼꦭꦱ꧀ꦲꦼꦤ꧀ꦠꦺꦏ꧀ꦠꦏ꧀ꦱꦿꦸꦥꦸꦠ꧀ ꦧꦥꦏꦺꦥꦩꦶꦠ꧀ꦠꦤ꧀ꦭꦤ꧀ꦥꦼꦱꦼꦤ꧀ꦱꦸꦥꦪꦧꦚꦸꦱꦶꦁꦤꦺꦁꦧꦺꦴꦠꦺꦴꦭ꧀ꦫꦺꦴꦁꦭꦶꦠꦼꦂꦱꦼꦠꦼꦔꦃꦲꦶꦏꦶꦏꦸꦢꦸꦠꦏ꧀ꦲꦺꦤ꧀ꦠꦺꦏ꧀ꦤꦺꦱꦢꦸꦫꦸꦁꦔꦺꦩꦥꦤ꧀ꦠꦸꦫꦸꦩꦼꦁꦏꦺꦴꦧꦼꦔꦶ꧉ꦲꦤꦺꦃꦲꦺꦏꦺꦴꦏ꧀ꦭꦒꦶꦠꦏ꧀ꦠꦶꦁꦒꦭ꧀ꦩꦺꦔꦺꦴꦧꦲꦺꦧꦏꦸꦭ꧀ꦠꦺꦴꦩ꧀ꦲꦶꦏꦸꦮꦶꦱ꧀ꦲꦶꦭꦁ꧉ꦥꦿꦚꦠꦲꦶꦧꦸꦏꦸꦪꦩꦺꦭꦸꦲꦁꦒꦸꦩꦸꦤ꧈ꦏꦪꦲꦺꦴꦫꦱꦧꦲꦺꦤꦺ꧉

꧋ꦲꦏꦸꦧꦤ꧀ꦗꦸꦂꦢꦶꦠꦼꦂꦏꦺꦲꦶꦧꦸꦩꦼꦚꦁꦗꦼꦫꦺꦴꦏꦩꦂꦱꦸꦥꦪꦲꦶꦱꦭꦺꦫꦺꦤ꧀ꦭꦤ꧀ꦧꦚꦸꦤꦺꦱꦶꦁꦧꦂꦠꦏ꧀ꦲꦺꦴꦩ꧀ꦧꦺꦩꦿꦱꦸꦏ꧀ꦤꦩ꧀ꦧꦤꦶꦭꦫꦏꦸ꧉ꦲꦶꦧꦸꦧꦤ꧀ꦗꦸꦂꦤ꧀ꦢꦺꦭꦺꦃꦱꦶꦱꦤꦺꦧꦚꦸꦤꦺꦁꦕꦼꦣꦏ꧀ꦥꦠꦸꦫꦺꦴꦤ꧀ꦏꦸ꧉ꦭꦏ꧀ꦭꦼꦱ꧀ꦲꦺꦴꦫꦲꦤ꧀ꦢꦢꦏ꧀ꦲꦶꦠꦸꦁꦔꦤ꧀ꦩꦼꦤꦶꦠ꧀ꦲꦏꦸꦮꦶꦱ꧀ꦲꦺꦴꦫꦲꦺꦭꦶꦁꦲꦥꦲꦥꦩ꧀ꦭꦪꦸꦤꦺꦁꦲꦭꦩ꧀ꦲꦶꦩ꧀ꦥꦺꦤ꧀꧈

꧋ꦲꦶꦁꦱꦗꦿꦺꦴꦤꦶꦁꦲꦶꦩ꧀ꦥꦺꦤ꧀ꦥꦿꦱꦏꦸꦏꦼꦠꦼꦩꦸꦏꦫꦺꦴꦥꦮꦺꦴꦁꦔꦤ꧀ꦗꦸꦧꦃꦥꦸꦠꦶꦃꦲꦶꦁꦱꦠꦼꦔꦃꦲꦺꦢꦭꦤ꧀ꦠꦼꦔꦃꦲꦭꦱ꧀ꦒꦸꦁꦭꦶꦮꦁꦭꦶꦮꦸꦁ꧉ꦲꦶꦁꦔꦶꦩ꧀ꦥꦶꦲꦶꦏꦸꦲꦏꦸꦩ꧀ꦭꦏꦸꦲꦢꦺꦴꦃꦭꦤ꧀ꦤꦭꦶꦏꦏꦿꦱꦏꦼꦱꦼꦭ꧀ꦭꦺꦫꦺꦤ꧀ꦲꦶꦁꦔꦶꦱꦺꦴꦂꦮꦶꦠ꧀ꦏꦁꦭꦒꦶꦔꦽꦩ꧀ꦧꦸꦪꦸꦁ꧉ꦠꦿꦸꦱ꧀ꦢꦶꦥꦫꦤꦶꦲꦏꦶꦲꦏꦶꦗꦸꦧꦃꦥꦸꦠꦶꦃꦭꦤ꧀ꦩꦺꦤꦺꦃꦲꦶꦲꦏꦸꦔꦺꦴꦩ꧀ꦧꦺꦠꦤ꧀ꦥꦚꦸꦮꦫ꧉ꦧꦚꦸꦲꦶꦁꦧꦺꦴꦠꦺꦴꦭ꧀ꦠꦏ꧀ꦠꦩ꧀ꦥꦤꦶꦭꦤ꧀ꦭꦒꦶꦠꦏ꧀ꦲꦺꦴꦩ꧀ꦧꦺꦱꦱꦿꦸꦥꦸꦠ꧀ꦭꦏꦺꦴꦏ꧀ꦲꦏꦶꦲꦏꦶꦩꦲꦸꦩꦸꦱ꧀ꦤ꧉ꦗꦼꦁꦒꦶꦫꦠ꧀ꦲꦏꦸꦠꦔꦶ꧈ꦥꦿꦚꦠꦲꦶꦧꦸꦏꦸꦲꦶꦱꦶꦃꦤꦸꦁꦒꦺꦴꦤꦶꦲꦏꦸꦩꦼꦂꦒꦠꦸꦫꦸꦏꦸꦏ꧀ꦭꦶꦱꦶꦏ꧀ꦏꦤ꧀ꦭꦤ꧀ꦒꦺꦴꦧꦾꦺꦴꦱ꧀꧈ꦲꦮꦏ꧀ꦏꦸꦥꦤꦱ꧀ꦧꦔꦼꦠ꧀ꦢꦶꦏꦺꦴꦩ꧀ꦥꦿꦺꦱ꧀ꦲꦶꦧꦸꦏꦸ꧉ꦮꦼꦠꦼꦁꦏꦸꦩꦸꦊꦱ꧀ꦭꦤ꧀ꦏꦼꦧꦼꦊꦠ꧀ꦥꦶꦥꦶꦱ꧀ꦲꦺꦴꦫꦏꦼꦤꦢꦶꦲꦼꦩ꧀ꦥꦼꦠ꧀꧈

꧋ꦱꦮꦶꦱ꧀ꦱꦺꦢꦶꦠꦼꦂꦤꦺꦲꦶꦧꦸꦠꦼꦏꦤ꧀ꦗꦼꦣꦶꦁ꧈ꦭꦁꦱꦸꦁꦠꦏ꧀ꦧꦿꦺꦴꦭ꧀ꦏꦺꦲꦥꦱꦶꦁꦲꦁꦒꦤ꧀ꦗꦭ꧀ꦲꦶꦁꦮꦼꦠꦼꦁꦏꦸ꧉ꦲꦏꦸꦏꦒꦺꦠ꧀ꦥꦶꦥꦶꦱꦏ꧀ꦏꦸꦏꦺꦴꦏ꧀ꦫꦸꦥꦤꦺꦥꦸꦠꦶꦃꦏꦼꦤ꧀ꦛꦼꦭ꧀ꦱꦼꦩꦸꦩꦸꦤ꧀ꦛꦸꦏ꧀꧈ꦮꦏ꧀ꦏꦸꦮꦶꦱ꧀ꦲꦺꦴꦫꦥꦤꦱ꧀ꦩꦤꦺꦃꦤꦔꦶꦁꦥꦿꦲꦸꦥ꧀ꦥꦤ꧀ꦏꦸꦥꦸꦕꦼꦠ꧀ ꦤꦺꦁꦲꦶꦧꦸꦧꦤ꧀ꦗꦸꦂꦢꦶꦗꦸꦥꦸꦏ꧀ꦤꦺꦧꦚꦸꦱꦶꦱꦤꦺꦩꦲꦸ꧉ꦠꦏ꧀ꦲꦺꦴꦩ꧀ꦧꦺꦒ꧀ꦭꦼꦒꦼꦏ꧀ꦱꦸꦥꦪꦢꦸꦮꦺꦢꦪ꧉ꦩ꧀ꦧꦸꦃꦧꦂꦔꦼꦠꦺꦴꦏ꧀ꦤꦺꦥꦶꦥꦶꦱ꧀ꦱꦶꦁꦲꦺꦴꦫꦱꦧꦲꦺꦤꦺꦩꦲꦸꦫꦱꦤꦺꦲꦺꦴꦠꦺꦴꦠ꧀ꦧꦼꦧꦪꦸꦏꦸꦏꦪꦢꦶꦭꦺꦴꦭꦺꦴꦱ꧀ꦱꦶ꧉ꦲꦏꦸꦧꦤ꧀ꦗꦸꦂꦠꦔꦶꦱ꧀ꦠꦔꦶꦱ꧀ꦱꦤ꧀ꦏꦫꦺꦴꦲꦶꦧꦸꦏꦸ꧉

*******

꧋ꦧꦼꦔꦶꦤꦺꦲꦏꦸꦲꦁꦭꦶꦭꦶꦂꦭꦤ꧀ꦔꦼꦠꦺꦴꦏ꧀ꦤꦺꦧꦚꦸꦥꦶꦥꦶꦱ꧀ꦭꦸꦮꦶꦃꦏꦼꦤ꧀ꦛꦼꦭ꧀ꦱꦏꦲꦮꦤ꧀ꦩꦲꦸ꧉ꦲꦩꦂꦒꦲꦺꦴꦫꦠꦺꦒꦤꦔꦺꦏ꧀ꦤꦺꦧꦺꦴꦗꦺꦴꦏꦸ꧈ꦲꦏꦸꦠꦿꦤ꧀ꦠꦤ꧀ꦤꦤ꧀ꦒꦮꦠꦼꦏꦼꦤ꧀꧈ꦠꦺꦏꦤ꧀ꦗꦼꦣꦺꦴꦁꦲꦩ꧀ꦧꦿꦺꦴꦭ꧀ꦏꦧꦺꦃꦧꦚꦸꦱꦶꦁꦤꦺꦁꦮꦼꦠꦼꦁꦏꦸꦭꦤ꧀ꦫꦱꦤꦺꦩꦿꦶꦥꦠ꧀ꦏꦸꦥꦣꦁꦥꦾꦂ꧉

꧋ꦲꦏꦸꦧꦤ꧀ꦗꦸꦂꦝꦺꦴꦥꦿꦺꦴꦏ꧀ꦤꦺꦁꦝꦶꦁꦏ꧀ꦭꦶꦏ꧀ꦔꦉꦥ꧀ꦗꦼꦣꦶꦁ꧉ꦠꦏ꧀ꦒꦿꦪꦃꦲꦶꦮꦼꦠꦼꦁꦏꦸꦏꦺꦴꦏ꧀ꦏꦼꦩ꧀ꦥꦺꦱ꧀꧈ꦲ꧀ꦭꦺꦴꦱꦶꦏꦶꦭ꧀ꦏꦸꦏꦺꦴꦏ꧀ꦮꦶꦱ꧀ꦲꦺꦴꦫꦲꦧꦺꦴꦃ꧉ꦣꦸꦃꦓꦸꦱ꧀ꦠꦶꦩꦠꦸꦂꦤꦸꦮꦸꦤ꧉ꦏꦫꦺꦴꦔꦢꦼꦒ꧀ꦲꦁꦫꦁꦒꦺꦃꦠꦶꦱꦸꦏꦁꦒꦺꦴꦔꦼꦭꦥ꧀ꦥꦶꦭꦸꦃꦏꦸꦢꦿꦺꦴꦢꦺꦴꦱ꧀ꦱꦤ꧀꧈ꦭꦏꦺꦴꦏ꧀ꦲꦏꦸꦲꦶꦱꦔꦢꦼꦒ꧀ ꦧꦤ꧀ꦗꦸꦂꦗꦸꦩꦁꦏꦃꦲꦭꦺꦴꦤ꧀꧈꧈꧈ꦄꦭ꧀ꦭꦲꦸꦄꦏ꧀ꦧꦂꦲꦏꦸꦲꦶꦱꦩ꧀ꦭꦏꦸꦩꦤꦺꦃ꧉

꧋ꦔꦤ꧀ꦠꦶꦠꦼꦏꦤ꧀ꦏꦩꦂꦲꦏꦸꦲꦶꦱꦩ꧀ꦭꦏꦸꦱꦼꦤꦗꦤ꧀ꦲꦭꦺꦴꦤ꧀ꦲꦺꦴꦫꦔꦁꦒꦺꦴꦠꦼꦏꦼꦤ꧀ꦩꦤꦺꦃ꧉ꦠ꧀ꦧꦿꦸꦏ꧀ꦤꦺꦲꦮꦏ꧀ꦏꦸꦲꦭꦺꦴꦤ꧀ꦲꦶꦁꦏꦱꦸꦂꦏꦸꦮꦠꦶꦂꦲꦩ꧀ꦧꦿꦶꦧꦺꦤꦶꦲꦤꦏ꧀ꦧꦺꦴꦗꦺꦴꦏꦸ꧈ꦲꦏꦸꦩꦼꦉꦩ꧀꧈ꦤꦺꦃ꧉ꦤꦔꦶꦁꦢꦸꦫꦸꦁꦔꦤ꧀ꦠꦶꦱꦱꦼꦂꦫꦤ꧀ꦲꦏꦸꦏꦼꦧꦼꦊꦠ꧀ꦩꦤꦺꦃ꧉ꦲ꧀ꦭꦺꦴꦲ꧀ꦭꦺꦴ꧈꧈꧈꧈ꦲꦏꦸꦏꦼꦱꦸꦱꦸ꧈ꦫꦩꦼꦚꦁꦗꦼꦝꦶꦁꦱꦼꦠꦼꦔꦃꦩ꧀ꦭꦪꦸ꧉ꦠꦠꦼꦏꦤ꧀ꦔꦉꦥ꧀ꦗꦼꦝꦶꦁꦲꦶꦧꦸꦏꦸꦱꦶꦁꦭꦒꦆꦩꦸꦱꦸꦱꦶꦧꦼꦫꦱ꧀ꦔꦤ꧀ꦠꦶꦭꦩꦶꦢꦺꦴꦩ꧀ꦧꦭꦺꦴꦔꦼꦤ꧀ꦭꦤ꧀ꦧ꧀ꦮꦫꦱꦺꦏꦸꦠꦃꦏꦧꦺꦃ꧉ꦲꦶꦧꦸꦧꦤ꧀ꦗꦸꦂꦲꦁꦒꦾꦸꦭ꧀ꦔꦿꦁꦏꦸꦏ꧀ꦲꦏꦸꦏꦫꦺꦴꦧꦼꦔꦺꦴꦏ꧀꧇ꦫꦶꦤ꧈꧈꧈꧈ꦤ꧀ꦝꦸꦏ꧀ꦲꦤꦏ꧀ꦏꦸ!!!꧇꧉

꧋꧇ꦱꦶꦏ꧀ꦧꦸꦏ꧀꧈꧈꧈꧈ꦏꦸꦭꦏꦼꦧꦼꦊꦠ꧀꧇꧉

꧋ꦠꦼꦏꦤ꧀ꦔꦉꦥ꧀ꦗꦣꦶꦁꦮꦶꦱ꧀ꦲꦺꦴꦫꦱꦿꦤ꧀ꦠ꧈ꦲꦩ꧀ꦧꦿꦺꦴꦭ꧀ꦧꦚꦸꦱꦏꦗꦼꦫꦺꦴꦮꦼꦠꦼꦁꦏꦸ꧉ꦒꦿꦺꦴꦗꦺꦴꦒ꧀ꦔꦤ꧀ꦠꦶꦱ꧀ꦮꦫꦤꦺꦏꦪꦧꦚꦸꦢꦶꦱꦸꦤ꧀ꦠꦏ꧀ꦱꦏꦲꦺꦩ꧀ꦧꦺꦂ꧈꧈꧈꧈ꦱꦺꦴꦂ!!ꦮꦼꦂꦤꦤꦺꦏꦪꦧꦚꦸꦏꦸꦩ꧀ꦧꦃꦲꦤ꧀ꦱꦶꦁꦲꦤꦲꦸꦤ꧀ꦛꦸꦏ꧀ꦏꦺ꧉ꦲꦶꦧꦸꦏꦸꦔꦢꦼꦒ꧀ꦏꦩꦶꦠꦼꦁꦒꦼꦔꦼꦤ꧀꧈

꧋ꦲꦺꦴꦫꦏꦿꦱꦧꦺꦴꦗꦺꦴꦏꦫꦺꦴꦲꦤꦏ꧀ꦏꦸꦮꦶꦱ꧀ꦲꦁꦫꦸꦧꦸꦁꦲꦏꦸ꧉ꦧꦚꦸꦥꦶꦥꦶꦱ꧀ꦱꦶꦁꦏꦼꦧꦏ꧀ꦲꦸꦤ꧀ꦛꦸꦏ꧀ꦲꦶꦏꦸꦒꦒꦺꦢꦶꦉꦱꦶꦏ꧀ꦑꦶꦧꦺꦴꦗꦺꦴꦏꦸ꧉ꦲꦤꦺꦃꦲꦺꦏꦺꦴꦏ꧀ꦲꦺꦴꦫꦏꦼꦤ꧀ꦛꦼꦭ꧀ꦢꦢꦶꦲꦺꦴꦫꦲꦩ꧀ ꦧ꧀ꦭꦩ꧀ꦧꦁꦤꦺꦁꦗꦺꦴꦒꦤ꧀ ꧈ꦏꦫꦺꦴꦔꦼꦭꦥ꧀ꦥꦶꦭꦸꦃꦏꦸꦱꦶꦁꦧꦿꦭ꧀ꦧꦿꦺꦴꦭ꧀ꦭꦤ꧀ꦏꦪꦧꦂꦩ꧀ꦭꦪꦸꦲꦢꦺꦴꦃ꧉ꦱꦮꦶꦱꦺꦔꦽꦱꦶꦏ꧀ꦏꦶꦲꦮꦏ꧀ꦏꦸ꧈ꦲꦶꦧꦸꦧꦤ꧀ꦗꦸꦂꦤꦸꦤ꧀ꦠꦸꦤ꧀ꦲꦏꦸꦭꦸꦁꦒꦸꦃꦲꦶꦁꦱꦺꦴꦥ꦳ꦏꦫꦺꦴꦲꦺꦴꦫꦏꦸꦫꦁꦏꦸꦫꦁꦲꦁꦒꦺꦴꦤꦺꦔꦸꦕꦥ꧀ꦱꦸꦏꦸꦂ꧉ꦩꦏ꧀ꦚꦸꦠ꧀ꦧꦤ꧀ꦗꦸꦂꦲꦏꦸꦥꦤ꧀ꦢꦼꦁꦥꦤ꧀ꦢꦼꦁꦔꦤ꧀ꦏꦫꦺꦴꦲꦶꦧꦸꦭꦤ꧀ꦱꦼꦥꦺꦴꦤ꧀ꦠꦤ꧀ꦩꦸꦤꦶꦧꦉꦁ꧈꧇ꦧꦏꦸꦭ꧀ꦠꦺꦴꦩꦠ꧀꧇꧉

꧋ꦱꦺꦱꦸꦏ꧀ꦏꦺꦲꦏꦸꦧꦤ꧀ꦗꦸꦂꦭꦠꦶꦪꦤ꧀ꦩꦼꦠꦸꦱꦏꦲꦺꦴꦩꦃꦢꦶꦏꦤ꧀ꦕꦤꦶꦲꦶꦧꦸꦏꦸ꧉ꦲꦺꦴꦫꦏꦿꦱꦩ꧀ꦭꦏꦸꦏꦸꦠꦼꦏꦤ꧀ꦫꦠꦤ꧀ꦚꦒ꧀ꦚꦒ꧀ꦏꦪꦲꦺꦴꦫꦭꦫꦏꦲꦺ꧉ꦏꦩꦁꦏꦮꦶꦔꦶꦲꦶꦱꦶꦃꦲꦶꦁꦣꦸꦮꦸꦂꦏꦸꦂꦱꦶꦫꦺꦴꦣ꧈ꦔꦢꦺꦒ꧀ꦧꦲꦺꦏꦸꦢꦸꦔꦁꦒꦺꦴꦠꦼꦏꦼꦤ꧀꧈ꦠꦁꦒꦠꦼꦥꦫꦺꦴꦧꦤ꧀ꦗꦶꦸꦂꦔꦿꦸꦧꦸꦁꦔꦼꦂꦠꦏ꧀ꦤꦺꦏꦧꦺꦃꦥꦣꦒꦸꦩꦸꦤ꧀꧈ꦧꦤ꧀ꦗꦸꦂꦲꦶꦧꦸꦏꦸꦕꦿꦶꦠꦭꦤ꧀ꦠꦏꦺꦴꦤꦠꦁꦒꦠꦼꦥꦫꦺꦴꦲꦥꦮꦶꦔꦶꦮꦼꦫꦸꦃꦧꦏꦸꦭ꧀ꦠꦺꦴꦩꦠ꧀ꦱꦶꦁꦲꦶꦢꦼꦂꦲꦸꦢꦏꦫꦗꦩ꧀ꦱꦼꦮꦼꦭꦱ꧀ꦲꦮꦤ꧀꧈ꦲꦤꦺꦲꦺꦏꦧꦺꦃꦧ꧀ꦭꦱ꧀ꦲꦺꦴꦫꦲꦤꦱꦶꦁꦮꦼꦫꦸꦃ꧉ꦏꦩꦁꦏꦤꦺꦏ꧀ꦲꦏ꧀ꦧꦏꦸꦭ꧀ꦲꦶꦢꦼꦂꦫꦤ꧀ꦩꦸꦫꦃꦩꦼꦱ꧀ꦛꦶꦲꦶꦧꦸꦲꦶꦧꦸꦤꦺꦁꦏꦩ꧀ꦥꦸꦁꦃꦲꦺꦴꦫꦏꦼꦠꦶꦁꦒꦭ꧀ꦭꦤ꧀꧈ꦲꦏꦸꦩꦸꦁꦥꦤ꧀ꦢꦼꦁꦥꦤ꧀ꦢꦼꦁꦔꦤ꧀ꦏꦫꦺꦴꦲꦶꦧꦸꦭꦤ꧀ꦫꦱꦤꦺꦩꦿꦶꦤ꧀ꦢꦶꦁꦧꦔꦼꦠ꧀꧈ꦄꦭ꧀ꦭꦲꦸꦄꦏ꧀ꦧꦂ꧉

 

*******

꧋ꦩꦢꦶꦪꦸꦤ꧀ ꧇꧑꧔꧇ꦩꦺꦲꦶ꧇꧒꧐꧒꧒꧇꧉

꧋ꦮꦶꦱ꧀ꦤꦠꦺꦏꦥꦕꦏ꧀ꦲꦶꦁꦭꦺꦤ꧀ꦱꦱꦱ꧀ꦠꦿ꧉

https://lensasastra.id/2022/07/30/bakul-tomat-nyalawadi/

 

 

Leave a Reply

Your email address will not be published. Required fields are marked *